1. Khuyini engasikhuthaza nasizizwa sisodwa begodu sigandelelwe miraro esiqalene nayo? (IRhubo 118:5-7)

WAKHE wazizwa uwedwa na? Wazizwa ngasuthi akunamuntu uzokusiza uqalane nobudisi? Banengi abantu abakhe bazizwa njalo kuhlanganise neenceku zakaJehova azithembekileko. (1 Kho. 19:14) Nakwenzeka uzizwe njalo, khumbula lokho uJehova akuthembisa khona nakathi, “Angekhe nginitjhiye, begodu angekhe nginilahle.” Yeke singaba nesibindi sithi, “UJehova umsizami; angekhe ngisabe.” (Heb. 13:5, 6) Umpostoli uPowula watlola amezwi la, awatlolela abantu akholwa nabo beJudiya ngo-61 CE. Amezwakhe la, asikhumbuza amezwi asemtlolweni weRhubo 118:5-7.​—Wufunde.

2. Sizokucoca ngani esihlokwenesi begodu kubayini?

² UPowula bekafana nomrhubi ngombana wabona ngaye ukuthi uJehova unguMsizakhe. Ngokwesibonelo, ngemva kobana kuphele iminyaka emibili atlolele beHebheru incwadi wakhamba ikhambo eliyingozi, arabhula elwandle ebeliwunwawunwa mumoya. (IzE. 27:4, 15, 20) Ngaphambi kobana uPowula athathe ikhambo, nangesikhathi sele alithethe uJehova wabaMsizi kaPowula ngeendlela ezinengi. Sizokucoca ngeendlela ezintathu. UJehova wasiza uPowula asebenzisa uJesu, iingilozi nabantu abahlukahlukeneko abanegunya elithileko. Wabuye wasebenzisa nabantu abebalotjha kunye noPowula. Ukubuyekeza izenzakalo ezenzeka epilweni kaPowula, kuzosenza simthembe khulu uZimu neenthembiso azenze kithi begodu sithembe nokuthi uzokusabela nasifuna asisize.

3. Khuyini okungenzeka uPowula wazibuza yona begodu kubayini?

³ UPowula bekatlhoga isizo. Ngo-56 C.E., isiqubuthu samrhudulela  ngaphandle kwethempeli eJerusalema salinga ukumbulala. Ngelanga elilandelako, uPowula nakalethwa phambi kweSanhedrini amanabakhe apheze ukumphadlhula phakathi. (IzE. 21:30-32; 22:30; 23:6-10) Koke lokho nakwenzekako kungenzeka uPowula wazibuza ukuthi, ‘Ngizokukghodlhelela bekube kunini?’

4. UJehova wamsiza njani uPowula asebenzisa uJesu?

⁴ Ngiliphi isizo uPowula alifumanako? Ebusuku bangemva kokuthi uPowula abotjhwe, “iKosi” uJesu yajama phambi kwakhe yathi, “Yiba nesibindi! Njengombana bewunikela ubufakazi obupheleleko ngami eJerusalema, kufanele ufakaze neRoma.” (IzE. 23:11) Bekusikhuthazo esifike ngesikhathi lesi uPowula ebekasitlhoga. UJesu wabuka uPowula ngobufakazi abunikela eJerusalema. Begodu wamthembisa ukuthi uzokufika aphephile eRoma lapho azokunikela ubufakazi obungeziweko khona. Ngemva kobana akhuthazwe ngendlela le, kufuze ukuthi uPowula wazizwa akhuthazeke kwanga mntwana osingathwe nguyise.

5. UJehova wamsiza njani uPowula ngengilozi? (Qala isithombe esingaphandle.)

⁵ Ngiziphi ezinye iinqabo uPowula ahlangabenzana nazo? Ngemva kweminyaka emibili izintwezo zenzeke eJerusalema, uPowula wakhwela umkhumbi otjhinga eTariyana. Kulapho abafunyanwa khona siwuruwuru esakhula kangangokuthi abantu abanengi ebebalapho bacabanga ukuthi bazokuhlongakala. Nanyana kunjalo, uPowula akhenge kumthuse lokho. Watjela abantu abasemkhumbini ukuthi, “Ebusukwinobu ingilozi kaZimu engimlotjhako nengimenzela umsebenzi ocwengileko ijame hlanu kwami yathi: ‘Ungasabi Powula. Kufuze ujame phambi kwakaKhesari, uZimu ukunikele boke labo abathaya nawe.’” UJehova wasebenzisa ingilozi bona ikhuthaze uPowula ngesikhuthazo asinikelwe nguJesu ngaphambilini. Ngambala uPowula wafika eRoma.​—IzE. 27:20-25; 28:16.

6. Ngisiphi isithembiso uJesu asenzako esisiqinisako idolo begodu kubayini?

⁶ Ngiliphi isizo thina esilifumanako? Nathi uJesu uzosisekela njengombana asekela uPowula. Ngokwesibonelo, uJesu wathembisa boke abalandeli bakhe wathi, “Nginani imihla yoke bekube sekupheleni kwephasi.” (Mat. 28:20) Amezwi kaJesu la asiqinisa idolo. Ngombana ngezinye iinkhathi kubudisi ukukghodlhelela. Ngokwesibonelo, nakwenzeka kuhlongakale umuntu esimthandako, kufuze siphile nobuhlungobo ingasi amalangana kwaphela kodwana iminyaka eminengi. Ngapha abanye kufuze bakghodlhelelele ubudisi obuza nokuluphala. Kuthi kusesenjalo abanye  balwisana nokugandeleleka. Nanyana kunjalo sifumana amandla nasikhumbula bona uJesu unathi, “imihla yoke” kuhlanganise namalanga okubudisi ukuwakghodlhelelela.​—Mat. 11:28-30.

7. Ngokuya ngokwesAmbulo 14:6, uJehova usisiza njani namhlanjesi?

⁷ IliZwi lakaZimu lisiqinisekisa ngokuthi uJehova uzosisiza ngeengilozi. (Heb. 1:7, 14) Ngokwesibonelo, iingilozi ziyasisekela zisinqophise nasitjhumayela ‘iindaba ezimnandezi zomBuso’ sizitjhumayela “kizo zoke iintjhaba, iinkoro, amalimi nabantu.”​—Mat. 24:13, 14; funda isAmbulo 14:6.

8. UJehova wamsiza njani uPowula asebenzisa isikhulu samasotja?

⁸ Ngiliphi isizo uPowula alifumanako? Nasele sibuyela emva eminyakeni ka-56 C.E., uJesu waqinisekisa uPowula ukuthi uzokufika eRoma. Nanyana kunjalo, amanye amaJuda eJerusalema afuna ukuvimbezela uPowula bona ambulale. Kwathi isikhulu samabutho uKlawudiyusi Lisiya nasizwa ngamano la, savikela uPowula. Akhenge ariyade uKlawudiyusi, wathumela uPowula eKhesariya avikelwe masotja amanengi. IKhesariya beyingaba makhilomitha ayi-105 ukusuka eJerusalema. Nakafika eKhesariya, umbusi uFeliksi wathi uPowula “ahlale agadiwe ngesigodlweni sakaHerode.” Ngokunjalo, uPowula wasindiswa ebantwini ebebazombulala.​—IzE. 23:12-35.

9. Umbusi uFestusi wamsiza njani uPowula?

⁹ Ngemva kweminyaka emibili, uPowula bekasavalelwe ejele, eKhesariya. Ngesikhatheso uFestusi besele abusa esikhundleni sakaFeliksi. AmaJuda ancenga uFestusi bona abuyise uPowula eJerusalema bona agwetjwe, kodwana uFestusi akhenge avume. Kungenzeka kungebanga lokuthi uFestusi bekazi ukuthi “bebahlele ukusahlela uPowula bambulale ngokubhaca bamlinde endleleni.”​—IzE. 24:27–25:5.

10. UmBusi uFestusi wasabela njani lokha uPowula nakathi ufuna ukuyokwahlulelwa nguKhesari?

¹⁰ Ngokukhamba kwesikhathi, umlando kaPowula wadenjwa eKhesariya. Ngebanga lokobana uFestusi “bekafuna ukuthandwa maJuda” wabuza uPowula ukuthi, “Kghani ufisa ukukhuphukela eJerusalema bona wahlulelwe lapho phambi kwami?” UPowula bekazi ukuthi kungenzeka abulawe eJerusalema. Yeke bekazi bona khuyini ekufuze ayenze bona asindise ukuphila kwakhe, atjhinge eRoma, arage nokusebenzela uZimu. UPowula waphendula wathi, “Ngidlulisela icala kuKhesari!” Ngemva kokuhlanganisa iinhloko nabaluleki bakhe, uFestusi wathi kuPowula, “Udlulisele icala kuKhesari; uzakuya kuKhesari.” Isiqunto esathathwa nguFestusi sasindisa uPowula emanabenakhe. Ngesikhathi esifaneleko, uPowula bekazokuba seRoma, kude namaJuda ebekafuna ukumbulala.​—IzE. 25:6-12.

11. Ngimaphi amezwi akhulunywa ngu-Isaya okungenzeka uPowula wacabangisisa ngawo?

¹¹ Lokha uPowula nakazokuthoma ikhambo lakhe elide eliya eTariyana, kungenzeka wacabanga ngesiyeleliso umphorofidi u-Isaya asinikela abantu abaphikisana noJehova, “Ningalumbisana amano, kodwana azakufeleliswa! Nanyana ningathiyisana amaqhinga, anizukuphumelela ngombana uZimu unathi.” (Isa. 8:10) UPowula bekazi ukuthi uJehova uzomqinisa. Lokho kwamqinisa njengombana bekazokuqalana nezinye iintjhijilo ezisezako.

12. UJuliyasi wamphatha njani uPowula begodu khuyini okungenzeka uPowula wayibona?

¹² Ngo-58 C.E., uPowula wathoma ikhambo  lakhe lokuya eTariyana. Njengombana bekasibotjhwa bekangaphasi kwesikhulu sebutho lamaRoma esinguJuliyasi. Ngesikhatheso uJuliyasi bekanamandla wokuthi angenza ukuphila kwaka Powula ukuthi kube budisi namkha kubengcono. Bekazowasebenzisa njani amandla ebekanawo? Ngelanga elilandelako nabafikako “uJuliyasi waphatha uPowula ngomusa, wamvumela nokuthi akhambe ayokubona abangani bakhe.” Ekukhambeni kwesikhathi uJuliyasi wasindisa ukuphila kwakaPowula. Amasotja bekafuna ukubulala zoke iimbotjhwa ebezisemkhumbini kodwana uJuliyasi wawavimba. Kungombana “bekafuna ukusindisa uPowula.” Kungenzeka uPowula wabona ukuthi umbusi onehliziywehle lo usetjenziswa nguJehova.​—IzE. 27:1-3, 42-44.

13. UJehova angabasebenzisa njani abantu abaseenkhundleni eziphakemeko?

¹³ Ngiliphi isizo thina esilifumanako? Izinto nazikhambisana nehloswakhe, uJehova angasebenzisa ummoyakhe ocwengileko ebantwini abaseenkhundleni eziphakemeko bona benze lokho akufunako. Njengombana iKosi uSolomoni yatlola, “Ihliziyo yekosi isesandleni sakaSomnini, uyinqophisa njengomsele wamanzi, ayise nanyana kukuphi lapha athanda khona.” (IzA. 21:1) Utjho ukuthini umtlolo lo? Abantu bangemba umsele bona banqophise amanzi lapha bafuna atjhinge khona. Ngokufanako uJehova angasebenzisa ababusi abenze bavumelane nalokho okuzokufezekisa ihloswakhe. Nakwenzeka njalo bangenza iinqunto ezizokuzuzisa abantu bakaZimu.​—Madanisa no-Ezra 7:21, 25, 26.

14. Ngokuya ngokomtlolo wezEnzo 12:5, bobani ekufuze sibathandazele?

¹⁴ Khuyini esingayenza? Singathandazela, ‘amakhosi nabo boke abaseenkhundleni eziphakemeko’ nakufuze bathathe isiqunto esizokuthinta ukuphila kwethu kobuKrestu nomsebenzethu wokutjhumayela. (1 Thim. 2:1, 2; Nerh. 1:11) Njengombana kwenza amaKrestu wangeenkhathi zabapostoli, nathi sithandazela abafowethu nabodadwethu abasemajele. (Funda izEnzo 12:5; Heb. 13:3) Singabuye sithandazele nabonogada bemajele abagade abafowethu nabodadwethu. Singabawa uJehova abasize benze njengoJuliyasi, baphathe abafowethu nabodadwethu, “ngomusa.”​—IzE. 27:3.

15-16. UJehova wamsiza njani uPowula asebenzisa u-Aristakusi noLukasi?

¹⁵ UPowula wasizwa ngayiphi indlela? Endleleni eya eRoma uJehova wasiza uPowula  kanengi, amsiza ngabantu alotjha nabo. Akhesicoce ngezinye zeembonelo zakhona.

¹⁶ Abakhambisani abathembekileko bakaPowula, u-Aristakusi noLukasi bakhamba naye eRoma. * Bafaka ukuphila kwabo engozini, ngitjho nanyana uJesu angakhenge abaqinisekise ngokuthi bazokufika eRoma. Ngemva kwekhambo elide nebelingasimnandi bafumana bona angekhe babulawe. Yeke ngesikhathi u-Aristakusi no-Lukasi bakhwela umkhumbi eKhesariya, kungenzeka bona uPowula wathandaza kuJehova amthokoza ngesizo alifumane kibo.​—IzE. 27:1, 2, 20-25.

17. UJehova wamsiza njani uPowula asebenzisa abantu alotjha nabo?

¹⁷ Ekhambweni lakhe kwenzeka iinkhathi ezinengi bona uPowula asizwe babantu alotjha uZimu nabo. Ngokwesibonelo, nabasedorobheli leTsidoni uJuliyasi wavumela uPowula bona “akhambe ayokubona abangani bakhe athabele netjhejo labo.” Ngokukhamba kwesikhathi nabasedorobheni lePhothiyoli, uPowula nabakhambisani bakhe ‘bafumana abafowethu basincenga bona sihlale nabo amalanga alikhomba.’ Njengombana amaKrestu uPowula alotjha nawo atlhogomela yena nabakhambisani bakhe, siyaqiniseka ukuthi athaba khulu uPowula nakabelana nawo izinto ezakhako. (Madanisa nezEnzo 15:2, 3.) Ngemva kwevakatjho elisikhuthazwelo, uPowula nabakhambisani bakhe baragela phambili nekhambo labo.​—IzE. 27:3; 28:13, 14.

18. Khuyini eyenza uPowula wathokoza uZimu begodu waba nesibindi?

¹⁸ Njengombana uPowula atjhidela eRoma, kungenzeka bona wacabanga ngamezwi abatlolela wona eminyakeni emithathu eyadlulako, “Sekuminyaka eminengi ngilulukela ukuza kini.” (Rom. 15:23) Bekangacabangi ukuthi uzokufika kibo sele asibotjhwa. Kufuze bona kwamkhuthaza ukubona abafowabo beRoma bajamile, balinde ukumlotjhisa. “Nakababonako, uPowula wathokoza uZimu begodu waba nesibindi.” (IzE. 28:15) Tjheja ukuthi  uPowula wathokoza uZimu ngabafowabo. Lokho kungombana nakilokhu uPowula bekabona ukuthi uJehova uyamsiza asebenzisa abantu abalotjha kunye naye.

19. Njengombana kutloliwe kweyoku-1 kaPitrosi 4:10, uJehova angasisebenzisa njani bona sisize abantu?

¹⁹ Khuyini esingayenza? Inga-kghani kunabafowethu namkha abodadwethu ebandleni abaqalene nokugandeleleka ngebanga leentjhijilo? Namkha bahlongakalelwe mumuntu abamthandako? Nakungenzeka sazi ukuthi kunomuntu otlhoga isizo, kufuze sithandaze kuJehova simbawe asisize sitjho namkha senze into etjengisa umusa nethando. Amezwi nezenzo zethu zingaba sikhuthazo kumfowethu namkha kudadwethu asitlhogako. (Funda yoku-1 kaPitrosi 4:10.) * Labo esibasizako bangafumana isibindi emezwini uJehova abathembise wona athi, “Angekhe nginitjhiye, begodu angekhe nginilahle.” Bangawezwa amezwi la asebenza kibo. Angekhe na kukuthabise lokho?

20. Kubayini singatjho ngesibindi ukuthi, “uJehova umsizami”?

²⁰ Njengombana kwenzeka kuPowula nabakhambisani bakhe. Nathi namhlanjesi singakhambe sihlangabezana neenwuruwuru ezinamandla. Ngesikhathi esifanako sinesibindi ngombana siyazi bona uJehova unathi. Uyasisiza asebenzisa uJesu neengilozi. Nakungenzeka ukuthi lokho kukhambisana nehloswakhe, uJehova angasebenzisa abantu abaseenkhundleni eziphezulu bona basize abantu bakhe. Njengombana inengi lethu libonile, uJehova usebenzisa ummoyakhe ocwengileko bona athinte iinhliziyo zeenkhonzi zakhe bona zisize abafowabo nabodadwabo. Nathi njengoPowula singatjho sithi, “UJehova umsizami; angekhe ngisabe. Umuntu angangenzani?”​—Heb. 13:6.