1-2. (a) Ngokuya ngokomtlolo wezAga 16:31, kufuze sibaqale njani abafowethu abakhulileko? (b) Sizokuphendula miphi imibuzo esihlokwenesi?

KUNEPHAGA e-U.S.A., e-Arkansas, lapha ungafumana khona amadayimani azihlalele. Nanyana kunjalo, amadayimani la awakaphoritjhwa. Ngebanga lokuthi ambatjhile, abantu kungenzeka bawadlule bangalemuki ukuthi aqakatheke kangangani.

² Ngendlela efanako namadayimani la, abantu abalupheleko baligugu. IliZwi lakaZimu lifanisa iinhluthu ezimhlophe nesihlohlo sedumo. (Funda IzAga; 16:31; 20:29) Nanyana kunjalo, kungenzeka siweqisele amehlo amagugu la. Lokha abantu abatjha nabazwisisa ukuthi abantu abakhulileko baligugu kangangani, bakghona ukufumana okunengi kibo. Esihlokwenesi, sizokuphendula imibuzo emithathu: Kubayini uJehova abaqala njengabaligugu abantu abalupheleko? Kubayini abafowethu nabodadwethu abalupheleko baqakathekile ehlanganweni kaJehova? Khuyini esingayenza bona sizuze khudlwana esibonelweni sabo?

3. Ngokomtlolo wamaRhubo 92:13-16, kubayini abakhulileko begodu abathembekileko baligugu kuJehova?

³ Abafowethu nabodadwethu abalupheleko begodu abathembekileko baligugu kuJehova. Ubazi kuhle ukuthi bababantu abanjani begodu uyabuthanda ubuntu babo. Uthaba khulu lokha abantu abalupheleko nabacoca nabantu abatjha ngendlela abasebenzele ngayo uJehova ngokuthembeka ukuphila kwabo koke. (Job. 12:12; IzA. 1:1-4) UJehova ukuthokoza khulu nokukghodlhelela kwabo. (Mal. 3:16) Nanyana baqalana nemiraro eminengi khulu ekuphileni kwabo, bahlale  bathembekile kuJehova. Ithemba labo ngengomuso likhanya khulu ukudlula lokha nabasathoma ukufunda iqiniso. UJehova uyabathanda ngombana baragela phambili bakhuluma ngegama lakhe “nebudaleni babo.”—Funda AmaRhubo 92:13-16.

4. Khuyini engakhuthaza abafowethu nabodadwethu abalupheleko?

⁴ Nangabe sewuthoma ukuluphala, qiniseka ngokuthi uJehova uyikhumbula yoke imisebenzi emihle omenzele yona esikhathini esidlulileko. (Heb. 6:10) Usekele umsebenzi wokutjhumayela ngokuzimisela begodu lokho kwenza uBabethu wezulwini athabe ngawe. Ukghodlhelelele imiraro emikhulu nedanisako, ulalele bewavikela iinkambisolawulo zeBhayibheli ezilungileko, waphetha izabelo ezibudisi ehlanganweni kaJehova bewabandula nabanye. Ukghonile ukukhambisana namatjhuguluko enziwa yihlangano kaJehova. Usekele bewakhuthaza abanye abasebenzela uJehova isikhathi esizeleko. UJehova uZimu ukuthanda khulu ngokuthembeka kwakho. Uthembisa ukuthi angekhe ‘abatjhiye abathembekileko bakhe.’ (Rhu. 37:28) Ukuqinisekisa ngokuthi: ‘Nawuthukghelako uzakusekela.’ (Isa. 46:4) Njengombana uluphala, ungathomi ucabange ukuthi awusanandima eqakathekileko ehlanganweni kaJehova. Uligugu khulu!

5. Khuyini abantu abakhulileko ekufuze bahlale bayikhumbula?

⁵ Abantu abalupheleko kusesekunengi abangakwenza. Akunakuzaza ukuthi amandlabo sekathoma ukuphela kodwana banelemuko elinengi khulu abalibuthelele eminyakeni edlulileko. UJehova angaragela phambili abasebenzisa ngeendlela ezinengi ezihlukahlukeneko, njengombana sizokubona eembonelweni zekadeni nezanamhlanjesi.

6-7. Nikela iimbonelo eziseBhayibhelini zabantu abalupheleko abafumene iimbusiso zokulotjha uJehova ngokuthembeka.

⁶ EBhayibhelini sifunda ngeembonelo ezihle zabantu abakhulileko abasebenzela uJehova ngokuthembeka. Ngokwesibonelo, uMosi bekaneminyaka ema-80 lokha nakathoma ukuba mphorofidi kaJehova  nomjameli wesitjhaba sakwa-Israyeli. Kungenzeka uDanyeli bekaneminyaka yama-90 lokha uJehova nakamsebenzisa njengomkhulumeli Wakhe. Umpostoli uJwanisi kungenzeka bekaseminyakeni ema-90 nakazakutlola incwadi yesAmbulo.

⁷ Abanye abantu bakaZimu abathembekileko bebangaziwa kangako. Yeke, bekungaba lula ukuthi beqiselwe amehlo. Nanyana kunjalo, uJehova wabatjheja bewababusisa ngokuthembeka kwabo. Ngokwesibonelo, uSimiyoni indoda ‘elungileko begodu esaba uZimu’ kukhulunywa ngayo kancani eBhayibhelini kodwana uJehova bekayazi ukuthi ingubani begodu wayinikela nelungelo lokubona isana elinguJesu nelokuphorofida malungana nomntwana nonina. (Luk. 2:22, 25-35) Cabanga godu ngomphorofidikazi u-Ana obekamhlolokazi. Bekaneminyaka ema-84 kodwana “bekangatshwili ethempelini.” Ukuthembeka kwakhe ngokuthi ‘angatshwili ethempelini’ kwabusiswa khulu lokha nakabona uJesu olisana. Bobabili uSimiyoni no-Ana bebaligugu kuJehova.—Luk. 2:36-38.

8-9. Khuyini omunye udade omhlolokazi ayenzako ehlanganweni kaJehova?

⁸ Eenkhathini zanje, kunabanengi abalupheleko begodu abathembekileko abaziimbonelo ezihle ebantwini abatjha. Cabanga ngesibonelo sakaDade u-Lois Didur. Bekaneminyaka ema-21 nakathoma ukuba liphayona elikhethekileko e-Canada. Ngemva kwalokho, yena nendodakwakhe, u-John, basebenze iminyaka eminengi emsebenzini wokujikeleza. Ngokukhamba kwesikhathi, basebenze iminyaka engaphezu kwema-20 e-Bethel ye-Canada. U-Lois nakaneminyaka ema-58, yena no-John bafumana isabelo esitjha e-Ukraine. Bebazokwenza njani? Kghani bebazokuphetha ngokuthi sele babadala khulu bona bangafudukela kenye inarha? Basamukela isabelweso begodu u-John wakhethwa njengelunga leKomidi yeGatja. Ngemva kweminyaka eli-7 u-John ahlongakele, u-Lois waqunta ukuhlala esabelweni sakhe. U-Lois nje sele aneminyaka ema-81, usasebenzela uJehova ngokuthembeka e-Bethel ye-Ukraine begodu bamthanda khulu.

⁹ Abahlolokazi abafana no-Lois kungenzeka bangasatjhejwa ngombana amadodabo sele ahlongakele. Nanyana kunjalo, ukuba mhlolokazi akwehlisi ukuqakatheka kwabo kuJehova. UJehova ubaqala njengegugu abodade abasekele amadodabo iminyaka eminengi begodu abasaragela phambili bamlotjha ngokuthembeka. (1 Thim. 5:3) Ukungezelela kilokho, babuye bakhuthaze nabantu abatjha.

10. U-Tony ubeke siphi isibonelo esihle?

¹⁰ Inengi labantu abalupheleko, abathembekileko abahlala emakhayeni wabalupheleko nalo liqakathekile. Ngokwesibonelo,  umfowethu u-Tony ngomunye wabahlala endaweni enjalo. Wabhajadiselwa e-Pennsylvania, e-U.S.A.ngo-Arhostesi 1942 nakaneminyaka ema-20. Msinyana ngemva kokubhabhadiswa kwakhe, watjelwa ukuthi aye ebusotjeni begodu ngebanga lokuthi azange avume, wabotjhwa iminyaka emibili nesiquntu. Yena nomkakhe u-Hilda, bakhulisele abantwababo ababili eqinisweni. Eminyakeni edlulileko, u-Tony ube mthintanisi wesihlopha sabadala emabandleni amathathu bewaba mbonisi womhlangano. Bekaraga imihlangano yebandla neemfundo zeBhayibheli ejele. Nje, u-Tony uneminyaka ema-98 begodu akakazimiseli ukulisa ukusebenzela uJehova. Uragela phambili enza koke okusemandlenakhe ukuthi asebenzele uJehova nokutjhumayela nebandla!

11. Singatjengisa njani ukuthi siyabathanda abafowethu nabodadwethu abahlala emakhaya wabalupheleko?

¹¹ Singatjengisa njani ukuthi siyabathanda abafowethu nabodadwethu abahlala emakhaya wabalupheleko? Nakukghonekako, abadala bangabasiza bona baye esifundweni namkha balalele imihlangano bebatjhumayele. Singatjengisa ukuthi siyabathanda ngokuthi sibavakatjhele namkha sibafowunele ngevidiyo. Sifuna ukubathanda khulu labo abahlala emakhaya wabalupheleko akude namabandla abahlanganyela kiwo. Kufuze singabeqiseli amehlo. Abanye abafowethu nabodadwethu abalupheleko bakufumana kubudisi ukucoca ngendlela abazizwa ngayo. Nanyana kunjalo, kungasikhuthaza ukuzipha isikhathi sokuthi sicoce nabo ngezinto ezihle abazithabele ehlanganweni kaJehova.

12. Khuyini esingayifumana kubafowethu nabodadwethu abalupheleko ebandleni lethu?

¹² Kungasithabisa ukulemuka ukuthi kuneembonelo ezihle zabalupheleko, abathembekileko ebandleni lethu. Udadwethu u-Harriette ulotjhe uJehova ngokuthembeka ebandleni lekhabo e-New Jersey, e-U.S.A. Ngemva kwalokho, wafuduka wayokuhlala nendodakazakhe. Abafowethu bebandleni afudekela kilo, bazipha isikhathi sokuthi bamazi begodu balemuka ukuthi uligugu kangangani. Bekabacocela ngezinto ebezenzeka esimini ngabo-1920 nakathoma ukufunda iqiniso. Ngeenkhathezo, bekahlala aphethe ibhratjhi yokuhlamba amazinyo ngombana bekungenzeka abotjhwe bekahlale ejele isikhathi eside. Kokwakho, ngo-1933 wabotjhwa kabili, waqeda iveke ejele. Lokha nakabotjhiweko, indodakwakhe ebeyingasi nguFakazi, yamsiza ngokuthi itlhogomele abantwana babo abathathu. Kwamambala, abantu abakhulileko abafana no-Harriette kufuze bahlonitjhwe!

13. Khuyini okufundileko ngendima yabakhulileko ehlanganweni kaJehova?

¹³ Abafowethu nabodadwethu abakhulileko banendima eqakathekileko ebandleni lakaJehova. Bazibonele ngewabo ukuthi uJehova uyibusise njani ihlanganwakhe kuhlanganise nabo. Bafunde iimfundo eziqakathekileko eemtjhaphweni abayenzileko. Muntu omutjha, baqale ‘njengomthombo wokuhlakanipha’ begodu ufunde eembonelweni zabo ezihle. (IzA. 18:4) Nawuzipha isikhathi sokubazi ngcono, ukukholwa kwakho kuzokuqina begodu uzokufunda okunengi eembonelweni zabo.

14. UDuteronomi 32:7 ukhuthaza abantu abatjha ukuthi benzeni?

¹⁴ Ziphe isikhathi sokucoca nabalupheleko. (Funda uDuteronomi 32:7.) Kungenzeka abasaboni kuhle, bakhamba  kabuthaka begodu bakhulumela phasi kodwana nanyana kunjalo, basafuna ukusebenza begodu sele bazenzele “ibizo elihle” kuJehova. (UMtj. 7:1) Khumbula ukuthi kubayini uJehova abathanda. Ragela phambili ubahlonipha. Lingisa isibonelo saka-Elitjha. Ngelanga labo lamaswaphela bandawonye, wakatelela ukuhlala no-Eliya. U-Elitjha wabuyelela kathathu amezwi athi: “Phila ngiphile, ngizokuba sithunzi sakho.”—2 Kho. 2:2, 4, 6.

15. Ngimiphi imibuzo esingayibuza abalupheleko?

¹⁵ Iba nekareko ebantwini abalupheleko ngokuthi ubabuze imibuzo. (IzA. 1:5; 20:5; 1 Thim. 5:1, 2) Buza imibuzo enjengale: “Nawusesemutjha, khuyini eyakuqinisekisako ukuthi ulifumene iqiniso? Zoke izinto ezenzeke ekuphileni kwakho, zikusize njani watjhidelana noJehova? Ngiyiphi ipengu yokuhlala uthabile nawusebenzela uJehova?” (1 Thim. 6:6-8) Lalelisisa njengombana bakucocela.

16. Umuntu olupheleko nomuntu omutjha nabacocako, bangafundisana njani?

¹⁶ Umuntu olupheleko nakacoca nomuntu omutjha, bobabili bangafundisana okunengi. (Rom. 1:12) Bantu abatjha nizoyibuka khulu indlela uJehova atlhogomela ngayo abantu abalupheleko begodu nabalupheleko bazozizwa bahlonitjhwa. Umuntu olupheleko uzokuthabela ukukucocela ngendlela uJehova ambusise ngayo.

17. Kubayini sithi abantu abakhulileko, abathembekileko baba bahle khulu kuJehova nasolo kukhamba iminyaka?

¹⁷ Ubuhle bangaphandle buyaphela ngebanga lokuluphala kodwana labo abathembekileko, baba bahle khulu kuJehova ngokukhamba kwesikhathi. (1 Thes. 1:2, 3) Kubayini kuliqiniso lokho? Kungebanga lokuthi eminyakeni yoke le edlulileko, bavumele ummoya kaJehova wababumba ukuthi babe nobuntu obuhle. Nasisolo sizipha isikhathi sokwazi abafowethu nabodadwethu abakhulileko, sibahloniphe besifunde kibo, sizokubona ukuthi baqakatheke kangangani!

18. Sizokucoca ngani esihlokweni esilandelako?

¹⁸ Ibandla liyaqina lokha abantu abalupheleko nabantu abatjha nabahloniphanako. Esihlokweni esilandelako, sizokucoca ngokuthi abakhulileko bangabahlonipha njani abantu abatjha ebandleni.