1. UJehova ukwenzeleni?

KUZE NJANI ukuthi ube nguFakazi kaJehova? Kokuthoma, uzwe “iindaba ezimnandi,” kungenzeka ngababelethi bakho, umuntu osebenza naye, umuntu ofunda naye namkha aboFakazi bakufumana nabatjhumayela indlu ngendlu. (Mar. 13:10) Ngemva kwalokho, kwaba nomuntu oba nesikhathi esinengi nawe akufundisa iBhayibheli. Njengombana ufunda, wathoma ukuthanda uJehova bewalemuka nokuthi naye uyakuthanda. UJehova wakudosela eqinisweni begodu njengombana sele umfundi kaJesu Krestu, unethemba lokuphila ngokungapheliko. (Jwa. 6:44) Siyaqiniseka ukuthi uyamthokoza uJehova ngokuthi asebenzise omunye umuntu ukukufundisa iqiniso nokuthi uZimu ukwamukele njengomunye weenkhonzi Zakhe.

2. Khuyini esizokucoca ngayo esihlokwenesi?

² Njengombana sele silazi iqiniso, sinelungelo lokusiza abanye bazihlanganise nathi njengombana sikhamba endleleni yokuphila. Singakufumana kulula ukutjhumayela umuzi nomuzi kodwana sikufumane kubudisi ukuthoma nokuraga iimfundo zeBhayibheli. Kghani nawe uzizwa njalo? Nangabe kunjalo, uzokufumana iimphakamiso ezingakusiza esihlokwenesi. Sizokucoca ngokuthi yini engasikhuthaza ukuthi senze abafundi. Sizokubuye sicoce ngokuthi singazihlula njani iintjhijiilo ezingasiliya ekurageni iimfundo zeBhayibheli. Kokuthoma, akhesicoce ngokuthi kubayini singasi batjhumayeli kwaphela kodwana sibafundisi beendaba ezimnandi.

3. Kubayini sitjhumayela?

³ UJesu nakasephasini, wanikela abalandeli bakhe umyalo okabili. Kokuthoma, wabatjela ukuthi batjhumayele iindaba ezimnandi zomBuso bewabatjengisa ukuthi bakwenze njani lokho. (Mat. 10:7; Luk. 8:1) Okhunye uJesu akufundisa abalandeli bakhe kukuthi, bangenzani lokha abantu nabamukela namkha baphikisa umlayezo womBuso. (Luk. 9:2-5) Wabuye wabikezela ngobukhulu bomsebenzabo wokutjhumayela ngokubatjela ukuthi iindaba ezimnandi “zizokutjhunyayelwa kilo loke iphasi.” (Mat. 24:14; IzE. 1:8) Kunganandaba ukuthi abantu basabela njani, abafundi bakaJesu bekufuze batjhumayele ngomBuso kaZimu nalokho ozokwenza.

4. Umtlolo kaMatewu 28:18-20, uthi khuyini enye ekufuze siyenze nasele sitjhumayele ngomBuso?

⁴ Uthini omunye umyalo uJesu awunikela abalandeli bakhe? Watjela abalandeli bakhe ukuthi bafundise abantu ukulandela koke lokhu abayale ngakho. Kghani umsebenzi wokufundisa lo bewuzokuphela ngeenkhathi zabapostoli, njengombana abanye bacabanga? Awa, uJesu waveza ukuthi umsebenzi oqakathekileko lo uzokuragela phambili bekube sesikhathini sethu namkha “bekube sekupheleni kwephasi.” (Funda uMatewu 28:18-20.) Kungenzeka ukuthi uJesu wanikela umyalo lo mhlazana avele ebafundini abangaphezu kwama-500. (1 Kor. 15:6) Esambulweni uJesu asinikela uJwanisi, waveza ngokukhanyako ukuthi boke abalandeli bakhe kufuze basize abanye abantu ukufunda ngoJehova.—IsAm. 22:17.

5. Emtlolweni woku-1 kwebeKorinte 3:6-9, uPowula uhlobanisa njani umsebenzi wokutjhumayela nokufundisa?

⁵ Umpostoli uPowula wafanisa umsebenzi wokwenza abafundi njengokulima, okutjengisa ukuthi kufuze senze okungaphezu kokutjala imbewu. Wakhumbuza abantu beKorinte, wathi: “Mina ngatjala, u-Apholo wathelelela . . . Nina niyisimu kaZimu elinywako.” (Funda yoku-1 kwebeKorinte 3:6-9.) Njengeensebenzi ‘esimini kaZimu,’ asitjali kwaphela imbewu kodwana siyayithelelela besihlole ituthuko yalokhu esikutjalileko ngaso soke isikhathi. (Jwa. 4:35) Ngesikhathi esifanako, siyalemuka ukuthi nguZimu okhulisako.

6. Umsebenzi wokufundisa ubandakanya ini?

⁶ Sifuna labo “abazimisele ukufumana ukuphila okungapheliko.” (IzE. 13:48) Nasenza abantu babe bafundi, kufuze sibasize (1) bazwisise, (2) bamukele, (3) bebasebenzise lokho abakufunda eBhayibhelini. (Jwa. 17:3; Kol. 2:6, 7; 1 Thes. 2:13) Boke ebandleni bangasiza abantu abafundelwa iBhayibheli ngokubatjengisa ukuthi bayabathanda nokubenza bazizwe batjhaphulukile nabeza esifundweni. (Jwa. 13:35) Umuntu oraga isifundo seBhayibheli kungatlhogeka ukuthi asebenzise isikhathi namamndlakhe amanengi ekusizeni umuntu afunda naye alise iinkolelo namasiko ‘adzinyeleliswe ngokuqinileko’. (2 Kor. 10:4, 5) Kungathatha iinyanga ezinengi ukusiza umuntu ukufikelela amagadango la bekabhajadiswe. Nanyana kunjalo, kufuze sikwenze lokhu.

7. Khuyini esikhuthaza ukuthi sitjhumayele besenze nabafundi?

⁷ Kubayini senza umsebenzi wokutjhumayela newokwenza abafundi? Kokuthoma, kungombana sithanda uJehova. Nasenza koke okusemandlenethu ukuthi sitjhumayele besenze abafundi, sitjengisa ukuthi siyamthanda uZimu. (1 Jwa. 5:3) Cabanga ngalokhu: Ithando onalo ngoJehova  likwenze watjhumayela umuzi nomuzi. Bekulula na ukukwenza lokho? Kungenzeka bekungasi lula. Kghani bewuthukiwe mhlazana ungena umuzi wokuthoma? Asizazi ukuthi bekunjalo! Nanyana kunjalo, bewazi ukuthi uJesu ufuna uwenze umsebenzi lo, yeke wawulalela umyalwakhe. Ngokukhamba kwesikhathi, kube lula ukuthi uragele phambili wenza umsebenzi wokutjhumayela. Kuthiwani-ke ngokuraga isifundo seBhayibheli? Kghani lokhu kukwenza ungenwe mamanzi emadolweni? Kungenzeka. Nanyana kunjalo, nawungabawa uJehova akusize uhlule ukuthukwa bewube nesibindi sokuthomisa ukufunda nabantu iBhayibheli, angakghona ukuqinisa isifiso sakho sokwenza abafundi.

8. Umtlolo kaMarkosi 6:34, uthi khuyini enye engasenza sifune ukufundisa abantu?

⁸ Kwesibili, lithando ngabomakhelwana bethu lisisikinya ukuthi sibafundise iqiniso. Kesinye isenzakalo, uJesu nabafundi bakhe bebadiniwe ngombana bebabuya ukuyokutjhumayela. Bebatlhoga indawo la bangaphumula khona kodwana isiqubuthu esikhulu sabalandela sayakibo. Ngebanga lesirhawu, uJesu wathoma ukubafundisa “izinto ezinengi.” (Funda uMarkosi 6:34.) Wasebenza budisi nanyana bekadiniwe. Kubayini? UJesu bekazwisisa kuhle ukuthi abantwaba bazizwa njani. Wazibonela indlela ebebatlhaga ngayo nokuthi bebalitlhoga kangangani ithemba, kungebangelo bekafuna ukubasiza. Abantu nanamhlanjesi basebujamweni obufanako. Ungakhohliswa yindlela abaqaleka ngayo. Bafana nezimvu ezilahlekileko, ezinganamelusi ongazilusa. Umpostoli uPowula wababiza ngokuthi babantu abanganaZimu nabanganathemba. (Efe. 2:12) ‘Basendleleni etjhinga ekubhujisweni’! (Mat. 7:13) Nasicabanga ngokuthi abantu besimini yangekhethu batlhoga kangangani ukuzwa ngoZimu, ithando nokubazwela kusenza sifune ukubasiza. Indlela ephuma phambili esingabasiza ngayo kukuthi sibawe ukufunda nabo iBhayibheli.

9. NgokwakaFilipi 2:13, uJehova angakusiza njani?

⁹ Kungenzeka uyazaza ukubawa ukufunda nabantu iBhayibheli ngombana uyazi ukuthi kutlhoga ukuzidela okungangani ukuraga isifundo. Nangabe kunjalo, tjela uJehova indlela ozizwa ngayo. Mbawe akusize ube nesifiso sokufumana umuntu ongaraga naye isifundo seBhayibheli. (Funda yebeFilipi 2:13.) Umpostoli uJwanisi wasiqinisekisa ngokuthi uZimu uzoyiphendula imithandazo ekhambisana nentandwakhe. (1 Jwa. 5:14, 15) Yeke, ungaqiniseka ukuthi uJehova uzokusiza ube nesifiso sokwenza abafundi.

10-11. Khuyini engabasitjhijilo nasizakuraga iimfundo zeBhayibheli?

¹⁰ Siwuthathela ehloko umyalo wokwenza abafundi nanyana siqalana neenqabo ezisivimbako ukwenza ngendlela esingakghona ngayo. Akhesiqale ezinye iintjhijilo nokuthi singazihlula njani.

¹¹ Singazizwa singakghoni ukwenza okunengi ngebanga lobujamo bethu. Ngokwesibonelo, abanye abatjhumayeli sele baluphele namkha banepilo ebogabogako. Kghani kunjalo ngakuwe? Nangabe kunjalo, cabanga ngeemfundo esizifumene kusindabelaphi i-COVID-19. Sibonile ukuthi singakghona ukuraga iimfundo zeBhayibheli eziphumelelako nge-elekthronikhi! Yeke-ke, ungakghona ukuthoma bewurage isifundo uzihlalele ekhaya. Kunesifundo esinye godu. Abanye bayakuthabela ukufunda iBhayibheli kodwana abafumaneki ngeenkhathi ekutjhunyayelwa ngazo. Nanyana kunjalo, bangafumaneka ekuseni namkha  ebusuku. Ungakghona ukufumaneka ngeenkhathezi? UJesu wafundisa uNikhodemusi ebusuku ngombana bekusikhathi afumaneka ngaso.—Jwa. 3:1, 2.

12. Khuyini engasenza sizithembe ukuthi singaraga iimfundo zeBhayibheli eziphumelelako?

¹² Kungenzeka asizithembi naziza ekurageni iimfundo zeBhayibheli. Mhlamunye sizizwa ngathi sifuna ilwazi namkha ikghono elingeziweko ukuthi sikwazi ukuraga isifundo. Nangabe uzizwa njalo, cabanga ngezinto ezintathu ezingathuthukisa ukuzithemba kwakho. Kokuthoma, uJehova ukubona ufaneleka ukufundisa abanye. (2 Kor. 3:5) Kwesibili, uJesu, ‘onikelwe loke ilawulo ezulwini nephasini,’ ukunikele igunya lokufundisa. (Mat. 28:18) Kwesithathu, ungathembela kwabanye ukuthi bakusize. UJesu wathembela kilokhu uYise amfundise ukukutjho, yeke nawe ungenza njalo. (Jwa. 8:28; 12:49) Ukungezelela kilokho, ungabawa umfowethu odosa phambili isiqhema sesimu, iphayona eliphumelelako namkha umtjhumayeli onelemuko ukuthi akusize uthome bewurage isifundo seBhayibheli. Okhunye ongakwenza kukuthi ube khona lokha omunye wabatjhumayelaba nakaraga isifundo sakhe.

13. Kubayini sitlhoga ukujayelana nendlela etjha yokufundisa?

¹³ Singakufumana kusitjhijilo ukujayelana neendlela namkha amathulusi amatjha. Indlela esiraga ngayo iimfundo zeBhayibheli sele itjhugulukile. Incwadi eyihloko esiyisebenzisako, ethi: Thabela Ukuphila Ngokungapheliko, ifuna sisilungiselele kuhle isifundo besisirage ngendlela ehlukileko kunendlela ebesenza ngayo. Sifunda iingaba ezimbalwa bese sicoca khudlwana nomfundi. Nasifundisako, sisebenzisa amavidiyo nezinto ze-elekthronikhi, njenge-JW Library^®. Nawungakajayelani kuhle nokusebenzisa amathulusi la, coca nomuntu ongakusiza ukghone ukwazi ukuwasebenzisa. Sibabantu abajayela ukwenza izinto ngendlela ethileko. Yeke, akubi lula ukujayela ukwenza into ngendlela etjha. Ngesizo lakaJehova nelabanye, ungakufumana kulula ukujayela iindlela ezitjha bewukuthabele khulu ukufunda nabanye iBhayibheli. Malungana nendlela le yokufundisa, elinye iphayona lathi: “yenza kube mnandi, kokubili emntwini ofundelwako nofundisako.”

14. Khuyini ekufuze siyikhumbule nasisebenza isimu engatheliko begodu umtlolo woku-1 kwebeKorinte 3:6, 7 usikhuthaza njani?

¹⁴ Kungenzeka sihlala endaweni la kubudisi ukuthoma iimfundo zeBhayibheli. Mhlamunye abantu abawuthandi umlayezwethu namkha bayawuphikisa. Singasizwa yini ukuthi sihlale sinomkhumbulo omuhle nasihlala endaweni enjalo? Khumbula ukuthi ubujamo babantu butjhuguluka msinya ephasini eliqale phasi phezulu begodu kungenzeka ukuthi labo ebebanganandaba nalokhu esikufundisako, mhlamunye sele batlhoga iinqophiso zakaZimu. (Mat. 5:3) Abanye bebalokhu bangazifuni iincwadi zethu kodwana ngokukhamba kwesikhathi, bamukela isifundo seBhayibheli. Siyazi nokuthi uJehova uyiKosi yesivuno. (Mat. 9:38) Ufuna siragele phambili sitjala besithelelele kodwana Nguye ozokukhulisa. (1 Kor. 3:6, 7) Kuyakhuthaza ukwazi ukuthi nanyana singanazo iimfundo zeBhayibheli esiziragako kwanje, uJehova uzosivuza ngemizamo esiyenzako, ingasi ngemiphumela esiyifumanako! *

15. UJehova uzizwa njani umuntu nakamukela isifundo seBhayibheli bekasebenzise lokho akufundako?

¹⁵ UJehova uthaba khulu umuntu nakamukela iqiniso leBhayibheli bekatjele nabanye ngalo. (IzA. 23:15, 16) Cabanga ngethabo uJehova analo ngalokhu akubona kwenzeka namhlanjesi! Ngokwesibonelo, naphezu kwesindabelaphi emnyakeni wekonzo ka-2020, kuragwe iimfundo ezii-7,705,765, okwenze abantu abazii-241,994 bazinikela kuJehova bebabhajadiswa. Abafundi abatjhaba nabo bazokuraga iimfundo zeBhayibheli bebenze nabafundi. (Luk 6:40) Akunakuzaza ukuthi uJehova uthaba khulu nasenza abafundi.

16. Ngimuphi umnqopho omuhle esingazibekela wona?

¹⁶ Ukwenza abafundi kumsebenzi obudisi kodwana ngesizo lakaJehova, singaba nendima ekulu ekufundiseni abantu ukuthanda uBabethu wezulwini. Angekhe na sazibekela umnqopho wokuthoma nokuraga isifundo sinye seBhayibheli? Ungasirara umphumela wokubawa ukufunda iBhayibheli kunanyana ngubani esihlangana naye. Singaqiniseka ngokuthi uJehova uzoyibusisa imizamwethu.

17. Sizozizwa njani nasiraga iimfundo zeBhayibheli?

¹⁷ Sinelungelo elihle khulu lokutjhumayela nokufundisa abanye iqiniso! Umsebenzi lo usithabisa kwamambala. Umpostoli uPowula, owasiza abanengi eThesalonika baba bafundi, uthi: “liyini ithemba lethu namkha ithabo namkha isihlohlo sethabo phambi kweKosethu uJesu ekubeni khona kwayo? Kghani akusingini? Eqinisweni niyiphazimulo nethabo lethu.” (1 Thes. 2:19, 20; IzE. 17:1-4) Abanengi namhlanjesi bazizwa ngendlela efanako. Udadwethu u-Stéphanie nobabakwakhe bafundise abantu abanengi iqiniso bebabhajadiswa, uthi, “Alikho ithabo elidlula ukusiza abantu bazinikele kuJehova.”