1-2. Khuyini eyatjhiwo ngomunye umtloli begodu sizokucoca ngani esihlokwenesi?

NAMHLANJESI, iingidi zabantu zithi zikholelwa kuJesu kodwana azizamukeli iimfundiso zakhe. (2 Thim. 4:3, 4) Omunye umtloli wakhe wathi: “Nabekungaba nomunye ‘uJesu’ hlangana nathi namhlanjesi obekazokutjho izinto uJesu wokuthoma azikhulumako  . . , kghani besizomala njengombana kwenzeka eminyakeni eziinkulungwana ezimbili ezidlulileko? . . . Ipendulo ithi: Iye, besizomala.”

² Inengi labantu esikhathini sakaJesu lezwa begodu lazibonela imikarisomraro uJesu ayenzako kodwana akhenge livume ukumkholelwa. Kubayini? Esihlokweni esidlulileko, sicoce ngeenzathu ezine zokuthi kubayini abantu bakhutjwa ngilokho uJesu akutjhoko nakwenzako. Akhesicoce ngamanye amabanga amane angeziweko. Ukwenza njalo, kuzosisiza sibone ukuthi kubayini namhlanjesi abantu bangabamukeli abalandeli bakaJesu nokuthi singakubalekela njani ukukhubeka.

3. Khuyini uJesu ayenzako eyenza abanye bona bakhubeke?

³ UJesu nakasephasini, wakhetha ukujayelana nayo yoke imihlobo yabantu. Bekahlala nabantu abanjingileko nabanamandla godu bekahlala nabantu abadobha phasi nabagandelelekileko. Ukungezelela kilokho, bekanomusa kibo boke abantu kuhlanganise nalabo ebebathathwa ‘njengezoni.’ Abanye abantu ebebazibona balunge khulu, bakhubeka ngalokho uJesu akwenzako. Babuza abafundi bakhe bathi: “Kubayini nidla begodu nisela nabathelisi nezoni na?” UJesu wabaphendula wathi: “Abaphilako abamtlhogi udorhodere kodwana ngabagulako abamtlhogako. Angikazeli ukubiza abantu abalungileko,  kodwana ngizele ukubiza izoni bona zitjhuguluke.”—Luk. 5:29-32.

4. Ngokuya ngokwaka-Isaya, khuyini amaJuda ebekufuze ayilindele ngoMesiya?

⁴ Ithini imiTlolo? Kusasele iminyaka eminengi bona uMesiya eze ephasini, umphorofidi u-Isaya wabikezela ukuthi iphasi angekhe limamukele. Isiphorofidwesi sabikezela sathi: ‘Wanyazeka bewalahlwa babantu, . . . njengomuntu osithezelwe ubuso. Iye, wanyazeka begodu azange bamhloniphe.’ (Isa. 53:3) UMesiya bakazokulahlwa “babantu” begodu amaJuda wangekhulu lokuthoma bekufuze akulindele ukuthi uJesu uzokwaliwa.

5. Inengi labantu libaqala njani abalandeli bakaJesu namhlanjesi?

⁵ Inga-kghani ukhona umraro onjenga lo namhlanjesi? Iye. Abadosi phambili bezekolo abanengi bayathaba lokha nababona abantu abaziwako, abanemali nabaqalwa njengabahlakaniphileko baba malunga wamabandlabo. Abadosi phambili bezekolwaba abanandaba nokuthi abantu baziphatha njani nokuthi indlela abaphila ngayo ivumelana nemithetho kaZimu na. Bona godu abadosi phambili bezekolwaba baqalela phasi iinkhonzi zakaJehova ezikhutheleko, eziziphatha kuhle ngombana aziphili ngeenkambiso zephasi. Kunjengombana uPowula atjho ukuthi uZimu wakhetha ‘abantu abaqalelwa phasi.’ (1 Kor. 1:26-29) Nanyana kunjalo, kuJehova, boke abathembekileko baligugu kuye.

6. Singawulingisa njani umbono kaJesu njengombana uvezwe kuMatewu 11:25, 26?

⁶ Singakubalekela njani ukukhubeka? (Funda uMatewu 11:25, 26.) Ungavumi ukuba nombono wephasi ngendlela eliqala ngayo abantu bakaZimu. Lemuka ukuthi uJehova usebenzisa abantu abathobekileko kwaphela bona benze intandwakhe. (Rhu. 138:6) Cabangisisa ngokuthi khuyini ayifezileko ngokusebenzisa abantu abathobekileko, iphasi elibaqala njengabantu abangakafundi nabaphasi.

7. Kubayini uJesu abiza abaFarisi ngokuthi babazenzisi begodu basabela njani?

⁷ UJesu waziphikisa ngesibindi iimfundiso zobuzenzisi zangesikhathi sakhe. Ngokwesibonelo, waveza ubuzenzisi babaFarisi ebebanendaba khulu ngokuthi bahlanze izandla zabo kunokutlhogomela ababelethi babo. (Mat. 15:1-11) Kungenzeka abafundi bakaJesu barareka ngamezwakhe. Ekhabolakhona, bambuza bathi: “Uyazi bona abaFarisi bahlabekile nabezwa lokho okutjhwileko?” UJesu wabaphendula wathi: “Nanyana ngisiphi isitjalo esingakatjalwa nguBaba wezulwini sizokuruthulwa. Baliseni banjalo. Babarholi abaziimphofu. Nje-ke, nangabe isiphofu sinqophisa isiphofu, zombili zizokuwela ngemgodini.” (Mat. 15:12-14) UJesu azange avumele umkhumbulo ongakalungi lo wabadosi phambili bezekolo umvimbele bona akhulume iqiniso.

8. UJesu watjengisa njani ukuthi akusizo zoke iinkolo ezamukelwa nguZimu?

⁸ UJesu wabuye wabeka epepeneneni iimfundiso zamala zekolo. Akhenge athi zoke iimfundiso zekolo ziyamukeleka kuZimu. Kunalokho, wakhuluma ngabantu abanengi abakhamba endleleni ekulu eyisa ekubhujisweni, ngakelinye ihlangothi kunabantu abancani abakhamba endleleni enyinyekileko etjhingisa ekuphileni. (Mat. 7:13, 14) Wakwenza kwakhanya ukuthi abanye bebazokubonakala ngasuthi balotjha uZimu kanti eqinisweni, akusinjalo. Wathi: “Yelelani abaphorofidi bamanga abeza kini bambethe isikhumba semvu, khisibe ngaphakathi baziimpisi ezirharulako. Nizobabona ngeenthelo zabo.”—Mat. 7:15-20.

9. Ngiziphi ezinye iimfundiso ezimamala uJesu azibeka epepeneneni?

 ⁹ Ithini imiTlolo? Isiphorofido seBhayibheli sabikezela ukuthi uMesiya uzokutjhisakalela indlu kaZimu. (Rhu. 69:10; Jwa. 2:14-17) Ukutjhisekokhu kwenza uJesu bona azibeke epepeneneni iimfundiso ezimamala zekolo kunye nezenzo zayo. Ngokwesibonelo, abaFarisi bebakholelwa ukuthi umphefumulo womuntu awufi kodwana uJesu wafundisa ukuthi abafileko balele. (Jwa. 11:11) AbaSadusi bebakholelwa ukuthi akukho ukuvuswa kwabafileko kodwana uJesu wavusa umnganakhe uLazaru. (Jwa. 11:43, 44; IzE. 23:8) AbaFarisi bebakholelwa ukuthi ukuphila komuntu koke kuhlelwe nguZimu. UJesu wafundisa abantu ukuthi kufuze bazikhethele bona ukuthi bazokulotjha uZimu namkha awa.—Mat. 11:28.

10. Kubayini inengi likhutjwa ziimfundiso zethu?

¹⁰ Inga-kghani ukhona umraro onjenga lo namhlanjesi? Iye. Inengi likhutjwa ziimfundiso eziseBhayibhelini ezibeka iimfundiso ezimamala epepeneneni. Abadosi phambili bezekolo bafundisa abalandeli babo ukuthi, uZimu uzobajezisa esirhogweni somlilo nabangalaleliko. Basebenzisa ifundiso le bona balawule abantu. Iinkhonzi zakaJehova, ezilotjha uZimu olithando, zisiza abantu bakghone ukuzwisisa ukuthi ifundiso le imamala. Abadosi phambili bezekolo babuye bafundise ukuthi umphefumulo womuntu awufi. Nangabe ifundiso le beyiliqiniso, bekungekhe kutlhogeke bona kube nevuko. Nanyana iinkolo ezinengi zifundisa ukuthi koke okwenzeka epilweni yomuntu kuhlelwe nguZimu namkha mmoya othileko ongabonakaliko onamandla. IBhayibheli lifundisa ukuthi woke umuntu unekululeko yokuzikhethela ukuthi uyafuna ukulotjha uZimu namkha awa. Abadosi phambili bezekolo basabela njani kilokhu? Kanengi, bakwata baqede iswigiri!

11. Ngokuya ngokwamezwi kaJesu akuJwanisi 8:45-47, khuyini uZimu ayifuna ebantwini bakhe?

¹¹ Singakubalekela njani ukukhubeka? Nangabe sithanda iqiniso, sizokwamukela koke okutjhiwo nguZimu. (Funda uJwanisi  8:45-47.) Ngokungafani noSathana, thina angekhe salihlanukela iqiniso. Angekhe senza nanyana yini engavumelani nalokho esikukholelwako. (Jwa. 8:44) UZimu ufuna abantu bakhe ‘bahloye okumbi, banamathele kokuhle’ njengoJesu.—Rom. 12:9; Heb. 1:9.

12. Kubayini indlela uJesu ahlongakala ngayo yakhubekisa amaJuda amanengi?

¹² Ngiliphi elinye ibanga elenza amaJuda bona ale uJesu? UPowula wathi: “Sitjhumayela uKrestu abulawelwe esigodweni, emaJudeni lokho kusikhubekiso.” (1 Kor. 1:23) Kubayini kwaba yinto embi kumaJuda ukufa kwakaJesu esigodweni sokuhlunguphazwa? Kibo, ukufela kwakaJesu esigodweni sokuhlunguphazwa bekubonakala ngathi usilelesi nesoni, ingasi uMesiya.—Dut. 21:22, 23.

13. Laba abakhutjwa nguJesu khuyini ababhalelwa kuyilemuka?

¹³ Labo ebebahlangana namaJuda akhubekako abhalelwa kubona ukuthi uJesu bekanganamlandu, bekanindwa ngomlandu ongasiwo nokuthi khenge aphathwe ngobulungiswa. Labo bebademba indaba kaJesu bebanganandaba nobulungiswa, bebahlekisa ngaye. Ikhotho ephakemeko yamaJuda yahlangana msinyana bona izokwahlulela uJesu begodu khenge balandele imithetho efaneleko yendlela ekufuze baphathe ngayo umlandwakhe. (Luk. 22:54; Jwa. 18:24) Abahlulelaba akhenge benze ngobulungiswa ngemva kokuzwa ngeensolo nobufakazi obujamelene noJesu, bazama ukufumana “ubufakazi bamala ngoJesu bona bambulale.” Bathi nabafumana bona babhalelwe, bazama ukwenza uJesu akhulume into ebeyizomenza abemlandu. Lokhu bekungavumelani nakancani nomthetho. (Mat. 26:59; Mar. 14:55-64) Ngemva kokobana uJesu avusiwe, abahluleli abakhohlakeleko bafumbathisa amasotja amaRoma ebekagade ithuna lakhe, bawanikela “Iimpaparwana zesiliva ezinengi” bona akhulume amanga ngokuthi kubayini kunganamuntu ethuneni.—Mat. 28:11-15.

14. Khuyini imitlolo eyakubikezelako malungana nokufa kwakaMesiya?

 ¹⁴ Ithini imiTlolo? Nanyana amaJuda amanengi ngesikhathi sakaJesu bekangakalindeli bona uMesiya ahlongakale, tjheja lokho okwabikezelwa emiTlolweni: “Ngokunikela kwayo ipilo ekufeni nangokubalelwa nabaphambekako. Yona yathwala izono zabanengi, yazikhuba ngebanga labaneemphambeko.” (Isa. 53:12) Yeke, amaJuda bewanganaso isizathu sokukhubeka uJesu nakabulawa njengesoni.

15. Khuyini aboFakazi bakaJehova abasolwa ngayo eyenza abantu abanengi bona bakhubeke?

¹⁵ Inga-kghani ukhona umraro onjenga lo namhlanjesi? Iye! UJesu wabekwa umlandu begodu wagwetjwa ngendlela engakafaneli, naboFakazi bakaJehova namhlanjesi baqalene nobujamo obufanako. Tjheja nanzi iimbonelo. Ngesikhathi sabo-1930 nabo-1940, e-United States, ikululekwethu yokulotjha uZimu beyingahlonitjhwa begodu besifakwa emakhotho. Abanye abahluleli bebanganaanhloni ngokusikhethulula. Isonto le-Quebec, e-Canada nomBuso bebasebenzisana, bavimbela umsebenzethu. Inengi labatjhumayeli labotjhwa ngebanga lokukhuluma nabantu ngomBuso kaZimu. E-Nazi ye-Germany, inengi labafowethu abatjha abathembekileko, labulawa babantu ebebangakholelwa kuZimu. Eminyakeni yamva nje, abafowethu e-Russia bagwetjwa bebabotjhwa ngebanga lokucoca nabanye ngeBhayibheli, lokho bathi “kuvukela.” ITjhugululo YePhasi Elitjha YemiTlolo Ecwengileko yavinjelwa yelimi lesi-Russia yavinjelwa ngombana isebenzisa igama elithi Jehova, yeke bathi “yincwadi evukelako.”

16. Njengombana kuvezwe kweyoku-1 kaJwanisi 4:1, kubayini kungakafuzi sithuselwe ziindaba ezimamala ngabantu bakaZimu?

¹⁶ Singakubalekela njani ukukhubeka? Funda amaqiniso. Etjumayelwenakhe yeNtabeni, uJesu wayelelisa ebebamlalele, wathi abanye ‘bebazobarhwayela amanga ahlaza.’ (Mat. 5:11) Umthombo wamanga lawo nguSathana. Usebenzisa abaphikisi bona barhatjhe iindaba ezimamala nezilamazako ngalabo abathanda iqiniso. (IsAm. 12:9, 10) Kufuze singawamukeli amanga akhulunywa baphikisi bethu. Akukafuzi sibavumele basithusele namtjhana baqalele phasi ukukholwa kwethu.—Funda yoku-1 kaJwanisi 4:1.

17. Izenzakalo zangaphambi kokufa kwakaJesu, bezingabakhuba njani abanye?

¹⁷ Ngaphambi kokufa, uJesu wathengiswa ngomunye wabapostoli bakhe abali-12. Omunye umpostoli waphika uJesu kathathu kwathi boke abapostoli bakhe bamlahla ngobusuku bangaphambi kokufa kwakhe. (Mat. 26:14-16, 47, 56, 75) Lokho akhenge kummangaze uJesu. Bekazi ukuthi kuzokwenzeka begodu khewatjho ukuthi kuzokwenzeka. (Jwa. 6:64; 13:21, 26, 38; 16:32) Lokhu bekungenza abanye bakhubeke, bebatjho bathi, ‘Nangabe abapostoli baziphatha ngendlela le, angifuni ukuba yingcenye yabo!’

18. Ngiziphi iimphorofido malungana nezenzakalo zokuhlongakala kwakaJesu ezazaliseka?

¹⁸ Ithini imiTlolo? Kusasele amakhulu weminyaka, uJehova waveza eliZwini lakhe ukuthi uMesiya bekazokuthengiswa ngeempaparwana zesiliva ezima-30. (Zak. 11:12, 13) Umuntu obekazomthengisa, bekuzokuba mumuntu atjhidelene naye. (Rhu. 41:10) Umphorofidi uZakariya watlola wathi: “Kghedlha umelusi ukuze izimvu ziphadlhalale.” (Zak. 13:7) Kunokobana bakhubeke, abantu abaneenhliziyo ezilungileko bekufuze kubaqinise ukuzaliseka kweemphorofidwezi malungana noJesu.

19. Khuyini abantu abaneenhlizyo ezilungileko abayaziko?

 ¹⁹ Inga-kghani ukhona umraro onjenga lo namhlanjesi? Iye. Eenkhathini zanje, bambalwa aboFakazi abaziwako abatjhiya iqiniso baba ziinhlubuki begodu balinga nokwenza abanye batjhiye iqiniso. Barhatjhe imibiko engasiliqiniso namanga ngaboFakazi bakaJehova kwezokuthintana. Nanyana kunjalo, abantu abaneenhliziyo ezilungileko abakhutjwa zizinto ezinjengalezi. Ngokuhlukileko kilokhu, bayazi ukuthi iBhayibheli labikezela ukuthi izinto ezinjalo zizokwenzeka.—Mat. 24:24; 2 Pit. 2:18-22.

20. Singakubalekela njani ukukhutjwa ngilabo abatjhiye iqiniso? (2 Thimothi 4:4, 5)

²⁰ Singakubalekela njani ukukhubeka? Kufuze siqinise ukukholwa kwethu ngokufunda qobe, ukuthandaza nangokuba majadu ngomsebenzi uJehova asinikele wona bona siwenze. (Funda yesi-2 kaThimothi 4:4, 5.) Nasitjengisa ukukholwa, ngeze sangenwa mamanzi emadolweni nasizwa iindaba ezimamala. (Isa. 28:16) Ithando lethu ngoJehova, iliZwi lakhe nangabafowethu lizosisiza sihlule ukukhutjhwa ngilabo abatjhiye iqiniso.

21. Nanyana inengi namhlanjesi lingawamukeli umlayezo esiwuphetheko, khuyini esiqiniseka ngayo?

²¹ Ekhulwini lokuthoma, inengi labantu lakhubeka begodu khenge limamukele uJesu. Nanyana kunjalo, inengi labanye lamamukela. Laba bafaka hlangana ilunga leSanhedrini yamaJuda kunye “Nesiqubuthu esikhulu sabaphristi.” (IzE. 6:7; Mat. 27:57-60; Mar. 15:43) Ngendlela efanako nanamhlanjesi, iingidi khenge zikhubeke. Kubayini? Kungombana bayawazi begodu bayawathanda amaqiniso afumaneka emiTlolweni. IliZwi lakaZimu lithi: “Abathanda umthethwakho banokuthula okukhulu, akukho okungabenza bakhutjwe.”—Rhu. 119:165.