SOKE sikholelwa bona uJehova nguye osinqophisako nosondlako “emihleni yokuphela” le. (2 Thim. 3:1) Yeke soke kuqakathekile bona simlalele uJehova. Ubujamo bethu singabufanisa nebama-Israyeli ngesikhathi asemmangweni begodu kufuze alalele umdumo weembhorompita.

UJehova walayela uMosi bona enze iimbhorompita ezimbili azikhande ngesiliva ezizakuba “libika lokubiza umkhambathi nokufudusa ikampa.” (Num. 10:2) Abaphristi bekufuze bavuthele iimbhorompita ngeendlela ezihlukileko ezihlathulula lokho abantu ekufuze bakwenze. (Num. 10:3-8) Namhlanjesi abantu bakaZimu bafumana iinqophiso ngeendlela ezihlukahlukeneko. Akhesicoce ngeendlela ezintathu ezisikhumbuza ebekutjhiwo ziimbhorompita zekadeni. Abantu bakaZimu namhlanjesi bamenyelwa emihlanganweni emikhulu, abadala bayabandulwa bona bathuthukise indlela amabandla asebenza ngayo.

UJehova nakafuna “umkhambathi woke” bona uhlangane emnyango wetende lokuhlanganela, abaphristi bebavuthela iimbhorompita. (Num. 10:3) Zoke iinkoro ebezibhode ithaberinakeli ezihlukaniswe zaba ziingcenye ezine bezizwa itjhada elikhethekileko. Labo ebebaseduze nomnyango bekubulula khulu bona batjhinge emnyango wetende. Abanye bebakude, yeke lokho bekwenza bona batlhoge isikhathi nemizamo engeziweko bona bafike. Kinanyana ngibuphi ubujamo, uJehova bekafuna boke bamuzwe.

Namhlanjesi asihlangani ethaberinakeli kodwana simenywa bona sizokuhlangana nabantu bakaZimu. Simenywa emihlanganweni emikhulu nakeminye imihlangano ekhethekileko bona sizokufumana ilwazi neenqophiso eziqakathekileko. Ephasini mazombe abantu bakaJehova bathabela ukuhlangana ndawonye. Ngaphezu kwalokho, abasabelako esimemwenesi babayingcenye yesiqubuthu esikhulu esithabileko. Abanye babuya eendaweni ezikude. Nanyana kunjalo, abazisoli ngokuhlangana ndawonye nabantu bakaZimu.

Kuthiwani ngalabo abakude khulu neendawo lapho isiqubuthu esikhulu sihlanganela kizo? Ngebanga lokuthuthuka kwetheknoloji, abantu abanengi nanyana bangasi seduze nesiqubuthu esikhulu bayazuza emhlanganweni begodu bazizwa bayingcenye yesiqubuthu esikhulu. Ngokwesibonelo, lokha nakuvakatjhe umjameli wegatja, i-ofisi leBenin lathungelela ihlelo lomhlangano edorobheli le-Arlit, eNiger, eseSahara Desert. Emhlanganweni loyo bekunabafowethu  nabodadwethu abamatjhumi amabili nanye kuhlanganise nabamenyiweko. Nanyana bebakude, bazizwa ngasuthi bayingcenye yesiqubuthu esikhulu ebesizii-44 131. Omunye umfowethu wathi: “Sithokoza khulu ngokufumana ihlelo lomhlangano, lokho kusitjengisa ukuthi nisithanda kangangani.”

Umphristi wakwa-Israyeli nakabetha ibhorompita kanye kwaphela “abarholi abaziinhloko zeenkoro zakwa-Israyeli” bebaya etendeni lokuhlangana. (Num. 10:4) Nabalapho, uMosi bekababandula begodu abanikele nelwazi elingeziweko. Lokho bekubasiza barhole iinkoro zabo kuhle. Ngathana bewungumrholi weenkorwezo bewungekhe na wenze koke okusemandlenakho bona uzuze efundisweni nebandulweni lakaMosi?

Namhlanjesi abadala bamabandla ‘abasibaphathi’ begodu abazenzi amakhosi phezu komhlambi kaZimu. (1 Pet. 5:1-3) Benza koke okusemandleni bona baluse umhlambi. Ngaphezu kwalokho, bayasamukela isimemo sebandulo elingeziweko, njengokuya esiKolweni sabaDala. Ebandulweneli abadala bafundiswa indlela ekufuze benze ngayo nabazokutlhogomela kuhle iindaba zebandla. Umphumela walokho uba kukuthi ibandla liyazuza begodu liba nobuhlobo obuhle noJehova. Ngitjho nanyana ungakhenge ulifumane ibandulweli, uyakghona ukuzuza kilabo abalifumeneko.

Ngezinye iinkhathi abaphristi bakwa-Israyeli bebabetha ibhorompita enamatjhada ahlukahlukeneko. Leyo bekuyindlela uJehova abatjela ngayo bona kufuze bafuduke. (Num. 10:5, 6) Ukufuduka kwabo bekutjengisa ukubambisana kwabo kodwana bekumsebenzi omkhulu ukwenza lokho. Amanye ama-Israyeli bekariyada nakufuze athuthele kenye indawo. Kubayini bekunjalo?

Mhlamunye abanye bebezwa ngasuthi sebafuduke khulu begodu lokho bekwenzeka bangakalindeli. “Kwesinye isikhathi ilifu belijama ukusuka ntambama bekube sekuseni.” Ngezinye iinkhathi bekuba “malanga amabili, inyanga namkha isikhathi eside” nabafudukako. (Num. 9:21, 22) Bafuduka kangakhi? UNumeri 33 ukhuluma nangezinye iindawo ezima-40 ama-Israyeli afika kizo.

Amanye bewafumana iindawo ezinomthunzi ahlale kizo, iindawezo bezibangcono khulu ‘kunerhalawumba elikhulu nelesabekako.’ (Dut. 1:19) Lokho bekungabenza bacabange ukuthi ukufudukela kenye indawo bekungatlhogeki.

Bebathi bangathoma ukufuduka, bekuba budisi kwabanye ukulinda isikhathi sabo sokufuduka. Boke bebalizwa itjhada lebhorompita, kodwana bebangekhe bafunduke boke ngesikhathi sinye. Ukutjhuguluka kwetjhada lebhorompita bekuveza ukuthi sele kusikhathi sokufuduka kwekoro yangepumalanga eyakhiwa nguJuda, u-Isakari noZebuloni. (Num. 2:3-7; 10:5, 6) Ngemva kokufuduka kwabo abaphristi bebabetha ibhorompita ihlandla lesibili ukutjengisa ukuthi iinkorwezi kufuze zitjhinge esewula. Abaphristi bebaraga ngendlela leyo bekube kulapho boke sebafudukile.

Kungenzeka ukuthi nakuwe kubudisi ukwamukela amatjhuguluko athileko enziwa yihlangano. Kungenzeka wazizwa ugandelelekile nakufuze wenze amatjhuguluko ebewungakawalindeli. Akhesithi bewuyithanda indlela izinto ebeziraga ngayo begodu ubona kunganatlhogeko yokwenza amatjhuguluko. Kinanyana ngikuphi, mhlamunye kube budisi ukujayelana namatjhuguluko lawo. Nanyana kunjalo, nasizimisela ukulalela, sizokubona ukuthi amatjhuguluko la avela kuZimu begodu yena uzosibusisa ngalokho esikwenzako.

UJehova wasebenzisa uMosi bona arhole iingidi zamadoda, abomma nabantwana nabasemmangweni. Ngaphandle kokutlhogonyelwa nokunqotjhiswa nguJehova bebangekhe baphumelele. Nanamhlanjesi uJehova usasinqophisa ngeliZwi lakhe. Ekhabolakhona siyaphumelela. Kwanga soke singazimisela ukwenza koke okusemandleni bona silalele njengama-Israyeli wekadeni athembekileko.