Awa, akusinjalo. UDeveli akhenge athi u-Eva nakangadla umuthi uZimu athe angadli kiwo, uzokufa, bese kuthi ingcenye engabonakaliko yomzimbakhe (abanye namhlanjesi bathi lokho mphefumulo ongafiko) izokuphila endaweni ethileko. Asebenzisa ingilozi, uSathana wathi u-Eva nakangadla isithelo somuthi ‘ngeze afa.’ Bekatjho ukuthi uzokuragela phambili aphila kamnandi ephasini, angalawulwa mthetho kaZimu.—Gen. 2:17; 3:3-5.

Nangabe ifundiso yamala yokungafi komphefumulo efundiswa namhlanjesi akhenge ivele e-Edeni, yavela nini? Asiqiniseki. Esikwaziko kukuthi ukulotjha kwamala kwapheliswa ngomthwalela wangesikhathi sakaNowa. Azikho iimfundiso zeenkolo zamala ezasala, kodwana kwasala uNowa nomndenakhe, abantu abalotjha uJehova ngeqiniso.

Lokhu kwenza bona sicabange ukuthi kungenzeka ifundiso yomphefumulo ongafiko kungenzeka yavela ngemva komthwalela. UZimu nakararanisa amalimi eBhabheli, abantu basabalala ‘iphasi loke,’ ngungenzeka babanombono wokuthi abantu banomphefumulo ongafiko. (Gen. 11:8, 9) Kungakhathaliseki bona ifundiso le yathoma nini, singaqiniseka ngokuthi ‘uyihlo wamala,’ uSathana uDeveli, nguye obekaphehla indaba le begodu kwamthabisa ukuyibona izala iphasi lokeli.—Jwa. 8:44.