1. Khuyini okungenzeka kwakurara lokha nawuthoma ukutjela abanye ngomlayezo weBhayibheli?

UYAKHUMBULA mhlazana ufumana amaqiniso? Iimfundiso zeBhayibheli bezilula ukuzizwisisa. Mhlamunye wabe wacabanga nokuthi woke umuntu uzozamukela iimfundiswezi. Bewuqiniseka ukuthi umlayezo weBhayibheli nabawamukela, uzobanikela ukuphila okugcono nje nethemba elihle ngengomuso. (Rhu. 119:105) Wabhalelwa kuzibamba, watjela iinhlobo nabangani ngamaqiniso owafumeneko. Waba yini umphumela? Kungenzeka bona warareka khulu nabangafuni ukukulalela.

2-3. Inengi labantu lamphatha njani uJesu?

² Akukafuzi kusirare ukuthi abanye abafuni ukulalela umlayezo esiwutjhumayelako. Ngesikhathi uJesu asephasini, abanengi akhange bamlalele nanyana bekabenzela imikarisomraro, abonisa kuhle ukuthi usekelwa nguZimu. Ngokwesibonelo, uJesu wavusa uLazaru okwaba yikarisomraro, labo abaphikisana naye ababhalelwa kuyiphikisa. Nanyana kunjalo, abadosiphambili bamaJuda babhalelwa kukwamukela uJesu njengoMesiya. Ngokuphambene nalokho, bebafuna ukubulala uJesu noLazaru!—Jwa. 11:47, 48, 53; 12:9-11.

³ UJesu bekazi ukuthi abantu abanengi bengekhe bamamukele njengoMesiya. (Jwa. 5:39-44) Watjela isiqhema sabafundi bakaJwanisi uMbhabhadisi wathi: “Uyathaba loyo onganabanga lokuzaza ngami.” (Mat. 11:2, 3, 6) Kubayini abantu abanengi bangakhange bamlalele uJesu?

4. Khuyini esizokucoca ngayo esihlokwenesi?

⁴ Esihlokwenesi nesilandelako, sizokuhlola amabanga enza bona abantu bangesikhathi sakaJesu bangamamukeli. Sizokuhlola nokuthi kubayini abanengi namhlanjesi bakhubeka. Okuqakatheke khulu, sizokufunda nokuthi kubayini  kufuze sibe nokukholwa okuqinileko kuJesu ukuthi nathi singakhubeki.

5. Kubayini kungenzeka abanye baphetha ngokuthi uJesu akasinguMesiya owabikezelwako?

⁵ Abanengi bakhubeka ngebanga lalapho uJesu abelethelwa khona. Nanyana bebakuvuma ukuthi uJesu bekamfundisi onekghono begodu bekenza imikarisomraro, kibo bekayindodana yombazi otlhagileko. BekangeweNazaretha, idorobho ebeliqalelwa phasi. UNathaniyeli, owabamfundi kaJesu wathi “Ikhona intwehle engavela eNazaretha?” (Jwa. 1:46) Kungenzeka uNathaniyeli akhenge akareke ngedorobha uJesu akhulela kilo. Namtjhana kungenzeka bekacabanga ngesiphorofido sakaMikha 5:2 esabikezela ukuthi uJesu uzokubelethelwa eBhetlehema, ingasi eNazaretha.

6. Khuyini ebeyingasiza abantu ngesikhathi sakaJesu babone ukuthi unguMesiya?

⁶ Ithini imiTlolo? Umphorofidi u-Isaya wabikezela ukuthi amanaba kaJesu bengekhe abenendaba ‘ngemininingwana yesizukulwana sakhe [uMesiya].’ (Isa. 53:8 NW) Imininingwana enjengale kwaphorofidwa ngayo. Ngathana abantu babanesikhathi sokwenza irhubhululo, bahlolisise amaqiniso bebazokufumana ukuthi uJesu wabelethelwa eBhetlehema nokuthi usizukulwana seKosi uDavida. (Luk. 2:4-7) Yeke, indawo uJesu abelethelwa kiyo ikhambisana kuhle nalokho okwaphorofidwa emtlolweni kaMikha 5:2. Alo-ke, bewuyini umraro? Abantu bagijimela ukuzenzela iinqunto zabo. Akhenge babe nawo woke amaqiniso. Kungebangelo bakhubeka.

7. Kubayini inengi lingabalaleli aboFakazi bakaJehova?

⁷ Inga-kghani ukhona umraro onjengalo namhlanjesi? Iye ukhona. Inengi labantu bakaJehova namhlanjesi alikanjingi namkha alisibabantu abaziwako, abaqakathekileko emphakathini, yeke baqalwa njengabantu “abangakafundi.” (IzE. 4:13) Abanye babona ngathi abantu bakaZimu akukafuzi bafundise ngeBhayibheli ngombana abakayi eenkolweni ezifundisa ngeBhayibheli. Abanye bathi aboFakazi bakaJehova “Yikolo ye-America,” kodwana kiboFakazi bakaJehova abali-7 munye kwaphela ohlala e-United States. Abanye batjelwa ukuthi aboFakazi abakholelwa kuJesu. Eminyakeni edlulileko, aboFakazi bekuthiwa “Ziimpimpi ze-America,” namkha balihlelo elithileko “eliphikisako.” Lokho kwenza ukuthi abantu abatjelwa iindabezi bakhubeke ngombana abanalwazi elaneleko ngaboFakazi.

8. IzEnzo 17:11, zithi khuyini inengi ekufuze liyenze nalifuna ukubona abantu bakaZimu namhlanjesi?

⁸ Singakubalekela njani ukukhubeka? Kufuze sihlolisise lokho okuliqiniso. Ngilokho umtloli weVangeli uLukasi ebekazimisele ukukwenza. Bekenza zoke izinto “ngokulandelana kwazo.” Bekafuna bona abafundi ‘bazi kuhle iqiniso lezinto’ abazizwileko ngoJesu. (Luk. 1:1-4) AmaJuda weBheriya yekadeni bekafana noLukasi. Nabathoma ukuzwa iindaba ezimnandi ngoJesu, bathoma ukuhlolisisa imiTlolo yesiHebheru bona baqinisekise ukuthi zinjalo na izinto ebebabatjela zona. (Funda IzEnzo 17:11.) Ngendlela efanako nabantu namhlanjesi, kufuze bahlolisise lokho okuliqiniso. Bamadanise lokho esibafundisa khona nalokho okutjhiwo miTlolo. Bafunde nangalokho okwenziwe babantu bakaJehova esikhathini sethu sanamhlanje. Nabangenza kuhle “irhubhululo,” angeze bavumela ibandlululo nezinto ezitjhiwo babantu bona zibavale amehlo.

9. Khuyini eyenzekako lokha uJesu nakala ukwenza isibonakaliso esivela kuZimu?

⁹ Abanye ngesikhathi sakaJesu bebanganeliseki ngokufundisa kwakhe okuhle. Bebafuna okungaphezu kwalokho. Bebafuna azibonakalise ukuthi unguMesiya ngokwenza “isibonakaliso esivela kuZimu.” (Mat. 16:1) Kungenzeka lokho bebakutjho ngebanga lalokho okusemtlolweni kaDanyela 7:13, 14. Nanyana bekunjalo, bekungakabi sikhathi sakaJehova bona kuzaliseke isiphorofidweso. Lokho uJesu ebekakufundisa bekufuze kube ngikho okubenza bakholelwe ukuthi unguMesiya. Kwathi lokha nakangabenzeli isibonakaliso sokuthi unguMesiya, bakhubeka.—Mat. 16:4.

10. UJesu wakuzalisekisa njani lokho u-Isaya akutlola ngoMesiya?

¹⁰ Ithini imiTlolo? Nakakhuluma ngoMesiya, umphorofidi u-Isaya wathi: “Angeze arhuwelela abize, nanyana ahlabe umkhosi eendledlaneni.” (Isa. 42:1, 2) UJesu akhenge azidosele amehlo nakenza ikonzwakhe. Akhenge akhe amathempeli amakhulu bekambathe nezembatho ezihle khulu zakanokutjho. Akhenge afune nokubizwa ngamagama aqakathekileko anikelwa abadosiphambili bezekolo. Lokha nakaqalene nesigwebo sokufa, uJesu akhenge afune ukutjengisa amandlakhe ngokwenzela iKosi uHerode ikarisomraro. (Luk. 23:8-11) UJesu bekayenza imikarisomraro kodwana bekadzimelele khulu ekutjhumayeleni iindaba ezimnandi. Watjela abafundi bakhe wathi “ngizele lokho.”—Mar. 1:38.

11. Ngimiphi imibono engakafaneli abantu abanayo namhlanjesi?

¹¹ Inga-kghani ukhona umraro onjengalo namhlanjesi? Iye. Namhlanjesi, inengi labantu likarwa mimakhiwo emikhulu yamasonto nezembatho ezihle ezikhethekileko ezimbathwa badosiphambili bezekolo, kuhlanganise neziqu zamagamabo ezizwakala ziqakathekile neminyanya engakhambelani nobuKrestu. Khuyini abantu abaya emasondweni abayifundako, khulu  khulu ngoZimu nomnqophwakhe? Ngokuhlukileko, labo abeza emihlanganwenethu yobuKrestu bafunda ngalokho uJehova akufuna kithi nokuthi khuyini ekufuze sikwenze bona sivumelane nentandwakhe. AmaWolwethu womBuso ahlwengekile bekasebenza kuhle kodwana akasingewakanokutjho. Abadosaphambili abambathi izembatho ezikhethekileko ezibizako namkha babizwe ngamagama athileko angathi akhethekile. Esikufundako nesikukholelwako kuvela eliZwini lakaZimu. Nanyana kunjalo, inengi labantu namhlanjesi liyakhubeka ngombana lithi indlela yethu yokufundisa nokulotjha ayikarisi beyilula khulu. Lokho esikufundisako akusingilokho abafuna ukukuzwa.

12. Njengombana kuhlathululwe kumaHebheru 11:1, 6, ukukholwa kwethu kufuze sikusekele kuphi?

¹² Singakubalekela njani ukukhubeka? Umpostoli uPowula watjela amaKresu weRoma bona “ukukholwa kulandela into ezwiweko. Bese lokho okuzwiweko kuza ngelizwi elimalungana noKrestu.” (Rom. 10:17) Yeke, sakha ukukholwa kwethu ngokufunda imiTlolo, ingasi ngokuhlanganyela ezintweni zekolo ezingekho eBhayibhelini, kunganandaba ukuthi iminyanya le iminandi kangangani. Sifuna ukuba nokukholwa okuqinileko okusekelwe elwazini ngombana “ngaphandle kokukholwa akukghoneki ukuthabisa uZimu.” (Funda yebeHebheru 11:1, 6.) Ngaphezu kwalokho, asitlhogi itshwayo elivela ezulwini ukutjengisa ukuthi silifumene iqiniso. Ukuzihlolisisa nokuhlolisisa lokho okutjhiwo yiBhayibheli kuzokuqinisa ukukholwa kwethu ezintweni esifundiswe zona, lokho kuzosisiza bona sihlule nanyana ngikuphi ukuzaza ekungenzeka sinakho.

13. Khuyini eyenza abantu abanengi bangamamukeli uJesu?

¹³ Ngesikhathi sakaJesu, abafundi bakaJwanisi uMbhabhadisi barareka lokha abafundi bakaJesu nabangazili. UJesu wabahlathulela ukuthi abanabanga lokuthi bangazila ngombana usaphila. (Mat.  9: 14-17) Nanyana kunjalo, abanye abaFarisi nabaphikisi bamsola uJesu ngombana bekangawalandeli amasikabo. Bakwata bazala ipotjwana lokha nababona uJesu alapha abantu ngeSabatha. (Mar. 3:1-6; Jwa. 9:16) Ngakelinye ihlangothi, bathi bayalihlonipha iSabatha, ngapha bebanganakinga nokuthengisa ethempelini ngeSabatha. Basilingeka khulu lokha uJesu nakabasola ngesenzo sabo. (Mat. 21:12, 13, 15) Labo uJesu abatjhumayezako esinagogeni eNazaretha bakwata khulu nakasebenzisa isibonelo samaKrestu wekadeni ukubatjengisa ukuthi bebamarhamaru begodu bebanganakho ukukholwa. (Luk. 4:16, 25-30) Inengi labantu lakhubeka ngombana zange uJesu enze lokho ebebalindele ukuthi akwenze.—Mat. 11:16-19.

14. Kubayini uJesu angakhenge avumelane namasiko angakhambisani nemiTlolo?

¹⁴ Ithini imiTlolo? UJehova wathi ngomphorofidakhe u-Isaya: “Ngebanga lokobana abantwaba, batjhidela kimi ngemilomabo, bangidumisa ngeembhena zabo, khisibe iinhliziyo zabo zikude nami, nokungilotjha kwabo kungokweemfundiso zabantu.” (Isa. 29:13) UJesu bekenza kuhle ngokusola amasiko wabantu angakhambisani nalokho okusemTlolweni. Labo abathi imithetho namasiko kuqakatheke khulu ukudlula iBhayibheli, abamamukeli uJehova naloyo amthumileko uMesiya.

15. Khuyini abantu abanengi abangayithandiko ngaboFakazi bakaJehova namhlanjesi?

¹⁵ Inga-kghani ukhona umraro onjengalo namhlanjesi? Iye. Inengi namhlanjesi liyakhubeka lokha aboFakazi bakaJehova nabangahlanganyeli nabo ekugidingeni iminyanya enjengamalanga wokubelethwa kunye noKresimusi ngombana iBhayibheli alikhambisani nayo. Abanye bayasilingeka lokha aboFakazi bakaJehova bangahlanganyeli nabo ezintweni zepolotiki namtjhana bangalandeli amasiko wokubulungwa kwabantu ajayelwe ukwenziwa angavumelani neliZwi lakaZimu. Abantu abakhubekakwabo, bazitjela ukuthi ngibo abalotjha uZimu kwaphela ngendlela efaneleko kodwana angeze bakwazi ukuthabisa uZimu nangabe basagidinga amasiko wephaseli begodu bathi angcono kunalokho ukufundiswa yiBhayibheli.—Mar. 7:7-9.

16. Ngokomtlolo weRhubo 119:97, 113, 163-165, khuyini ekufuze siyenze begodu khuyini ekufuze siyibalekele?

¹⁶ Singakubalekela njani ukukhubeka? Ngokuzifundisa ukuthanda imithetho kaJehova neenkambiso zakhe. (Funda IRhubo 119:97, 113, 163-165.) Nasithanda uJehova, sizokwala woke amasiko angawathandiko. Angeze sivumele nanyana yini ibenesandla ethandweni lethu noJehova.

17. Khuyini amaJuda amanengi ebekalindele uJesu ayenze?

¹⁷ Abanye ngesikhathi sakaJesu bebafuna kubenetjhuguluko kezepolotiki. Bebalindele ukuthi uJesu abatjhaphulule ekugandelelweni mBuso wamaRoma. Kwathi lokha nabafuna ukwenza uJesu bona abe ikosi, khenge avume. (Jwa. 6:14, 15) Abanye abafaka hlangana abapristi ebebatshwenyekile ngokuthi uJesu bekangaletha amatjhuguluko kezepolotiki, ebekazokuthinta umBuso weRoma ngombana bewuthembise abadosiphambili bezekolo amandla nelawulo. Lokho kwenza amaJuda amanengi akhubeka.

18. Ngiziphi iimphorofido zeBhayibheli ezimalungana noMesiya inengi elingakhange lizitjheje?

¹⁸ Ithini imiTlolo? Inengi leemphorofido labikezela ukuthi uMesiya uzokuphumelela, ezinye iimphorofido zithi kokuthoma  bekufuze ahlongakalele izono zethu. (Isa. 53:9, 12) Yeke, kubayini amaJuda bekanombono ongakalungi ngoMesiya? Inengi langesikhathi sakaJesu akhenge litjheje iimphorofido ezabikezela ukuthi uJesu akhenge athembise ukuthi uzokuqeda yoke imirarwabo ngesikhatheso.—Jwa. 6:26, 27.

19. Khuyini ekhuba abantu abanengi namhlanjesi?

¹⁹ Inga-kghani ukhona umraro onjengalo namhlanjesi? Iye. Inengi namhlanjesi liyakhubeka ngebanga lokuthi asithathi ihlangothi kwezepolotiki. Balindele bona sivowude lokha nakukhethwa ababusi. Nanyana kunjalo, siyazi ukuthi nasikhetha umuntu ukuthi asibuse, sisuke silahla uJehova. (1 Sam. 8:4-7) Abanye banombono wokuthi kufuze sakhe iinkolo neembhedlela besenze izinto ezizokusiza umphakathi. Bayakhubeka ngombana amandlethu siwasebenzisa emsebenzini wokutjhumayela ingasi ukulinga ukusombulula imiraro eqalene nephasi namhlanjesi.

20. Njengombana kuvezwe mamezwi kaJesu emtlolweni kaMatewu 7:21-23, khuyini ekufuze sidzimelele kiyo?

²⁰ Singakubalekela njani ukukhubeka? (Funda uMatewu 7:21-23.) Kufuze sidzimelele emsebenzini uJesu asinikele wona bona siwenze. (Mat. 28:19, 20) Akukafuzi sithikanyezwe zizinto zepolotiki nezinto zomphakathi, ephasineli. Siyabathanda abantu begodu sinendaba nemiraro ebatshwenyako. Nanyana kunjalo siyazi ukuthi indlela yokubasiza, kubafundisa ngomBuso kaZimu nokubasiza ukuthi babe nobuhlobo obuhle noJehova.

21. Khuyini ekufuze sizimisele kuyenza?

²¹ Esihlokwenesi, sicoce ngezinto ezine ezakhubekisa abantu nezenza inengi langamlaleli uJesu ngesikhathi sakhe begodu zingenza bona nanamhlanjesi abalandeli bakaJesu bangalalelwa babantu. Inga-kghani ngilezi kwaphela izinto ekufuze sizibalekele? Awa. Esihlokweni esilandelako, sizokucoca nangezinye izinto ezine ezingasenza bona sikhubeke. Kwanga singabalekela ukukhubeka siqinise ukukholwa kwethu!