1. Abantu abanengi bawuqala njani umsebenzi?

ABANTU bawuqala njani umsebenzi endaweni ohlala kiyo? Eenarheni ezinengi, abantu basebenza budisi begodu basebenza ama-awara amanengi. Abantu abasebenza budisi ngokujayelekileko bahlala bamajadu abanaso isikhathi sokuphumula, sokubanemindenabo namkha sokufunda ngoZimu. (UMtj. 2:23) Ngakelinye ihlangothi, abanye abantu abafuni ukusebenza banjalo nje babeka amabanga angazwakaliko wokuthi kubayini bangafuni ukusebenza.—IzA. 26:13, 14.

2-3. Ngiziphi iimbonelo ezabekwa nguJehova noJesu malungana nokusebenza?

² Ngokungafani nendlela iphasi eliqala ngayo umsebenzi, akhesihlole bona uJehova noJesu bawuqala njani. Akunakuzaza ukuthi uJehova uyakuthanda ukusebenza. UJesu wakwenza kwakhanya lokho nakathi: “UBaba usolo asebenza bekube nje, nami ngisolo ngisebenza.” (Jwa. 5:17) Cabanga ngawo woke umsebenzi uZimu awenzileko nakadala iingilozi, iinkwekwezi kunye namaplanethi. Nathi siyabubona ubufakazi bomsebenzi kaZimu ephasina. Umrhubi wathi: “Maye, minengi kangangani imisebenzakho Somnini! Yoke uyenze ngokuhlakanipha; iphasi ligcwele umnothwakho.”—Rhu. 104:24.

³ UJesu walingisa uYise. INdodana, ekuhlakanipha, yaba nesandla uZimu “najamisa amazulu.” BeyinoJehova ‘ingusosino.’ (IzA. 8:27-31) Kwathi lokha uJesu nakasephasina, wenza imisebenzi ebabazekako. Umsebenzi bewufana nokudla kuye, begodu koke akwenzako kwatjengisa bona bekathunywe nguZimu.—Jwa. 4:34; 5:36; 14:10.

4. Khuyini esingakufunda kuJehova noJesu malungana nokuphumula?

⁴ Kghani iimbonelo ezabekwa nguJehova noJesu malungana nokusebenza zitjho bona akukafuzi siphumule? Awa,  akusinjalo. UJehova akadinwa, yeke akatlhogi ukuphumula njengathi. IBhayibheli liyatjho bona ngemva kokudala amazulu nephasi uJehova ‘waphumula, waqabuleka.’ (Eks. 31:17) Nanyana kunjalo, kuyakhanya ukuthi uJehova wajama kancani, waqala umsebenzakhe begodu waneliseka ngawo. Nanyana uJesu bekasebenza budisi nakasephasina, wabanesikhathi sokuphumula nesokuzithabisa nabangani bakhe.—Mat. 14:13; Luk. 7:34.

5. Abantu abanengi baqalana nabuphi ubudisi?

⁵ IBhayibheli likhuthaza iinkhonzi zakaZimu ukuthi zikuthande ukusebenza. Yeke, kufuze zikhuthale zingabi mavila. (IzA. 15:19) Kungenzeka uyasebenza bona utlhogomele umndenakho. Boke abalandeli bakaKrestu kufuze batjhumayele iindaba ezimnandi. Nanyana kunjalo, sitlhoga ukuphumula ngokwaneleko. Kghani ukufumana kubudisi ngezinye iinkhathi ukuhlela kuhle isikhathi sokwenza umsebenzi wokuziphilisa, ukutjhumayela kunye nesokuphumula? Sazi njani bona kufuze sisebenze isikhathi esingangani nokuthi kufuze siphumule isikhathi esingangani?

6. UMarkosi 6:30-34, utjengisa njani ukuthi uJesu bekanombono ofaneleko ngokusebenza kunye nokuphumula?

⁶ Nakuziwa emsebenzini, kuqakathekile ukuba nombono ofaneleko. IKosi uSolomoni yaphefumulelwa bona itlole ithi: “Yoke into inesikhathi ebekelwe sona” Yakhuluma ngokutjala, ukwakha, ukulila, ukuhleka, ukujida nezinye izinto. (UMtj. 3:1-8) Kuyakhanya ukuthi kunezinto ezimbili eziqakathekileko ekuphileni komuntu, izintwezo msebenzi nokuphumula. UJesu bekanombono ofaneleko malungana nomsebenzi kunye nokuphumula. Kesinye isenzakalo, abapostoli bebadiniwe ngombana bebamajadu ngelangelo batjhumayela. Akhenge babenesikhathi “sokuphumula ngitjho nesokudla.” Yeke uJesu wathi kibo: “Nambani sikhambe siye endaweni enganabantu niyokuphumula kancani.” (Funda uMarkosi 6:30-34.) Nanyana uJesu nabafundi bakhe bebangasifumani kuhle isikhathi sokuphumula ngendlela abafuna ngayo, kodwana bekazi ukuthi bayakutlhoga ukuphumula.

7. Ukucabangisisa ngomThetho weSabatha kungasisiza njani?

⁷ Ngezinye iinkhathi, siyakutlhoga ukubetjhwa mumoya begodu siphumule. Lokho singakubona elungiselelweni eliqakathekileko uZimu alenzela abantu bakhe bekadeni, ilungiselelwelo belaziwa ngokuthi yiSabatha laqobe veke. Nanyana singekho ngaphasi komThetho kaMosi kodwana singafunda kilokho okutjhiwo liSabatha. Esikufunda kilo kungasisiza sicabangisise ngombonwethu malungana nomsebenzi nokuphumula.

8. Ngokomtlolo ka-Eksodusi 31:12-15, iSabatha bekulilanga lani?

⁸ IliZwi lakaZimu lithi ngelanga lekhomba uZimu gade sekawuqedile umsebenzakhe, yeke waphumula. (Gen. 2:2) Nanyana kunjalo, uJehova uyakuthanda ukusebenza, ngamanye amezwi ‘usasebenza bekube nje.’ (Jwa. 5:17) Ilungiselelo leSabatha laqobe veke lifana nelanga lakaJehova lokuphumula okukhulunywa ngalo kuGenesise. UZimu wathi iSabatha belilitshwayo hlangana kwakhe nama-Israyeli. Bekulilanga . . . , “elihlukaniselweko nelicwengileko kuSomnini.” (Funda u-Eksodusi 31:12-15.) Woke umuntu bekangakavumeleki bona angasebenza, lokhu kufaka hlangana abantwana, iingqila ngitjho  neenlwana. (Eks. 20:10) Ilangeli belinikela abantu ithuba lokufunda ngoZimu.

9. Ngimuphi umbono ongakafaneli ngeSabatha ebewukhona ngesikhathi sakaJesu?

⁹ Ilanga leSabatha belilihle ebantwini bakaZimu, nanyana kunjalo abadosiphambili bekolo abanengi ngesikhathi sakaJesu beza nemithetho eqinileko ngendlela ekufanele uqalwe ngayo umthetho weSabatha. Bebathi bekungasi ngokomthetho bona abantu bakhe iinqwambi zekoroyi namkha kulatjhwe umuntu ogulako ngeSabatha. (Mar. 2:23-27; 3:2-5) Imibono enjalo beyingaveli kuZimu begodu noJesu wakwenza kwakhanya lokho kilabo ebebamlalela.

10. Encwadini kaMatewu 12:9-12, sifundani ngendlela uJesu ebekaqala ngayo iSabatha?

¹⁰ UJesu nabalandeli bakhe abamaJuda baphumula ngeSabatha ngombana bebalalela umThetho kaMosi. * UJesu watjengisa ngamezwi nangezenzo ukuthi bekungasikumbi ukwenzela abanye izinto ezihle nokubasiza ngelanga leSabatha. Wathi, “Yeke kusemthethweni ukwenza okuhle ngeSabatha.” (Funda uMatewu 12:9-12.) Akhenge acabange ukuthi kukuphula umthetho ukwenzela abantu izinto ezihle ngeSabatha. Kunalokho, izenzo zakhe zatjengisa ukuqakatheka kweSabatha. Ngebanga lokuthi abantu bakaZimu bebaphumula emisebenzinabo, bebakghona ukulotjha uZimu. UJesu wakhulela emndenini ebewusebenzisa ilanga leSabatha bona ulotjhe uZimu. Lokho sikubona ngokufunda ngezinto  azenzako nakasekhabo eNazaretha: “Njengokujayelekileko ngelanga leSabatha, wangena ngesinagogeni wajama bona afunde.”—Luk. 4:15-19.

11. Ngubani owabekela uJesu isibonelo esihle sokusebenza?

¹¹ UJosefa bekanombono kaZimu ngomsebenzi ngombana wafundisa uJesu ukuba mbazi. (Mat. 13:55, 56) UJesu bekambona qobe lilanga uJosefa nakasebenza budisi bona atlhogomele umndenakhe omkhulu. Ngemva kwesikhathi, uJesu watjela abafundi bakhe, wathi: “Isisebenzi sifanelwe mrholwaso.” (Luk. 10:7) Kuyakhanya ukuthi uJesu bekakwazi ukusebenza budisi.

12. Ngimiphi imitlolo esitjengisa ukuthi lithini iBhayibheli ngokusebenza budisi?

¹² Nompostoli uPowula bekakwazi ukusebenza budisi. Umsebenzakhe ebewuphuma phambili bekukufundisa abanye ngoJesu nangalokho uJesu akufundisako. Nokho, uPowula bekanawo umsebenzi wokuziphilisa. Abantu beThesalonika bebakwazi ukusebenza kwakhe ‘budisi nokuzikhandla kwakhe, bekasebenza ubusuku nemini’ bona ‘angathwesi nanyana ngubani wabo umthwalo obudisi.’ (2 Thes. 3:8; IzE. 20:34, 35) UPowula nakakhuluma ngomsebenzakhe, kungenzeka bekatjho umsebenzi wokwenza amatende. NakaseKorinte, bekahlala no-Akhwila noPeresila begodu “wasebenza nabo, ngombana umsebenzabo bekukukwenza amatende.” Ukuthi uPowula wasebenza “imini nobusuku” akutjho ukuthi akhenge aphumule. Nakulilanga leSabatha bekaphumula. Ngelangelo bekasebenzisa ithuba alifumanako bona atjhumayeze amaJuda ebewangasebenzi ngelanga leSabatha.—IzE. 13:14-16, 42-44; 16:13; 18:1-4.

13. Khuyini esingayifunda esibonelweni sakaPowula?

¹³ Umpostoli uPowula wabeka isibonelo esihle. Bekufuze bona asebenze, nanyana kunjalo, bekaqiniseka ngokuthi uhlanganyela ngokuzeleko “emsebenzini ocwengileko weendaba ezimnandi zakaZimu.” (Rom. 15:16; 2 Kor. 11:23) Wakhuthaza nabanye bona benze okufanako. U-Akhwila noPeresila ‘bebaziinsebenzi ezikunye naye kuKrestu Jesu.’ (Rom. 12:11; 16:3) UPowula wabawa abantu beKorinte bona “bahlale banokunengi kokukwenza emsebenzini weKosi.” (1 Kor. 15:58; 2 Kor. 9:8) UJehova waphefumulela umpostoli uPowula bona atlole: “Nangabe umuntu akafuni ukusebenza, nokudla angadli.”—2 Thes. 3:10.

14. UJesu bekatjho ukuthini nakakhuluma amezwi akuJwanisi 14:12?

¹⁴ Umsebenzi oqakatheke khulu emihleni yokuphela le, msebenzi wokutjhumayela nokwenza abafundi. Ekhabolakhona, uJesu watjela abafundi bakhe ukuthi bazokwenza imisebenzi eminengi ukudlula yakhe! (Funda uJwanisi 14:12.) Akhenge atjho ukuthi bazokwenza imikarisomiraro njengaye. Kunalokho, bekatjho ukuthi bazokutjhumayela abantu abanengi, eendaweni ezinengi, isikhathi eside ukudlula sakhe.

15. Ngimiphi imibuzo ekufuze sizibuze yona begodu kubayini?

¹⁵ Nangabe uyasebenza, zibuze imibuzo nasi: Emsebenzini kghani ngaziwa njengomuntu osebenza budisi? Ngiwuqeda ngesikhathi umsebenzami begodu ngiwenza kuhle?’ Nangabe iimpendulo zakho ngu-iye, kungenzeka umqatjhakho akuthembe. Lokho kungenza ukuthi abantu osebenza nabo bafune ukulalela iindaba ezimnandi. Nakuziwa emsebenzini wokutjhumayela nokufundisa, zibuze imibuzo nasi: ‘Kghani ngaziwa njengomuntu osebenza budisi esimini? Kghani ngilungiselela kuhle ngaphambi  kokuyokutjhumayela ekukhambeleni kokuthoma? Ngibuyela ngokurhabako ebantwini abatjengise ikareko? Ngizibandakanya qobe kiyo yoke imisebenzi ehlukahlukeneko esimini? Nangabe uphendule ngo-iye, uzowuthabela umsebenzakho wokutjhumayela.

16. UJesu nabapostoli bebakuqala njani ukuphumula, begodu lokho kuhluke njani endleleni abantu abakuqala ngayo ukuphumula namhlanjesi?

¹⁶ UJesu bekazi ukuthi ngezinye iinkhathi yena nabapostoli bebasitlhoga isikhathi sokuphumula. Nanyana kunjalo, abantu ebebaphila ngesikhathi sakhe nabantu abaphila nje bangafaniswa nendoda enjingileko esemfanekisweni kaJesu. Indoda le yazitjela yathi: “Zigedle, udle, usele, uzithabise.” (Lukasi 12:19; 2 Thimothi 3:4) Yacabanga ukuthi izinto eziqakatheke khulu ekuphileni, kuphumula nokuzithabisa. Ngokungafaniko, uJesu nabapostoli akhenge bazithabise bona.

17. Sisisebenzisa njani isikhathi sokuphumula esisifumana emsebenzini?

¹⁷ Namhlanjesi silingisa uJesu ngokusebenzisa isikhathi sethu sokuphumula esisifumene emsebenzini ngokuthi sitjhumayele begodu siye nemihlanganweni yobuKrestu. Kuhlekhule, umsebenzi wokwenza abafundi nokuya esifundweni siwuqala njengokuqakatheke khulu begodu senza koke esingakwenza bona sihlanganyele ngokuzeleko emisebenzini ecwengileko le. (Heb. 10:24, 25) Ngitjho nalokha nasisevakatjhweni, sihlala senza imisebenzethu yobukrestu njengokuya esifundweni begodu sifuna amathuba wokutjhumayeza boke esihlangana nabo.—2 Thim. 4:2.

18. Khuyini iKosethu uJesu Krestu efuna bona siyenze?

¹⁸ Kusithabisa khulu ukwazi ukuthi iKosethu uJesu Krestu ayilindeli bona senze okungaphezu kwamandlethu begodu lokho kusisiza bona sibe nombono ofaneleko malungana nokuphumula nokusebenza! (Heb. 4:15) Ifuna siphumule ngendlela efaneleko. Godu ifuna bona sisebenze budisi bona sikghone ukuzitlhogomela besihlanganyele emsebenzini othabisako wokwenza abafundi. Esihlokweni esilandelako, sizokufunda ngendima edlalwa nguJesu ekusitjhaphululeni ebugqilini nekuphathweni ngelunya.