1. Khuyini engaba nomthelela endleleni indoda ephatha ngayo umkayo?

IBIZO elithi ‘ihloko’ litjho ukuthini kuwe? Amadoda amanengi aphatha imindenawo ngendlela nangokwamasiko akhuliswe ngawo. Udadwethu uYanita ohlala e-Europe uthi, “La engihlala khona, abantu abanengi baqala abafazi njengabangakaqakatheki nanjengeensebenzi.” Umfowethu ibizo lakhe linguLuke ohlala e-United States, uthi, “Abanye abobaba bafundisa amadodanabo ukuthi akukafuzi balalele abafazi ngombana imibonwabo ayikaqakatheki.” Nanyana kunjalo, uJehova akafuni amadoda aphathe abafazi bawo ngendlela leyo. (Madanisa noMarkosi 7:13.) Alo-ke, indoda ingabusebenzisa njani ubuhloko bayo ngendlela efaneleko emndenini?

2. Khuyini ihloko yomndeni ekufuze iyazi begodu kubayini?

² Ukuthi indoda ikghone ukusebenzisa kuhle ubuhloko bayo, kufuze yazi ukuthi uJehova ufuna yenzeni. Kufuze yazi ukuthi kubayini uJehova ahlele ilungiselelo lobuhloko nokuthi khuyini engayifunda esibonelweni sakaJehova noJesu. Kubayini kuqakathekile bona yazi koke lokhu? Kungombana uJehova unikele amadoda ukuthi abe ziinhloko zemindeni begodu ulindele ukuthi abusebenzise kuhle.—Luk. 12:48b.

3. Ngokuya ngokomtlolo weyoku-1 kwebeKorinte 11:3, khuyini esiyifunda ngobuhloko?

³ Funda yoku-1 kwebeKorinte 11:3. Iveseli litjengisa indlela uJehova ahlele ngayo umndenakhe wezulwini nephasini. Ubuhloko buhlanganisa izinto ezimbili, amandla nokuziphendulela. UJehova ‘uyihloko,’ unawo woke amandla begodu abantu neengilozi baziphendulela kuye.  (Rom. 14:10; Efe. 3:14, 15) UJehova unikele uJesu amandla wokulawula ibandla, lokho kwenza aziphendulele kuJehova ngendlela aphatha ngayo ibandla. (1 Kor. 15:27) UJehova unikele nendoda amandla phezu komndenayo begodu izoziphendulela kuJehova noJesu ngendlela ephatha ngayo umndenayo.—1 Pit. 3:7.

4. UJehova noJesu banaliphi ilungelo?

⁴ NjengeHloko yomndeni wephasini nezulwini, uJehova unelungelo lokunikela umthetho begodu ulindele ukuthi abantwana bakhe bawulalele. (Isa. 33:22) UJesu njengombana ayihloko yebandla lobuKrestu, naye unelungelo lokubeka imithetho begodu ulindele ukuthi siyilalele.—Gal. 6:2; Kol. 1:18-20.

5. Ihloko yomndeni emKrestu inaliphi ilungelo begodu kufuze liphelele kuphi?

⁵ NjengoJehova noJesu, ihloko yomndeni nayo inelungelo lokwenza iinqunto malungana nomndenayo. (Rom. 7:2; Efe. 6:4) Nanyana kunjalo, kuna la ephelela khona. Ngokwesibonelo, imithetho ayibekako, kufuze isekelwe eliZwini lakaZimu. (IzA. 3:5, 6) Ihloko yomndeni ayinalungelo lokubekela umthetho omunye umuntu ongasi lilunga lomndenakhe. (Rom. 14:4) Nalokha abantwana sele bakhulile begodu bangasahlali ekhaya, kufuze bamhloniphe kodwana lokho akutjho ukuthi uzoziphendulela ngabo.—Mat. 19:5.

6. Kubayini uJehova enze ukuthi kube nobuhloko?

⁶ UJehova wenze ukuthi kube nobuhloko ngebanga lethando analo ngomndenakhe. Kusisipho esivela kuye. Ubuhloko benza umndeni kaJehova ube ngohlelekileko begodu ube nokuthula. (1 Kor. 14:33, 40) Ngaphandle kobuhloko, umndeni kaJehova bewuzokuhlangahlangana bewungathabi. Ngokwesibonelo, bengekhe kwaziwe ukuthi ngubani ekufuze athathe iinqunto begodu ngubani ozokudosa phambili ekufezekiseni iinquntwezo.

7. Yebe-Efesu 5:25, 28 ithi uJehova ufuna amadoda abaphathe njani abafazi babo?

⁷ Nangabe ihlelo lobuhloko elenziwe nguJehova yinto ehle, kubayini abomma abanengi namhlanjesi bazizwa baphathwa kabuhlungu begodu bagandelelwa madodabo? Lokhu kungombana amadoda amanengi awayithatheli ehloko imithetho kaJehova begodu akhetha ukulandela indlela namasiko akhuliswe ngawo. Amanye azizwa ngcono lokha nakatlhorisa abafazi bawo. Ngokwesibonelo, amadoda amanengi atlhorisa abafazi bawo ngebanga lokuthi bafuna ukubonakala ebantwini ukuthi ‘bamadoda wamambala.’ Angacabanga ukuthi angeze amkatelele ukuthi amthande kodwana angamenza amsabe. Angasebenzisa lokho ukuthi amlawule. * Indlela le yokuziphatha nokucabanga yamanye amadoda ayikalungi ngombana itjengisa ukuthi amadoda awabathandi abafazi bawo begodu awabahloniphi, ngaphezu kwalokho, iveza ukuthi baphikisana nalokho uJehova akufunako.—Funda yebe-Efesu 5:25, 28.

8. Khuyini engasiza indoda bona iphathe kuhle umndenayo?

⁸ Ukuqala indlela uJehova noJesu  ababusebenzisa ngayo ubuhloko kungasiza ihloko yomndeni iwuphathe kuhle umndenayo. Akhesiqale iindlela ezimbili uJehova noJesu abazisebenzisako, sibone nokuthi ihloko yomndeni, ingazisebenzisa njani iindlelezo emndeninayo.

9. UJehova utjengisa njani ukuthi uthobekile?

⁹ Ukuthobeka. UJehova uhlakaniphe ukubadlula boke abantu, nanyana kunjalo, uyayilalela imibono yeenceku zakhe. (Gen. 18:23, 24, 32) Uyayivumela nemibono evela kwabanye. (1 Kho. 22:19-22) UJehova akanasono kodwana akakalindeli abantu bakhe ukuthi bangayenzi imitjhapho. Kunalokho, uyabasiza abantu bakhe abanesono ukuthi baphumelele. (Rhu. 113:6, 7) Ekhabolakhona, iBhayibheli lihlathulula uJehova ngokuthi ‘umsizi.’ (Rhu. 27:9; Heb. 13:6) IKosi uDavida yavuma ukuthi beyingeze yakghona ukwenza imisebenzi emikhulu ngathana uJehova bekangayisizi.—2 Sam. 22:36.

10. UJesu watjengisa njani ukuthi uthobekile?

¹⁰ Akhesicoce ngesibonelo sakaJesu. Nanyana bekamkhulu kunabafundi bakhe kodwana wabahlambisa iinyawo. Kubayini uJehova enza bona indaba le itlolwe eBhayibhelini? Umnqopho bekukusiza iinhloko zemindeni zifumane isibonelo ezingasilandela. UJesu wathi, “Nginibekela isibonelo sokuthi njengombana ngenzile kini, nani nenze okufanako.” (Jwa. 13:12-17) Nanyana bekamkhulu, uJesu akhenge alindele ukwenzelwa izinto. Yena wenzela abanye.—Mat. 20:28.

11. Khuyini engafundwa yihloko yomndeni esibonelweni sakaJehova noJesu?

¹¹ Lokho esikufundako. Ihloko yomndeni ingatjengisa ngeendlela ezinengi ukuthi ithobekile. Ngokwesibonelo, ayikalindeli ukuthi umndenayo ungayenzi imitjhapho. Iyayilalela imibono yamalunga womndenayo, nanyana ingavumelani nayo. UMarley we-United States uthi: “Mina nendodakwami khesibe nembono engafaniko ngezinye iinkhathi. Kuyangithabisa ukuthi uyayilalela imibonwami, nalokha nakenza iinqunto uyacabangisisa ngayo.” Ngaphezu kwalokho, indoda ethobekileko, iyazimisela ukuthi yenze imisebenzi yangendlini nanyana lokho kuthathwa njengomsebenzi wabafazi endaweni  ehlala kiyo. Lokho kungaba sitjhijilo, kubayini sitjho njalo? Omunye udadwethu ibizo linguRachel uthi, “Nange indoda isiza umkayo ngemisebenzi yangendlini, abomakhelwana namkha iinhlobo ziyakurarekela lokho zicabange ukuthi indoda le, ‘akusiyindoda yamambala.’ Bazokucabanga ukuthi ayikghoni ukulawula umkayo.” Nangabe kunjalo nala uhlala khona, khumbula ukuthi noJesu wahlamba iinyawo zabafundi bakhe nanyana lokho bekuqalwa njengomsebenzi weengqila. Ihloko yomndeni ayifuni ukwenza ngasuthi ngiyo kwaphela eqakathekileko, kunalokho ifuna ukuthabisa umndenayo. Ngaphezu kokuthobeka, ngikuphi okhunye ihloko yomndeni ekufuze ibe nakho?

12. Ithando lenza uJehova noJesu benzeni?

¹² Ithando. Koke uJehova akwenzako, ukwenza ngebanga lethando. (1 Jwa. 4:7, 8) Ngebanga lokuthi uyasithanda, usinikele iBhayibheli okuliliZwi lakhe nehlanganwakhe. Usenza sizizwe sivikelekile ngokuhlala asikhumbuza ukuthi uyasithanda. Kuthiwani ngezinto esizitlhogako? UJehova ‘usinikela ngokunjingileko zoke izinto esizithabelako.’ (1 Thim. 6:17) Nasenza imitjhapho, uyasilungisa kodwana akalisi ukusithanda. Ngebanga lokuthi uyasithanda, usilungiselele umhlatjelo. Ngokufanako noJesu, ngebanga lokuthi uyasithanda, wanikela ngokuphila kwakhe ngebanga lethu. (Jwa. 3:16; 15:13) Akukho okungenza bona uJehova noJesu bangasasithandi, khulukhulu nasithembekile kibo.—Jwa. 13:1; Rom. 8:35, 38, 39.

13. Kubayini kuqakathekile bona ihloko yomndeni ithande umndenayo? (Qala ibhoksi elithi, “ Indoda Eqeda Ukutjhada Ingakufumana Njani Ukuhlonitjhwa Mkayo?”)

¹³ Lokho esikufundako. Koke ihloko yomndeni ekwenzako kufuze ikwenze ngabanga lethando. Kubayini kuqakathekile lokho? Umpostoli uJwanisi uphendula uthi, “Loyo ongamthandi umfowabo, ambonileko, angekhe amthanda uZimu, angakhenge ambone.” (1 Jwa. 4:11, 20) Indoda ethanda umndenayo begodu efuna ukulingisa  uJehova noJesu, izokusiza umndenayo ukuthi ube obuhlobo obuhle noJehova begodu iwunikele nezinto ozitlhogako. (1 Thim. 5:8) Izokufundisa beyibandule abantwana bayo. Izokuragela phambili ifunde ukwenza iinqunto ezizokuthabisa uJehova zizuzise nomndenayo. Akhe sicoce ngayinye yezintwezi, sibone ukuthi ihloko yomndeni ingamlingisa njani uJehova noJesu.

14. Khuyini eyenziwa yihloko yomndeni ukuthi umndenayo ube nobuhlobo obuhle noJehova?

¹⁴ Kufuze isize umndenayo ube nobuhlobo obuhle noJehova. UJesu watjengisa ukuthi ufana noBabakhe ngombana bekafuna ukusiza abafundi bakhe babe nobuhlobo obuqinileko noJehova. (Mat. 5:3, 6; Mar. 6:34) Ngendlela efanako, kufuze kube yinto eqakathekileko ehlokweni yomndeni ukusiza umndenayo ube nobuhlobo obuhle noJehova. (Dut. 6:6-9) Yenza lokhu ngokuthi yona nomndenayo bafunde iliZwi lakaZimu qobe, baye emihlanganweni, batjhumayele iindaba ezimnandi begodu bakhe ubuhlobo obuqinileko noJehova.

15. Ihloko yomndeni ingawatlhogomela njani amazizo womndenayo?

¹⁵ Itlhogomela amazizo womndenayo. UJehova watjela uJesu ukuthi uyamthanda. (Mat. 3:17) UJesu watjengisa abalandeli bakhe ukuthi uyabathanda ngalokho abenzela khona nalokho abatjela khona. Nabo batjengisa ukuthi bayamthanda. (Jwa. 15:9, 12, 13; 21:16) Ihloko yomndeni ingatjengisa umndenayo ukuthi iyawuthanda ngalokho ekwenzako, njengokufunda nabo iBhayibheli. Ingabatjela godu ukuthi iyabathanda begodu iyabathokoza. Nakufanelekako, ingababuka naphambi kwabantu.—IzA. 31:28, 29.

16. Khuyini okhunye ekufuze ihloko yomndeni ikwenze begodu yini ekufuze ibalekele ukukwenza?

¹⁶ Itlhogomela umndenayo ngezinto ozitlhogako. UJehova wawatlhogomela ama-Israyeli ngitjho nanoma bekawakhalima ngebanga lokungalaleli. (Dut. 2:7; 29:5) Nanamhlanjesi, uJehova usasitlhogomela. (Mat. 6:31-33; 7:11) Ngendlela efanako, noJesu bekabatlhogomela abalandeli bakhe. (Mat. 14:17-20) Walapha nabagulako. (Mat. 4:24) Ukuthi ithabise uJehova, ihloko yomndeni kufuze itlhogomele umndenayo. Nanyana kunjalo, kufuze ilinganisele. Akukafuzi ingene ngehloko emsebenzinayo beyibhalelwe kusiza umndenayo ukuthi uthuthukise itjhebiswano lawo noJehova nokutlhogomela amazizo wawo.

17. Ngisiphi isibonelo esibekwa nguJesu ekusikhalimeleni nekusibanduleni?

¹⁷ Ukubandula abanye. UJehova uyasibandula bekasikhalime ngebanga lokuthi uyasithanda. (Heb. 12:7-9) UJesu naye ulingisa  uBabakhe ngokubandula labo abangaphasi kwakhe ngendlela enethando. (Jwa. 15:14, 15) Akajikajiki kodwana usikhalimela ngethando. (Mat. 20:24-28) Uyazwisisa ukuthi sinesono begodu senza nemitjhapho.—Mat. 26:41.

18. Khuyini ihloko yomndeni ekufuze ikukhumbule?

¹⁸ Ihloko yomndeni ingalingisa uJehova noJesu ngokuthi ikhumbule ukuthi amalunga womndenayo nawo anesono. ‘Ayiwubhokeli ngobukhali’ umndenayo. (Kol. 3:19) Kunalokho, isebenzisa ikambiso efumaneka kwebeGalathiya 6:1 ilinge ukubalungisa “ngomoya ophasi,” ikhumbula ukuthi nayo ayikapheleli. NjengoJesu, iyalemuka ukuthi indlela ephuma phambili yokufundisa, kubeka isibonelo.—1 Pit. 2:21.

19-20. Ihloko yomndeni ingamlingisa njani uJehova noJesu ekuthatheni iinqunto?

¹⁹ Thatha iinqunto ezizokuzuzisa abanye. UJehova wenza iinqunto ezizuzisa abanye. Ngokwesibonelo, wadala ukuphila ngombana bekafuna kuzuzise thina. Akekho obekangamkatelela bona anikele ngeNdodanakhe ngebanga lezono zethu. Lokho ukwenze ngombana bekafuna ukuzuzisa thina. Ngendlela efanako, noJesu wenze iinqunto ezizuzisa abanye. (Rom. 15:3) Ngokwesibonelo, ngitjho nanyana bekadiniwe, akhenge aphumule kodwana wakhetha ukufundisa isiqubuthu.—Mar. 6:31-34.

²⁰ Ihloko yomndeni iyazi ukuthi kuqakatheke kangangani ukuthatha iinqunto ezizokuzuzisa umndenayo, iyakubalekela ukuthatha iinqunto ngaphandle kwesizathu esizwakalako namtjhana ngokuya ngokuthi izizwa njani ngesikhatheso. Kunalokho, ivumela uJehova ukuthi ayibandule. * (IzA. 2:6, 7) Ngaleyo ndlela, izokuzuzisa abanye ingasiyona kwaphela.—Flp. 2:4.

21. Khuyini okuzokucocwa ngayo esihlokweni esilandelako?

²¹ UJehova unikele iinhloko zomndeni isabelo esisitjhijilo begodu bazoziphendulela ngendlela abasifeza ngayo. Indoda ezimiselako ukulandela isibonelo sakaJehova noJesu izokuba yihloko yomndeni ephumelelako. Umfazi nakadlala indimakhe, umtjhado uyaphumelela. Umfazi kufuze abuqale njani ubuhloko begodu ngiziphi iintjhijilo angaqalana nazo? Esihlokweni esilandelako sizokuphendula imibuzo leyo.