1. Kubayini uJesu abawa ukuthi uJehova avikele abafundi bakhe?

NGOBUSUKU bakhe bokugcina asephasini, uJesu bekacabanga ngeentjhijilo abafundi bakhe abazokuqalana nazo. Ngebanga lethando ebekanalo ngabangani bakhe, uJesu wabawa uBabakhe wathi, “ubavikele ngebanga lomumbi.” (Jwa. 17:14, 15) UJesu bekazi ukuthi ngemva kokubuyela kwakhe ezulwini, uSathana uDeveli uzokuragela phambili alwisana nananyana ngubani ofuna ukulotjha uJehova. Kuyakhanya ukuthi abantu bakaJehova bazokutlhoga isivikelo.

2. Singaqiniseka njani ukuthi uJehova uzoyiphendula imithandazwethu?

² UJehova wawuphendula umthandazo kaJesu ngebanga lokuthi uyayithanda iNdodanakhe. Nasilinga ngamandla ukuthabisa uJehova, uzosithanda bekalalele imithandazwethu yokumbawa isizo nesivikelo. Njengobaba onethando, uJehova uzokuragela phambili atlhogomela bekathande abantwana bakhe. Kungahlazisa igama lakhe kunye nesithunzi sakhe nakangenzi njalo!

3. Kubayini sitlhoga isivikelo sakaJehova namhlanjesi?

³ Sitlhoga isivikelo sakaJehova khulu nje kunangaphambili. USathana uqotjhwe ezulwini “anelaka elikhulu.” (IsAm. 12:12) Ukghonile ukukhohlisa abasihlunguphazako ukuthi bacabange bona ‘benzela uZimu umsebenzi ocwengileko.’ (Jwa. 16:2) Abanye abangakholelwa kuZimu bayasihlunguphaza ngebanga lokuthi asifuni ukubunjwa liphaseli. Nanyana ngikuphi esiqalene nakho, kufuze sibe nethemba. Kubayini? Kungombana iliZwi lakaZimu lithi: “iKosi ithembekile, izoniqinisa beyinivikele komumbi.” (2 Thes. 3:3) UJehova usivikela njani? Akhesicoce ngeendlela ezimbili.

4. Ngokuya ngokomtlolo webe-Efesu 6:13-17, khuyini uJehova asinikele yona ukuthi isivikele?

⁴ UJehova usinikele isambatho sepi esikghona ukusivikela ekuhlaselweni nguSathana. (Funda yebe-Efesu 6:13-17.) Isambathwesi siqinile begodu sisebenza kuhle khulu! Singasivikela kwaphela lokha nasimbatha iingcenye zoke zaso singazihlubuli. Ingcenye ngayinye yesambathwesi ifanekisela ini? Akhesicoce ngazo.

5. Liyini ibhande leqiniso begodu kubayini kufuze silimbathe?

⁵ Ibhande leqiniso lifanekisela amaqiniso esiwafumana eliZwini lakaZimu iBhayibheli. Kubayini kufuze silimbathe? Kungombana uSathana “unguyise wamala.” (Jwa. 8:44) Uneenkulungwana zeminyaka aleya amala, ukhohlise “iphasi loke.” (IsAm. 12:9) Iqiniso elifumaneka eBhayibhelini liyasivikela bona singakhohliseki. Silimbatha njani ke ibhande elimfanekisweli? Lokho sikwenza ngokuthi sifunde iqiniso ngoJehova, simlotjhe “ngommoya nangeqiniso,” nangokuthi siziphathe ngendlela ethembekileko kizo zoke izinto.—Jwa. 4:24; Efe. 4:25; Heb. 13:18.

6. Siyini isivikelo sesifuba sokulunga begodu kubayini kufuze sisembathe?

⁶ Isivikelo sesifuba sokulunga sifanekisela iinkambiso ezilungileko zakaJehova. Kubayini kufuze simbathe isivikelwesi? Njengombana isivikelo sesifuba sivikela ihliziyo yesotja bona ingahlatjwa misubela, ngendlela efanako isivikelo sesifuba sokulunga sivikela iinhliziyo zethu ezingokomfanekiso namtjhana umuntu wangaphakathi ukuthi angadurhiswa liphaseli. (IzA. 4:23) UJehova ulindele ukuthi simthande ngehliziywethu yoke. (Mat. 22:36, 37) USathana ulinga ngamandla ukuphandlhula iinhliziyo zethu phakathi ngokuthi asenze sithande izinto zephaseli, okuyinto uJehova ayihloya kwamambala. (Jak. 4:4; 1 Jwa. 2:15, 16) Lokho nakungasebenziko, uzosikatelela ngokuthi asihlunguphaze bona singakhambi ngeenkambiso zakaZimu.

7. Sisembatha njani isivikelo sesifuba sokulunga?

⁷ Sembatha isivikelo sesifuba sokulunga ngokuthi samukele iinkambisolawulo zakaJehova malungana nokulungileko nokungakalungi besiphile ngazo. (Rhu. 97:10) Abanye bangazizwa ngasuthi iinkambiswezi ziyabagandelela. Lokha nasilisa ukuzisebenzisa ekuphileni kwethu sizokufana nesotja elithi naliphakathi epini, lihlubule isambatho salo sesivikelo sesifuba ngebanga lokuthi lizwa ngathi liyadisibezwa. Kuzabe kubudlhadlha ukwenza njalo! Kilabo abathanda uJehova imithethwakhe “ayisibudisi,” beyisindisa ukuphila.—1 Jwa. 5:3.

8. Kutjho ukuthini ukumbatha amanyathelo alungele ukutjhumayela iindaba ezimnandi?

⁸ UPowula usikhuthaza ukuthi simbathe amanyathelo alungele ukutjhumayela iindaba ezimnandi zokuthula. Ngamanye amezwi, kufuze sihlale sikulungele ukutjhumayela iindaba ezimnandi zomBuso kaZimu. Lokha nasicoca nabantu ngomlayezo weBhayibheli, ukukholwa kwethu kuyaqina. Siyakhuthazeka ukubona abantu bakaJehova ephasini loke basebenzisa amathuba woke abanawo wokuthi batjhumayele iindaba ezimnandi zomBuso kaZimu, kungaba semsebenzini, esikolweni, endaweni yamabhizinisi, ukungena umuzi nomuzi, eentolo, ukuvakatjhela iihlobo ezingakholwako, ukukhuluma nabantu esijayelene nabo namkha ukukhuluma nalabo abavaleleke emakhaya ngamabanga athileko. Nakungenzeka sisabe ukutjhumayela iindaba zomBuso, sizokufana nesotja elihlubula amanyathelwalo epini okungabangela bona lihlatjwe eenyaweni. Lokho kuzokwenza bona kube lula  ukuthi balidule phasi begodu angekhe likghone ukulandela iinqophiso zomlawulalo.

9. Kubayini kufuze siragele phambili siphethe isihlangu esikhulu sokukholwa?

⁹ Isihlangu esikhulu sifanekisela ikholo esinalo ngoJehova. Siyamthemba ukuthi uzozizalisa iinthembiso zakhe. Ikholo esinalo lisisiza “ukucima yoke imisubela evuthako yomumbi.” Kubayini kufuze sihlale siphethe isihlangu esikhulu? Kungebanga lokuthi siyasivikela eemfundisweni zeenhlubuki nekuthuselweni babantu abahloye ihlangano. Ngaphandle kwekholo, angekhe sakghona ukujamelana nabantu abalinga ukusenza singalaleli umthetho kaJehova. Ngakelinye ihlangothi nasijamelana neenlingo, kungaba semsebenzini namkha esikolweni, ikholo lethu liyasivikela. (1 Pit. 3:15) Ngaso soke isikhathi nasala umsebenzi obhadela kuhle bona ungasiphazamisi ekulotjheni kwethu uJehova, nalapho ikholo lethu liyasivikela njengesihlangu. (Heb. 13:5, 6) Nalokha siragela phambili silotjha uJehova nangaphezu kokuhlunguphazwa, ikholo lethu liyasivikela.—1 Thes. 2:2.

10. Siyini isikoporo sesindiso begodu kubayini kufuze sisembathe?

¹⁰ Isikoporo sesindiso lithemba uJehova asinikela  lona, ithemba lokuthi uzosisindisa ekufeni bekabanikele umvuzo boke laba abenza intandwakhe. (1 Thes. 5:8; 1 Thim. 4:10; Tit. 1:1, 2) Njengombana isikoporo sivikela ihloko yesotja, ngendlela efanako ithemba ngesindiso livikela nendlela esicabanga ngayo. Ngayiphi indlela? Ithembeli lisisiza ukuthi sihlale sidzimelele eenthembisweni zakaJehova besibe nombono ofaneleko ngemiraro esiqalana nayo. Sisembatha njani ke isikoporwesi? Sikwenza lokho ngokuthi siragele phambili sicabanga ngendlela uJehova acabanga ngayo. Ngokwesibonelo, ithemba lethu asilibeki ezintweni zobunjinga bephaseli kodwana silibeka kuZimu.—Rhu. 26:2; 104:34; 1 Thim. 6:17.

11. Iyini isabula yommoya begodu kubayini sitlhoga ukuyisebenzisa?

¹¹ Isabula yommoya liliZwi lakaZimu, iBhayibheli. Isabula le inamandla wokuveza ihlobo lazo zoke izinto ezikhohlisako beyisiza nabantu ukuthi bangabi ziingqila zefundiso yamala nemikghwa elimazako. (2 Kor. 10:4, 5; 2 Thim. 3:16, 17; Heb. 4:12) Sifunda ukusebenzisa isabula le ngendlela efaneleko ngokufunda iBhayibheli nangebandulo esilifumana ehlanganweni kaZimu. (2 Thim. 2:15) Ngaphezu kwesambatho sepi, uJehova usinikela esinye isivikelo esinamandla. Siyini isivikelweso?

12. Khuyini okhunye esikutlhogako begodu kubayini?

¹² Isotja elinelemuko, lazi kuhle ukuthi angeze lakghona ukulwa nebutho elinengi lilodwa, litlhoga ukusizwa masotja amanye. Ngendlela efanako, angeze saphumelela ukulwisana noSathana nabalandeli bakhe sisodwa, sitlhoga ukusekelwa bafowethu nabodadwethu. UJehova usinikele “ihlangano yabafowethu” abahlale bakulungele ukusisiza.—1 Pit. 2:17.

13. Ngokomtlolo webeHebheru 10:24, 25, kusizuzisa ngani ukuya qobe emihlanganweni yebandla?

¹³ Enye indlela esifumana ngayo amandla kukuthi sibe khona qobe emihlanganweni. (Funda yebeHebheru 10:24, 25.) Nasizizwa siphelelwa mamandla njengombana kungenzeka kunanyana ngubani, imihlangano ingasisiza isinikele amandla. Nasisesifundweni sikhuthazwa ziimpendulo ezinikelwa bafowethu nabodadwethu. Iinkulumo ezisekelwe eBhayibhelini neemboniso, kuyasiqinisa, kusenza sizimisele ukulotjha uJehova. Ukucoca nabafowethu ngaphambi nangemva komhlangano kuyasikhuthaza. (1 Thes. 5:14) Ngaphezu kwalokho, imihlangano isinikela ithuba lokusiza abanye begodu lokho kuyasithabisa. (IzE. 20:35; Rom. 1:11, 12) Imihlangano ibuye isisize nangezinye iindlela, ithuthukisa amakghonwethu isenza sikulungele kuhle ukutjhumayela. Ngokwesibonelo, sifunda ukusebenzisa amaThulusi wethu wokuFundisa ngendlela ephumelelako. Yeke, ilungiselele kuhle imihlangano yebandla. Nasele usemhlanganweni lalelisisa kuhle kuthi ngemva komhlangano ukusebenzise lokho okufundileko. Ngokwenza koke lokhu uzokuba “njengesotja elihle lakaKrestu Jesu.”—2 Thim. 2:3.

14. Ngiliphi elinye isizo esinalo?

¹⁴ Sisekelwa naziingidi zeengilozi ezinamandla. Akhucabange ngalokho okungenziwa yingilosi yinye! (Isa. 37:36) Nje-ke cabanga ngalokho okungenziwa liwomakazi leengilozi. Akunamuntu namkha amadimoni angalinganiswa namandla kaJehova. Khekwatjhiwo ukuthi uFakazi munye othembekileko nakahlangene noJehova, benza isibalo esikhulu sabantu. (Khok. 6:16) Mbala lokho kuliqiniso! Yeke, lokha nawuthuselwa babantu osebenza nabo, ofunda nabo esikolweni  namkha iinhlobo ezingamlotjhiko uJehova, khumbula ukuthi awusiwedwa epini le. Ulandela isinqophiso sakaJehova.

15. Ngokomtlolo ka-Isaya 54:15, 17, kubayini uSathana angekhe avale abantu bakaZimu umlomo?

¹⁵ Njengombana iphaseli libuswa nguSathana, abantu bakhona bayasihloya, lokho kungebanga lokuthi akunasiqhema sezepolotiki esisisekelako begodu asithathi hlangothi kwezepi. Sitjhumayela ngebizo lakaZimu, sitjela abantu ukuthi umBuswakhe ngiwo ozokuletha ukuthula ephasini begodu siphila ngeenkambiso zakhe zokulunga. Siveza ukuthi unamala nokuthi umbulali. (Jwa. 8:44) Sitjhumayela nangokutjhatjalaliswa okuzako kwephasi lakaSathana. USathana nabalandeli bakhe angeze basivala umlomo. Kunalokho sizokuragela phambili siphazimulisa uJehova, sisebenzise koke esingakghona ukukusebenzisa ukuthi simphazimulise. Nanyana uSathana anamandla kodwana ubhalelwe ukuvimbela ukumenyezelwa komBuso kaZimu ephasini loke. Sivikelo sakaJehova kwaphela esikghona ukwenza lokhu.—Funda u-Isaya 54:15, 17.

16. UJehova uzobasindisa njani abantu bakhe hlangana nesizi elikhulu?

¹⁶ Khuyini esiqale phambili kiyo? Hlangana nesizi elikhulu uJehova uzosisindisa ngeendlela ezimbili ezikarisako. Kokuthoma, uzokusindisa boke abathembekileko, lokha nakabangela amakhosi wephaseli ukuthi atjhabalalise iBhabhiloni Elikhulu, umbuso wekolo yamala. (IsAmbulo 17:16-18; 18:2, 4) Ngemva, kwalokho uzokusindisa abantu bakhe lokha nakatjhabalalisa iphasi eliseleko lakaSathana e-Arimagedoni.—IsAm. 7:9, 10; 16:14, 16.

17. Khuyini esiyizuzako ngokuhlala sitjhidelene noJehova?

¹⁷ Nasihlala sitjhidelene noJehova, uSathana angeze asilimaza isiphelani. Ekhabolakhona, nguye ozokulimala isiphelani. (Rom. 16:20) Yeke, mbatha isambatho sakho sepi ungasihlubuli! Ipi le ungayilwi wedwa. Sekela abafowenu nabodadwenu. Landela isinqophiso sakaJehova. Nawenza njalo ungaqiniseka ngokuthi, uBabakho wezulwini okuthandako uzokuqinisa bekakuvikele.—Isa. 41:10.