Amavesi la akhuluma ngezinto ezihlukahlukeneko amaKrestu ekufuze abe nazo: “iinthelo zommoya zilithando, ithabo, ukuthula, ukubekezela, umusa, ubuhle, ukukholwa, ukuba nommoya ophasi, ukuzibamba.” Akukafuzi siqale izintwezi njengokuphela kwezinto ummoya kaZimu ongasisiza sibe nazo.

Tjheja ukuthi umpostoli uPowula utloleni emavesini angaphezu kwala esikhulume ngawo: “Imisebenzi yenyama . . . zizenzo zomseme ezisisono, kusilaphala, kukwenza amanyala ungabi neenhloni, kulotjha iinthombe, bungoma, bubutha, kukulwa, sikhwele, yitukuthelo, kuphikisana, kukwahlukana, kukwenza iintlamu zokuhlubuka, mumona, budakwa, minyanya engalawulekiko, nezinye izinto ezifana nalezi.” (Gal. 5:19-21) Kungenzeka ukuthi kunezinye izinto uPowula ebekangakhuluma ngazo athi ‘zimisebenzi yenyama’ njengalezo ekukhulunywa ngazo kweyabaseKolose 3:5. Ngemva kokukhuluma ngezinto ezihle ezilithoba uthe: “Awukho umthetho olwisana nezinto ezinjalo.” Nala, uPowula bekangalingi ukukhuluma ngazo zoke izinto ummoya kaZimu ongasisiza sibe nazo.

Lokho kubonakala kuhle nasimadanisa nerhelo uPowula alitlolele ibandla le-Efesu: “Iinthelo zokukhanya zihlanganisa yoke imihlobo yobuhle, yokulunga neyeqiniso.” (Efe. 5:8, 9) ‘Ukulunga’ kunye nobulungisa neqiniso ziingcenye ‘zeenthelo zokukhanya’ kodwana ngesikhathi esifanako ‘kusithelo sommoya.’

UPowula wabuye wakhuthaza uThimothi wathi, “lwela ukufumana ukulunga, ukuzinikela kuZimu, ukukholwa, ithando, ukukghodlhelela, nobumnene.” Lezi zizinto ezisithandathu ezithandekako. (1 Thim. 6:11) Ezintwenezi zintathu kwaphela (kukholwa, lithando nobumnene) ezaziwa ngokuthi ‘ziinthelo zommoya.’ Nanyana kunjalo uThimothi bekatlhoga ukusizwa mumoya kaZimu bona abe nezinye izinto uPowula akhulume ngazo: ukulunga, ukuzinikela kuZimu nokukghodlhelela.—Madanisa noKolose 3:12; 2 Pitrosi 1:5-7.

Ngikho sithi uGalatiya 5:22, 23 akakhulumi ngazo zoke izinto umKrestu ekufuze abenazo. Ummoya kaZimu ungasisiza sibe nezinto ezilithoba ezibizwa ngokuthi ‘ziinthelo zommoya.’ Kunezinye godu izinto esifuna ukusebenza ngamandla bona sibe nazo njengombana siba maKrestu avuthiweko “kufuze nimbathe ubuntu obutjha obadalwa ngokuvumelana nentando kaZimu ngokulunga kwamambala nokuthembeka.”—Efe. 4:24.