1. Khuyini uJehova angayenza bona azalise umnqophwakhe?

UJEHOVA angaba nanyana yini bona azalise umnqophwakhe. Ngokwesibonelo, uJehova uMfundisi, uMduduzi begodu uMvangeli, la ngamanye wamagama aziwa ngawo. (Isa. 48:17; 2 Kor. 7:6; Gal. 3:8) Nanyana kunjalo, kanengi usebenzisa abantu bona azalise umnqophwakhe. (Mat. 24:14; 28:19, 20; 2 Kor. 1:3, 4) UJehova angasinikela ukuhlakanipha namandla esiwatlhogako bona senze intandwakhe. Koke lokhu kulihlathulula kuhle ibizo lakaJehova, njengombana lizwisiswa zizazi ezinengi.

2. (a) Kubayini ngezinye iinkhathi singazaza ukuthi uJehova angasisebenzisa? (b) Khuyini esizokucoca ngayo esihlokwenesi?

² Soke sifuna ukusetjenziswa nguJehova, kodwana abanye kungenzeka bazaze ukuthi angabasebenzisa. Kubayini? Kungombana bacabanga ukuthi angeze bakghona ukwenza okunengi ngendlela abafuna ngayo ngebanga leminyakabo, ubujamo namkha amakghono. Ngakelinye ihlangothi, abanye bangazizwa banelisekile ngalokho esele bakwenza begodu bangayiboni itlhogeko yokuthi bathuthuke. Esihlokwenesi, sizokucoca ngokuthi uJehova angabandula nanyana ngubani bona azalise umnqophwakhe. Ngemva kwalokho, sizokucoca ngeembonelo eziseBhayibhelini zeenceku zakaJehova, ezihlanganisa amadoda nabafazi awanikela isifiso namandla wokwenza  intandwakhe. Ekugcineni, sizokucoca ngendlela esingamvumela ngayo bona asisebenzise.

3. Ngokwalokho okutjhiwo mtlolo webeFilipi 2:13, uJehova angasinikela njani isifiso sokwenza intandwakhe?

³ Funda kwebeFilipi 2:13. * UJehova angasinikela isifiso sokwenza intandwakhe. Angakwenza njani lokho? Mhlamunye ebandleni sazi othileko otlhoga isizo. Namkha abadala basifundela incwadi evela e-ofisini legatja esitjela ukuthi kunetlhogeko ebandleni elithileko. Lokho kungasenza bona sizibuze, ‘Khuyini engingayenza bona ngisize?’ Mhlamunye sinikelwe isabelo esibudisi begodu asazi ukuthi sizosenza kuhle na. Ngemva kokufunda iliZwi lakaZimu, ungazibuza, ‘Ngingawusebenzisa njani umTlolo lo bona ngisize abanye?’ UJehova angeze asikatelela bona senze nanyana yini. Kodwana nakabonako ukuthi sicabanga ngalokho esikufundako, angakghona ukusinikela isifiso sokwenza lokho ebesifunda ngakho.

4. UJehova angasinikela njani amandla bona senze intandwakhe?

⁴ UJehova angasinikela amandla wokwenza intandwakhe. (Isa. 40:29) Angasinikela ummoya ocwengileko bona sithuthukise amakghono esele sinawo. (Eks. 35:30-35) Ngehlanganwakhe, uJehova angasifundisa indlela esingayenza ngayo imisebenzi ethileko. Nange ungaqiniseki ngokuthi ungasenza njani isabelo esithileko, bawa isizo. Godu zizwe utjhaphulukile ukubawa uBabethu wezulwini ophanako bona akunikele “amandla angaphezu kajayelekileko.” (2 Kor. 4:7; Luk. 11:13) IBhayibheli lineembonelo ezinengi zendlela uJehova asiza ngazo amadoda nabafazi ngokubanikela isifiso namandla wokwenza intandwakhe. Njengombana sizokucoca ngezinye zeembonelwezo, linga ukucabanga ngokuthi uJehova angakusebenzisa njani nawe ngendlela efanako.

5. Sifundani endleleni uJehova asebenzisa ngayo uMosi bona atjhaphulule abantu bakhe?

⁵ UJehova wenza uMosi bona atjhaphulule ama-Israyeli. Kodwana wamsebenzisa nini? Kghani kwenzeka ngemva kobana uMosi ‘afundiswe koke ukuhlakanipha kweGibhide’? (IzE. 7:22-25) Awa, uJehova wamsebenzisa ngemva kobana amfundise ukuthobeka. (IzE. 7:30, 34-36) Wanikela uMosi isibindi sokukhuluma nekosi yeGibhide enamandla. (Eks. 9:13-19) Sifundani endleleni uJehova asebenzisa ngayo uMosi? UJehova usebenzisa labo abalinga ngamandla ukulingisa ubuntu bakhe begodu bathembele kuye bona bafumane amandla.—Flp. 4:13.

6. Sifundani endleleni uJehova asebenzisa ngayo uBharzilayi bona asize iKosi uDavida?

⁶ Ngemva kwesikhathi esithileko, uJehova wasebenzisa uBharzilayi bona asize iKosi uDavida. UDavida nabantu ebekakhamba nabo ‘bebalambile nokudinwa badiniwe’ ngesikhathi babaleka indodanakhe u-Absalomu. UBharzilayi, obekasele aluphele ngesikhatheso, wafaka ukuphila kwakhe nokwabanye engozini bona asize uDavida nalabo ebekakhamba nabo. UBharzilayi akhenge aphethe ngokuthi sele akhulile, yeke uJehova angekhe asamsebenzisa. Kunalokho, wasebenzisa lokho ebekanakho bona asize iinceku zakaZimu ebezitlhoga isizo. (2 Sam. 17:27-29) Sifundani? Kungakhathaliseki bona sineminyaka emingaki, uJehova angasisebenzisa  bona sisize esikholwa nabo, esihlala nabo namkha abakwezinye iinarha. (IzA. 3:27, 28; 19:17) Ngitjho nanyana singakghoni ukubasiza ngokunqophileko, kodwana singakghona ukunikelela umsebenzi wephasi loke ukwenzela bona imali leyo isize abafowethu nabodadwethu.—2 Kor. 8:14, 15; 9:11.

7. UJehova wamsebenzisa njani uSimiyoni begodu ukwazi lokho kusikhuthaza njani?

⁷ UJehova wathembisa uSimiyoni, indoda ebesele iluphele yeJerusalema ukuthi angekhe ihlongakale ngaphambi kobana ibone uMesiya. Kungenzeka bona isithembisweso samkhuthaza khulu uSimiyoni, ngombana besele kusikhathi eside alinde uMesiya. UJehova wakubusisa ukukholwa nokukghodlhelela kwakhe. Ngelinye ilanga ‘anqotjhiswa mummoya,’ weza ethempelini. Nakalapho wabona isana elinguJesu begodu uJehova wamsebenzisa bona abikezele ngomntwana obekazokuba nguKrestu. (Luk. 2:25-35) Ngitjho nanyana kungenzeka bona uSimiyoni wahlongakala ngaphambi kokuthi uJesu athome umsebenzakhe wokutjhumayela, wakuthabela ukusetjenziswa nguJehova ngendlela le, kusese nezinto ezinengi ezihle asazozibona. Ephasini elitjha, indoda ethembekileko le izokubona ukuthi ukubusa kwakaJesu kuzokuba njani sibusiso ebantwini boke. (Gen. 22:18) Nathi singakuthabela ukusetjenziswa nguJehova emsebenzinakhe.

8. UJehova angasisebenzisa njani njengombana asebenzisa uBharinabhasi?

⁸ Ngeenkhathi zabapostoli, indoda ethileko ebizwa ngokuthi nguJosefa beyinesifiso sokusetjenziswa nguJehova. (IzE. 4:36, 37) Ngebanga lokuthi beyiphumelela ekududuzeni abanye, abapostoli bayibiza ngokuthi nguBharinabhasi okutjho ukuthi “iNdodana yeNduduzo.” Ngokwesibonelo, uSawula nakabamKrestu, abanye ebandleni bebamsaba ngebanga lokuthi bekahlunguphaza labo ebebakholelwa kuJesu. Nanyana kunjalo, uBharinabhasi wasiza uSawula bewamduduza, uSawula kwamthabisa khulu lokho. (IzE. 9:21, 26-28) Ngemva kwesikhathi esithileko, abadala beJerusalema bekufuze bakhuthaze amaKrestu we-Anthiyokiya yeSiriya. Alo-ke bathuma ubani? UBharinabhasi! Bebakhethe kuhle ngombana iBhayibheli lithi, “wabakhuthaza boke bona bahlale eKosini ngokuzimisela okuvela ehliziyweni.” (IzE. 11:22-24) Nanamhlanjesi, uJehova angasisiza bona siduduze abafowethu nabodadwethu. Ngokwesibonelo, angasisebenzisa bona siduduze abahlongakalelweko. Angasisebenzisa bona sikhuthaze abantu abagulako nabagandelelekileko ngokuthi sibavakatjhele namkha sibadosele umtato. Kghani uzomvumela uJehova bona akusebenzise njengoBharinabhasi?—1 Thes. 5:14.

9. Sifundani endleleni uJehova asiza ngayo uVasily bona abe mdala ofanelekako?

⁹ UJehova wasiza umfowethu obizwa ngokuthi nguVasily bona abe mdala ofanelekako. Lokha uVasily nakabekwa bona abe mdala bekaneminyaka ema-26, bekanevalo lokuthi angekhe akghona ukutlhogomela ibandla, khulukhulu ukusiza abaqalene nobudisi. Nanyana kunjalo, abanye abadala bambandula begodu nesiKolo sabaDala samsiza kwamambala. Yeke uVasily wasebenza ngamandla bona athuthuke. Ngokwesibonelo, wazenzela ihlelo lezinto angakghona ukuzenza. Kwathi nasele akghona ukuzenza, wazizwa azithemba. Nje uthi: “Izinto ebengizisaba esikhathini esidlulileko seziyangithabisa. UJehova nakangisiza bona ngifumane umtlolo engingakhuthaza ngawo umfowethu namkha udadwethu, lokho kuyangithabisa.” Bafowethu, nangabe sivumela uJehova bona asisebenzise  njengoVasily, uzosinikela amandla wokwenza okungeziweko ebandleni.

10. U-Abigeyili wenzani begodu khuyini oyifundako esibonelweni sakhe?

¹⁰ Lokha uDavida nabakhambisani bakhe nabagijimiswa yiKosi uSawula, bebatlhoga isizo. Yeke abakhambisani bakhe babawa ukudla endodeni enjingileko yakwa-Israyeli uNabhali, babawa nanyana yini ebekangabapha yona. Akhenge basabe ukubawa ngombana bebavikela imihlambi kaNabhali emangweni. Ngebanga lokuzicabangela yena kwaphela, akhenge abaphe litho. UDavida wasilingeka khulu bewafuna ukubulala uNabhali nawo woke amadoda ebekasemzinakhe. (1 Sam. 25:3-13, 22) Umfazi kaNabhali u-Abigeyili bekamuhle begodu ahlakaniphile. Ngesibindi waguqa eenyaweni zakaDavida wamrabhela bona angabi nomlandu wokuthulula iingazi ngokuthi abulale uNabhali neensebenzi zakhe. Ngokuhlakanipha wambawa ukuthi athembele kuJehova bona amsize. Amezwi womusa ka-Abigeyili nezenzo zakhe zokuhlakanipha zamthinta kwamambala uDavida. Walemuka ukuthi bekathunyelwe nguJehova. (1 Sam. 25:23-28, 32-34) U-Abigeyili watjengisa iimfanelo ezamenza bona asetjenziswe nguJehova. Ngokufanako, abodadwethu abamaKrestu abanelemuko bangasetjenziswa nguJehova bona baqinise imindenabo nabanye ebandleni.—IzA. 24:3; Tit. 2:3-5.

11. Khuyini eyenziwa madodakazi kaTjhalumu begodu bobani ababalingisako namhlanjesi?

¹¹ Ngemva kwesikhathi esithileko, amadodakazi kaTjhalumu bewaphakathi kwabantu uJehova abasebenzisako nakuvuselelwa amaboda weJerusalema. (Nerh. 2:20; 3:12) Ngitjho nanyana ubababo bekayikosi, amadodakazi kaTjhalumu bewazimisele ukwenza umsebenzi obudisi lo noyingozi. (Nerh. 4:15-18) Akhenge afane namadoda wamaTekhowa ebewabosaziwako ‘angazange afake isandla’ emsebenzini. (Nerh. 3:5) Akhucabange ukuthi amadodakazi kaTjhalumu athaba kangangani nakuphela umsebenzi ngamalanga ama-52! (Nerh. 6:15) Namhlanjesi, ngokuzithandela abodadwethu benza imisebenzi ekhethekileko kuZimu njengokwakha nokutlhogomela imakhiwo kaJehova. Umsebenzi lo nawuzakuphumelela, siyabatlhoga abodadwethwaba abanamakghono, itjiseko nabathembekileko.

12. UJehova angasisebenzisa njani njengombana asebenzisa uThabitha?

¹² UJehova wasebenzisa uThabitha bona akhule ‘ekwenzeni izenzo ezinengi ezihle.’ Khulukhulu ekusizeni abahlolokazi. (IzE. 9:36) Ngebanga lokuthi bekanomusa begodu aphana, abanengi bamlilela nakahlongakalako. Kwathi lokha umpostoli uPitrosi nakamvusako bathaba khulu. (IzE. 9:39-41) Sifundani kuThabitha? Kungakhathaliseki bona sibancani nofana sibakhulu, simadoda namkha sibafazi, soke singabasiza abafowethu nabodadwethu.—Heb. 13:16.

13. UJehova wamsebenzisa njani udadwethu oneenhloni uRuth begodu wathini uRuth ngalokho?

¹³ Udade oneenhloni ibizo lakhe elinguRuth bekafuna ukuba sithunywa sevangeli. Nakasesemntazanyana, bekathanda ukugijima angene umuzi nomuzi anikele abantu amaphetjhana. Uthi: “Bengiwuthanda khulu umsebenzi lo.” Nanyana kunjalo, ukungena umuzi nomuzi atjela abantu ngomBuso kaZimu bekusitjhijilo kuye. Naphezu kokuba neenhloni, uRuth waba liphayona lesikhathi esizeleko aneminyaka eli-18. Ngo-1946, wabizelwa esiKolweni seGiliyadi, kwathi ngemva kwalokho wafumana isabelo sokuya eHawaii  neJapan. UJehova wamsebenzisa bona enze okunengi emsebenzini wokutjhumayela eenarhenezo. Pheze ngemva kweminyaka ema-80 atjhumayela, uRuth uthi: “UJehova bekamthombo wenduduzo kimi. Wangisiza bona ngihlule ukuba neenhloni. Ngiyaqiniseka ukuthi uJehova angasebenzisa nanyana ngubani omthembako.”

14. UmTlolo webeKolose 1:29, uthi kufuze senzeni nasizakusetjenziswa nguJehova?

¹⁴ Kiwo woke umlando, uJehova usebenzise iinceku zakhe ngeendlela ezihlukahlukeneko. Kghani wena uzokusebenzisa njani? Kuzokuya ngokuthi uzimisela kangangani ukusebenza budisi. (Funda kwebeKolose 1:29.) Nawuzimisele ukusebenzela uJehova, uzokwenza bona ube mtjhumayeli okhutheleko, umfundisi ophumelelako, umduduzi, isisebenzi esinekghono, umngani omuhle, namkha nanyana yini afuna uyenze bona ufeze intandwakhe.

15. Njengombana kutjho yoku-1 kaThimothi 4:12, 15, khuyini abafowethu abasesebatjha okufuze babawe uJehova abasize bona bayenze?

¹⁵ Kuthiwani ngabafowethu abasesebatjha esele bayela eminyakeni yobudala? Kunetlhogeko ekulu yamadoda anamandla azokusiza ebandleni ngokuba ziinceku ezisizako. Emabandleni amanengi, kunabadala banengi ukudlula iinceku ezisizako. Bafowethu abasesebatjha, kghani ningasiza na ngokuzimisela ukwenza okungeziweko emabandleni? Ngezinye iinkhathi, kunabanye abafowethu abathi, “Ngiyakuthabela ukuba mrhuweleli nje kwaphela.” Nangabe nawe uzizwa ngendlela le, bawa uJehova akusize uhlawulele isifiso sokufaneleka ukuba yinceku esizako begodu akunikele amandla wokwenza nanyana yini bona umlotjhe. (UMtj. 12:1) Sitlhoga isizo lakho!—Funda yoku-1 kaThimothi 4:12, 15.

16. Khuyini okufuze siyibawe uJehova begodu kubayini?

¹⁶ UJehova angakwenza ube nginanyana yini afuna ube ngiyo bona afeze intandwakhe. Yeke mbawe akunikele isifiso sokwenza umsebenzakhe begodu umbawe akunikele amandla owatlhogako. Kungakhathaliseki ukuthi umncani namkha umdala, sisebenzise kuhle isikhathi sakho, amandla nezinto onazo bona udumise uJehova nje. (UMtj. 9:10) Ungavumeli ukusaba namkha ukuzizwa ungasililitho kukwenze ulise amathuba amahle wokwenza koke ongakwenza bona ulotjhe uJehova. Kulilungelo elihle khulu soke esinalo lokuba nengcenye encani ekudumiseni uBabethu onethando!