1. Ikulumo eyabekwa emhlanganweni ka-1935 yaba namuphi umthelela esokaneni elithileko?

 ISOKANA elinye belineminyaka eli-18 nalibhajadiswako ngo-1926. Ababelethi balo bebabafundi beBhayibheli, ebekuligama aboFakazi bakaJehova ebebabizwa ngalo ngesikhatheso. Bebanamadodana amathathu namadodakazi amabili, abawakhulisa ukuthi alotjhe uJehova bekalingise noKrestu. Njengombana bekujayelekile ngabafundi beBhayibheli bangesikhatheso, isokaneli nalo belihlanganyela ekudleni isikwa belisele newayini esiDlweni seKosi saNtambama. Nanyana kunjalo ithemba lalo latjhuguluka nalizwa ikulumo eqakathekileko enesihloko esithi, “Isiqubuthu Esikhulu.” Ikulumo le, yabekwa nguJ. F. Rutherford ngo-1935 emhlanganweni ebewuse Washington, D.C., e-U.S.A. Khuyini okwafundwa bafundi beBhayibheli emhlanganweni lo?

2. Ngiliphi iqiniso elavela ekulumweni kamFowethu uRutherford?

² Ekulumwenakhe umFowethu uRutherford waveza ukuthi bonani abenziwa ‘liwoma elikhulu’ (KJ) namkha “isiqubuthu esikhulu” okukhulunywa ngaso kusAmbulo 7:9. Bekufikele ngesikhatheso, bekucatjangwa ukuthi basigaba sesibili salabo abanokholwa okuncani esizokutjhinga ezulwini. UmFowethu uRutherford wasebenzisa imitlolo ukuhlathulula ukuthi isiqubuthu esikhulu asiyokuphila ezulwini, kunalokho singezinye izimvu  zakaKrestu * eziyokusinda “esizini elikhulu” besiphile ngokungapheliko ephasini. (IsAm. 7:14) UJesu wathi, “Nginezinye izimvu ezingasizo zesibayesi; nazo kufuze ngizingenise, zizolilalela ilizwi lami, begodu zizokuba mhlambi munye, nomelusi munye.” (Jwa. 10:16) Laba abafaniswa nezimvu ngabanye aboFakazi bakaJehova abathembekileko abanethemba lokuphila ephasini epharadesi. (Mat. 25:31-33, 46) Akhesibone ukuthi iqinisweli latjhugulula amaphilo amanengi wabantu bakaJehova ngayiphi indlela, kuhlanganise nomfowethu loya oneminyaka eli-18.—Rhu. 97:11; IzA. 4:18.

3-4. Emhlanganweni womnyaka ka-1935, khuyini abanengi abayizwisisako ngethemba labo begodu kubayini?

³ Kwaba mhlangano othabisa khulu lokha isikhulumi nasibawa iinlaleli sithi, “Boke abanethemba lokuphila ephasini isiphelani, bangasikima?” Umfowethu obekakhona emhlanganweni loyo uthi, wabona isiquntu seenlaleli ezingaba zii-20 000 sisikima. Ngemva kwalokho umfowethu uRutherford wathi “Qalani! Iwoma elikhulu.” Lokho kwalandelwa kukuthi kuwahlwe izandla ngethabo. Ebebajamile balemuka ukuthi abakakhethelwa ukuyokuphila ezulwini nokuthi abakakhethwa mmoya kaZimu. Ngelanga elilandelako lomhlangano kwabhajadiswa aboFakazi abama-840. Inengi labo bekungezinye izimvu.

⁴ Ngemva kwekulumo leyo, umfowethu esikhulume ngaye loya ekuthomeni nabanengi balisa ukudla isikwa nokusela iwayini eSidlweni seKosi saNtambama. Omunye umfowethu wakhulumela abanengi nakathi, “Ngadla kokugqina esiKhumbuzweni saka-1935 ngebanga lokuthi ngalemuka bona benginganalo ithemba kokuphila ezulwini. UJehova bekangakangizesi ngommoyakhe, kunalokho benginethemba lokuphila ephasini nekulenzeni ipharadesi.” (Rom. 8:16, 17; 2 Kor. 1:21, 22) Kusukela ngaleso sikhathi isiqubuthu esikhulu besisolo sanda begodu sisebenza eduze nalabo abaseleko abazesiweko. *

5. UJehova ubaqala njani abantu abalisa ukudla iimfanekiselo esiKhumbuzweni?

⁵ UJehova wabaqala njani labo abalisa ukudla iimfanekiselo esiKhumbuzweni sangemva kwaka-1935? Begodu kuthiwani nangabe umKrestu obhajadisiweko namhlanjesi udla iimfanekiso kuthi ngemva kwalokho alemuke ukuthi akakazeswa? (1 Kor. 11:28) Abanye bebadla iimfanekiselo ngombana bebangazwisisi ithemba abanalo. Kodwana nangabe bayayivuma imitjhaphwabo bese bayalisa ukudla iimfanekiselo bebaragele phambili nokulotjha uJehova, uyabamukela njengezinye izimvu. Nanyana bangasazidli iimfanekiselo, basaragela phambili baya esiKhumbuzweni ngombana bayasithokozela isipho uJehova noJesu ababenzele sona.

6. UJesu uyale iingilozi bona zenzeni?

⁶ Isizi elikhulu liseduze, kungasikhuthaza ukubuyekeza incwadi yesAmbulo isahluko 7 njengombana ikhuluma ngamaKrestu azesiweko nesiqubuthu esikhulu sezinye izimvu. UJesu uyale iingilozi bona ziragele phambili zibambe imimoya emine etjhabalalisako. Iingilozezi akukafuzi ziyilise imimoya emine le bekube kula woke amaKrestu azesiweko abekwa itshwayo, okutjho ukwamukelwa nguJehova. (IsAm. 7:1-4) Njengomvuzo wokuthembeka kwabo, abafowabo bakaKrestu abazesiwekwaba bazokuba makhosi nabaphristi ezulwini. (IsAm. 20:6) Boke abayingcenye yomndeni kaZimu wezulwini bazokuthabela ukubona abazesiweko abazii-144 000 bafumana umvuzwabo wokuyokuphila ezulwini.

7. Njengombana kuhlathululwe kusAmbulo 7:9, 10 ngubani uJwanisi ambona embonweni begodu bekenzani? (Qala isithombe esingaphandle.)

⁷ Ngemva kokubona amakhosi nabaphristi abayi-144 000 uJwanisi wabona okhunye okukarisako bewabona “isiqubuthu esikhulu” esisinde ku-Arimagedoni. Isiqubuthwesi sihlukile kilesi asibone ekuthomeni, lesi sikhulu begodu akunasibalo esibekiweko. (Funda isAmbulo 7:9, 10.) Simbethe “iimphuraphura ezimhlophe” ezitjengisa bona sahlala ‘singanabala’ ephasini lakaSathana besathembeka kuZimu nakaKrestu. (Jak. 1:27) Sarhuwelela sithi sisinde ngebanga lalokho uJehova noJesu iMvu kaZimu esenzela khona. Ngesikhatheso besiphethe iimpande zomuthi wesundu okutjengisa bona sithabile begodu siyalemuka bona uJesu uyiKosi yombuso kaJehova.—Madanisa noJwanisi 12:12, 13.

8. IsAmbulo 7:11, 12, sisitjelani ngomndeni kaJehova wezulwini?

⁸ Funda isAmbulo 7:11, 12. Kwenzekani kilabo abasezulwini nababona isiqubuthu esikhulu? UJwanisi ubona woke umndeni kaJehova wezulwini uthabile njengombana kufika isiqubuthu esikhulu besidumisa noZimu. Umndeni kaJehova wezulwini uzokuthaba khulu nawubona ukuzaliseka kombono lo ngesikhathi isiqubuthu esikhulu sisinda ngemva kwesizi elikhulu.

9. Ngokuya ngesAmbulo 7:13-15, senzani njenganje isiqubuthu esikhulu?

⁹ Funda isAmbulo 7:13-15. UJwanisi wabika bona isiqubuthu esikhulu ‘sihlanza iimphuraphura zaso, sazenza zaba mhlophe ngeengazi zeMvana.’ Lokho kutjengisa bona sinonembeza ohlanzekileko phambi kwakaJehova. (Isa. 1:18) Sizinikele begodu simaKrestu abhajadisiweko. Siyakholwa emhlatjelweni kaJesu besinobuhlobo noJehova. (Jwa. 3:36; 1 Pit. 3:21) Ngikho sikulungele ukujama phambi kwesihlalo sobukhosi sakaZimu simenzela “umsebenzi ocwengileko ubusuku nemini” ephasinapha. Sikhuluma nje sikhuthele emsebenzini wokutjhumayela ngomBuso nokwenza abafundi. Sibeka umBuso qangi kunalokho okufunwa ngiso.—Mat. 6:33; 24:14; 28:19, 20.

10. (a) Khuyini isiqubuthu esikhulu esiqiniseka ngakho? (b) Ngikuphi isiqubuthu esikhulu esizokubona kuzaliseka?

¹⁰ Isiqubuthu esikhulu esisinde esizini elikhulu siyaqiniseka bona uZimu uzokuhlala asitlhogomela ngombana ‘loyo ohlezi esihlalweni sobukhosi uzokululela itende lakhe phezu kwaso.’ Kuzokuzaliseka isithembiso izimvwezi okukade  sisilindele ngombana uZimu “uzokusula zoke iinyembezi emehlwenabo, ukufa angekhe kusaba khona.”—IsAm. 21:3, 4.

11-12. (a) Njengombana isAmbulo 7:16, 17, sitjho ngiziphi iimbusiso ezizokufunyanwa siqubuthu esikhulu? (b) Khuyini ezinye izimvu ezingayenza esiKhumbuzweni begodu kubayini?

¹¹ Funda isAmbulo 7:16, 17. Njenganje abantu bakaZimu babulawa yindlala ngebanga lokugandelelwa, ukubogaboga kwezomnotho namkha izipi. Kuthi kusesenjalo abanye basemajele ngebanga lokukholwa kwabo. Nanyana kunjalo, isiqubuthu esikhulu siyakhuthazeka ukwazi ukuthi ngemva kokutjhatjalaliswa kwephasi lakaSathana sizokuba nokudla okunengi nelwazi esinalo ngoZimu lizokuba linengi begodu lokho kuzositjhideza kuye. Nakutjhatjalaliswa iphasi lakaSathana isiqubuthu esikhulu sizokusinda ‘ekutjhiseni okubulalako’ kwelaka lakaJehova azolithela ephasini. Nakuphela isizi elikhulu, uJesu uzokunqophisa abasindileko ephasina “emithonjeni yamanzi wokuphila.” Akhucabange ukuthi isiqubuthu esikhulu sinethemba elihle kangangani. Iingidigidi zabantu ekhezaphila kungenzeka zingahlongakali.—Jwa. 11:26.

¹² Ezinye izimvu zithokoza uJehova noJesu ngethemba elihle ezinalo. Azikakhethelwa ukuyokuphila ezulwini kodwana ziqakatheke ngendlela efanako kuJehova. Amalunga weenqhema ezimbilezi athokoza uZimu noKrestu. Enye indlela ezitjengisa ngayo ukuthokoza kwazo kukuthi zibe khona esiDlweni seKosi saNtambama.

13-14. Kubayini woke umuntu kufuze aye esiKhumbuzweni?

¹³ Ngokujayelekileko, nakunabantu abayikulungwana, munye kwaphela ozokudla isikwa asele newayini esiKhumbuzweni. Lokho kuba silinganiso sokuthi emabandleni asithandathu linye kwaphela elizokuba nomuntu odlako esiKhumbuzweni. Lokho kutjengisa bona inengi labantu abaya esiKhumbuzweni babantu abanethemba lokuphila ephasini. Alo kubayini baya esiDlweni seKosi saNtambama? Abantu nabaya  emtjhadweni nanyana kungasibo abatjhadako, baya ngehloso yokusekela abatjhadikazi, singatjho ukuthi nalaba abaya esiKhumbuzweni, baya ngehloso yokutjengisa isekelo nethando kuKrestu nakabazesiweko. Yeke, nezinye izimvu ziya esikhumbuzweni ngebanga lomhlatjelo owenza kwakghonakala bona zifumane ukuphila okungapheliko.

¹⁴ Enye into eyenza kuqakatheke ngomhlambi wezinye izimvu bona uye esiKhumbuzweni kulalela umyalo kaJesu. UJesu nakenza isidlo esikhethekilekwesi nabapostoli bakhe abathembekileko wathi kibo, “Hlalani nikwenza lokhu bona ningikhumbule.” (1 Kor. 11:23-26) Yeke, baragela phambili bagidinga isiDlo seKosi saNtambama ikani abazesiweko nabasesekhona ephasini. Ekhabolakhona izimvu ezinyezi zibe zimeme nabanye abantu bona baye nazo esiKhumbuzweni.

15. Khuyini ongayenza ukutjengisa ukuthi uthokoza uZimu noKrestu esiKhumbuzweni?

¹⁵ EsiKhumbuzweni siba nethuba lokudumisa uJehova noKrestu ngengoma nangomthandazo. Isihloko sekulumo yomnyaka lo yesiKhumbuzo sithi, “Thokoza Ngalokho UZimu NoKrestu Abakwenzele Khona!” Izosenza sithokoze ngalokho uJehova noKrestu abasenzele khona. Njengombana sizabe sidluliselwa iimfanekiselo, sizokhunjuzwa nokuthi zitjho umzimba kaJesu neengazi zakhe. Sizokukhumbula ukuthi uJehova wanikela ngoJesu bona sifumane ukuphila. (Mat. 20:28) Woke umuntu othanda uBabethu wezulwini neNdodanakhe uzokufuna ukubakhona esiKhumbuzweni.

16. Abazesiweko nezinye izimvu bafana ngani?

¹⁶ Abazesiweko nezinye izimvu uJehova ubathanda ngokulingana. Yomibili imihlambi le uyithenge ngentengo efanako, ngeengazi zeNdodanakhe, umahluko okhona emihlambini emibili le, kukuthi ayinathemba elifanako. Imihlambi le kufuze ihlale ithembekile kuZimu nakuKrestu. (Rhu. 31:23) Ummoya kaZimu usebenza ngendlela efanako kithi soke. UJehova usinikela ummoya ocwengileko ngendlela efanako kuye ngokuthi khuyini umuntu ayitlhogako.

17. Khuyini amaKrestu aseleko azesiweko ayilindeleko?

¹⁷ AmaKrestu azesiweko akabelethwa anethemba lokuphila ezulwini, ithembelo alinikelwa nguZimu. Acabanga ngethembelo, athandaze ngalo begodu akuqale ngabomvu ukufumana umvuzo loyo ezulwini. Akakghoni nokucabanga ukuthi umzimbawo wommoya uzokuba njani.  (Flp. 3:20, 21; 1 Jwa. 3:2) Nanyana kunjalo, aqale phambili ukuba noJehova noJesu nezinye iingilozi kuhlanganise nabo boke abazesiweko nekwenzeni imisebenzawo emBusweni kaZimu ezulwini.

18. Ngiwuphi umvuzo ezinye izimvu eziwulindeleko?

¹⁸ Ezinye izimvu zilindele ukuphila isiphelani ephasini. (UMtj. 3:11) Ziqale phambili ekwenzeni iphaseli libe yipharadesi. Zilulukela ukwakha izindlu zazo, zitjale neenthelo, zikhulise nabantwana bazo ephasini elihle elinepilo ethabisako. (Isa. 65:21-23) Ziqale phambili nokukhamba iindawo ezihlukahlukeneko ezisephasini, zibone iintaba, amahlathi nelwandle bezifunde ngakho koke uJehova akudalileko. Ukungezelela kilokho, zithabela ukwazi ukuthi ubuhlobo bazo noJehova buzokuqina bezitjhidelane naye khulu kunangaphambili.

19. IsiKhumbuzo sisinikela liphi ithuba begodu emnyakeni lo sizokuba nini?

¹⁹ UJehova unikele zoke iinkhonzi zakhe ezizinikeleko ithemba elihle ngengomuso. (Jor. 29:11) IsiKhumbuzo sokufa kwakaKrestu sisinikela ithuba elihle lokudumisa uZimu noKrestu ngalokho abasenzele khona bona sifumane ukuphila okungapheliko. IsiKhumbuzo siqakatheke khulu kiwo woke amaKrestu weqiniso, ngikho kufanele abe khona. Umnyaka lo sizokuba ntambama ngoMgqibelo, Matjhi 27, 2021. Inengi lethu litjhaphulukile ukuthi lingakghona ukuya esiKhumbuzweni. Abanye bazokuhlanganyela basemajele, begodu bahlunguphazwa. Njengombana amabandla, iinqhema nabanye bazabe bahlanganyela esiKhumbuzwenesi, uJehova noJesu namanye amalunga womndeni kaJehova wezulwini bazabe baqalile.