1-2. AboFakazi abanengi baqalana naziphi iintjhijilo?

Umpostoli uPowula wakhuthaza uThimothi begodu ngokwezinga elithileko woke amaKrestu, bona aragele phambili awenze ngokupheleleko umsebenzawo. (2 Thim. 4:5) Soke nje kufuze sisithathele ehloko iseluleko sakaPowula. Nanyana kunjalo, zikhona iintjhijilo. Abafowethu nabodadwethu abanengi batlhoga isibindi ukuthi bakghone ukwenza umsebenzi wokutjhumayela lo. (2 Thim. 4:2) Ngokwesibonelo, cabanga ngabafowethu abahlala la umsebenzi wokutjhumayela uvinjelwe khona. Baragela phambili batjhumayela nanyana babeka ikululwekwabo engozini!

² Abantu bakaJehova abanengi baqalana nemiraro engabadanisa. Ngokwesibonelo, abanengi kufuze basebenze ama-awara amanengi bona bakghone ukutlhogomela imindenabo. Bangakuthabela ukwenza okunengi ekonzweni kodwana nakuphela iveke vane sele baphelile bangasanamandla. Abanye kuncani khulu abangakghona ukukwenza ngebanga lokugula abanakho okungapheliko namkha ukuluphala, abanye kungenzeka abasakghoni ukutjhiya imizabo. Abanye kungenzeka bazizwa bangasililitho kuJehova. U-Mary, * udadwethu ohlala e-Middle East, uthi: “Kufuze ngenze umzamo omkhulu bona ngilwe namazizo angakhiko angitjhiya ngidiniwe. Ngemva kwalokho ngizizwa ngimlandu ngombana kuthatha isikhathi namandla ekufuze ngathana ngiwasebenzisa ekonzwenami.”

3. Sizokucoca ngani esihlokwenesi?

³ Akunandaba bona siqalana nabuphi ubujamo, uJehova angasipha amandla wokuqalana neentjhijilo zethu siragele phambili simlotjha, kuye ngobujamo bethu. Ngaphambi kobana siqale bona uJehova angasisiza njani, akhe sihlole ukuthi wabaqinisa njani uPowula noThimothi bona baragele phambili  bawenze ngokupheleleko umsebenzabo naphezu kweentjhijilo ebebaqanala nazo.

4. UPowula waqalana naziphi iintjhijilo?

⁴ UPowula waqalana neentjhijilo ezinengi. Bekatlhoga amandla ngemva kobana abetjhiwe, wakghadlhwa ngamatje begodu wavalelwa ejele. (2 Kor. 11:23-25) UPowula wakubeka epepeneneni bona naye ngezinye iinkhathi bekatshwenywa mazizo angasimahle. (Rom. 7:18, 19, 24) Wakghodlhelelela “iliva enyameni” ebekalokhu abawa uJehova bona alisuse.—2 Kor. 12:7, 8.

5. UPowula wenzani nanyana bekaqalene neentjhijilo?

⁵ UJehova wanikela uPowula amandla wokuragela phambili atjhumayela naphezu kweentjhijilo aqalana nazo. Akhe ucabange ngalokho uPowula akghona ukukwenza. Ngokwesibonelo, ngesikhathi abotjhiwe ejele, eRoma, wazimisela ukuvikela iindaba ezimnandi, phambi kwabadosiphambili bamaJuda naphambi kweenkhulu zakarhulumende. (IzE. 28:17; Flp. 4:21, 22) Watjhumayeza abonoGada bomBusi nabo boke abantu abebazomvakatjhela. (IzE. 28:30, 31; Flp. 1:13) Ngesikhathi esifanako, uPowula watlola iincwadi ezasiza amaKrestu weqiniso, ngitjho nanamhlanjesi ziyawasiza. Ngaphezu kwalokho, isibonelo sakaPowula sakhuthaza ibandla leRoma, okwaba nomphumela wokuthi abafowabo babe “nesibindi esikhulu ngokungeziweko sokukhuluma ilizwi lakaZimu ngokungasabi.” (Flp. 1:14) Nanyana ngezinye iinkhathi bekukuncani lokho uPowula ebekakghona ukukwenza kodwana kibo boke ukujamo, walinga ukwenza angakghona ukukwenza begodu lokho ‘kwarholela ekurhatjhweni kweendaba ezimnandi.’—Flp. 1:12.

6. Ngokuya ngeye-2 kwebeKorinte 12:9, 10, yini eyasiza uPowula bona awenze ngokuphumelelako umsebenzakhe?

⁶ UPowula walemuka bona yoke into ayenzele uJehova, wayenza ngamandla kaJehova ingasi wakhe. Wavuma ukuthi amandla kaZimu “enziwa aphelele ekubogabogeni.” (Funda ye-2 kwebeKorinte 12:9, 10.) Ngommoyakhe ocwengileko, uJehova wanikela uPowula amandla wokuthi awenze ngokupheleleko umsebenzakhe, naphezu kokuhlunguphazwa, ukubotjhwa nezinye iintjhijilo aqalana nazo.

7. Ngiziphi iintjhijilo uThimothi ekwafuze azihlule bona akghone ukwenza isabelo sakhe?

⁷ UThimothi osesemutjha obekakhamba noPowula, bekufuze naye athembele emandleni kaZimu ukuthi akghone ukutjhumayela.  Lokha uPowula nakasithunywa sevangeli bekakhamba noThimothi. UPowula wakhe wamthuma bona ayokuvakatjhela amabandla begodu awakhuthaze. (1 Kor. 4:17) Kungenzeka ukuthi uThimothi bekazinyaza. Mhlamunye kungebangelo uPowula amkhuthaza wathi: “Ungavumeli muntu bona aqalele phasi ubutjha bakho.” (1 Thim. 4:12) Ukungezelela kilokho, ngaso isikhathesi, uThimothi naye bekanalo iliva enyameni, ‘ukugula kwakhe.’ (1 Thim. 5:23) UThimothi bekazi ukuthi ummoya kaJehova ocwengileko onamandla bewuzomnikela amandla awatlhogako ukuthi atjhumayele iindaba ezimnandi bekasize nabafowabo.—2 Thim. 1:7.

8. UJehova ubaqinisa njani abantu bakhe namhlanjesi?

⁸ Nanamhlanjesi uJehova unikela abantu bakhe “amandla angaphezu kajayelekileko” ukuthi bakghone ukumlotjha ngokuthembeka. (2 Kor. 4:7) Akhe sihlole iindlela ezine uJehova azenze zafumaneka, asiqinisa bekasisize ngazo bona sihlale sithembekile kuye: umthandazo, iBhayibheli, abafowethu nabodadwethu abamaKrestu nokutjhumayela.

9. Umthandazo ungasisiza njani?

⁹ Umthandazo uyasiqinisa. Njengombana kutloliwe kwebe-Efesu 6:18, uPowula usikhuthaza bona sithandaze kuZimu “ngazo zoke iinkhathi.” Nasenza njalo, uZimu uzosipha amandla. U-Jonnie ohlala e-Bolivia walizwa isekelo elinjalo lokha nakaqalene nemilandelande yeentjhijilo. Ukosikazakhe nababelethi bakhe ababili bagula babangwa neenzibi ngesikhathi sinye. U-Jonnie wathwala budisi khulu bona atlhogomele abantu abathathwaba. Ummakhe wahlongakala begodu kwathatha isikhathi bona ukosikazakhe nobabakhe balulame ekuguleni kwabo. Nakaqala emva u-Jonnie uthi, “Lokha nangigandelelekileko, ngasizwa kukuthi ngithandaze ngitjele uJehova indlela engizizwa ngayo.” UJehova wanikela u-Jonnie amandla awatlhogako bona akghodlhelele. U-Ronald ongumdala webandla e-Bolivia, wafumana bona unina unekankere. Kwathi ngemva kwenyanga wahlongakala. Yini eyamsizako? Uthi: “Ukuthandaza kuJehova kungivumela bona ngimrhuthulele isifuba sami ngimtjele nangendlela engizizwa ngayo. Ngiyazi bona ungizwisisa ukudlula nanyana ngubani omunye umuntu, ukudlula nangendlela mina engizizwisisa ngayo.” Ngezinye iinkhathi singagandeleleka khulu namkha singazi bona yini okufuze siyithandazele. UJehova uyasimema bona sithandaze kuye ngitjho nanyana kubudisi ukutjho indlela esizizwa ngayo namkha lokho esikucabangako.—Rom. 8:26, 27.

10. Njengombana kuvezwe kumaHebheru 4:12, kubayini ukufunda iBhayibheli nokuzindla ngalokho esikufundako kuqakathekile?

¹⁰ Ukufumana amandla eBhayibhelini. Njengombana uPowula bekathembele emitlolweni bona imqinise begodu imduduze, nathi singathembela kiyo. (Rom. 15:4) Njengombana sifunda iliZwi lakaZimu begodu sizindla ngalokho esikufundako, uJehova angasebenzisa ummoyakhe bona asisize sizwisise ngcono ukuthi imitlolo singayisebenzisa njani ebujamweni esiqalene nabo. (Funda amaHebheru 4:12) U-Ronald ekhesakhuluma ngaye phambilini, uthi: “Kuyangithabisa ukuthi ngibe nomukghwa wokufunda ingcenye yeBhayibheli qobe ebusuku. Ngiyazindla ngoJehova nangobuntu bakhe nendlela yethando asebenzelana ngayo neenkhonzi zakhe. Lokhu kungisiza bona ngifumane amandla.”

11. IBhayibheli lamqinisa njani omunye udadwethu obekagandelelekile?

¹¹ Singaba nombono ofaneleko ngobujamo bethu ngokuzindla ngeliZwi lakaZimu. Akhesicoce ngendlela iBhayibheli elasiza ngayo umhlolokazi. Umdala othileko, wanikela udade lo iimphakamiso ezilisizo ngokuthi afunde incwadi yeBhayibheli kaJobho.  Njengombana afunda, ekuthomeni wasola uJobho ngombonwakhe ongakafaneli. Nakacabanga, wazifumana sekamkhalima athi: “Jobho! Lisa ukuba nombono ongakafaneli!” Ngokukhamba kwesikhathi wabona ukuthi umbonwakhe bewufana newakaJobho. Lokhu kwamsiza bona alungise indlela aqala ngayo izinto begodu kwamqinisa kwamenza bona aqalane ngokuphumelelako nobuhlungu bokulahlekelwa yindodakwakhe ngokufa.

12. UJehova ubasebenzisa njani abafowethu abamaKrestu bona basisize?

¹² Ukuqiniswa bafowethu abamaKrestu. Enye indlela uJehova ayisebenzisako bona aqinise amaKrestu, bafowethu nabodwadwethu ebandleni. UPowula watlola wathi bekakululukela ‘ukuzokukhuthazana’ nabafowabo nabodadwabo abamaKrestu. (Rom. 1:11, 12) U-Mary ekhesakhuluma ngaye phambili uyakuthabela ukuhlangana namanye amaKrestu. Uthi: “UJehova wasebenzisa abafowethu nabodadwethu ebebangayazi imirarwami. Batjho izinto ezikhuthazako, bangithumelela ikarada begodu ngilokho ebengikutlhoga ngesikhatheso. Kwangisiza khulu nokucoca nabanye abodadwethu ebebasebujamweni obufanako nebami begodu ngafunda ezintweni ezabehlelako. Abadala bebandla nabo bebangikhuthaza qobe, bangenza ngabona ukuthi ngiyingcenye eqakathekileko yebandla.”

13. Singabaqinisa njani abanye emhlanganweni yebandla?

¹³ Enye indawo la sifumana khona iinkhuthazo, kusemihlanganweni yebandla. Nawusemihlanganweni yebandla, kubayini ungaziphi isikhathi sokuqinisa abanye ngokubabuka ngamazwi amnandi nokubatjela bona uthokoza kangangani ngokuba nabo ebandleni? Ngokwesibonelo, ngaphambi kwemihlangano umdala ibizo lakhe elingu-Peter wathi komunye udade onomlingani ongakholwako: “Awazi bona kukhuthaza kangangani ukukubona ula. Qobe wena nabantwana bakho abasithandathu nilungiselela ukuba khona emihlanganweni begodu ninikele nangeempendulo.” Amehlwakhe azala iinyembezi zethabo njengombana aphendula umfowethu lo, athi: “Awazi bona bengitlhoga kangangani ukuzwa amezwi la namhlanjesi.”

14. Ukutjhumayela kusisiza njani?

¹⁴ Siqiniswa kutjhumayela. Lokha nasikhuluma nabantu ngamaqiniso weBhayibheli, sizizwa siqabulekile begodu sivuselelekile, kungakhathaliseki bona bayasamukela namkha abakwamukeli esibatjela khona. (IzA. 11:25) Udade ibizo lakhe elingu-Stacy, wabona ukuthi kuqinisa njani ukutjhumayela. Lokha ilunga lomndenakhe lisusiwe ekuhlanganyeleni, wazizwa kabuhlungu kangangobana bekasolo azibuza athi, ‘inga-kghani kukhona okhunye ebengingakwenza bona ngimsize?’ Ayikho enye into u-Stacy ebekakghona ukucabanga ngayo. Yini eyamsiza bona akghone ukuqalana nobujamobu? Kutjhumayela! Njengombana bekamajadu nomsebenzi wokutjhumayela, wathoma wadzimelela ebantwini ebebasesimini ayitjhumayelako ebebatlhoga ukusizwa. Uthi: “Ngesikhatheso uJehova wangisiza ngafumana umuntu engingafunda naye iBhayibheli, umuntu loyo wathuthuka. Lokho kwangikhuthaza khulu. Okukuphela kwento engiqinisako ekuphileni kwami kutjhumayela.”

15. Khuyini oyifundako emezwini ka-Mary?

¹⁵ Ngebanga lobujamo babo, abantu abanengi bangaba nomuzwa wokuthi akusikunengi abangakwenza emsebenzini wokutjhumayela. Nange nawe uzizwa njalo, khumbula bona uJehova kuyamthabisa ukukubona wenza koke okusemandlenakho. Akhe sikhulume ngesibonelo saka-Mary. Nakafudukela enarheni ekhuluma elinye ilimi, wazizwa kukuncani khulu angakghona ukukwenza. Uthi, “Kwaphela isikhathi eside, into ebengikghona ukuyenza bekukukhuluma nje amezwi ambalwa namkha ukufunda ivesi leBhayibheli  namkha ukunikela abantu iphetjhana esimini kwaphela.” Lokhu kwamenza wazizwa angafaneleki nakazimadanisa nabantu abakhuluma ilimelo endaweni. Nanyana kunjalo, walungisa umbonwakhe. Wathoma ukubona ukuthi uJehova angamsebenzisa nanyana kukuncani akghona ukukwenza. Uthi, “Amaqiniso asindisa ukuphila la abulula begodu akghona ukutjhugulula amaphilo walabo abawamukelako.”

16. Khuyini engasiza labo abangakghoni ukuphuma bona bafumane amandla?

¹⁶ UJehova uyazi bona abanye bethu bayafuna ukumthabisa ngokutjhumayela kodwana abakghoni ukuphuma. Angenza bona kube namathuba wokunikela ubufakazi kilabo abasitlhogomelako namkha kwabezepilo. Nasimadanisa ubujamo bethu banje nalokha ebesingikho esikhathini sangaphambili, singadana. Nasikhumbula bona uJehova usisiza njani nje, sizokuba namandla sikghone ukukghodlhelelela iintjhijilo ngethabo.

17. NgokwakaMtjhumayeli 11:6, kubayini kufuze siragele phambili nokutjhumayela ngitjho nanyana singayiboni imiphumela?

¹⁷ Asazi bona ngiyiphi imbewu yeqiniso esiyitjalako ezokuhluma. (Funda UMtjhumayeli 11:6) Ngokwesibonelo, u-Barbara oneminyaka ema-80 ujayele ukutjhumayela ngofunjathwako nangokutlola iincwadi. Kwenye yeencwadi azitlolako, wafaka isiThala sangoMeyi/Juni 2014 ebesinesihloko esithi “Lokho UZimu Akwenzele Khona.” Bekangazi bona incwadi ayitlolako le yafunyanwa batjhadikazi ebebamaKrestu kodwana balisa ukuba boFakazi bakaJehova. Abatjhadikazaba bawufunda bawubuyelela umagazini lo. Indoda le ithi yazizwa ngasuthi uJehova bekakhuluma nayo ngokunqophileko. Abatjhadikazaba bathoma ukuya emihlanganweni, ngokukhamba kwesikhathi, ngemva kweminyaka engaphezu kwema-27 bathoma godu baba boFakazi bakaJehova. Akhe ucabange nje bona u-Barbara wakhuthazeka bewaqiniswa kangangani nakabona imiphumela yencwadakhe!

18. Khuyini esingayenza bona sizuze emandleni kaZimu?

¹⁸ UJehova usinikele amathuba amanengi wokwamukela amandlakhe amakhulu. Nasiwasebenzisa amalungiselelo la, afaka hlangana umthandazo, iBhayibheli, ukuzihlanganisa nabafowethu abamaKrestu nokutjhumayela, sisuke sitjengisa ukuthi siyawathemba amandla kaJehova nesifiso sakhe sokusisiza. Kwanga soke singahlala sithembela kuBabethu wezulwini, okuthabelako “ukuqinisa labo abanhliziyo zabo zinamathele kuye.”—2 Kron. 16:9.