1. Ngekhulu lokuthoma, isiqubuthu satjelwa bona senzeni?

ISIQUBUTHU esikhulu samadoda nabafazi esivela eenarheni ezihlukahlukeneko esikhuluma amalimi angafaniko sahlangana ndawonye. Kwenzeka ikarisomraro ngelangelo. Isiqubuthu samaJuda ajayekileko sakghona ukukhuluma amalimi wakosontjhaba! Nanyana isenzweso besikara kodwana ebekukara khulu ngilokho amaJuda akutjhoko nalokho umpostoli uPitrosi akutjela boke ebebalapho. Lokho bekufaka hlangana umlayezo wokuthi bebangasinda, kwaphela nabebangakholelwa kuJesu Krestu. Isiqubuthu sathinteka khulu ngemva kokuzwa umlayezo lo. Abantu bathinteka khulu kangangokuthi babuza: “Kufuze senzeni?” UPitrosi wathi: “Tjhugulukani, ngamunye wenu abhajadiswe.”—IzE. 2:37, 38.

2. Sizokufunda ngani esihlokwenesi? (Qala isithombe esingaphandle.)

² Okwalandelako kwaba yinto engakajayeleki. Kwaba nabantu abazii-3000 ababhajadiswako baba bafundi bakaKrestu. Kula kwathoma khona umsebenzi omkhulu wokwenza abafundi lo uJesu atjela abafundi bakhe ukuthi kufuze bawenze. Umsebenzi loyo usenziwa balandeli bakhe nanamhlanjesi. Esikhathini esiphila kiso akukghoneki ukuthi sibhabhadise umuntu ngama-awara ambadlwana. Kungathatha iinyanga namkha umnyaka namkha ngaphezulu ukuthi umuntu abhajadiswe. Ukwenza abafundi kumsebenzi omkhulu njengombana ulemuka nangabe kunomuntu ofunda naye iBhayibheli. Esihlokwenesi, sizokufunda ngokuthi khuyini ongayenza ukuthi usize umuntu ofunda naye iBhayibheli.

3. Njengombana kuvezwe kuMatewu 28:19, 20, khuyini umuntu esifunda naye ekufuze ayenze nakazakubhajadiswa?

³ Ngaphambi kokuthi isifundo seBhayibheli sibhajadiswe, kufuze sikusebenzise lokho esikufundako. (Funda uMatewu 28:19, 20.) Lokha umuntu esifunda naye nakasebenzisa lokho  akufundileko, ‘uba njengendoda ehlakaniphileko’ esemfanekisweni kaJesu eyagubha yangenelela edwaleni yakha indlwayo. (Mat. 7:24, 25; Luk. 6:47, 48) Singamsiza njani umuntu esifunda naye ukuthi akusebenzise lokho akufundako? Akhesiqale iimphakamiso ezintathu.

4. Ungamsiza njani umuntu omfundelako bona aragele phambili athuthukele ekubhajadisweni? (Qala ibhoksi elithi “ Siza Umuntu Ofunda Naye Azibekele Imigomo Bekayifikelele.”)

⁴ Siza ofunda naye azibekele imigomo. Kubayini kufuze wenze njalo? Cabanga nganaku umfanekiso: Nangabe uthatha ikhambo elide, kufuze kube nala ojama khona uphumule. Lokho kuzokwenza ikhambo lakho libe lula khulu. Ngendlela efanako, nangabe umuntu ofunda naye iBhayibheli uzibekela imigomo bekayifikelele, kuzokuba lula nokuthi azibekele umgomo wokubhajadiswa. Sebenzisa ingcenye ethi, “Uzimisele ukwenzani?” esencwadini ethi, Thabela Ukuphila Ngokungapheliko! ukusiza umuntu ofunda naye bona athuthuke. Ekuphetheni kwesifundo ngasinye, coca ngokuthi umgomo umfundi azibekele wona ukhambisana njani nalokho eniqeda ukukufunda. Nangabe kunomunye umgomo owucabangako malungana nomfundi, tlola phasi engcenyeni ethi, “Okhunye ongakutlola.” Sebenzisa ingcenye le ngaso soke isikhathi nanifundako bona nibuyekeze imigomo emifitjhani neyesikhathi eside umfundi azibekele yona.

5. Ngokuya ngokwalokho okusemtlolweni kaMarkosi 10:17-22, khuyini uJesu ayitjela indoda enjingileko begodu kubayini?

⁵ Siza ofunda naye enze amatjhuguluko ekuphileni kwakhe. (Funda uMarkosi 10:17-22.) UJesu bekazi ukuthi kuzokuba budisi khulu ngendoda enjingileko bona ithengise izinto zoke enazo. (Mar. 10:23) UJesu watjela indoda le ukuthi kufuze yenze amatjhuguluko ekuphileni kwayo. Kubayini? Kungombana uJesu bekamthanda. Ngezinye iinkhathi, kungenzeka singakghoni ukukhuthaza umfundi bona asebenzise lokho akufundako ngombana  sibona ngasuthi akakakulungeli ukwenza amatjhuguluko. Kungathatha isikhathi ngomuntu esimfundelako bona ahlubule ubuntu obudala bekambathe ubuntu obutjha. (Kol. 3:9, 10) Naningakhuluma ngendaba le zisuka zibekwa, kulapho-ke umfundi azokuthoma ukwenza amatjhuguluko. Ukucoca naye ngendaba le kuzokutjengisa ukuthi unendaba naye.—Rhu. 141:5; IzA. 27:17.

6. Kubayini kufuze sisebenzise imibuzo eyenza umuntu aveze umbonwakhe ngalokho akufundako?

⁶ Kuqakathekile ukuthi sibuze umuntu esifunda naye ukuthi ucabangani ngendaba esicoca ngayo. Nasizakufumana lokho umfundi akuzwisisako nakukholelwako, kufuze siyisebenzise imibuzo le. Nasiyisebenzisa qobe imibuzo le, kuzokuba bulula ngomfundi ukucoca ngezinto ezibudisi esikhathini esizako. Incwadi ethi, Thabela Ukuphila Ngokungapheliko! inemibuzo eminengi efuna umfundi aveze imibonwakhe. Ngokwesibonelo, isifundo 04 sinombuzo othi: “Ucabanga ukuthi uJehova uzizwa njani nakakuzwa usebenzisa ibizo lakhe?” Isifundo 09 sinombuzo othi: “Ngiziphi izinto ongathanda ukuzithandazela?” Ekuthomeni, umuntu ofunda naye angatlhoga isikhathi sokucabanga ukuthi angayiphendula njani imibuzo le. Ungamsiza ngokumbandula ukuthi akghone ukuphendula asebenzisa okutjhiwo mitlolo kunye neenthombe.

7. Singazisebenzisa njani izinto ezenzeke kwabanye ukuthi sikhuthaze umuntu esifunda naye?

⁷ Lokha umuntu ofunda naye nakazwisisa ukuthi khuyini ekufuze ayenze, sebenzisa iimbonelo zalokho ekhekwehlela abanye bona umkhuthaze. Ngokwesibonelo, nangabe umuntu ofunda naye iBhayibheli akezi esifundweni, mhlamunye ungamtjengisa ividiyo ethi, UJehova Wangitlhogomela ngaphasi kwengcenye ethi, “Hlola okungenzasi” esifundweni 14. Eemfundweni ezinengi encwadini ethi, Thabela Ukuphila Ngokungapheliko! uzokufumana iindaba ezinengi ezikhuluma ngalokho, ngaphasi kwengcenye ethi, “Funda Ngokungeneleleko” namkha ngaphasi kwengcenye * ethi, “Hlola okungenzasi.” Kufuze utjheje ungamadanisi umuntu ofunda naye nomuntu enifunda ngaye, mhlamunye uthi, “Nangabe umuntu lo wakghona ukukwenza, nawe ungakghona ukukwenza.” Vumela umuntu ofunda naye iBhayibheli kube nguye otjho lokho. Kunokwenza njalo, veza amaphuzu aqakathekileko asize umuntu enifunda ngaye evidiyweni wasebenzisa lokho okufundiswa yiBhayibheli. Mhlamunye ungaveza imitlolo eveleleko namkha okuthileko akwenzileko. Nakungenzeka, gandelela ukuthi uJehova wamsiza njani umuntu lo.

8. Singabasiza njani abantu esibafundelako bona bathande uJehova?

⁸ Siza umuntu omfundelako athande uJehova. Njani? Funa iindlela zokusiza umuntu omfundelako abone ubuntu bakaJehova. Msize abone uJehova njengoZimu othabako nosekela abantu abamthandako. (1 Thim. 1:11; Heb. 11:6) Tjengisa umuntu omfundelako ukuthi angazuza njani nakasebenzisa lokho akufundako begodu umhlathululele ukuthi lokho kutjengisa indlela uZimu amthanda ngayo. (Isa. 48:17, 18) Njengombana ithando lakhe ngoJehova likhula, umuntu omfundelako uzokwenza amatjhuguluko atlhogekako.—1 Jwa. 5:3.

9. Ngokuya ngokomtlolo kaMarkosi 10:29, 30, khuyini umuntu ofuna ukubhajadiswa ekungatlhogeka ayilise?

⁹ Bona athuthukele ekubhajadisweni, umfundi kuzokutlhogeka azidele kokhunye. Njengendoda enjingileko ekukhulunywe  ngayo ekuthomeni, abantu esibafundelako kungatlhogeka bona balise ukuthanda izinto ezibonakalako. Nangabe umsebenzi abawenzako awukhambisani neenkambisolawulo zeBhayibheli, kungafuze benze amatjhuguluko. Abanye kungafuze balise abangani abangamthandi uJehova. Abanye bangalahlwa malungabo womndeni angathandi aboFakazi bakaJehova. UJesu watjho ukuthi kungaba budisi ngabanye ukwenza amatjhuguluko la. Nokho, wathembisa labo abamlandelako ukuthi angeze bazisola. Bazokufumana umvuzo onothileko ngombana bazokuba nomndeni obathandako hlangana nabantu bakaZimu. (Funda uMarkosi 10:29, 30.) Ungamsiza njani umuntu ofunda naye iBhayibheli bona azuze esiphweni esihlesi?

10. Indaba ka-Manuel ikufundisani?

¹⁰ Yakha ubungani nomuntu omfundelako. Kuqakathekile ukutjengisa umuntu omfundelako ukuthi unendaba naye. Kubayini kunjalo? Tjheja lokho okwatjhiwo ngu-Manuel, we-Mexico. Ukhumbula isikhathi basamfundela iBhayibheli, uthi: “Ngaphambi kokuthi sithome ukufunda, umuntu obekangifundela bekathoma ngokungibuza ukuthi nginjani. Lokho bekungisiza, kungenze ngitjhaphuluke begodu ngikghone ukukhuluma naye nangezinye izinto. Bengikghona ukuzwa ukuthi unendaba nami.”

11. Ukuba nesikhathi nalabo esifunda nabo iBhayibheli kungabasiza njani?

¹¹ Iba nesikhathi nabantu ofunda nabo iBhayibheli njengombana noJesu bekanesikhathi nabalandeli bakhe. (Jwa. 3:22) Nakukghonekako, mema umuntu ofunda naye iBhayibheli kwakho nizokudla, nisele itiye namkha nibukele ihlelo le-jw broadcasting laqobe nyanga. Angakuthabela nawummemako, khulukhulu ngeenkhathi zamaholideyi nakanesizungu. U-Kazibwe we-Uganda uthi: “Ngafunda okunengi ngoJehova esikhathini engaba naso nomuntu obekangifundela, ukudlula ngesikhathi ebesifunda ngaso ndawonye iBhayibheli. Ngabona ukuthi uJehova ubathanda kangangani abantu bakhe nokuthi bathabe kangangani. Ngilokho nami ebengikufuna.”

12. Kubayini kufuze sikhambe nabantu abahlukahlukeneko emntwini esifunda naye iBhayibheli?

 ¹² Khamba nabatjhumayeli abahlukahlukeneko emuntwini ofunda naye iBhayibheli. Ngezinye iinkhathi, kungaba lula ukuzikhambela namkha ukhambe nomuntu munye iinkhathi ezinengi emuntwini ofunda naye iBhayibheli. Iye, lokho nakho kulungile kodwana umfundi uzokuzuza khulu nasingakhamba nabatjhumayeli abahlukahlukeneko. U-Dimitrii ohlala e-Moldova uthi: “Omunye nomunye umuntu ebekeza naye bekahlathulula izinto ngendlela ehlukileko kweyomunye. Lokho kwangisiza ukuthi ngiqale indaba yinye ngeendlela ezihlukahlukeneko. Kwangenza nokuthi ngingabi namahloni nangiya kokuthoma esifundweni ngombana abanengi besele ngibazi.”

13. Kubayini kufuze sisize umuntu esifunda naye iBhayibheli eze emihlanganweni?

¹³ Siza umuntu ofunda naye iBhayibheli abekhona emihlanganweni yebandla. Kubayini? Kungombana uJehova ufuna abakhulekeli bakhe bahlangane ndawonye. Kazi lokho kuyingcenye yokumlotjha. (Heb. 10:24, 25) Ukungezelela kilokho, abafowethu nabodadwethu bamndeni esilotjha nawo uJehova. Nasihlangana nabo, kufana nokuthi sihleli ndawonye, sithabela ukudla okumnandi. Nawusiza umuntu ofunda naye iBhayibheli bona aye esifundweni, umsiza athathe elinye igadango eliqakathekileko elizomsiza abhajadiswe. Nokho, lelo kungaba ligadango elibudisi kuye ukulithatha. Incwadi ethi, Thabela Ukuphila Ngokungapheliko! ingamsiza njani umuntu ofunda naye iBhayibheli ukuthi ahlule iintjhijilo angahlangabezana nazo?

14. Singamkhuthaza njani umuntu esifunda naye iBhayibheli bona eze emihlanganweni?

¹⁴ Sebenzisa isifundo 10 sencwadi ethi, Thabela Ukuphila Ngokungapheliko! bona ukhuthaze umuntu ofunda naye. Ngaphambi kobana incwadi le itjhatjhululwe, yanikelwa abatjhumayeli ababomakadebona bona basebenzise isifundwesi kubantu abafunda nabo iBhayibheli. Nababikako, bathi incwadi le ibe nomphumela omuhle ekusizeni abantu ababafundelako bona baye emihlanganweni. Akukafuzi ulinde benifike esifundweni 10 sencwadi le kukulapho uthoma khona ukumemela umuntu ofunda naye iBhayibheli esifundweni. Mmeme msinya begodu uragele phambili wenza njalo. Ubujamo babantu esifunda nabo iBhayibheli abufani. Tjheja iindingo zomuntu ofunda naye bese ulinga ukumsiza. Ungapheli amandla nakumthatha isikhathi ngaphambi kokuza esifundweni. Mbekezelele, uragele phambili nokummema.

15. Khuyini engenza abantu ofunda nabo iBhayibheli basabe?

¹⁵ Uyakhumbula uzizwa usaba kancani ngokuba ngomunye waboFakazi bakaJehova? Kungenzeka wacabanga ukuthi ngekhe wakghona ukutjhumayela tjhatjhalazi. Namkha kungenzeka bewusaba ukuthi umndenakho nabangani bakho ngekhe bakwamukela. Nangabe kunjalo, ungakghona ukuzwisisa umuntu ofunda naye iBhayibheli. UJesu watjho ukuthi ukusaba okunjalo kuzokuba khona. Nanyana kunjalo, wabawa abalandeli bakhe ukuthi bangavumeli ukusaba kubakhandele ekulotjheni uJehova. (Mat. 10:16, 17, 27, 28) UJesu wabasiza njani abalandeli bakhe ukuthi bahlule ukwesaba? Ungasilandela njani isibonelo sakhe?

16. Singabasiza njani abantu esifunda nabo bona bakhulume ngalokho abakufundileko?

¹⁶ Bandula umuntu ofunda naye bona akhulume ngokukholwa kwakhe. Kungenzeka ukuthi abafundi bakaJesu barhidlwa livalo nakufuze bayokutjhumayela. Nanyana kunjalo, uJesu wabasiza ngokuthi abatjele ukuthi kufuze batjhumayele kuphi nokuthi khuyini ekufuze batjhumayele ngayo. (Mat. 10:5-7) Ungamlingisa njani uJesu? Siza umuntu ofunda naye abone ukuthi kukuphi la angatjhumayela  khona. Ngokwesibonelo, mbuze ukuthi ukhona na umuntu acabanga ukuthi kungamzuzisa ukuzwa amaqiniso athileko aseBhayibhelini. Bese umsize alungiselele lokho azokutjho ngokuthi umtjengise indlela elula yokutjhumayela kwabanye. Nakufanelekako, ungasebenzisa ingcenye ethi, “Abanye Abantu Bathi” nethi, “Omunye Angabuza Athi,” encwadini ethi, Thabela Ukuphila Ngokungapheliko! Njengombana wenza njalo, dzimelela ekubanduleni umuntu ofunda naye ukuthi asebenzise iBhayibheli ukunikela impendulo ezilula nezizuzisako.

17. Singamsebenzisa njani uMatewu 10:19, 20, 29-31 ekusizeni abantu esifunda nabo bathembe uJehova?

¹⁷ Siza umuntu ofunda naye bona athembe uJehova. UJesu waqinisekisa abafundi bakhe ukuthi uJehova uzobasiza ngombana uyabathanda. (Funda uMatewu 10:19, 20, 29-31.) Khumbuza umuntu ofunda naye ukuthi naye uJehova uzomsiza. Ungamsiza ukuthi athembe uJehova ngokuthandaza naye. U-Franciszek, ohlala e-Poland uthi: “Umuntu obekafunda nami iBhayibheli bekahlala akhuluma ngemigomwami emthandazwenakhe. Nangibona ukuthi uJehova bekayiphendula njani imithandazwakhe, nami ngathoma ukuthandaza. Bengilizwa isizo lakaJehova nangitlhoga ukuthi ngithathe amalanga emsebenzini bona ngikghone ukuya emhlanganweni emikhulu nesifundweni.”

18. UJehova uzizwa njani ngamaKrestu afundisa abanye iBhayibheli?

¹⁸ UJehova unendaba khulu nabantu esifunda nabo iBhayibheli. Kuyamthabisa ukubona amaKrestu asebenza budisi asiza abantu bona batjhidelane naye begodu uyabathanda ngalokho. (Isa. 52:7) Nangabe nje awunaso isifundo seBhayibheli osiragako, ungakghona ukusiza abafundelwa iBhayibheli bathuthukele ekubhajadisweni ngokuthi uphekelele labo abaneemfundo zeBhayibheli.