ISIHLOKO SAMA-37
Zimisele Ukulalela UJehova—Kubayini Begodu Njani?
“Akukafuzi na sizithobe khulu kuBaba?”—HEB. 12:9.
INGOMA 9 UJehova UyiKosethu!
OKUZOKUCOCWA NGAKHO *
1. Kubayini kufuze sizithobe kuJehova?
KUFUZE sizithobe * kuJehova ngombana uMdalethu. Ngebangeli, unelungelo lokusitjela ukuthi khuyini okufuze siyenze. (IsAm. 4:11) Kodwana sinelinye ibanga elisenza ukuthi simlalele, indlelakhe yokubusa ilungile. Kiwo woke umlando, ababusi abanengi banesilinganiso esithileko sokubusa abantu. Kodwana nasimadanisa indlelabo yokubusa nendlela kaJehova yokubusa, sikghona ukubona ukuthi uhlakaniphile, ulithando, unomusa begodu uMbusi onesirhawu.—Eks. 34:6; Rom. 16:27; 1 Jwa. 4:8.
2. AmaHebheru 12:9-11, asinikela maphi amabanga wokuzithoba kuJehova?
2 UJehova ufuna simlalele, ingasi ngombana siyamsaba, kodwana ngebanga lokuthi siyamthanda begodu naye uyasithanda. Encwadinakhe ayitlolela amaHebheru, uPowula wathi kufuze “sizithobe khulu kuBaba” ngombana usibandulela bona ‘sizuze.’—Funda amaHebheru 12:9-11.
3. (a) Singatjengisa njani ukuthi sizithoba kuJehova? (b) Ngimiphi imibuzo esizoyiphendula?
3 Sizithoba kuJehova ngokwenza koke okusemandlenethu bona simlalele ezintweni zoke begodu silwisane nommoya wokuzithemba. (IzA. 3:5) Sikufumana kulula ukuzithoba kuJehova njengombana sazi ubuntu bakhe obuhle. Kubayini? Ngombana ubuntobu buveza koke akwenzako. (Rhu. 145:9) Nasifunda okungeziweko ngoJehova, kula simthanda khona khulu. Nasithanda uJehova, asitlhogi irhelo lemithetho eminengi esitjela ukuthi khuyini okufuze siyenze nalokho okungakafaneli sikwenze. Silinga ufunda indlela yokucabanga begodu senze okulungileko, sigegede okumbi. (Rhu. 97:10) Nanyana kunjalo, ngezinye iinkhathi, singakufumana kubudisi ukulalela uJehova. Kubayini kunjalo? Khuyini abadala, abobaba, nabomma abangayifunda esibonelweni soMbusi uNerhemiya; seKosi uDavida; nesakaMariya unina lakaJesu? Isihlokwesi sizosinikela iimpendulo zemibuzo le.
KUBAYINI KUNGABA BUDISI UKULALELA UJEHOVA?
4-5. NgokwebeRoma 7:21-23, kubayini kungaba sitjhijilo ukulalela uJehova?
4 Elinye ibanga elingasenza sikufumane kusitjhijilo ukuzithoba kuJehova kungombana soke sazuza isono begodu asikapheleli. Sinemikghwa yokungafuni ukulalela. Ngemva kobana u-Adamu no-Eva bangalaleli uZimu ngokudla isithelo ebekungakafuzi basidle, bazikhethela ngokwabo ukuthi khuyini okulungileko nokumbi. (Gen. 3:22) Namhlanjesi, abantu abanengi abamlaleli uJehova begodu baziquntela ngokwabo ukuthi khuyini okulungileko nokumbi.
5 Ngitjho nalabo abamaziko uJehova bangakufumana kubudisi ukumlalela ngokupheleleko. Nompostoli uPowula waqalana nesitjhijilwesi. (Funda kwebeRoma 7:21-23.) NjengoPowula, nathi sifuna ukwenza okulungileko kuJehova. Kodwana kufuze sihlale silwisana nomukghwa wokwenza izinto ezimbi.
6-7. Ngiliphi elinye ibanga elingenza bona kube budisi ukulalela uJehova? Nikela isibonelo.
6 Elinye ibanga elisenza sikufumane kubudisi ukulalela uJehova, kungombana sithonywe masiko wendawo esakhulela kiyo. Abantu abanengi basitjela okuhlukileko kilokho uJehova akufunako. Yeke kufuze sisebenze budisi bona singacabangi ngendlela abacabanga ngayo. Akhesicoce nganasi isibonelo.
7 Kezinye iindawo kujayelekile ukuthi abantu abatjha bagandelelwe bona bazidele ukuze babe nemali enengi. Udade ibizo lakhe elinguMary * waqalana nesitjhijilo esifanako. Ngaphambi kokwazi uJehova, bekafunda kesinye seenkolo eziphuma phambili enarheni yekhabo. Umndenekhabo wamkatelela bona afune umsebenzi obhadela khulu begodu ahlonitjhwe babantu. Naye bekakufuna lokho. Nanyana kunjalo, kwathi ngemva kokwazi uJehova begodu wamthanda, watjhugulula imigomwakhe. Kodwana bekungasilula, uthi: “Ngezinye iinkhathi ngifumana indlela yokwenza imali enengi, kodwana ngiyazi ukuthi izongivimbela ukulotjha uJehova njengombana ngenza nje. Ngebanga lokuthi ngakhuliswa njalo, ngikufumana kubudisi ukwala. Kwafuza ngibawe uJehova ukuthi angisize ngilwisane nesilingwesi bona ngingamukeli umsebenzi ozongenza ngingamlotjhi.”—Mat. 6:24.
8. Khuyini esizokucoca ngayo?
8 Siyazuza nasilalela uJehova. Kodwana labo abanesilinganiso esithileko segunya njengabadala, abobaba, nabomma, banomthwalo ongeziweko wokulalela isinqophiso sakaZimu; bangasiza abanye bona bazuze. Akhesicoceni ngezinye iimbonelo eziseBhayibhelini ezisifundisa indlela esingasebenzisa ngayo igunya bona sithabise uJehova.
ABADALA BANGAFUNDANI KUNERHEMIYA?
Abadala bebandla basebenza ndawonye ekulungiseni iWolo lomBuso njengombana noNerhemiya wasiza ekuvuseleleni iJerusalema (Funda iingaba 9-11) *
9. Ngiziphi iintjhijilo uNerhemiya aqalana nazo?
9 UJehova uphathise abadala umsebenzi oqakathekileko wokutlhogomela abantu 1 Pit. 5:2) Abadala bangafunda okunengi endleleni uNerhemiya aphatha ngayo abantu bakaJehova. Njengombana bekambusi wakwaJuda, uNerhemiya bekaphathiswe okunengi. (Nerh. 1:11; 2:7, 8; 5:14) Cabanga ngezinye iintjhijilo uNerhemiya aqalana nazo. Wezwa ukuthi abantu basilaphaza ithempeli begodu bebangawasekeli amaLevi ngokweemali njengombana bekutjho umThetho. AmaJuda bewangawulaleli umthetho kaJehova malungana neSabatha begodu amanye amadoda atjhada abafazi beentjhaba ezingamlotjhiko uJehova. UMbusi uNerhemiya bekufuze alungise ubujamo obubudisobo.—Nerh. 13:4-30.
bakhe. (10. UNerhemiya wasabela njani eentjhijilweni aqalana nazo?
10 UNerhemiya akhenge awasebenzise kumbi amandlakhe bona akatelele imibonwakhe ebantwini bakaZimu. Kunalokho, wafuna isinqophiso kuJehova ngomthandazo, wafundisa abantu umThetho kaJehova. (Nerh. 1:4-10; 13:1-3) Godu uNerhemiya ngokuzithoba wasebenzisana nabantu, wabasiza bona bavuselele amaboda weJerusalema.—Nerh. 4:15.
11. Ngokweyoku-1 kwebeThesalonika 2:7, 8, abadala kufuze bawaphathe njani amalunga webandla?
11 Kungenzeka abadala bangaqalani nemiraro efana nekaNerhemiya, kodwana bangalingisa isibonelo sakhe ngeendlela ezinengi. Ngokwesibonelo, basebenza budisi bona basize abafowabo nabodadwabo. Abaziboni bangcono kunabanye ngebanga lemisebenzi abaphathiswe yona. Kunalokho, baliphatha kuhle ibandla. (Funda yoku-1 kwebeThesalonika 2:7, 8.) Ngebanga lokuthi bathobekile begodu bathanda abanye, bakhuluma nabantu boke ngomusa. Umdala onelemuko u-Andrew, uthi: “Ngitjheje ukuthi umdala nakanomusa, anobungani, lokho kuyabathinta abodade nabafowethu ebandleni. Ubuntobu bukhuthaza ibandla bona libambisane nabadala.” Omunye umdala ongumakekere, ibizo lakhe linguTony, uthi: “Ngilinga ukusebenzisa iseluleko esifumaneka kwebeFilipi 2:3 begodu ngilinga ngamandla bona ngiqale abanye njengabakhulu kunami. Lokhu kungisiza bona ngingakateleli abanye bona bangihloniphe.”
12. Kubayini kuqakathekile ngabadala bona bazithobe?
12 Abadala kufuze bazithobe njengombana noJehova athobekile. Nanyana uJehova aMbusi oPhakemeko endaweni yoke, “uyakhothama” bona avuse “abakhwahlileko ebhudwini.” (Rhu. 18:35; 113:6, 7) Ekhabolakhona, uJehova ubahloyile abantu abazikhukhumezako.—IzA. 16:5.
13. Kubayini umdala kufuze ‘alawule ilimu lakhe’?
13 Umdala ozithoba kuJehova kufuze ‘alawule ilimu lakhe.’ Nangabe akakwenzi lokho, uzokulimaza abanye. (Jak. 1:26; Gal. 5:14, 15) U-Andrew ekhesakhuluma ngaye uthi: “Ngezinye iinkhathi bengifikelwa kubakhulumisa kumbi abanye, khulukhulu nangizwa ngasuthi umfowethu namkha udadwethu akangihloniphi. Nanyana kunjalo, ngacabangisisa ngeembonelo zamadoda athembekileko ezifumaneka eBhayibhelini, lokho kwangisiza ngabona ukuqakatheka kokuzithoba.” Abadala bazithoba kuJehova ngokukhuluma nabafowabo nabodadwabo bebandleni ngomusa nangethando.—Kol. 4:6.
ABOBABA BANGAFUNDA EKOSINI UDAVIDA
14. UJehova wabele abobaba muphi umthwalo begodu khuyini ayilindele kibo?
14 UJehova wabele ubaba bona abe yihloko yomndeni begodu ulindele ukuthi afundise, anqophise bekabandule abantwana bakhe. (1 Kor. 11:3; Efe. 6:4) Kodwana amandla ubaba anawo alinganiselwe, naye kufuze alandise kuJehova ngombana yoke imindeni ithiyelelwe ngaye. (Efe. 3:14, 15) Abobaba bazithoba kuJehova ngokusebenzisa amandlabo ngendlela ethabisa uJehova. Bangafunda okunengi esibonelweni seKosi uDavida.
Indlela ubaba athandaza ngayo kufuze itjengise umndenakhe bona uthobekile (Funda iingaba 15-16) *
15. Kubayini iKosi uDavida isibonelo esihle kibobaba?
15 UJehova akhenge abele uDavida bona abe yihloko yomndenakhe kwaphela, kodwana wamabela nokobana abe yihloko yenarha ka-Israyeli woke. Njengombana bekayikosi, uDavida bekanamandla amakhulu. Ngezinye iinkhathi akhenge awasebenzise kuhle amandlakhe begodu wenza imitjhapho. (2 Sam. 11:14, 15) Wazithoba kuJehova wavuma ukulungiswa, wathandaza watjela uJehova amazizwakhe bewalinga ngamandlakhe woke ukulalela iseluleko sakaJehova. (Rhu. 51:1-4) Ukungezelela kilokho, wazithoba ngokwamukela iseluleko esingaveli emadodeni kwaphela, kodwana wasamukela neseluleko esivela kibomma. (1 Sam. 19:11, 12; 25:32, 33) UDavida wafunda emitjhaphwenakhe bewadzimelelisa ukuphila kwakhe ekulotjheni uJehova.
16. Abobaba bangafundani kuDavida?
16 Cabangisisa ngezinye zeemfundo abobaba abangazifunda eKosini uDavida: Ungawasebenzisi kumbi amandla uJehova akunikele wona. Vuma imitjhaphwakho begodu wamukele iseluleko osifumana kwabanye esivela eBhayibhelini. Nawenza njalo, umndenakho uzokuhlonipha ngebanga lokuthi uthobekile. Nawuthandaza nomndenakho, tjela uJehova ngendlela ozizwa ngayo, vumela umndenakho uzwe ukuthi umthembe kangangani uJehova. Ngaphezu kwakho koke, yenza ukulotjha kwakho uJehova kube yinto eqakatheke khulu kuwe. (Dut. 6:6-9) Isibonelo sakho esihle sisipho esihle khulu ongasinikela umndenakho.
ABOMMA BANGAFUNDA KUMARIYA
17. UJehova ubanikele yiphi indima abomma?
17 UJehova unikele abomma indima eqakatheke khulu emndenini begodu ubanikele nomthwalo wokutlhogomela abantwana. (IzA. 6:20) Ekhabolakhona, lokho umma akutjhoko nakwenzako kungathinta umntwana ipilwakhe yoke. (IzA. 22:6) Tjheja lokho abomma abangakufunda kuMariya unina lakaJesu.
18-19. Khuyini abomma abangayifunda kuMariya?
18 UMariya bekayazi kuhle imiTlolo. Bekamhlonipha khulu uJehova begodu bekanobuhlobo obuqinileko naye. Bekazimisele ukulalela iinqophiso zakaJehova ngokuzithoba, ngitjho nanyana lokho bekuzokutjho ukwenza amatjhuguluko ekuphileni kwakhe.—Luk. 1:35-38, 46-55.
Nangabe umma udiniwe namkha usilingekile kungatlhogeka bona enze umzamo omkhulu wokutjengisa amalunga womndenakhe ukuthi uyawathanda (Funda isigaba 19) *
19 Bomma ningamlingisa uMariya ngeendlela ezihlukahlukeneko. Njani? Kokuthoma, thuthukisani ubuhlobo benu noJehova ngokufunda qobe lilanga iBhayibheli nangokuthandaza. Kwesibili, ngokuzimisela ukwenza amatjhuguluko ekuphileni kwenu, ngokwenza njalo nizokuthabisa uJehova. Ngokwesibonelo, kungenzeka wakhuliswa mbelethi obekasilingeka msinyana bese akhulume amezwi ahlabako. Yeke ngebanga lalokho, kungenzeka nawe wakhula ucabanga ukuthi le yindlela efaneleko yokukhulisa abantwana. Ngitjho nangemva kokufunda ukuthi uJehova ufuna ubakhulise njani abantwana bakho, kodwana ungakufumana kubudisi ukwenza njalo, khulukhulu nawuzwa ngasuthi abantwana bakho abakulaleli. (Efe. 4:31) Nawuzizwa ngendlela le, kuqakatheke khulu ukubawa isizo lakaJehova. Umma ibizo lakhe linguLydia uthi: “Ngezinye iinkhathi bekutlhogeka bona ngithandaze ukwenzela bona ngingayisilingekeli indodanami nayingangilaleliko. Bengizikhalima, ngingakaqedi ukukhuluma bese ngithandaze isidu ngibawe isizo lakaJehova. Umthandazo ungenza ngibe nokuthula.”—Rhu. 37:5.
20. Ngisiphi isitjhijilo abanye abomma abaqalana naso begodu isitjhijilweso bangasihlula njani?
20 Esinye isitjhijilo abomma abangaqalana naso budisi bokutjengisa abantwababo ukuthi bayabathanda. (Tit. 2:3, 4) Abanye abomma bakhuliswe babelethi ebebanganabo ubuhlobo obutjhideleneko nabo. Nangabe nawe wakhuliswa ngendlela le, tjheja bona ungabenzi ubutjhapho obufanako. Umma ozithobako kuJehova kungatlhogeka bona afunde indlela yokutjengisa abantwana bakhe ukuthi uyabathanda. Kungaba budisi kuye ukutjhugulula indlela acabanga ngayo, azizwa ngayo nenza ngayo izinto. Kodwana angakghona ukukwenza lokhu begodu ukwenza njalo kungazuzisa yena nomndenakhe.
RAGELA PHAMBILI UZITHOBA KUJEHOVA
21-22. U-Isaya 65:13, 14, uthi sizuza njani nasizithoba kuJehova?
21 IKosi uDavida beyizazi iinzuzo zokuzithoba kuJehova. Yatlola yathi: “Umthetho kaSomnini uphelele, uvuselela ipilo. Ubufakazi bakaSomnini buthembekile, bunikela ubuhlakani kabanganalwazi. Incekwakho nayo ilulekwa ngikho; ukukulonda lokho kunomvuzo omkhulu.” (Rhu. 19:8, 12) Namhlanjesi, siyawubona umehluko hlangana nalabo abalalela uJehova nalabo abangasamukeli iseluleko sakhe. Labo abathobela uJehova ‘bazakuhlokoma ngethabo leenhliziyo zabo.’—Funda u-Isaya 65:13, 14.
22 Lokha abadala, abobaba nabomma bazithoba kuJehova ukuphila kwabo nemindenabo kuyathabisa begodu nebandla loke liba nobunye. Okuqakatheke kunakho koke, bathabisa ihliziyo kaJehova. (IzA. 27:11) Awukho umvuzo othabisa ukudlula lo!
INGOMA 123 Ukuzithoba Ngokuthembeka Ehlelweni LakaZimu
^ isig. 5 Esihlokwenesi sizokufunda ngokuthi kubayini kufuze sizithobe kuJehova. Kuzokukhulunywa nangalabo abanegunya, okubadala, abobaba nabomma, ukuthi khuyini abangayifunda esibonelweni soMbusi uNerhemiya; iKosi uDavida noMariya unina lakaJesu.
^ isig. 1 IHLATHULULO YAMAGAMA: Ibizo elithi, ukuzithoba linehlathululo engasiyihle kilabo abakatelelekileko ukuthi balalele umuntu othileko. Nanyana kunjalo, abantu bakaZimu bakhetha ukumlalela, abakuqali njengento embi ukumlalela.
^ isig. 7 Amanye amagama esihlokwenesi atjhugululiwe.
^ isig. 62 IHLATHULULO YEENTHOMBE: Umdala webandla usebenza nendodanakhe ekulungiseni iWolo lomBuso njengombana noNerhemiya wasiza ekuvuseleleni amaboda weJerusalema.
^ isig. 64 IHLATHULULO YEENTHOMBE: Ubaba uthandaza nomndenakhe, uveza amazizwakhe kuJehova.
^ isig. 66 IHLATHULULO YEENTHOMBE: Umsana udlala imidlalo yevidiyo begodu akakawuqedi umsebenzakhe wekhaya nowesikolweni. Ummakhe ubuya emsebenzini udiniwe begodu uyamkhalima kodwana akasilingeki namkha akhulume amagama alimazako.