1. Khuyini abafowethu abatjha abangayenza?

BAFOWETHU abatjha, kunengi eningakwenzela uJehova. Inengi lenu linamandla begodu nikghona nokwenza izinto ezinengi. (IzA. 20:29) Kunengi eningakwenza bona nisize ibandla. Kufuze niqale phambili ekubeni ziinceku ezisizako. Nanyana kunjalo, kungenzeka nizizwa ngasuthi abanye baniqala njengabantu abasesebancani bona banganithemba ngomsebenzi oqakathekileko webandla. Ngitjho nanyana nisesebatjha nje, kunengi eningakwenza okuzokwenza abantu nebandla banithembe.

2. Khuyini esizokucoca ngayo esihlokwenesi?

² Esihlokwenesi, sizokucoca ngalokho okwenzeka ekuphileni kweKosi uDavida. Sizokubuya sicoce godu ngalokho okwenzeka ekuphileni kwaka-Asa no Jehotjhafathi, amakhosi amabili wakwaJuda. Sizokucoca godu nangeentjhijilo amadoda amathathu la aqalana nazo nokuthi bakghona njani ukuzihlula, sibuye sicoce nangokuthi abafowethu abasesebatjha bangafundani eembonelweni zabo.

3. Ngiyiphi indlela abantu abatjha abangasiza ngayo abantu abakhulileko ebandleni?

³ Lokha uDavida nakasesemutjha bekanamakghono ahlukahlukeneko abantu ebebawathanda. Bekamumuntu onobuhlobo  obuhle noJehova begodu bekanekghono lokubhina, ikghonwelo lamzuzisa khulu uSawula, ikosi ebeyikhethwe nguZimu. (1 Sam. 16:16, 23) Bafowethu abatjha, inga-kghani ninamakghono athileko eningawasebenzisa ekusizeni ibandla? Inengi lenu linawo. Ngokwesibonelo, abantu abakhulileko ebandleni bakuthokozela khulu ukusizwa babantu abatjha ngezinto ze-elektroniki abazisebenzisa ebandleni. Ilwazi lenu lingaba lisizo khulu kubantu abakhulileko.

4. Ngibuphi ubuntu obunjengebakaDavida abafowethu abatjha ekufuze babe nabo? (Qala isithombe esingaphandle.)

⁴ UDavida bekahlala atjengisa ngaso soke isikhathi ukuthi uthembekile. Ngokwesibonelo, nanyana bekasesemutjha, bekasebenza budisi ekutlhogomeleni izimvu zakayise. Leso bekusisabelo esiyingozi. UDavida wahlathululela iKosi uSawula, wathi: “Incekwakho beyelusa izimvu zakayise. Bekuthi nakufika ibhubezi nanyana ibhere ithathe imvu hlangana nomhlambi, ngiyilandele, ngifike ngiyisawule bese ngihlangula imvu emlonyenayo.” (1 Sam. 17:34, 35) UDavida bekazi ukuthi kufuze azilwele bekazitlhogomele ngesibindi izimvezi. Abafowethu abatjha nabo bangalingisa uDavida ngokuthi benze izabelo zabo ngokuthembeka.

5. Ngokuya ngokomtlolo weRhubo 25:14, ngiyiphi into eqakathekileko abafowethu abatjha abangayifunda?

⁵ UDavida bekanobuhlobo obutjhidelene khulu noJehova. Ubuhlobo bakhe noJehova bobuqakatheke khulu ukudlula isibindi ebekanaso namkha amakghono ebekanawo njengokudlala isidonodono. UJehova bekangasi mngani kaDavida nje kwaphela kodwana bekaMngani otjhidelene khulu naye. (Funda IRhubo 25:14.) Abafowethu abatjha bangafunda into eqakatheke khulu kilokhu, kufuze babenobuhlobo obuhle noBabethu wezulwini ngombana lokho kuzobasiza bafumane amalungelo angeziweko ebandleni.

6. Abantu bebamthatha njani uDavida?

⁶ Umraro uDavida ebekaqalene nawo kukuthi abantu bebamnyaza. Ngokwesibonelo, nakazokulwa noGoliyadi, iKosi uSawula yazama ukumqeda amandla, yathi: “usesemsana.” (1 Sam. 17:31-33) Ngaphambi kwalokho, umfowabo lakaDavida wamsola ngokuthi wenza ngokunganaki. (1 Sam. 17:26-30) Nanyana kunjalo, uJehova bekangamqali njengomuntu osesemncani. Bekamazi kuhle uDavida. Ukuthembela eMnganinakhe uJehova,  kwamnikela amandla wokubulala uGoliyadi.—1 Sam. 17:45, 48-51.

7. Khuyini ongayifunda kilokho okwenzeka kuDavida noGoliyadi?

⁷ Khuyini esikufundako kilokho uDavida aqalana nakho? Sifunda ukuthi kufuze sibekezele. Kungathatha isikhathi ngabantu okhule phambi kwabo bona bakuqale njengomuntu osele akhulile. Qiniseka ngokuthi uJehova ubona lokho abantu abangakghoni ukukubona. Uyazi ukuthi umumuntu onjani nokuthi khuyini okghona ukuyenza. (1 Sam. 16:7) Qinisa ubuhlobo bakho noZimu. UDavida wenza lokho ngokuqala imisebenzi kaJehova endalweni. Bekacabangisisa ngalokho uJehova akudalileko begodu wakghona ukubona ukuthi uJehova unguMdali onjani. (Rhu. 8:3, 4; 139:14; Rom. 1:20) Okhunye ongakwenza kukuthi ubawe uJehova akuphe amandla. Ngokwesibonelo, inga-kghani abantu ofunda nabo esikolweni bahlekisa ngawe ngebanga lokuthi unguFakazi kaJehova? Thandaza ngalokho, ubawe uJehova akusize uqalane nesitjhijilweso. Kusebenzise lokho okufumana eliZwini lakhe iBhayibheli kunye neencwadini ezisekelwe eBhayibhelini nemavidiyweni. Ngaso soke isikhathi nawubona indlela uJehova akusiza ngayo nawuqalene neenkhathi ezibudisi, uzomthemba khulu. Ukungezelela kilokho, abanye nababona ukuthi uthembela kuJehova, nabo bazokuthemba.

8-9. Khuyini eyasiza uDavida ukulinda ngesineke ngaphambi kobana abe yikosi begodu khuyini abafowethu abatjha abangayifunda esibonelweni sakhe?

⁸ Cabangisisa ngesinye isitjhijilo uDavida aqalana naso. Ngemva kobana akhethelwe ukuba yikosi, kwafuze alinde iminyaka eminengi ngaphambi kokobana abekwe njengekosi yakwaJuda. (1 Sam. 16:13; 2 Sam. 2:3, 4) Hlangana nesikhatheso, khuyini eyamsiza bona alinde? Kunokobana avumele ukudana kumqede amandla, uDavida wenza lokho ebekakghona ukukwenza ngesikhatheso. Ngokwesibonelo, ngesikhathi asesembaleki enarheni yamaFilisti, wasebenzisa ithubelo bona alwisane namanaba wama-Israyeli. Ngokwenza njalo, wavikela umkhawulo wobukhosi bamaJuda.—1 Sam. 27:1-12.

⁹ Khuyini abafowethu abatjha abangayifunda esibonelweni sakaDavida? Sebenzisani nanyana ngimaphi amathuba anivulekeleko ukusiza abafowenu nabodadwenu. Akhesicoce ngesibonelo somfowethu uRicardo. * Nakasesemutjha bekanesifiso sokuba liphayona lesikhathi esizeleko kodwana lokho bekangakalungeli. Kunokobana adane, aphele amandla, uRicardo wasebenzisa isikhathi sakhe esinengi atjhumayela. Uthi: “Nangiqala emva, ngibona kuhle ukuthi kukhona la ebekusafuze ngithuthukise khona. Ngadzimelela ekutheni ngibuyele kilabo ebebanekareko eendabeni ezimnandi. Ngabe ngafumana nomuntu engamfundela iBhayibheli kokuthoma. Njengombana besele ngithoma ukujayela, ngakghona nokuthi ngizithembe.” Nje, uRicardo uliphayona eliphumelelako lesikhathi esizeleko begodu uyinceku esizako.

10. Khuyini uDavida ayenza ngaphambi kokuthi athathe isiqunto?

¹⁰ Cabanga ngokhunye okwenzeka ekuphileni kwakaDavida. Ngesikhathi uDavida nebutho lakhe babalekile bayokulwa, batjhiya imindenabo. Nabasabalekile njalo, amanababo afika athatha imizabo, athumba nemndenabo. Bekungaba bulula ngoDavida ukuza namano wokutjhaphulula imindenabo njengombana bekayindoda yepi kodwana akhenge akwenze lokho. Kunokobana enze njalo, uDavida wabawa uJehova kobana amnqophise.  Ngesizo lomphristi u-Abhiyathari, uDavida wabuza kuJehova wathi: “Ngibagijimise abasahlelaba na?” UJehova wathi kuDavida angenza njalo bewamqinisekisa ukuthi uzokuphumelela. (1 Sam. 30:7-10) Khuyini ongayifunda endabeni le?

11. Khuyini ongayenza ngaphambi kokuthatha iinqunto?

¹¹ Bawa isinqophiso ngaphambi kokuthatha isiqunto. Khuluma nababelethi bakho. Ungafumana nesizo ngokukhuluma nabadala bebandla abanelemuko. UJehova uyawathemba amadoda la, nawe kufuze uwathembe. UJehova uthi amadoda la ‘azizipho’ ebandleni. (Efe. 4:8) Kuzokuzuzisa ukulingisa ikholo labo kunye nokulalela izeluleko zabo ezihle abakunikela zona. Nje, akhesicoce ngalokho esingakufunda eKosini u-Asa.

12. Ngibuphi ubuntu iKosi u-Asa ebeyinabo nayithoma ukubusa?

¹² Njengesokana elitjha iKosi u-Asa, beyithobekile begodu inesibindi. Ngokwesibonelo, ngemva kokuhlongakala kwakababayo u-Abhija, yathoma ijima lokususa abosingazimu. Ikosi u-Asa ‘yayala abantu bakwaJuda bonyana bafune uSomnini uZimu waboyisemkhulu begodu balalele umthetho nomyalwakhe.’ (2 Kron. 14:1-7) Lokha uZerarhi, umKhutjhe nakahlasela amaJuda ngamasotja azii-1 000 000, u-Asa wabawa isizo kuJehova, wathi: “Somnini, akakho onjengawe ongasiza obogabogako ezandleni zetsitsirimba. Nje-ke Somnini Zimethu, sisize ngombana sithembele kuwe.” Amazwi la atjengisa ukuthi u-Asa bekathembele kuJehova begodu bekakholelwa ukuthi angabasindisa abantu bakhe. U-Asa wathembela kuBabakhe wezulwini begodu “uSomnini uZimu wamadlha amaKhutjhe phasi.”—2 Kron. 14:8-12.

13. Khuyini eyenzeka ku-Asa begodu kubayini?

¹³ Bekuyinto ethusa khulu ukuqalana nebutho lamasotja azii-1 000 000 kodwana u-Asa waphumelela. Okudanisako kukuthi nakaqalana nomunye umraro olula, akhenge abawe isizo kuJehova. Lokha nakasongelwa yiKosi embi uBhatjha wakwa-Israyeli, u-Asa wabawa isizo ekosini yama-Aramu. Isiquntweso sabangela ihlekelele! Ngomphorofidi uRhanani, uJehova watjela u-Asa wathi: “Ngebanga lokobana uthembele ekosini yama-Aramu kodwana ingasi kuZimu iKosakho, ibutho lekosi ye-Aramu liphunyurhile esandleni sakho.”  Kusukela ngesikhatheso, ikosi u-Asa beyihlala isepini. (2 Kron. 16:7, 9; 1 Kho. 15:32) Sifundani kilokhu?

14. Ungatjengisa njani ukuthi uthembele kuJehova begodu ngokuya ngokomtlolo weyoku-1 kaThimothi 4:12, uzokuba yini umphumela nawenza njalo?

¹⁴ Hlala uthobikile begodu uthembele kuJehova. Lokha nawubhajadiswako watjengisa ukholelwa kuJehova nokumthemba. UJehova wakwamukela ngethabo njengelunga lomndenakhe. Into ekufuze uyenze, kuragela phambili uthembele kuJehova. Kungabonakala kubulula ukuthembela kuJehova nakufuze uthathe iinqunto eziqakathekileko ekuphileni kodwana kuthiwani nakufuze uthathe iinqunto ezincani? Kuqakatheke khulu ukuthembela kuJehova nawuthatha iinqunto malungana nokuzithabisa, umsebenzi wokuziphilisa kunye nangalokho esiqunta ukukwenza ngokuphila kwethu. Ungathembeli ekuhlakanipheni kwakho. Kungaba kuhle ukutjhinga eBhayibheli, sifune iinqophiso malungana nobujamo esikibo besenze ngokuvumelana nalokho esikufundileko. (IzA. 3:5, 6) Nawenza njalo uzokuthabisa uJehova, ibandla lizokuhlonipha.—Funda yoku-1 kaThimothi 4:12.

15. Ngokomtlolo we-2 IinKronike 18:1-3; 19:2, ngimuphi umtjhapho iKosi uJehotjhafathi eyawenzako?

¹⁵ Soke sinesono, yeke ngezinye iinkhathi sizoyenza imitjhapho. Nanyana kunjalo, lokho akukafuzi kusikhandele ekwenzeni koke esingakwenza ekusebenzeleni uJehova. Akhesicoce ngesibonelo seKosi uJehotjhafathi. Bekanobuntu obuhle. Njengomuntu omutjha, “wafuna uZimu kayisemkhulu bewalandela imiyalwakhe.” Wabewathumela neenkhulu zakhe kilo loke idorobho lakwaJuda bona ziyokufundisa abantu ngoJehova. (2 Kron. 17:4, 7) Nanyana bekathembekile, ngezinye iinkhathi uJehotjhafathi wenza iinqunto ezimbi. Kezinye iinqunto ezimbi uJehotjhafathi azenzako, uJehova wasebenzisa umjamelakhe bona amkhalime. (Funda yesi-2 IinKronike 18:1-3; 19:2.) Ngisiphi isifundo ongasifunda esibonelwenesi?

16. Khuyini ongayifunda esibonelweni sakaRajeev?

¹⁶ Samukele bewusisebenzise isiyalo osifumanako. Njengenengi labantu abatjha, kungababudisi ukuzibekela umgomo wokusebenzela uJehova. Ungapheli amandla. Cabanga ngesibonelo somfowethu osesemutjha, uRajeev. Ukhumbula ngesikhathi asakhula, uthi:  “Ngezinye iinkhathi bengizizwa ngasuthi angizazi ukuthi ngifunani epilweni. Njengenengi labantu abatjha, bengikuthanda khulu ukudlala begodu bengibona kungakaqakatheki ukuya esifundweni namkha ukuyotjhumayela.” Wasizwa yini uRajeev? Umdala onomusa wamnikela iseluleko. URajeev uthi: “Wangisiza ngomtlolo weyoku-1 kaThimothi 4:8.” Ngokuzithoba, uRajeev wasamukela iselulekwesi bewathoma ukuhlela kuhle lokho afuna ukukwenza ngepilwakhe. Uthi: “Ngaqunta ukwenza uJehova eze qangi ekuphileni kwami.” Waba yini umphumela? Uthi, “ngemva kweminyaka embalwa ngifumene iselulekweso, ngabayinceku esizako.”

17. Abantu abakhulileko ebandleni bazizwa njani ngabafowethu abatjha abasebenzela uJehova?

¹⁷ Abantu abakhulileko ebandleni babathanda khulu abafowethu abatjha ebandleni abalotjha uJehova “babambisene” nabo. (Zef. 3:9) Bayayithokoza indlela enikhuthele ngayo nanenza imisebenzi eninikelwe yona begodu banithanda khulu.—1 Jwa. 2:14.

18. Njengombana kuvezwe kuzAga 27:11, uJehova uzizwa njani ngabafowethu abatjha abamsebenzelako?

¹⁸ Bafowethu abatjha, ningalibali ukuthi uJehova uyanithanda begodu uyanithemba. Wabikezela ukuthi hlangana namalanga wokuphela, kuzokuba nebutho labantu abatjha elizozinikela ngokuzithandela ekwenzeni intando kaZimu. (Rhu. 110:1-3) Uyazi ukuthi niyamthanda begodu nifuna ukumsebenzela ngamandlenu woke. Yeke, ragelani phambili nibekezelele abanye begodu nizibekezelele nani. Nanenza imitjhapho, yamukelani ukubandulwa nokuyalwa, lokho nikuqale njengokuvela kuJehova. (Heb. 12:6) Zimisele nawenza izabelo onikelwe zona. Ngaphezu kwalokho, koke enikwenzako kwenzeni ngendlela yokuthi uBabenu wezulwini azikhakhazise ngani.—Funda IzAga 27:11.