1. Kubayini ngezinye iinkhathi abantu abalotjha uJehova baba nesizungu?

NGEZINYE iinkhathi, inengi lethu lizizwa linesizungu. Imizwa le idlula msinya kabanye bethu. Kabanye ithatha isikhathi. Singazizwa sinesizungu ngitjho nanyana sinabantu. Abanye balwisana nokujayela ibandla abafudekele kilo. Abanye bavela emndenini otjhideleneko kodwana babanjwa sizungu nabafudukela kude neenhlobo zabo. Abanye balulukela itjhebiswano elihle ebebanalo nomuntu abamthandako ohlongakeleko. Amanye amaKrestu aqeda ukutjhugulukela eqinisweni, azizwa aninwa nabaqalana nokuphikiswa namkha ukuhlunguphazwa malunga wondeni angakholwako nabangani babo bangaphambilini.

2. Ngimiphi imibuzo esizoyiphendula?

² UJehova uyasazi bewuzwisisa yoke into ngathi. Uyalemuka nasizizwa sinesizungu bewufuna nokusisiza siyihlule imizwa leyo. UJehova usisiza njani? Khuyini esingayenza bona sizisize thina? Singabasiza njani abanesizungu ebandleni? Asiqale iimpendulo zemibuzo le.

3. UJehova watjengisa njani ukuthi unendaba no-Eliya?

³ UJehova unendaba nehlalakuhle yabantu abamlotjhako. Useduze khulu nomuntu ngamunye bewuyalemuka nasizizwa sidanile. (Rhu. 145:18, 19) Cabanga ngendlela uJehova bekanendaba ngayo no-Eliya. Indoda ethembekileko le yaphila ngesikhathi esibudisi khulu emlandwini wakwa-Israyeli. Abantu abathanda uJehova bebahlunguphazwa kabuhlungu begodu u-Eliya bekaqothelwe khulu manaba kaJehova anamandla. (1 Kho. 19:1, 2) Enye into okungenzeka beyitshwenya u-Eliya kukuthi bekacabanga  bona nguye yedwa umphorofidi kaJehova oseleko. (1 Kho. 19:10) UZimu wenza okuthileko bona amsize. UJehova wathumela ingilosi bona iyokuqinisekisa umphorofidakhe ukuthi akayisedwa kunalokho bewasesemanengi ama-Israyeli asaba uZimu.—1 Kho. 19:5, 18.

4. UMarkosi 10:29, 30 uthi uJehova ubasekela njani abantu bakhe abanganalo isekelo?

⁴ UJehova uyazwisisa ukuthi abanye bethu sitjhiye okunengi ngemva bona simlotjhe. Lokho kungafaka hlangana isekelo ebesilifumana eenhlotjeni zethu nebanganini bethu bangaphambilini. Mhlamunye kungebangelo umpostoli uPitrosi abuza uJesu ngephimbo elitshwenyekileko nakazakuthi: “Sitjhiye koke sakulandela; alo-ke thina sizokuzuzani?” (Mat. 19:27) UJesu waqinisekisa abalandeli bakhe ngokuthi bazokuzuza umndeni omkhulu olotjha uJehova. (Funda uMarkosi 10:29, 30) UJehova, okunguye iHloko yabantu abamlotjhako, uthembisa ukuthi ozabaseleka boke abafuna ukumlotjha. (Rhu. 9:10) Akhesicabange ngamagadango esingawathatha nasizakufumana isizo lakaJehova bona silwisane nesizungu.

5. Sizuzani ngokudzimelela endleleni uJehova asisekela ngayo?

⁵ Dzimelela endleleni uJehova akusekela ngayo. (Rhu. 55:22) Lokhu kuzokusiza ube nombono ofaneleko ngobujamo bakho. Udadwethu oyedwa eqinisweni nongakatjhadi, u-Carol, * uthi: “Nangiqala emva bengicabangisise kuhle ngesekelo lakaJehova eentjhijilweni engidlule kizo, ngizizwa nginganasizungu. Kuyangiqinisekisa ukuthi uJehova uzokuhlala angisekela nesikhathini esizako.”

6. Umtlolo woku-1 kaPitrosi 5:9, 10 ubakhuthaza njani labo abenesizungu?

⁶ Cabanga ngokuthi uJehova ubasekela njani abantu bakhe abanesizungu. (Funda yoku-1 kaPitrosi 5:9, 10) Umfowethu u-Hiroshi, okwaphela iminyaka eminengi kunguye yedwa uFakazi ngakwabo, uthi: “Ebandleni kubulula ukubona kwangathi akekho onemiraro. Ukwazi ukuthi  soke senza imizamo yokulotjha uJehova, kubakhuthaza khulu labo abangana bakwabo eqinisweni.”

7. Ukuthandaza kungakusiza njani?

⁷ Iba nehlelo elihle lokufunda ngoZimu. Lokhu kufaka hlangana nokutjela uJehova indlela ozizwa ngayo. (1 Pit. 5:7) U-Massiel, ongudade osesemutjha owazizwa aninwa mndenakhe ngebanga lokujamela iqiniso, uthi: “Enye yezinto eziqakathekileko eyangisizako bona ngiqalane nesizungu bekukuthandaza qobe kuJehova. BekanguBaba wamambala kimi bengithandaza kuye kanengi qobe langa, ngimtjela indlela engizizwa ngayo.”

8. Ukufunda iliZwi lakaZimu nokucabangisisa ngalo, kungakusiza njani?

⁸ Funda iliZwi lakaZimu qobe, ucabangisise ngezinye iindaba eziseBhayibheli ezitjengisa ithando lakaJehova ngawe. U-Bianca okghodlhelele amagama ahlabako emndeninakhe, uthi: “Ukufunda nokucabangisisa ngeendaba eziseBhayibhelini nobujamo obufana nobami obehlela abantu bakaJehova, kuyangisiza tle.” Amanye amaKrestu abamba imitlolo eduduzako ngehloko efana namaRhubo 27:10 no-Isaya 41:10. Abanye bafumane ukuthi ukulalela imigadangiso erekhodiweko nabalungiselela imihlangano namkha ukufunda iBhayibheli, kwehlisa isizungu.

9. Ukuba khona esifundweni kungakuzuzisa njani?

⁹ Lwela ukuba khona qobe esifundweni. Kunengi ozokuzuza ehlelweni lomhlangano loyo begodu uzobazi ngcono abafowethu nabodadwethu. (Heb. 10:24, 25) U-Masseil, ekukhulunywe ngaye, uthi: “Nanyana bengineenhloni kodwana ngaqunta ukuya esifundweni qobe benginikele ngeempendulo. Lokho kwangisiza bona ngizizwe ngiyingcenye yebandla.”

10. Kubayini kuqakathekile ukuba mngani wamaKrestu athembekileko?

¹⁰ Yakha ubungani namaKrestu athembekileko. Funa abangani ebandleni ozokufunda litho likhulu kibo nanyana kungenzeka ningalingani ngeminyaka namkha iinzinda zingafani. IBhayibheli lisikhumbuza ukuthi ukuhlakanipha “kusebantwini abadala.” (Job. 12:12) Abakhulileko kunengi abangakufunda ebantwini abatjha abathembekileko. UDavida bekamncani kunoJonathani kodwana lokho akhenge kubavimbe ukuthi babe bangani abatjhideleneko. (1 Sam. 18:1) UDavida noJonathani basizana bona balotjhe uJehova naphezu kweenqabo ezinengi. (1 Sam. 23:16-18) U-Irina, udade okunguye yedwa uFakazi ngakwabo, uthi:  “Abafowethu nabodadwethu bangaba babelethi bethu namkha abantwana bakwethu abathanda uJehova. UJehova angabasebenzisa bona babe mndeni esiwutlhogako.”

11. Khuyini ongayenza bona wakhe ubungani obuqinileko?

¹¹ Ukwenza abangani akusilula, khulukhulu nangabe umumuntu oneenhloni. U-Ratna, udadwethu oneenhloni owafunda iqiniso naphezu kokuphikiswa, uthi, “Bekufuze ngivume ukuthi ngitlhoga isizo nesekelo kubafowethu abathanda uJehova.” Kungaba sitjhijilo ukutjela abanye indlela ozizwa ngayo kodwana ukukhulumisana ngokutjhaphulukileko sisekelo sobungani obuqinileko. Abangani bakho bayafuna ukukusekela nokukukhuthaza, nanyana kunjalo bafuna ubatjele ukuthi bangakwenza njani lokho.

12. Ukutjhumayela kungakusiza njani wenze abangani?

¹² Enye indlela ehle yokwenza abangani kutjhumayela nabanye. U-Carol, ekukhulunywe ngaye phambilini, uthi: “Ngifumene abangani abanengi abalungileko ngokuba nesikhathi esinengi ngitjhumayela nabodadwethu nakeminye imikhakha yekonzo. UJehova ungisekele khulu eminyakeni edlulileko ngabanganaba.” Ukwakha ubungani namaKrestu athembekileko yinto engasizuzisa khulu. UJehova usebenzisa ubungani obunjalo ukukusiza ulwisane namazizo agandelelako anjengokuba nesizungu.—IzA. 17:17.

13. Ngimuphi umthwalo soke esinawo ebandleni?

¹³ Soke sinomthwalo wokwenza ibandla libe yindawo enethando nenokuthula la woke umuntu angekhe azizwe anesizungu. (Jwa. 13:35) Esikwenzako nesikutjhoko kungenza umehluko omkhulu. Tjheja lokho okwatjhiwo ngomunye udadwethu: “Nangifundelwa iqiniso, ibandla laba mndenami. Bengekhe ngaba nguFakazi ngaphandle kwesekelo labo.” Ungabasiza njani labo abanganabo bakwabo eqinisweni bazizwe bayingcenye yebandla?

14. Khuyini ongayenza ukwakha ubungani nabantu abaceda ukufika ebandleni?

¹⁴ Thatha igadango lokwakha ubungani nabo. Singathoma ngokwamukela abaceda ukufika ebandleni ngendlela enomusa. (Rom. 15:7) Ngaphezu kwalokho, sifuna ukwenza okungeziweko. Sifuna ukwakha ubungani obuqinileko ngokukhamba kwesikhathi. Yeke-ke, iba nekareko kilabo abatjha ebandleni. Linga ukuzwisisa indlela abazizwa ngayo kodwana ungafaki ipumulo eendabeni zabo. Abanye bangakufumana kubudisi ukukhuluma indlela abazizwa ngayo, ngalokho kufuze siyelele singabakateleli bona bakhulume. Kunalokho, singababuza ngokuhlakanipha imibuzo bese silalela iimpendulo abasinikela zona. Ngokwesibonelo, singababuza ukuthi balifumene njani iqiniso?

15. AmaKrestu avuthiweko angabasiza njani abanye ebandleni?

¹⁵ Ngamunye wethu angakghona ukuthuthukisa itjhebiswano lakhe noZimu lokha amaKrestu avuthiweko, khulukhulu abadala bebandla, nabatjengisa ukuba nendaba nomuntu ngamunye. U-Melissa, owakhuliswa ngunina eqinisweni, uthi: “Awekho amagama angahlathulula indlela engizizwa ngayo ngabafowethu ebebahlale bakhona njengabobaba kimi eminyakeni edlulileko. Qobe nangitlhoga  umuntu engingakhuluma naye, bengazi ukuthi bakhona. “U-Mauricio, umfowethu osesemutjha owazizwa alahliwe ngemva kokuthi umuntu obekamfundela iBhayibheli atjhiye iqiniso, uthi: “Umehluko omkhulu wenziwa kukuthi abadala bebatjengisa ukuthi nendaba nami. Bebahlala bakhuluma nami ngaso soke isikhathi. Bebasebenza nami esimini, bacoce nami ngamagugu abawafumene ekufundeni kwabo kweBhayibheli begodu sidlala nemidlalo ndawonye.” Bobabili, u-Melissa no-Mauricio, bathuthukela ekulotjheni uJehova isikhathi esizeleko.

16-17. Khuyini esingayenza ukusiza abanye?

¹⁶ Yenza okuthileko bona ubasize. (Gal. 6:10) U-Leo, osithunywa sevangeli enarheni ekude nekhabo, uthi: “Kanengi sitlhoga kwaphela umusa oboniswa ngesikhathi esifaneleko. Ngikhumbula ngelinye ilanga nangizokuba nengozi yekoloyi. Ngathi nangifika ekhaya, bengigandelelekile. Abatjhadikazi abanye bangimema bona ngiyokudla nabo. Angisakhumbuli ukuthi sadlani kodwana ngikhumbula ukungilalela kwabo ngomusa. Ekugcineni, ngazizwa ngingcono khulu.”

¹⁷ Soke siyayithabela imibuthano yobuKrestu, njengomhlangano wesigodi newesifunda ngombana siba nesikhathi esimnandi nabanye besicoce ngehlelo lomhlangano ndawonye. Nanyana kunjalo, u-Carol, ekukhulunywe ngaye phambilini, uthi: “Ngikufumana kubudisi ukuya emhlanganweni yesigodi neyesifunda.” Kubayini atjho njalo? Uthi: “Nanyana ngihlangana nabafowethu nabodadwethu abanengi, kanengi baba ndawonye nemindenabo. Kimi, amazizo wesizungu abanamandla khulu.” Abahlongakalelwe balingani babo bomtjhado, bangakufumana kubudisi ukuya emhlanganweni wesigodi newesifunda kokuthoma ngaphandle kwabo. Ukhona omaziko oqalene nobujamobu? Kubayini ungammemi bona azokuthabela umhlangano olandelako nomndenakho?

18. Singawusebenzisa njani umtlolo wesi-2 kwebeKorinte 6:11-13 bona simeme abanye?

¹⁸ Ibani nesikhathi ndawonye. Linga  ukubiza abafowethu nabodadwethu abahlukahlukeneko, okungenzeka banesizungu, lokha nanizithabisako. Sifuna ‘ukubavulela iinhliziyo zethu’ khulukhulu labo abanjalo. (Funda yesi-2 kwebeKorinte. 6:11-13) U-Melissa, ekhesakhuluma ngaye phambilini uthi, “Bekuhlala kumnandi lokha abangani nabasimemako ukuthi sizobavakatjhela nemindenabo namtjhana sizikhiphe ndawonye”. Ukhona na umuntu omaziko ebandleni ongakghona ukummema?

19. Kunini la ukuba nesikhathi namanye amaKrestu kungasiza khona?

¹⁹ Kungaba neenkhathi la abafowethu bangakuthabela khona ukuthi sibe nabo. Abanye bakufumana kubudisi ukuthi babe neenhlobo zabo ezingakholwako ngeenkhathi zamaholideyi. Abanye bangazizwa bagandeleleke khulu ngamanye amalanga, mhlamunye njengelanga okwahlongakala ngalo umuntu abamthandako. Nasiba nabafowethu nabodadwethu abaqalene neentjhijilwezi, sibatjengisa ukuthi ‘sibatlhogomela kwamambala.’—Flp. 2:20.

20. Amezwi kaJesu akuMatewu 12:48-50 angasisiza njani nasinesizungu?

²⁰ Manengi amabanga angenza abafowethu bazizwe banesizungu. Nanyana kunjalo, akukafuzi silibale ukuthi uJehova uyakubona lokho nendlela abazizwa ngayo. Usinikela lokho esikutlhogako, esikhathini esinengi, ngamaKrestu esikunye nawo. (Funda uMatewu 12:48-50) Sitjengisa ukuthi siyamthokoza uJehova ngelungiselelo lakhe ngokuthi sisekele abafowethu ngendlela esingakghona ngayo. Akunandaba ukuthi ngezinye iinkhathi sizizwa njani, asisisodwa ngombana uJehova uhlala anathi.