1. Abantu abanengi batjharaganiswa yini?

MANENGI amasondo azibiza ngokuthi maKrestu alotjha uZimu ngendlela ayamukelako. Ngikho abantu batjharagene kangaka namhlanjesi! Bayabuza ukuthi, “Kghani kunekolo yinye yeqiniso namkha zoke iinkolo ziyamthabisa uZimu?” Thina siyaqiniseka na ukuthi lokho esikufundisako kuliqiniso nokuthi indlela aboFakazi bakaJehova abalotjha ngayo namhlanjesi ngeyamukelekako kuJehova? Kghani siyaqiniseka na ukuthi silifumene iqiniso? Akhesiqale ubufakazi balokho.

2. Umtlolo woku-1 webeThesalonika 1:5 uthi kubayini umpostoli uPowula bekaqiniseka ukuthi ufumene iqiniso?

² Umpostoli uPowula bakaqiniseka ngokuthi ulifumene iqiniso. (Funda yoku-1 kwebeThesalonika 1:5.) Ukuqinisekokho bekungasekelwa endleleni azizwa ngayo. UPowula bekakhuthalele ukufunda iliZwi lakaZimu. Bekakholelwa ukuthi “woke umTlolo uphefumulelwe nguZimu.” (2 Thim. 3:16) Khuyini ayifundako? EmiTlolweni, wafumana ubufakazi obungaphikisekiko bokuthi uJesu bekanguMesiya othenjisiweko, okubufakazi abadosiphambili bekolo yobuJuda abakhethe akungabunaki. Abazenzisabo bebathe bafundisa iqiniso ngoZimu kodwana izenzo zabo bezikuphika lokho. (Tit. 1:16) Ngokuhlukileko, uPowula akhenge akhethe ukuthi uzokukholelwa iingcenye ezithileko zeliZwi lakaZimu. Bekakulungele ukufundisa nokwenza “woke umnqopho kaZimu.”—IzE. 20:27.

3. Kghani sitlhoga ukwazi zoke iimpendulo zemibuzo esinayo ukuthi siqiniseke ngokuthi silifumene iqiniso? (Qala ibhoksi elithi “ Imisebenzi KaJehova Nemicabangwakhe ‘Minengi Khulu Kobana Ingabalwa.’”)

 ³ Abantu abathileko bacabanga ukuthi ikolo yeqiniso kufuze ikwazi ukuphendula yoke imibuzo, ngitjho naleyo engaphendulwa ngokunqophileko yiBhayibheli. Kghani kungakghoneka lokho? Cabanga ngesibonelo sakaPowula. Wakhuthaza amanye amaKrestu ukuthi ‘aqiniseke ngazo zoke izinto,’ bewavuma nokuthi akazwisisi zoke izinto. (1 Thes. 5:21) Watlola wathi “sinelwazi elingakapheleli,” bewangezelela ngokuthi “sibona lififi esibonibonini sesimbi.” (1 Kor. 13:9, 12) Powula bekangazwisisi zoke izinto, nathi ngokufanako. Kunalokho, bakawazwisisa kuhle amaqiniso asisekelo malungana nomnqopho kaJehova. Bekanelwazi elaneleko ebelimqinisekisa ukuthi ufumene iqiniso!

4. Singaqiniseka njani ukuthi silifumene iqiniso begodu sizokucoca ngani emalungana namaKrestu weqiniso?

⁴ Enye indlela esingaqiniseka ngayo ukuthi silifumene iqiniso kumadanisa isibonelo esabekwa nguJesu sokulotjha uJehova nalokho okwenziwa boFakazi bakaJehova namhlanjesi. Esihlokwenesi, sizokubona ukuthi amaKrestu weqiniso (1) akalotjhi iinthombe, (2) ahlonipha ibizo lakaJehova, (3) athanda iqiniso leBhayibheli, begodu (4) athandana wona ngokwawo.

5. Khuyini esiyifunda kuJesu malungana nendlela efaneleko yokulotjha uZimu begodu singakusebenzisa njani lokho?

⁵ Ngebanga lokuthanda uJehova khulu, uJesu walotjha uJehova kwaphela,  kokubili nakasezulwini nalokha nakasephasini. (Luk. 4:8) Wafundisa abalandeli bakhe ukwenza okufanako. UJesu nabalandeli bakhe akhenge bathome balotjhe iinthombe. Njengombana uZimu aMmoya, akakho umuntu ongamenza! (Isa. 46:5) Kuthiwani ngokwenza iinthombe eziqalwa njengezicwengileko bese ziyalotjhwa? Emthethweni wesibili weMiyalo eliTjhumi, uJehova wathi: “Ungazenzeli isithombesibazwa namkha umfanekiso wananyana yini esezulwini phezulu namkha ephasini phasi . . . Ungazikhothameli izintwezo.” (Eks. 20:4, 5) Abantu abafuna ukuthabisa uZimu, bayazwisisa ukuthi akafuni balotjhe iinthombe.

6. Ngisiphi isibonelo sokulotjha uZimu aboFakazi bakaJehova abasilandelako namhlanjesi?

⁶ Abosomlandu bayavuma ukuthi amaKrestu wekadeni bekalotjha uZimu kwaphela. Ngokwesibonelo, incwadi ethi History of the Christian Church ithi amaKrestu lawo “bebawuhloya” umbono wokulotjha iinthombe. Namhlanjesi, aboFakazi bakaJehova balandela isibonelo esabekwa maKrestu wekadeni. Nathi asithandazi “eenthombeni” namkha “eengilozini,” nakuJesu imbala. Asililotjhi iflarha namkha nanyana yini ephathele noRhulumende. Nanyana kungenzekani, sizimisele ukulalela amezwi kaJesu athi: “Kufuze ulotjhe uJehova uZimakho.”—Mat. 4:10.

7. AboFakazi bakaJehova bahluke njani kamanye amasondo?

⁷ Namhlanjesi, abantu abanengi bathanda ukulotjha abadosiphambili bekolo. Babathanda khulu abarholabo, ngezinye iinkhathi kuba ngathi balotjha bona. Abantu bababanengi emasondwenabo, bathenge iincwadi zabo bebanikele ngemali enengi. Abanye babo bakholelwa yoke into abatjelwa yona. Bakuthabela khulu ukuba nabarholi babo, kuba ngasuthi babona uJesu siqu sakhe! Ngakelinye ihlangothi, labo abalotjha uJehova ngendlela ayamukelako, abanabo abafundisi. Nanyana sibahlonipha labo abadosaphambili, sikhamba phezu kwefundiso kaJesu ekhanyako ethi: “Noke nina nibafowabo bomunye nomunye.” (Mat. 23:8-10) Asibalotjhi abantu, kungaba badosiphambili bekolo namkha ababusi bezepolotiki. Asizisekeli iinhloso zabo zekolo namkha zepolotiki. Kunalokho, asithathi ihlangothi besiyazihlukanisa nezinto zephasi. Ngendlela le, sihlukile kiwo woke amasondo athi angewobuKrestu.—Jwa. 18:36.

8. Sazi njani ukuthi uJehova ufuna siphazimulise ibizo lakhe besilenze laziwe ebantwini boke?

⁸ UJesu wakhe wathandaza wathi: “Baba, phazimulisa ibizo lakho.” UJehova waphendula umthandazo loyo ngelizwi eliphezulu elivela ezulwini, wathi uzoliphazimulisa ibizo lakhe. (Jwa 12:28) Kikho koke uJesu akwenzileko nakasephasini, waphazimulisa khulu ibizo lakaYise. (Jwa. 17:26) AmaKrestu weqiniso akuthatha njengelungelo elihle khulu ukusebenzisa ibizo lakaZimu nokwazisa abanye ngalo.

9. AmaKrestu wekadeni atjengisa njani ukuthi ayalihlonipha ibizo lakaZimu?

⁹ Msinyana ngemva kokuthonywa kwebandla lokuthoma lobuKrestu, uJehova “wakhumbula abantu bezinye iintjhaba, nokuthi athome ukukhetha kibo abantu bebizo lakhe.” (IzE. 15:14) AmaKrestu wekadeni bekazikhakhazisa ngokusebenzisa  ibizo lakaZimu nokulenza laziwe kabanye. Balisebenzisa ibizo lakaZimu nabatjhumayelako nalokha nabatlola iincwadi zeBhayibheli. * Ngokwenza njalo, bazitjengisa bababantu bebizo lakaZimu.—IzE. 2:14, 21.

10. Sazi njani ukuthi aboFakazi bakaJehova ngibo bodwa abenza ibizo lakaJehova laziwe?

¹⁰ Kghani aboFakazi bakaJehova ngibo bodwa abajamele ibizo lakaJehova? Akhesiqale napu ubufakazi. Namhlanjesi, abadosiphambili bekolo benze woke umzamo wokufihla ibizo lakaZimu. Balikhiphile emaBhayibhelinabo begodu kobunye ubujamo, abavumi nokuthi lisetjenziswe emasondwenabo. * Kuyakhanya ukuthi aboFakazi bakaJehova ngibo kwaphela abahlonipha ibizo lakaZimu ngendlela efaneleko. Senza ibizo lakaZimu laziwe ephasini loke ukudlula nanyana ngiyiphi enye ikolo! Soke senza okusemandlenethu ukukhambisana nebizo esibizwa ngalo elithi aboFakazi bakaJehova. (Isa. 43:10-12) Sigadangise amakhophi angaphezu kwayi-240 miliyoni weTjhugululo Yephasi Elitjha YemiTlolo Ecwengileko, ebuyisele ibizo lakaJehova eendaweni la belisuswe khona kamanye amaBhayibheli. Sigadangisa iincwadi ezisekelwe eBhayibhelini ngamalimi  angaphezu kwayi-1 000, ezithuthukisa ibizo lakaJehova!

11. AmaKrestu wekadeni alitjengise njani ithando lawo ngeqiniso?

¹¹ UJesu bekalithanda iqiniso ngoZimu nangomnqophwakhe. UJesu waphila ngokuvumelana neqiniso bewalenza laziwa ngabanye. (Jwa. 18:37) Abalandeli bakaJesu bamambala bebalithanda iqiniso. (Jwa. 4:23, 24) Umpostoli uPitrosi wathi ubuKrestu ‘buyindlela yeqiniso.’ (2 Pit. 2:2) Ngebanga lethando labo elidephileko ngeqiniso, amaKrestu wekadeni alahla imibono yekolo, amasiko wabantu nemibono engakhambisani neqiniso. (Kol. 2:8) Nanamhlanjesi, amaKrestu weqiniso alwela ‘ukuragela phambili akhamba eqinisweni’ ngokusekela iinkolelo zawo nokuphila kwawo eliZwini lakaJehova.—3 Jwa. 3, 4.

12. Kwenzekani lokha indlela ebesizwisisa ngayo nakufanele ilungiswe begodu kubayini kwenziwa njalo?

¹² AboFakazi bakaJehova abatjho ukuthi bazwisisa koke okuseBhayibhelini ngaso soke isikhathi. Ngezinye iinkhathi bayayenza imitjhapho nabahlathulula iimfundiso zeBhayibheli namkha indlela abanqophisa ngayo ibandla. Lokho akukafuzi kusirare. ImiTlolo ikwenza kukhanye ukuthi ilwazi likhamba likhula ngaso soke isikhathi. (Kol. 1:9, 10) UJehova wembula iqiniso kancakancani begodu kufuze sibekezele ukuthi umkhanyo weqiniso lo ukhanye khudlwana. (IzA. 4:18) Lokha isiHlopha esiBusako nasilemuka ukuthi sitlhoga ukulungisa indlela ebesizwisisa ngayo iphuzu elithileko, kwenziwa amatjhuguluko msinyana. Amasondo amanengi namhlanjesi enza amatjhuguluko ngebanga lokufuna ukukara abantu abasondako namkha ukwenza izinto ngendlela yephasi, kukulapho aboFakazi bakaJehova benza amatjhuguluko ngebanga lokuthi bafuna ukutjhidelana noZimu bebalandele umtlhala kaJesu eduze wokulotjha uZimu. (Jak. 4:4) Asenzi amatjhuguluko ngebanga lokuthi silandela imibono yabantu kodwana kungebanga lokuthi sesizwisisa imiTlolo khudlwana. Siyalithanda iqiniso!—1 Thes. 2:3, 4.

13. Ngiyiphi ifanelo eqakathekileko etjengiswa maKrestu weqiniso begodu ibonakala njani kiboFakazi bakaJehova namhlanjesi?

¹³ AmaKrestu wekadeni beweneemfanelo ezihle kodwana ebeyiphuma phambili bekulithando. UJesu wathi: “Boke bazokwazi ngalokhu ukuthi nibafundi bami—nanithandanako.” (Jwa. 13:34, 35) AboFakazi bakaJehova ephasini mazombe bathabela ithando leqiniso nobunye. Sihlukile kezinye iinkolo ngombana simndeni nanyana sivela eenarheni nemasikweni angafaniko. Siyalibona ithando lamambala esifundweni, emihlanganweni emincani nemikhulu. Ubufakazobu buyasiqinisekisa ukuthi indlela esilotjha ngayo, yamukelekile kuJehova.

14. Umtlolo webeKolose 3:12-14 uthi ngiyiphi indlela esingatjengisa ngayo ukuthi sithandana khulu?

¹⁴ ImiTlolo isikhuthaza ukuthi ‘sithandanane khulu.’ (1 Pit. 4:8) Enye indlela esithandana ngayo kukuthi silibalele abanye besibekezelele ukuba nesono komunye nomunye. Sifuna amathuba wokuba nomusa nokumema amalunga webandla, ngitjho nalabo ekungenzeka  abakasiphathi kuhle. (Funda kwebeKolose 3:12-14.) Nasinethando elinjalo, sitjengisa ukuthi simaKestu weqiniso.

15. Ngiziphi ezinye iindlela esilandela ngazo isibonelo sokulotjha uJehova esabekwa maKrestu wekadeni?

¹⁵ Kunezinye godu iindlela esilandela ngazo isibonelo sokulotjha uJehova esabekwa bapostoli. Ngokwesibonelo, ihlangano nebandla zihleleke ngendlela efanako nangendlela amaKrestu wekadeni ebekahleke ngayo ngombana sinababonisi ababhodako, abadala, neenceku ezisizako njengabo. (Flp. 1:1; Tit. 1:5) Indlela esiqala ngayo zomseme, umtjhado, ukucwengeka kweengazi nesifiso sethu sokuvikela ibandla ezonini ezingatjhugulukiko, koke kusekelwe esibonelweni samaKrestu wekadeni.—IzE. 15:28, 29; 1 Kor. 5:11-13; 6:9, 10; Heb. 13:4.

16. Sifundani emezwini esiwafumana encwadini yebe-Efesu 4:4-6?

¹⁶ UJesu wathi abanengi bazozibiza ngabafundi bakhe ekubeni babazenzisi. (Mat. 7:21-23) ImiTlolo yasiyelelisa kusesengaphambili ukuthi emalangeni wamaswephela, banengi ‘abazokubonakala bazinikele kuZimu.’ (2 Thim. 3:1, 5) Nanyana kunjalo, iBhayibheli liyibeka epepeneneni yokuthi “ukukholwa kunye” okwamukelwa nguZimu.—Funda kwebe-Efesu 4:4-6.

17. Bobani abalandela uJesu begodu abalotjha uJehova ngeqiniso namhlanjesi?

¹⁷ Bobani abalotjha uJehova ngendlela yeqiniso namhlanjesi? Sizihlolele thina ngokwethu ubufakazi. Sibonile indlela uJesu afundisa ngayo ukulotjha kweqiniso nendlela amaKrestu wekadeni ebekenza ngayo. Ipendulo yinye, boFakazi bakaJehova. Kulilungelo ukuba ngomunye wabantu bakaJehova nokwazi iqiniso ngomnqophwakhe! Kwanga singakakarela eqinisweni besiqiniseke ngalo.