USara * uthi: “Ngimumuntu oneenhloni ngokwemvelo begodu ngiyazinyaza. Lokho kwenza ngingatjhaphuluki kuhle nanginabantu abakhuluma khulu begodu abaveza imibonwabo ngendlela ebukhali. Kodwana nanginomuntu onommoya ophasi begodu othobekileko ngizizwa ngitjhaphulukile. Ngikghona ukucoca kuhle nomuntu loyo ngimtjele ngendlela engizizwa ngayo nezinto ezingitshwenyako. Abangani bami bababantu abathobekileko nabanommoya ophasi.”

Amezwi kaSara atjengisa ukuthi nasibabantu abanommoya ophasi abantu bayakubona lokho begodu bangafuna ukuba bangani bethu. Ukuba nommoya ophasi kuyamthabisa uJehova. IliZwi lakhe lisikhuthaza lithi: “Mbathani . . . ummoya ophasi.” (Kol. 3:12) Kutjho ukuthini ukuba nommoya ophasi? UJesu watjengisa njani ukuthi unommoya ophasi? Ubuntobu bungasenza njani sibe babantu abathabileko?

Ummoya ophasi mphumela wokuba mumuntu onokuthula. Umuntu onommoya ophasi ubaphatha kuhle abanye, uyayicabangela imizwa yabanye begodu uyazibamba izinto nazingakhambi kuhle.

Ukuba nommoya ophasi kutjengisa ukuthi ukghona ukuzibamba nokulawula indlela ozizwa ngayo. Ibizo lesiGirigi elitjhugululwa ngokuthi ukuba ‘nommoya ophasi’ belisetjenziselwa ukuhlathulula ipera yommango eyenzwe ukuthi ilawuleke bulula. Amandla inawo, nanyana kunjalo beyibandulelwa ukuthi iwasebenzise njani. Yeke nathi nasinommoya ophasi sisuke silawula indlela engakalungi esizizwa ngayo begodu sibe nokuthula nabanye.

Ungazitjela ukuthi: ‘Angisimumuntu onommoya ophasi.’ Kodwana siphila nabantu ababhalelwa kuzibamba begodu abaneenhliziyo ezincani, ngebanga lalokho kungaba budisi ukuthi sibe nommoya ophasi. (Rom. 7:19) Kutlhoga umzamo ukuba nommoya ophasi, uJehova angasebenzisa ummoyakhe ocwengileko bona usisize sibe nommoya ophasi. (Gal. 5:22, 23) Kubayini kufuze sikulwele ngamandla ukuba nommoya ophasi?

 Umuntu onommoya ophasi uyathandeka. Njengombana uSara esimdzubhule ngaphambilini atjhwile, kuyathabisa ukuba nabantu abanommoya ophasi. UJesu usibonelo esihle khulu sokuba nommoya ophasi. (2 Kor. 10:1) Ngitjho nabantwana ebebangamazi bebafuna ukuza kuye.—Mar. 10:13-16.

Ukuba nommoya ophasi kuyasivikela begodu kuvikele nabanye. Nasinommoya ophasi asisilingeki msinya. (IzA. 16:32) Sizokubalekela ukuzwisa abanye ubuhlungu begodu lokho kuzosenza singazizwa sinonembeza obuhlungu ngebanga lokuthi sikhulume into esizisola ngayo, khulukhulu emuntwini esimthandako. Ukuba nommoya ophasi kuvikela abanye ngombana nasinabo sizokulawula indlela esizizwa ngayo begodu sizokubalekela ukubazwisa ubuhlungu.

UJesu bekamumuntu onezinto ezinengi ebekufuze azenze begodu anommoya ophasi. Abantu abanengi ebebaphila ngesikhathi sakhe bebatlhaga begodu bagandelelekile bebatlhoga ukududuzwa. Akhucabange ukuthi bazizwa batjhaphuluke kangangani uJesu nakazakuthi: “Yizani kimi, . . . ngombana nginommoya ophasi nehliziyo ethobekileko.”—Mat. 11:28, 29.

Singafunda njani ukuba nommoya ophasi njengoJesu? Ngokuthi sifunde iBhayibheli sibone indlela uJesu ebekaphatha ngayo abantu. Sibone nangendlela aqalana ngayo nobujamo obubudisi. Yeke nasiqalana nobujamo obungalinga ukubakwathu nommoya ophasi. Sizokulinga ukulingisa uJesu. (1 Pit. 2:21) Cabanga ngamaphuzu amathathu asiza uJesu ukuthi abe nommoya ophasi.

UJesu bekathobekile. UJesu wathi: “Nginommoya ophasi nehliziyo ethobekileko.” (Mat. 11:29) IBhayibheli lithi ukuthobeka kukhambisana nokuba nommoya ophasi. (Efe. 4:1-3) Kubayini litjho njalo?

Ukuthobeka kuzosisiza bona singakhambi silinyazwa nazizinto ezincani. UJesu wazizwa njani lokha nabahlekisa ngaye bathi ‘usirhiribideli’ begodu ‘uzinikelele ewayinini’? Watjengisa ngendlela aphila ngayo ukuthi lokho bekumamala, ngebanga lokuthi bekathobekile wathi: “Ukuhlakanipha kubonakala kulungile ngemisebenzako.”—Mat. 11:19.

Akhesithi ngokwesibonelo umuntu uhlekisa ngawe ngebanga lesitjhaba ovela kiso, ubulili bakho namkha imvelaphi yakho, kubayini ungazimiseli ukuphendula ngommoya ophasi? UPeter umdala weSewula Africa uthi: “Nakwenzeka ngisilingeka ngebanga lento ekhulunywe mumuntu ngizibuza umbuzo othi, ‘UJesu bekazokwenza njani?’ Ngifunde ukungasolo ngilinyazwa zizinto ezincani.”

UJesu bekazi ukuthi abantu banesono. Abafundi bakaJesu bebahlala bafuna ukwenza okulungileko kodwana ngezinye iinkhathi bebenza okungakalungi ngebanga lesono. Ngokwesibonelo, ngobusuku bakhe bamaswaphela ephasini uPitrosi, uJakopo noJwanisi babhalelwa kuhlala balindile njengombana uJesu bekababawile. UJesu watjengisa ukuthi uyayizwisisa indlela ebebazizwa ngayo nakathi “ummoya uyafisa, kodwana inyama iyabogaboga.” (Mat. 26:40, 41) Ngebanga lokuthi bekazwisisa ukuthi abapostoli bakhe banesono, akhenge asilingeke.

UMandy ngudade obekahlala alindele okunengi kabanye, kodwana sikhuluma nje ulinga ngamandla ukulingisa isibonelo sakaJesu. Uthi: “Ngilinga ngamandla ukwamukela ukuthi abantu abakapheleli, ngilinga nokubona izinto ezihle abazenzako okuyinto noJehova ayenzako.” Indlela uJesu azwela ngayo abanye, ngitjho nangesikhathi benza imitjhapho ingakusiza na bona nawe ubazwele?

UJesu wathembela kuZimu. Nakasephasini wakghodlhelela ukuphathwa kumbi. Abantu bebangamzwisisi, bamdelela begodu bamtlhorisa. Nanyana kunjalo, bekasolo anommoya ophasi ngombana “wazibeka kiloyo owahlulela ngokulunga.” (1 Pit. 2:23) UJesu bekazi ukuthi uYise osezulwini uzomsiza bona akghodlhelele begodu uzobajezisa labo ebebamphatha kumbi.

Nasisilingeka begodu sizilwele thina, singenza ubujamo burhagale. Kungebangelo imiTlolo ithi: “Itukuthelo yomuntu ayilethi ukulunga kwakaZimu.” (Jak. 1:20) Ngitjho nanyana sisilingeke kufanele, ukungapheleli kwethu kungasenza sitjhaphe.

UCathy udade weGermany yena bekacabanga ukuthi, ‘Nawungajameli iindaba zakho, akakho umuntu ongakujamela.’ Kodwana wafunda ukuthembela kuJehova, indlela acabanga ngayo yatjhuguluka.  Uthi: “Akutlhogeki ngijamele iindaba zami, kuyangithabisa ukuba nommoya ophasi ngombana ngiyazi ukuthi uJehova uyakubona koke okwenzekako.” Nakungenzeka ukuthi wakhe waphathwa kumbi, landela umtlhala kaJesu uthembe ukuthi uZimu uzokusiza uhlale unommoya ophasi.

UJesu wathi nasifuna ukuthaba kufuze sibe nommoya ophasi. Wathi: “Bayathaba abathobekileko.” (Mat. 5:5) Tjheja ubujamo obulandelako lapho ukuba nommoya ophasi kungakusiza khona.

Ukuba nommoya ophasi kuyasiza nakuvela iintjhijilo emtjhadweni. URobert umfowethu we-Australia uthi: “Ngikhulume amezwi amanengi ahlabako kumkami kodwana bengingakahlosi ukwenza njalo, angekhe wakghona ukuwabuyisela emuva amezwi ahlabako owakhulumileko. Kwangizwisa ubuhlungu ukubona indlela engilimaze ngayo umkami.”

“Soke siyatjhapha iinkhathi ezinengi” endleleni esikhuluma ngayo, amezwi esiwatjho singakacabangi angaqeda ukuthula emtjhadweni. (Jak. 3:2) Ebujamweni obunjalo, ukuba nommoya ophasi kungasisiza silawule indlela esikhuluma ngayo.—IzA. 17:27.

URobert wasebenza budisi bona akghone ukuzibamba. Ube yini umphumela walokho? Uyaphendula uthi: “Nakwenzeka singaboni izinto ngendlela efanako, ngilinga ukulalelisisa, ngikhulume ngokuzithoba begodu ngilinga ukungasilingeki. Njenganje indlela esizwana ngayo sinomkami ingcono.”

Ukuba nommoya ophasi kwenza sizwane nabanye abantu. Abantu abakhubeka msinya ababi nabangani abanengi. Kodwana ukuba nommoya ophasi kwenza ‘silonde . . . ubunye bommoya nesibopho esibumbanisako sokuthula.’ (Efe. 4:2, 3) UCathy ekhesakhuluma ngaye phambilini uthi: “Ukuba nommoya ophasi kungenze ngasebenzelana nabanye ngokuthula ngitjho nanyana kubudisi ngezinye iinkhathi.”

Ukuba nommoya ophasi kwenza ube nokuthula. IBhayibheli ihlobanisa “ukuhlakanipha kwaphezulu” nokuba nommoya ophasi nokuthula. (Jak. 3:13, 17) Umuntu onommoya ophasi ‘unehliziyo enokuthula.’ (IzA. 14:30) UMartin wasebenza budisi bona abe nommoya ophasi, nje uthi: “Angisesemumuntu ofuna abantu benze izinto ngendlelami, sengimumuntu othabileko begodu nginokuthula.”

Iye khona kuliqiniso ukuthi akusibulula ukuba nommoya ophasi. Omunye umfowethu uthi: “Nasele ngikhuluma iqiniso, khengisilingeke ngiqede itjhukela kezinye iinkhathi.” UJehova uthi kufuze sibe nommoya ophasi, yeke uzosisiza sikghone ukwenza njalo. (Isa. 41:10; 1 Thim. 6:11) “Uzokuqedelela ukubandulwa kwenu” begodu ‘uzosenza sibe namandla.’ (1 Pit. 5:10) Nathi sizokufana noPowula, silingise uKrestu ngokuba ‘nomusa nommoya ophasi.’—2 Kor. 10:1.