1. Khuyini abanye abangayibuza njengombana kwenza iKosi uDavida?

 SOKE sifuna ukuphila ngokuthula. Akekho umuntu othatjiswa kungandeleleka. Nanyana kunjalo, ngasikhathi sikhe sigandeleleke. Kuhlekuhle, ngitjho nezinye iinceku zakaJehova zingase zibuze umbuzo owabuzwa yiKosi uDavida othi, “Kuze kube nini ngiwurubajekile, nginesizi ehliziywenami ilanga loke na?”—Rhu. 13:2.

2. Sizokucoca ngani esihlokwenesi?

² Soke kunesikhathi lapha sizizwa sigandelelekile khona, kodwana nanyana kunjalo, kunezinto esingazenza bona singazizwa sigandeleleke khulu. Esihlokwenesi, sizokuthoma ngokucoca ngezinto ezisibangela bona sigandeleleke. Ngemva kwalokho sizokucoca ngezinto ezisithandathu ezizosisiza sehlise ummoya njengombana siqalene nobujamo obugandelelako.

3. Kungangani ukugandeleleka esiqalana nakho begodu singakghona na ukukubalekela?

³ Kungenzeka kuncani namkha akukho esingakwenza ngemiraro esibangela bona sigandeleleke. Ngokwesibonelo, asikwazi ukulawula ukukhuphuka kwentengo yokudla, izembatho, nendawo yokuhlala. Asikwazi ukulawula iinkhathi abantu esisebenza namkha esifunda nabo abazosilinga ngazo bona singathembeki kuJehova. Asikwazi ukulawula ubulelesi obenzeka endaweni esihlala kiyo. Siqalana nazo zoke iintjhijilwezi ngebanga lokuthi inengi  labantu esiphila nalo alenzi ngokweenkambiso zeBhayibheli. USathana, onguZimu wephaseli, uyazi bona abanye abantu bazokuvumela “amatshwenyeko wephaseli” abalisise ukulotjha uJehova. (Mat. 13:22; 1 Jwa. 5:19) Kuyakhanya-ke bona kubayini iphaseli lizele ngezinto ezigandelelako.

4. Khuyini engenzeka nasigandeleleka khulu ngemiraro esiqalana nayo?

⁴ Kungenzeka sigandeleleke khulu ngebanga lemiraro esiqalana nayo. Ngokwesibonelo, singagandeleleka ngebanga lokuthi sicabanga ukuthi angeze sifumane imali eyaneleko yokuthenga izinto esizitlhogako namkha singagandelelwe kukuthi sicabanga bona sizokugula singakghoni ukuya emsebenzini bese silahlekelwa msebenzi. Singagandelelwa nakucabanga ngokuthi kuzokwenzekani nasingabhalelwa kuthembeka kuJehova nasilingelwa ukuphula imithethwakhe. Siyazi ukuthi uSathana uzokubangela bona abantu bakaZimu bahlaselwe, singatshwenyeka ngokuthi sizokwenza njani koke lokho nakwenzekako. Singabe sizibuze, ‘Kumbi na ukuzizwa ngalendlela?’

5. UJesu bekatjho ukuthini nakathi, “Lisani ukutshwenyeka?”

⁵ UJesu watjela abalandeli bakhe wathi, “Lisani ukutshwenyeka.” (Mat. 6:25) Inga-kghani lokho kutjho ukuthi akukafuzi sitshwenyeke nakancani? Awa, akusinjalo. Iinceku zakaJehova ezithembekileko zekadeni zakhe zatshwenyeka, kodwana uJehova bekathokoza ngazo. * (1 Kho. 19:4; Rhu. 6:3) Kuhlekuhle uJesu ebekakutjho lapha, kukuthi akukafuzi sigandelelwe miraro yokuphila kangangokuthi singasakghoni ukulotjha uJehova ngehliziyo epheleleko. Alo singakulawula njani ukugandeleleka?—Funda ibhoksi elithi, “ Ekufuze Ukwenze.”

6. Ngokuya ngomtlolo webeFilipi 4:6, 7 khuyini engasisiza sehlise ummoya nasigandelelekileko?

⁶ (1) Thandaza qobe. Nasigandelelekileko ngebanga lemiraro, singathandaza kuJehova sibawe isizo. (1 Pit. 5:7) UJehova angaphendula umthandazwakho ngokuthi ufumane “ukuthula kwakaZimu okudlula koke ukuzwisisa.” (Funda yebeFilipi 4:6, 7.) UJehova ngommoyakhe ocwengileko angasisiza sehlise ummoya.—Gal. 5:22.

7. Khuyini ekufuze siyikhumbule nasithandazako?

⁷ Nawuthandaza kuJehova, mthululele isifuba sakho. Mtjele bona utshwenywa yini, mtjele nokuthi lokho kukwenza uzizwe njani. Nangabe kukhona ongakwenza, mbawe akusize wazi bona kufuze wenzeni bekakuphe amandla wokukwenza lokho. Nangabe imiraro oqalene nayo ingaphezu kwamandlakho, bawa uJehova akusize ukghone ukulawula indlela otshwenyeke ngayo. Nasimtjela ngokunqophileko uJehova ngezinto ezisitshwenyako, kuzosikhanyela nakawuphendulako umthandazwethu. Nawungayifumani msinya ipendulo yomthandazwakho ungapheli amandla. UJehova ufuna umtjele ngokunqophileko ngezinto ezikutshwenyako begodu ungalisi ukuthandaza.—Luk. 11:8-10.

8. Khuyini ekufuze sithandaze ngayo?

 ⁸ Nawuthululela isifuba sakho kuJehova umtjela ngezinto ezikutshwenyako, linga nokumthokoza ngakwenzele khona. Kuhle ukucabanga ngezinto ezihle esinazo ngitjho nanyana siqalene neentjhijilo. Nakungenzeka kube budisi ukutjho indlela ozizwa ngayo ngebanga lobuhlungu obuzwako, khumbula ukuthi uJehova uyawuphendula nomthandazo othi, ‘Ngibawa ungisize!’—2 Kron. 18:31; Rom. 8:26.

9. Khuyini esingayenza nasithukiwe?

⁹ (2) Thembela kuJehova ingasi ekuhlakanipheni kwakho. Ngesikhathi somphorofidi u-Isaya, abantu bakwaJuda bebasaba ukuhlaselwa maSiriya. Yeke, bafuna ukusizwa maGibhide angamlotjhiko uJehova. (Isa. 30:1, 2) UJehova wabakhalimela, wabatjela ukuthi indlela abayithathako le izobafaka emrarweni. (Isa. 30:7, 12, 13) UJehova wasebenzisa u-Isaya wabatjela ukuthi bangalifumana kuphi ivikeleko. Wathi kibo, “amandlenu azakuba sekuzithobeni nethembeni.”—Isa. 30:15b

10. Kungaphasi kwabuphi ubujamo lapha singatjengisa khona ukuthi siyamethemba uJehova?

¹⁰ Singatjengisa njani ukuthi siyamethemba uJehova? Cabanga nganazi iimbonelo. Akhesithi unikelwe umsebenzi ozokubhadela imali engangemali kodwana uzokuthatha isikhathi sakho esinengi, uzokwenza ungasakghoni ukulotjha uJehova ngendlela ebewukghona ngawo. Namkha akhesithi kunomuntu emsebenzini ofuna ukuthandana nawe kodwana akalotjhi uJehova. Nofana ilunga lomndeni lithi, “khetha phakathi kwami noZimakho.” Kibo boke ubujamobu kuzokufuze uthathe isiqunto kodwana uJehova uzokunikela iinkambiso zokuthi kufuze wenzeni. (Mat. 6:33; 10:37; 1 Kor. 7:39) Umbuzo kukuthi uzokuthemba lokho bewukusebenzise?

11. Ngiziphi iimbonelo eziseBhayibhelini ezizosisiza sehlise ummoya nasiqalene nokuphikiswa?

¹¹ (3) Funda eembonelweni ezihle nezimbi. IBhayibheli lineembonelo ezihle ezitjengisa ukuthi kuqakatheke kangangani ukwehlisa ummoya nokuthembela kuJehova. Njengombana ufunda ngeembonelwezi, tjheja bona uZimu wabasiza njani abantu bakhe behlisa ummoya nabaphikiswako. Ngokwesibonelo, ngesikhathi ikhotho ekulu yakwaJuda itjela abapostoli bona balise ukutjhumayela, akhenge kubathuse lokho. Kunalokho bathi, “Kufuze silalele uZimu njengombusi kunabantu.” (IzE. 5:29) Ngitjho nangemva kokubetjhwa, akhenge bangenwe mamanzi emadolweni. Baqiniswa kukuthi bebazi bona uJehova unabo. UJehova bekathaba ngabo. Yeke baragela phambili batjhumayela iindaba ezimnandi. (IzE. 5:40-42) UStefani naye wehlisa ummoya ngesikhathi azokubulawa, “ubuso bakhe bebunjengobuso bengilozi.” (IzE. 6:12-15) Bekaqiniseka ukuthi uJehova uyamthanda.

12. Ngokuya ngeyoku-1 kaPitrosi 3:14; 4:14 kubayini singathaba ngitjho nanyana sihlunguphazwa?

¹² Abapostoli bebaqiniseka ukuthi uJehova unabo. Wabanikela amandla wokwenza imikarisomraro. (IzE. 5:12-16; 6:8) Ubujamo bethu namhlanjesi buhlukile. Nanyana kunjalo, uJehova usebenzisa iliZwi lakhe asiqinisekise ukuthi nasihlunguphazwako ngebanga lokwenza okulungileko uzokuba nathi. (Funda yoku-1 kaPitrosi 3:14; 4:14.) Kunokusolo sicabanga ngokuthi  sizokwenza njani nasihlunguphazwako esikhathini esizako, kungaba kuhle ukudzimelela ekwakheni ukukholwa kwethu begodu sithembe ukuthi uJehova uzosivikela. Njengombana kwenza abafundi bakaJesu bakade, nathi kufuze sithembe uJesu nakathi, “Ngizoninikela amezwi nokuhlakanipha abaphikisi benu boke abangekhe bakghone ukukuphikisa.” Sinesiqinisekiso sokuthi, ‘Ngokukghodlhelela kwethu sizokusindisa ukuphila kwethu.’ (Luk. 21:12-19) UJehova uyazikhumbula iinceku zakhe ezithembekileko begodu uzozivusa.

13. Singafundani eembonelweni zalabo ababhalelwa kukwehlisa ummoya nokuthembela kuJehova?

¹³ Singafunda neembonelweni zabantu ababhalelwa kukwehlisa ummoya nokuthembela kuJehova. Ukufunda eembonelweni zabo kuzosisiza sibalekele ukwenza imitjhapho efanako. Ngokwesibonelo, iKosi u-Asa yakwaJuda yathembela kuJehova nayilwa nebutho elikhulu begodu uJehova wayibusisa. (2 Kron. 14:9-12) Kodwana ngokukhamba kwesikhathi nasele izokulwa nebutho elincani leKosi uBhatjha, yabhadela ibutho lamaSiriya bona liyisize esikhundleni sokuthembela kuJehova njengombana yenza ngaphambilini. (2 Kron. 16:1-3) Nasele izokuhlongakala, yaphathwa kugula okumbi, nalapho akhange ithembele kuJehova bona ayisize.—2 Kron. 16:12.

14. Khuyini esingayifunda emitjhaphweni ka-Asa?

¹⁴ Ekuthomeni, u-Asa wafuna isizo lakaJehova nakaqalene nemiraro. Kodwana ngokukhamba kwesikhathi akhenge afune isizo lakaJehova, wafuna ukuzisombululela yena imirarwakhe. Kungenzeka ukuthi amano ka-Asa wokulwa namaSiriya bekabonakala angasebenza. Kodwana ukuthula abakufumanako akhenge kube ngokwesikhathi eside. UJehova wasebenzisa umphorofidakhe wamtjela ukuthi, “Ngebanga lokobana uthembele ekosini yama-Aramu kodwana ingasi kuZimu iKosakho, ibutho lekosi ye-Aramu liphunyurhile esandleni sakho.” (2 Kron. 16:7) Kufuze siyelele bona singazithembi ngokudluleleko besilibale ukufuna isizo lakaJehova. Ngitjho nanyana siqalene nobujamo oburhabekileko, kufuze sehlise ummoya begodu sithembele kuJehova yena uzosisiza siphumelele.

15. Khuyini okufuze siyenze nasifunda iBhayibheli?

¹⁵ (4) Bamba amavesi weBhayibheli ngehloko. Njengombana ufunda amavesi akhuluma ngokwehlisa ummoya, ukuthembela kuJehova, linga ukubamba ngehloko imitjho namkha amagama athileko emavesini lawo. Kungakusiza ukuwafundela phezulu namkha ukuwatlola lapha uzowafunda qobe khona. UJehova watjela uJotjhuwa bona afundele phezulu umThethwakhe bona azokuhlakanipha. Iinkhumbuzwezi bezizomsiza angathukwa kodwana abanesibindi sokunqophisa abantu bakaZimu. (Jotj. 1:8, 9) Amezwi amanengi afumaneka eliZwini lakaZimu angasisiza sehlise ummoya ebujamweni obungasenza sigandeleleke.—Rhu. 27:1-3; IzA. 3:25, 26.

16. UJehova ulisebenzisa njani ibandla bona asisize sehlise ummoya besithembele kuye?

¹⁶ (5) Ziphe isikhathi sokuba nabantu bakaZimu. UJehova usebenzisa abafowethu nabodadwethu bona asisize sehlise ummoya begodu sithembele kuye. Nasisesifundweni siyafunda nakwethulwa ikulumo, nakuphendula abafowethu  nabodadwethu nalokha nasicoca nabo. (Heb. 10:24, 25) Singabuye sikhuthazeke nasithululela umnganethu webandleni isifuba. “ilizwi elakhako” elivela emnganini lingasisiza silwisane nokugandeleleka ngokuphumelelako.—IzA. 12:25.

17. Ngokuya ngomtlolo webeHebheru 6:19 ithemba lethu lomBuso lingasisiza njani nasiqalene neentjhijilo?

¹⁷ (6) Qinisa ithemba lakho. Ithemba lethu lomBuso “linjenge-ankera yomphefumulo” liyasiqinisa ngitjho nanyana siqalene nokugandeleleka. (Funda yebeHebheru 6:19.) Zindla ngeenthembiso zakaZimu zengomuso lapho imicabango engakhiko izabe ingekho khona. (Isa. 65:17) Zicabange usephasini elitjha elinokuthula lapho ukugandeleleka kungasekho khona. (Mik. 4:4) Ukukholwa kwakho kuzokuqina nawutjhumayeza abanye. Yenza koke ongakwenza bona uhlanganyele emsebenzini wokutjhumayela nokwenza abafundi. Nawenza njalo, ‘uzokuqinisekisa ithemba lakho bekube sekupheleni.’—Heb. 6:11.

18. Ngiziphi iintjhijilo esilindele ukuhlangabezana nazo begodu singaqalana njani nazo ngokuphumelelako?

¹⁸ Njengombana iphaseli liya ekupheleni, sizokuqalana nobujamo obusenza sigandeleleke. Umtlolo womnyaka ka-2021 ungasisiza siqalane nobujamobo ngokuphumelelako, sehlise ummoya, sithembele emandleni kaJehova. Emnyakeni ozako, asitjengiseni ngezenzo bona siyasithemba isithembiso sakaJehova esithi: “Amandlenu azakuba sekuzithobeni nethembeni.”—Isa. 30:15.