Ngebanga lokulandisa okukuDuteronomi 22:25-27 indoda eyenze isenzwesi beyiqalwa njengendoda emlandu. Umthetho bewudzimelele ekuvezeni ubumsulwa betlawu. Akhesicabangisise ngommongo wendaba le.

Amavesi angaphambili akhuluma ngendoda etjhinga emabhayini nomfazi othenjiswe umtjhado ‘edorobheni.’ Ukwenza lokho, kwamenza waba nomlandu wokufeba njengombana umfazi lo bekaqalwa njengotjhadileko. Kuthiwani ngomfazi lo? ‘Azange arhuwelele.’ Ngathana warhuwelela, abanye bebazomuzwa bamsize. Kodwana akhenge arhuwelele. Ngaphezu kwalokho, naye waba nesandla ebufebeni obenziwako, yeke bobabili bahlulelwa ngokuba mlandu.—Dut. 22:23, 24.

Umthetho lo waveza obunye ubujamo obuhlukileko: “Kodwana nakube kusemmangweni, indoda ihlangane nomntazana oboniweko bese iyamgagadlhela, yindoda leyo kwaphela ezakubulawa. Nakulitlawelo lona ningalenzi litho. Itlawu alinamlandu wesibetho sokufa. Umlandu onje ufana nowalokha umuntu nasahlele bewabulala omunye umuntu. Ngombana uliragelele emmangweni; nanyana itlawu eliboniwekwelo lirhuwelele libawa isizo azange kube nomuntu olisizako.”—Dut. 22:25-27.

Ebujamwenobo abahluleli bebakholelwa ubufakazi bomfazi. Kubayini? Bekukholelwa ukuthi ‘urhuwelele wabawa isizo [kodwana] azange kube nomuntu omsizako.’ Ngebanga lokuthi indoda le ‘imragelele emmangweni’ ifunyenwe inomlandu wokukata umuntu othenjiswe umtjhado nomlandu wokufeba.

Ngitjho nanyana umthetho lo bewudzimelele ebumsulweni bomfazi, ukulandisokhu kwakuveza kuhle ukuthi indoda le inomlandu wokufeba nokukata. Singaqiniseka ngokuthi abahluleli ‘babuzisisa kuhle’ begodu benza isiqunto esisekelwe eenkambisweni uZimu aziveza ngokukhanyako nangokubuyelelweko emitlolweni.—Dut. 13:14; 17:4; Eks. 20:14.