UMUNTU obikezela ubujamo bezulu uhlahluba isithombe sobujamo bezulu. Ubona amawuruwuru eza ngamandla endaweni lapho kuhlala khona abantu abanengi. Ngebanga lokuthi utshwenyekile ngokuphepha kwabantu, wenza koke okusemandlenakhe bona abayelelise kusesenesikhathi.

Ngendlela efanako, uJehova nje uyelelisa abantu ‘ngesiwuruwuru’ esimbi khulu, esidlula nanyana ngisiphi abakhe bezwa ngaso nakubikezelwa ubujamo bezulu. Ukwenza njani lokho? Kubayini singaqiniseka ngokuthi unikela abantu isikhathi esaneleko sokwenza okuthileko? Bona sifumane iimpendulo, akhesicoce ngezinye iinyeleliso uJehova azinikela esikhathini esadlulako.

Ekadeni, uJehova wayelelisa abantu ‘ngamawuruwuru’ ahlukahlukeneko namkha ngezahlulelo azozilethela labo abangayilaleli imiyalwakhe. (IzA. 10:25; Jor. 30:23) Ebujamweni ngabunye, bekayelelisa abantu abangalaleliko kusesengaphambili, abatjele ukuthi khuyini okufuze bayenze bona bamlalele. (2 Kho. 17:12-15; Nerh. 9:29, 30) Bona abasize benze amatjhuguluko atlhogekako, kanengi bekasebenzisa iinceku zakhe ezithembekileko ukuthi zimemezele izahlulelo zakhe begodu zibasize bathathe igadango ngokurhabako.—Amo. 3:7.

UNowa bekangomunye weenceku ezithembekileko. Besele kuminyaka eminengi, ayelelisa abantu abaziphatha kumbi nabanenturhu ngoMthwalela ebewuzokufikela iphasi loke. (Gen. 6:9-13, 17) Wabatjela nokuthi khuyini ekufuze bayenze bona basinde, kungebangelo ngokukhamba kwesikhathi wabizwa ngokuthi “umtjhumayeli wokulunga.”—2 Pit. 2:5.

Naphezu kwemizamo uNowa ayenzako, abantu ebebaphila ngaphambi koMthwalela azange bawulalele umlayezo kaZimu. Akhenge babe nokukholwa. Umphumela walokho, bafa ‘nakufika uMthwalela wabarhurhula boke.’ (Mat. 24:39; Heb. 11:7) Njengombana ukuphela kutjhidela, bengekhe batjho ukuthi uZimu akhenge abayelelise kusesenesikhathi.

Ngezinye iinkhathi, uJehova wayelelisa abantu abathileko ngaphambi kokufika ‘kwesiwuruwuru’ ebesitjho ukuthoma kokwahlulela. Nanyana kunjalo, bekaqiniseka ngokuthi labo abayelelisako, ubanikela nesikhathi esaneleko bona benze amatjhuguluko. Ngokwesibonelo, wathoma ngokukhupha iinyeleliso isikhathi ngasinye nakaletha iiMbetho eziliTjhumi eGibhide lekadeni. Kesinye isibonelo, uJehova wathumela uMosi no-Aroni bona bayokuyelelisa uFaro neenceku zakhe ngesibetho sekhomba, okusiwuruwuru esikhambisana nesinanja. Njengombana isinanja besizokuthoma ngelanga elilandelako, kghani uJehova wabanikela isikhathi esaneleko bona babaleke? IBhayibheli lithi: “Iinkhulu zakaFaro ezesaba ilizwi lakaSomnini zarhaba zaletha amakhobokazo nefuywazo ngesidalasini. Kodwana lezo ezabeba ilizwi lakaSomnini zalisa amakhobokazo nefuywazo emrhuleni.” (Eks. 9:18-21) Kuyakhanya ukuthi uJehova wabayelelisa kanengi, ukwenzela bona labo abathatha igadango ngokurhabako basinde.

UFaro neenceku zakhe nabo bayeleliswa ngaphambi kobana kufike isibetho setjhumi. Nanyana kunjalo, batjengisa ubudlhadlha ngokungasilaleli isiyelelisweso. (Eks. 4:22, 23) Umphumela walokho, amadodanabo amazibulo afa. Lokho kwaba kumbi khulu! (Eks. 11:4-10; 12:29) Kghani bekufuze basilalele isiyelelisweso kusesenesikhathi? Iye! UMosi wasikimela phezulu wayelelisa ama-Israyeli ngesibetho setjhumi esizako begodu wabayelelisa ngokuthi bangasinda njani nemindenabo. (Eks. 12:21-28) Bangaki abantu abalalelako? Ngokwesilinganiso esithileko, iingidi  ezintathu zabantu kuhlanganise nama-Israyeli ‘nesiqubuthu sabantu’ bezinye iintjhaba nebeGibhide, basinda esahlulelweni sakaZimu.—Eks. 12:38.

Njengombana sibonile, uJehova uhlala aqiniseka bona ubanikela isikhathi esaneleko abantu ukuthi balalele iinyeleliso zakhe. (Dut. 32:4) Bewuyini umnqopho kaZimu ngalokho? Umpostoli uPitrosi wathi uJehova ‘akafisi ukuthi namunye atjhabalale kodwana ufisa bona boke batjhuguluke.’ (2 Pit. 3:9) Iye, uZimu bekanendaba nabantwabo. Bekafuna bona batjhuguluke begodu bathathe amagadango ngaphambi kokufika kwesahlulelo sakhe.—Isa. 48:17, 18; Rom. 2:4.

Nanamhlanjesi boke abantu kufuze bawulalele msinyana umlayezo orhatjhwa ephasini mazombe. Nakasesephasina, uJesu wayelelisa ngokuthi ubujamo bephaseli buzokupheliswa hlangana “nesizi elikhulu.” (Mat. 24:21) Malungana nesahlulelo esizakweso, wakhuluma ngesiphorofido ebesihlathulula ngokukhanyako ukuthi khuyini abalandeli bakhe okufuze bayilindele nabazoyibona njengombana kutjhidela isikhatheso. UJesu wakhuluma nangezenzakalo ezikulu esizibona zenzeka namhlanjesi.—Mat. 24:3-12; Luk. 21:10-13.

Ngokuvumelana nesiphorofidweso, nje uJehova ukhuthaza woke umuntu bona azithobe ekubuseni kwakhe okunethando. Ufisa ukuthi abantu abalalelako bathabele ukuphila okungcono nje kuhlanganise neembusiso ezizako ephasini elitjha lokulunga. (2 Pit. 3:13) UJehova ufuna ukusiza abantu bona bakholelwe eenthembisweni zakhe. Ubasiza ngokuthi abanikele umlayezo ozokusindisa ukuphila kwabo. Umlayezo loyo ‘ziindaba ezimnandi zomBuso,’ uJesu azibikezelako ukuthi “zizokutjhunyayelwa kilo loke iphasi bona kube bufakazi kizo zoke iintjhaba.” (Mat. 24:14) UZimu uhlophise amaKrestu weqiniso bona anikele “ubufakazi,” namkha umlayezwakhe bona waziwe eenarheni ezingaphezu kwama-240. UJehova ufuna abantu abanengi ngendlela okungakghoneka ngayo ukuthi balalele begodu basinde esiwuruwurwini esizako sesahlulelo sakhe sokulunga.—Zef. 1:14, 15; 2:2, 3.

Umbuzo oqakathekileko, awusikukuthi kghani uJehova uyabanikela na abantu isikhathi esaneleko sokulalela iinyeleliso zakhe. Ubufakazi butjengisa ukuthi uhlale akwenza lokho. Umbuzo oqakathekileko uthi: Kghani abantu bazozilalela na iinyeleliso zakaZimu kusesenesikhathi esaneleko? Njengombana siziinthunywa zakaZimu, kwangathi singaragela phambili sisiza abantu abanengi ngendlela esingakghona ngayo bona basinde nakuphela iphasi elimbeli.