Isenzakalweso satjhugulula ukuphila kwami ngombana kula ngathoma khona ukufuna ukwazi uMdali. Ngaphambi kobana nginicocele ukuthi khuyini eyalandelako ngobusukobo, akhenginitjele kafitjhazana ngendlela engakhula ngayo nangezinto ezangenza ngafuna uZimu.

Ngabelethwa ngo-1937 e-Guesnain, okulidorobha lamamayini elingetlhagwini ye-France. Njengombana ubabami bekasebenza emayini, wangifundisa ukuqakatheka kokusebenza budisi. Ngafunda nendlelakhe yokucabanga njengombana bekathanda ubulungiswa, okwamenza wajamela abasebenzi bemayini ebebakghodlhelelela ukusebenza ebujamweni obungasi buhle. Ngebanga lokuthi bekafuna ukuthuthukisa ubujamo, uBaba wazibandakanya neenhlangano ezijamele abasebenzi nemitjhagalo. Bekangakuthandi nokubona abafundisi bamasondo abazenzisako. Abanengi babafundisabo bebahlala eendlini zakanokutjho khisibe ngapha bafuna iimali ebantwini abadobha phasi. Ubuzenzisobo bebumsilinga tle, yeke, khenge angifundise ngezekolo. Ekhabolakhona, besingakhulumi nokukhuluma ngoZimu.

 Njengombana ngikhula, nami ngahloya ukungabi nabulungiswa. Ukungabi nabulungisokho bekuhlanganisa ukubandlululwa kwabantu abavela kwezinye iinarha bazokuhlala e-France. Bengidlala ibholo nabantwana babantu abafudukele enarheni yekhethu begodu bengikuthabela ukuhlala nabo. Ngaphezu kwalokho, umma wabelethelwa e-Poland, ingasi e-France. Benginesifiso sokuthi kungabi nebandlululo begodu kube nokulingana.

Ngafakwa ebuthweni lezepi ngo-1957. Ngazifumana ngizeentabeni ze-Algeria ngobusuku obunzima tshu, njengombana khengatjho phambilini. Ngemva kokurhidla isililo, ngithi, “Zimu! ,Maye, Zimu!” Bekungasilisotja esilwa nalo kodwana bekungudumbana wemmangweni! Lokho kwangenza ngatjhaphuluka. Nanyana kunjalo, isenzakalweso nepi leyo kwangenza ngacabangisisa ngomnqopho wokuphila. Siphilelani? Kghani uZimu unendaba nathi? Kghani kuzakhe kube nokuthula?

Nangivakatjhele ababelethi bami kwesikhatjhana, ngahlangana noFakazi kaJehova. Wanginikela ikhophi yeBhayibheli i-La Sainte Bible, okuyitjhugululo yesi-French Catholic engathoma ukuyifunda msinyana ngemva kokubuyela e-Algeria. Umtlolo owangithinta khulu ngewesAmbulo 21:3, 4. Othi: “Itende lakaZimu lihlangana nabantu . . . Uzokusula zoke iinyembezi emehlwenabo, ukufa angekhe kusaba khona, namkha isizi namkha ukulila namkha ubuhlungu angekhe kusaba khona.” * Amezwi la angirara. Ngazibuza, ‘Kghani aliqiniso amezwi la?’ Ngesikhatheso bengingazi litho ngoZimu neBhayibheli.

Ngemva kokuqeda ebusotjeni ngo-1959, ngahlangana noFakazi ongu-François, wangifundisa amaqiniso eBhayibheli. Ngokwesibonelo, wangitjengisa eBhayibhelini igama lakaZimu elithi Jehova. (Rhu. 83:18) U-François wangihlathululela ukuthi uJehova uzokuletha ubulungiswa ephasini, alilungise libe yipharadesi bekazalise amezwi wesAmbulo 21:3, 4.

Iimfundiswezo ngazizwisisa kuhle begodu zangithinta ihliziyo. Ngabakwatela khulu abafundisi kangangokuthi bengifuna ukubatjela indlebe ukuzwa ukuthi iimfundiso zabo zimamala begodu azikho eBhayibhelini! Kubonakala ngasuthi bengisasenombono kababa begodu bengingakghoni ukubekezela. Bengifuna ukwenza okuthileko msinyana!

U-François nabanye abangani bami abatjha ababoFakazi bangisiza ngehlisa ummoya bengalawula itukuthelwami. Bangihlathululela ukuthi njengombana simaKrestu, umsebenzethu kunikela abantu ithemba ngokubatjela ngomBuso kaZimu, ingasi ukubahlulela. Lo msebenzi uJesu awenzako bewawunikela abalandeli bakhe bona bawenze. (Mat. 24:14; Luk. 4:43) Kwafuze godu ngifunde indlela yokukhuluma nabantu ngomusa, ngibacabangele, kunganandaba ukuthi khuyini abayikholelwako. IBhayibheli lithi, “Inceku yekosi akukafuzi ilwe kodwana kufuze ibe mnene kibo boke.”—2 Thim. 2:24.

Ngenza amatjhuguluko atlhogekako bengabhajadiswa ngabangomunye waboFakazi bakaJehova emhlanganweni wesigodi ngo-1959.  Emhlanganweni loyo ngahlangana nomunye udadwethu ongu-Angèle, ngamthanda tle! Ngathoma nokuvakatjhela ibandla ebekakilo besatjhada ngo-1960. Kwamambala, umfazi okhamba phambili, usisipho esiligugu esivela kuJehova.—IzA. 19:14.

Eminyakeni eminengi edlulileko, ngifunde izinto ezinengi eziqakathekileko emadodeni ahlakaniphileko nanelemuko. Okuveleleko engakufundako, ngilokhu: Nawuzakuphumelela kinanyana ngisiphi isabelo onikelwe sona, kufuze uthobeke, usebenzise ukuhlakanipha okusencwadini yezAga 15:22, ethi: “Ngabeluleki abanengi amaqhinga ayaphumelela.”

Ngo-1964, ngabona ukuba liqiniso kwamezwi la. Ngomnyaka loyo, ngaba mjikelezi, ngivakatjhela amabandla bona ngiwakhuthaze bengiwaqinise ebuhlotjeni bawo noJehova. Bengisesemncani ngombana bengineminyaka ema-27 begodu benginganalemuko. Yeke, bengiyenza imitjhapho kodwana ngesikhathi esifanako, ngalinga ukufunda kiyo. Ngaphezu kwakho koke, kuneemfundo eziqakathekileko engazifunda ‘kibaluleki’ abahlakaniphileko nabanelemuko.

Ngikhumbula okuthileko okwenzeka kimi njengombana bengisesemjikelezi ongakabi nelemuko. Ngemva kokuvakatjhela ibandla e-Paris, omunye umfowethu onelemuko wabawa ukukhuluma nami ngeqadi. Ngathi, “Kulungile.”

Wangibuza, “Louis, navane sibize udorhodere ekhaya, nakafikako uya kubani?”

Ngaphendula ngathi, “uya emntwini ogulako.”

Wathi kimi: “Uqinisile. Ngitjheje ukuthi uba nesikhathi esinengi nalabo abanobuhlobo obuhle noZimu, njengomthintanisi webandla. Ibandla lethu linabafowethu nabodade abatlhoga ukukhuthazwa nalabo ingasi kade bathome ukuhlanganyela nabaneenhloni. Bangakhuthazeka khulu nawungaba nesikhathi nabo ubavakatjhele emakhaya benithabele nokudla ndawonye.”

Umfowethu othandekako lo wanginikela iseluleko esihle tle! Indlela athanda ngayo izimvu zakaJehova yangithinta ihliziyo. Ngazithoba, ngathoma ukusebenzisa iseluleko sakhe. Ngiyamthokoza uJehova ngabafowethu abanjengaye.

Ngo-1969 nango-1973, nganikelwa isabelo sokuba mtlhogomeli eMnyangweni woKudla emihlanganweni yeentjhabatjhaba emibili  e-Colombes, e-Paris. Emhlanganweni wango-1973, bekunabantu abazii-60 000 ebekutlhogeka bona banikelwe ukudla amalanga amahlanu woke! Kwangithusa khulu lokho. Nanyana kunjalo, ngakhumbula ukuthi khuyini ebeyingangenza ngiphumelele njengombana kutjho izAga 15:22, bekufuze ngitjhinge kwabanelemuko. Ngafuna iseluleko emadodeni anobuhlobo obuqinileko noJehova begodu anelemuko emnyangweni wokudla. Abafowethwaba bebafaka hlangana abatlhogomeli benyama, abatlhogomeli bemifino, abaphekako nabathengako. Sisoke, sakghona ukufeza isabelo ebesisikhulu njengentaba.

Ngo-1973, mina nomkami sabizelwa e-Bethel ye-France. Isabelo sami sokuthoma sabonakala sibudisi. Bekufuze ngikhambise iincwadi kubafowethu be-Afrika, e-Cameroon, lapho umsebenzethu bewuvinjelwe khona ngeminyaka yabo-1970 ukuya ku-1993. Ngazizwa ngingakghoni ukusenza isabelweso. Umfowethu obekamtlhogomeli emnyangweni lo wabona ukuthi bengigandelelekile, yeke wangikhuthaza wathi, “Abafowethu be-Cameroon bakutlhoga khulu lokhu bona babe nobuhlobo obuhle noZimu. Asibanikele ukudlokhu!” Mbala, ngilokho esakwenza.

Bengiyivakatjhela kanengi inarha ye-Cameroon, ngihlangana nabadala bamabandla ngedoyelweni lenarha leyo. Abadala abanesibindi nabanelemuko bangisiza bona ngihlele kuhle zoke izinto ezidingekako bona ngizokghona ukubanikela qobe iincwadi. UJehova wayibusisa imizamwethu. Ekhabolakhona, eminyakeni ema-20 yoke, bekungadluli inyanga abafowethwaba bangakasifumani IsiThala nencwajana esiyisebenzisa emhlanganweni waphakathi neveke ebeyibizwa ngokuthi yi-Our Kingdom Service.

Kusukela ekuthomeni kokwazana kwethu, ngatjheja ukuthi u-Angèle uneenthelo zommoya.  Ubuntobo babonakala khulu nalokha nasele sesitjhadile. Ekhabolakhona, ngobusuku esatjhada ngabo, wangibawa bona ngithandazele isifiso sethu sokulotjha uJehova isikhathi esizeleko njengombana sele sibatjhadikazi. UJehova wawuphendula umthandazwethu.

U-Angèle wangisiza ngamthemba khudlwana uJehova. Nasi isibonelo salokho: Ngo-1973 nasibizwa bona sizokusebenza e-Bethel, bengizaza ngombana bengithanda umsebenzi wokujikeleza. U-Angèle wangikhumbuza ukuthi sanikela ukuphila kwethu kuJehova. Akukafuzi na senze koke ihlanganwakhe esibawa bona sikwenze? (Heb. 13:17) Bengeze ngiphikisane naye kilokho! Yeke, satjhinga e-Bethel. Kikho koke ukuphila kwethu, ukuzithoba, ukuhlakanipha nobuhlobo bakhe noZimu zizinto ezaqinisa umtjhadwethu bezasisiza senza iinqunto ezihlakaniphileko.

Njengombana iminyaka sele iyile, u-Angèle usaragela phambili asibonelo esihle, bewuyangisekela. Ngokwesibonelo, lokha nakufuze siye esiKolweni somBuso, ezinengi zakhona eziragwa ngelimi lesiNgisi, mina no-Angèle sasebenza budisi bona sikghone ukuthuthukisa indlela esikhuluma ngayo ilimelo. Lokho kufaka hlangana nokuthi siye ebandleni elikhuluma isiNgisi ngitjho nanyana besele sisemnyakeni yama-70. Ngebanga lokuthi bengililunga leKomidi yeGatja le-France, ukufunda elinye ilimi kwaba sitjhijilo. Sino-Angèle besisizana. Nje sisemnyakeni yama-80, sisaragela phambili nokulungiselela imihlangano yebandla ngelimi lesiNgisi nesi-French. Silinga ukuba nengcenye godu emhlanganweni nesimini yebandla lethu. UJehova uyibusisile imizamwethu yokufunda isiNgisi.

Esinye seembusiso sasifumana ngo-2017. Mina no-Angèle saba nelungelo lokuya esiKolweni samaLunga weKomidi yeGatja nabaFazi Babo esabanjelwa e-Patterson, e-New York, e-Watchtower Educational Center.

UJehova unguMfundisethu oMkhulu. (Isa. 30:20) Yeke akurari ukuthi abantu bakhe, abadala nabatjha bafumana ifundo ephuma phambili! (Dut. 4:5-8) Ngibonile ukuthi abantu abatjha abalalela kokubili uJehova nalabo abanelemuko bathuthuka kuhle etjhebiswaneni labo noZimu begodu bayaphumelela nasele bakhulile. IzAga 9:9 zisikhumbuza ukuthi: “Nawunikela ilwazi kohlakaniphileko, uzakwanda ngobuhlakani; nawufundisa olungileko, uzazengezela ingqondo.”

Ngezinye iinkhathi nginokucabanga ngobusukoba obunzima obuthusako, eentabeni ze-Algeria eminyakeni ema-60 eyadlulako. Bengingazi ukuthi bekunezinto ezihle ezingilindileko. Ngifunde okunengi khulu kwabanye. UJehova usinikele ukuphila okwanelisako. Yeke, sizimisele ukuragela phambili sifundiswa nguBabethu wezulwini besifunde nakubafowethu nabodadwethu abahlakaniphileko nabanelemuko abamthandako.