UJehova ufuna abantu abatjhadileko bathabe bebabe nobuhlobo obutjhideleneko obungekhe baphela. (Mat. 19:4-6) Nangabe ufuna ukutjhada, ungamfumana njani umlingani womtjhado ofanelekako? NjengoMdalethu, uJehova uyazi ukuthi khuyini engaphumelelisa abantu abahlekisanako nabatjhadileko. Yeke, nasingasebenzisa iinkambisolawulo asinikele zona, siyaqiniseka ukuthi kuzokuba nemiphumela emihle. Cabanga ngezinye zeenkambiswezo.

Kokuthoma, kufuze sizwisise lokhu, “Ihliziyo imkhohlisi ngaphezu kwakho koke begodu yonakele khulu.” (Jor. 17:9) Njengombana umuntu alinga ukufumana umuntu azokutjhada naye, ngesikhatheso uba nemizwa eminengi, ngezinye iinkhathi imizwa leyo ingavala indlela umuntu ekufuze acabangisise kuhle ngayo. Lokha abantu ababili nabasekela isiqunto sabo sokutjhada endleleni abazizwa ngayo, lokho kungabangela umonakalo omkhulu. (IzA. 28:26) Kungebangelo kungasikuhlakanipha ngabantu ababili ukuthi batjelane ngendlela abathandana ngayo namkha bathembisane ngezinye izinto ngaphambi kokuthi bazane ngcono.

IzAga 22:3 zithi: “Ovuthiweko nabona ingozi uyabhaca, kodwana abanganalwazi bayaragalala, bahlupheke.” Bungaba yini ubungozi bokusebenzisa iinzinzolwazi zokuthintana ukuthi ufumane umlingani womtjhado? Okudanisako kukuthi, abanye bafunde kabuhlungu ngokuthi bahlangane nabantu abangabaziko abadlala ngemizwabo. Abantu abangakathembeki basebenzisa zokuthintana, bazenze abantu abangasingibo ukuthi badlelezele abanye, babathathele imali. Ngezinye iinkhathi, abantwaba, vane bazibize ngokuthi baboFakazi.

Cabanga ngobunye ubungozi. Ezinye iinzinzolwazi zisebenzisa iimbalo zisize abantu babone ukuthi bayafanelana na. Nanyana kunjalo akunabufakazi bokuthi iimbalwezi ziyasebenza. Kungaba kuhlakanipha na ukusebenzisa iindlela ezenziwe babantu ukuqinisekisa ukuphumelela kwento eqakathekileko njengomtjhado? Iimbalo ezifana nalezi singathoma na sizimadanise neenkambiso zeBhayibheli?—IzA. 1:7; 3:5-7.

Ikambiso efumaneka kuzAga 14:15 ithi: “Onganalwazi ukholwa nanyana yini, kodwana ovuthiweko uyaqaphelisisa amagadangwakhe.”  Ngaphambi kokuthi uqiniseke ukuthi umuntu loyo mlingani womtjhado ofanelekako, kufuze umazi kuhle. Lokha nawuhlangana nomuntu eenkundleni zokuthintana, kubudisi ukukwenza lokho. Nanyana ningabona imininingwana eminengi ngomunye nomunye benithumelane imilayezo iinkhathi ezinengi, kghani lokho kutjho ukuthi umazi kuhle umuntu loyo? Abanye ebebacabanga ukuthi bafumene umlingani wamambala abangathandana naye, bazifumana sele babambe ongenzasi nabahlangana nomuntu loyo ubuso nobuso.

Umrhubi wathi: “Angihlali neengilamkhuba, namkha ngizihlanganise nabazenzisi.” (Rhu. 26:4) Abanye bakwenze umukghwa ukuthi baleye amala eenkundleni zokuthintana ukwenzela ukuthi baqaleke bababantu abathandekako. Abanye bafihla ubuntu abangibo namkha bangazivezi. Kuthi abanye bazibiza ngokuthi baboFakazi bakaJehova, kghani bamaKrestu wamambala abhajadisiweko? Banobuhlobo obuhle noJehova? Bayahlonitjhwa ebandleni? Namkha abasiziimbonelo ezihle ebandleni, ‘babantu abambi’? (1 Kor. 15:33; 2 Thim. 2:20, 21) Bavumelekile ukuthi bangatjhada ngokuya ngokwemiTlolo? Kufuze uzazi izintwezi kodwana lokho kuzokutlhoga isizo lomunye uFakazi omazi kuhle umuntu loyo. (IzA. 15:22) Sazi kuhle ukuthi isikhonzi sakaJehova esithembekileko angeze ‘sabotjhelwa ejogeni’ nomuntu ongakholwako.—2 Kor. 6:14; 1 Kor. 7:39.

Nasiqalisisa kuhle ubungozi beenkundla zokuthintana, kunendlela engcono yokuthi ungafuna umlingani womtjhado nokuthi nibenobuhlobo obuhle obuzokwenza ukuthi umtjhado uhlonipheke. Ungawafumanaphi amathuba wokuthi uthole umlingani womtjhado ofanelekako? Nasikghona ukuhlangana ndawonye siboFakazi bakaJehova, sihlangana nabantu abanengi ubuso nobuso nasiya emihlanganweni emikhulu nemincani, esifundweni kuhlanganise neminye imibuthwano.

Imibuthwano le nayingenzekiko, mhlamunye ngebanga lesindabelaphi i-COVID-19, sisebenzisa izinto ze-elekthroniki ukuhlangana emihlanganweni yebandla la kunamathuba amanengi khona wokuthi abantu abangakatjhadi ababoFakazi bangazana kuhle. Ungakghona ukubabona kuhle endleleni abanikela ngayo iinkulumo nabaphendula ngayo ukuthi ukukholwa kwabo kunjani. (1 Thim. 6:11, 12) Ningakghona nokuvakatjhelana ngokusebenzisa ilungiselelo lama-breakout room ngemva kwemihlangano. Imihlangano enjalo, ingakusiza ekuqaleni umuntu onekareko kuye, ikusize ubone ubuntu bakhe bamambala nendlela akhulumisana ngayo nabanye abantu. (1 Pit. 3:4) Ngokukhamba kwesikhathi, ungakghona ukumazi kuhle bewubone ukuthi imiqophwakho neyakhe iyafana na namkha ihlukile.

Lokha umuntu ongakatjhadi nakafuna umlingani womtjhado ofanelekako ngendlela ekhambisana neenkambiso zeBhayibheli, manengi amathuba wokubona ukuba liqiniso kwamezwi wezaga athi: “Ofumana umfazi ufumene isipho esihle begodu uzuza umusa kaSomnini.”—IzA. 18:22.