ISIHLOKO SAMA-35
UJehova Uyazithanda Iinceku Zakhe Ezithobekileko
“USomnini . . . uyamtjheja ophasi [othobekileko].”—RHU. 138:6.
INGOMA 48 Khamba NoJehova Qobe Langa
OKUZOKUCOCWA NGAKHO *
1. UJehova ubaqala njani abantu abathobekileko? Hlathulula.
UJEHOVA uyabathanda abantu abathobekileko. Babantu abathobekileko kwaphela abangaba nobuhlobo obutjhideleneko noJehova. Ngakelinye ihlangothi, umuntu “ozitjhayako umbona akude.” (Rhu. 138:6) Soke siyafuna ukuthabisa uJehova begodu sizwe nethando lakhe, yeke sineenzathu ezihle zokuhlawulela ukuthobeka.
2. Sizokucoca ngani esihlokwenesi?
2 Esihlokwenesi, sizokucoca besiphendule nasi imibuzo emithathu: (1) Khuyini ukuthobeka? (2) Kubayini kufuze sikuhlawulele ukuthobeka? (3) Kubayini kungaba sitjhijilo ukuthobeka nasiqalene namatjhuguluko? Njengombana sizokubona, nasihlawulela ukuthobeka sithabisa uJehova begodu nathi siyazuza kilokho.—IzA. 27:11; Isa. 48:17.
KHUYINI UKUTHOBEKA?
3. Khuyini ukuthobeka?
3 Ukuthobeka kuzibeka phasi, umuntu othobekileko akazikhakhazisi begodu akacabangi ukuthi uqakatheke ukudlula abanye. Umuntu othobekileko uyabazwisisa abanye abantu begodu uyazi ukuthi uJehova mkhulu ukudlula yena. Umuntu othobekileko uyazi ukuthi abanye bakhulu kunaye namkha bangcono kunaye.—Flp. 2:3, 4.
4-5. Kubayini singathi umuntu obonakala athobekile, kungenzeka ukuthi akakathobeki?
4 Abanye abantu babonakala ngasuthi bathobekile. Bangabonakala baneenhloni namkha bathulile. Bangabonakala babahlonipha abantu ngombana ngilokho ababelethi babo ababafundisa khona. Kodwana kuhlekuhle eenhliziyweni zabo bababantu abazikhakhazisako. Ngokukhamba kwesikhathi, kuyavela ukuthi bababantu abanjani.—5 Ngakelinye ihlangothi, kunabantu ababonakala bazithembile namkha abakhuluma lokho abakucabangako, lokho akutjho bona bayazikhakhazisa. (Jwa. 1:46, 47) Nanyana kunjalo, labo abazithembileko kufuze batjheje bona bangazithembi khulu. Ukuthi sizithembile namkha awa, soke kufuze silwele ukuba babantu abathobekileko.
Umpostoli uPowula bekathobekile begodu akhenge acabange ukuthi uqakathekile (Funda isigaba 6) *
6. Njengombana kutjengiswe kweyoku-1 kwebeKorinte 15:10, khuyini esingayifunda esibonelweni sakampostoli uPowula?
6 Akhesifunde esibonelweni sakampostoli uPowula. UJehova wamsebenzisa khulu ekuthomeni amabandla amatjha emadorobheni ahlukahlukeneko. Kungenzeka bona waphumelela khulu emsebenzinakhe wokutjhumayela ukudlula abapostoli bakaJesu Krestu. Nanyana kunjalo, akhenge acabange ukuthi uqakatheke ukudlula abanye. Kunalokho, wazithoba wathi: “Ngingomncani ebapostolini begodu akukangifaneli ukubizwa ngokuthi ngimpostoli, ngombana ngahlunguphaza ibandla lakaZimu.” (1 Kor. 15:9) UPowula wathi unobuhlobo obuhle noJehova ngombana uZimu waba nomusa kuye ingasi ngebanga lokuthi bekaqakathekile namkha wenza izinto ezinengi ukudlula abanye. (Funda yoku-1 kwebeKorinte 15:10.) UPowula waba sibonelo esihle somuntu othobekileko. Nakatlolela beKorinte incwadi, akhenge azikhakhazise ngitjho nanyana abanye ebandleni leKorinte bebamnyefula.—2 Kor. 10:10.
Umfowethu uKarl F. Klein, obekalilunga lesiHlopha esiBusako bekathobekile (Funda isigaba 7)
7. Umfowethu uKarl F. Klein ukutjengise njani ukuthobeka? Nikela isibonelo.
7 Inengi labantu bakaJehova likhuthazwe mlando kamFowethu uKarl F. Klein, obekalilunga lesiHlopha esiBusako. UmFowethu uKlein ngokuzithoba wavuma ukuthi khewaqalana neentjhijilo ezinengi eminyakeni eyadlulako. Ngokwesibonelo, eminyakeni yabo-1920, wavuma ukuthi ukutjhumayela umuzi nomuzi bekubudisi kuye kangangokuthi ngemva kokwenza umsebenzi lo kokuthoma, akhenge asawenza godu bekwadlula iminyaka emibili. Kamva nasele aseBethel, akhenge akwamukele kuhle ukwelulekwa bafowethu. Ngaphezu kwalokho watshwenywa kugandeleleka kodwana wabuye waba ngcono godu. Nanyana kunjalo, waba namalungelo begodu wenza nezabelo ezinengi eziqakathekileko. Kuyakhanya ukuthi umFowethu uKlein bekathobekile ngombana wakhuluma ngobudisi aqalana nabo nanyana bekaziwa babantu abanengi. Abafowethu nabodadwethu abanengi bamkhumbula kuhle umFowethu uKlein ngamaqiniso awakhulumako nakalandisa ngendabakhe.KUBAYINI KUFUZE SIHLAWULELE UKUTHOBEKA?
8. Incwadi yoku-1 kaPitrosi 5:6, isisiza njani sizwisise ukuthi ukuthobeka kuthabisa uJehova?
8 Ibanga eliqakathekileko elisenza sithobeke, kukuthi sifuna ukuthabisa uJehova. Umpostoli uPitrosi walikhanyisa iphuzweli. (Funda yoku-1 kaPitrosi 5:6.) Nayikhuluma ngamezwi kaPitrosi la, incwadi ethi, ‘Woza Ube Ngumlandeli Wami’ ithi: “Ukuzikhakhazisa kufana netjhefu. Kungabangela umonakalo omkhulu. Nomuntu ozikhakhazisa ngamakghono anawo akasililitho kuZimu. Ngakelinye ihlangothi, umuntu onganamakghono kangako angasetjenziswa nguJehova kwaphela nakathobekileko. . . . uJehova uzokubusisa nawuthobekileko.” * Yeke into eqakatheke khulu esingayenza kuthabisa uJehova.—IzA. 23:15.
9. Nasithobekileko khuyini eyenza abantu bafune ukutjhidela kithi?
9 Ngaphezu kokuthabisa uJehova, nasithobekileko sifumana iimbusiso ezinengi. Nasithobekileko, abantu bazokufuna ukutjhidelana nathi. Kubayini sitjho njalo? Cabanga ukuthi uthanda ukuba nabantu abanjani. (Mat. 7:12) Ngokuvamileko asikuthandi ukuzihlanganisa nabantu abafuna ukwenza izinto ngendlelabo begodu abangayilaleli imibono yabanye. Kunalokho, siyakuthabela ukuba nabafowethu nabodadwethu ‘abazwelana nathi, abasithandako, abanehliziyo enesisa nokuthobeka.’ (1 Pit. 3:8) Le yindlela esizizwa ngayo ngabantu abathobekileko nabo bazokuthabela ukuba nathi nasithobekileko.
10. Ukuthobeka kukwenza njani ukuphila kwethu kube lula?
10 Ukuthobeka kwenza ukuphila kwethu kube lula. Ngezinye iinkhathi, singaqalana nezinto esicabanga ukuthi azinabulungiswa. IKosi uSolomoni yathi: “Ngibone amakhoboka akhwele iinjomani, khibe amakhosana ayabhadula inga makhoboka.” (UMtj. 10:7) Ngezinye iinkhathi labo abanamakghono ababukwa. Kuthi labo abanganawo babukwe khulu. Ngitjho noSolomoni wakulemuka lokho ukuthi kufuze samukele ipilo ngendlela engayo begodu singaphatheki kumbi ngendlela izinto ezenzeka ngayo ekuphileni. (UMtj. 6:9) Nasithobekileko, kuzokuba lula ukwamukela ipilo njengombana injalo, ingasi ngendlela esifuna bona ibe ngayo.
NGIBUPHI UBUJAMO OBUNGENZA KUBE BUDISI UKUTHOBEKA?
Ngibuphi ubujamo obungenza kube budisi ukuthobeka? (Funda iingaba 11-12) *
11. Kufuze senzeni nasilulekwako?
11 Qobe lilanga sinamathuba amanengi wokutjengisa ukuthi sithobekile. Cabanga ngananzi iimbonelo ezilandelako. Nasilulekwako. Kufuze sikhumbule ukuthi umuntu nakenze umzamo wokusiluleka, sisuke senze umtjhapho omkhulu singakatjheji. Ngezinye iinkhathi, singafisa ukungasilaleli iselulekweso. Singanyefula umuntu loyo namkha indlela asiluleke ngayo. Nasithobekileko, sizosamukela iseluleko.
12. NgokwezAga 27:5, 6, kubayini kufuze sithokoze nasilulekwako? Fanekisa.
12 Umuntu othobekileko uyasithabela iseluleko. Akhesithi usesifundweni. Ngemva kobana ukhulume nabantu abambalwa, kuthi omunye wabo akudosele ngeqadi bese akutjele ukuthi unokudla emazinyweni. Akunakuzaza bona uzokuhlaziseka. Kghani bewungekhe umthokoze umuntu loyo ngokuthi ukutjelile? Kuhlekuhle bewungafisa ukuthi ngathana utjelwe mumuntu wokuthoma okubonileko. Ngokufanako, kufuze sithobeke besithokoze lokha umfowethu namkha udadwethu asinikela iseluleko. Yeke umuntu loyo sizomqala njengomngani, ingasi isitha.—Funda izAga 27:5, 6; Gal. 4:16.
Kubayini kufuze sizithobe abanye nabafumana amalungelo wekonzo? (Funda iingaba 13-14) *
13. Singakutjengisa njani ukuthobeka lokha abanye ebandleni nabafumana izabelo?
13 Abanye nabafumana amalungelo wekonzo. Umdala uJason uthi: “Nangibona abanye bafumana amalungelo athileko, ngezinye iinkhathi ngiyazibuza ukuthi kubayini ngingakakhethwa.” Kghani khewazizwa 1 Thim. 3:1) Nanyana kunjalo, kufuze sikutjheje khulu lokho esikucabangako. Nasingatjhejiko, singavumela ukuzikhakhazisa kukhule eenhliziyweni zethu. Ngokwesibonelo, indoda emKrestu ingathoma ukucabanga ukuthi ngiyo kwaphela efanelekela ukwenza isabelo esithileko ebandleni. Namkha umfazi omKrestu angacabanga athi, ‘Ubabakwami angasenza ngcono isabelwesi ukudlula abanye!’ Nasithobeke kwamambala angeze sicabange njalo, sizokubalekela ukuzikhakhazisa.
ngendlela le? Kuhle khulu ukufuna ukwenzela uJehova okwengeziweko. (14. Sifundani endleleni uMosi asabela ngayo abanye nabafumana amalungelo?
14 Singafunda endleleni uMosi asabela ngayo abanye nabafumana amalungelo. UMosi wasithathela phezulu isabelo sokudosa phambili isitjhaba sama-Israyeli. UMosi wasabela njani uJehova nakaphathisa abanye ukuthi basebenze naye? Akhenge abe nomona ngalokho. (Num. 11:24-29) Bekathobekile begodu wavumela abanye bona bamsize ekwenzeni umsebenzi wokwahlulela. (Eks. 18:13-24) Lokhu bekuzokutjho ukuthi ama-Israyeli bekazokuba namadoda angeziweko azokuba babahluleli. Ngendlela leyo, uMosi akhenge anake amalungelwakhe ukudlula ukutlhogomela abantu. Lesi sibonelo esihle esingafunda kiso! Nasifuna ukusetjenziswa nguJehova, kuqakatheke khulu ukuthobeka ukudlula amakghonwethu. “Nanyana uSomnini aphakamile, uyamtjheja ophasi [othobekileko].”—Rhu. 138:6.
15. Abantu abanengi baqalana namaphi amatjhuguluko?
15 Nakutjhuguluka ubujamo. Eminyakeni yamva nje, inengi labafowethu nabodade esele linesikhathi eside lilotjha uJehova lifumene izabelo ezitjha. Ngokwesibonelo, ngo-2014 ihlangano yathi angekhe kusaba khona ababonisi besifunda, yeke abafowethwaba nabomkabo bafumana izabelo ezitjha. Ngomnyaka loyo, ababonisi abaneminyaka ema-70 ubudala
balisa ukujikeleza. Kwathi abafowethu abaneminyaka ema-80 ubudala namkha ngaphezulu balisa ukuba bathintanisi besihlopha sabadala. Ngaphezu kwalokho, eminyakeni embalwa edlulileko, abanengi ebebaseBethel bathunyelwa esimini. Abanye kwafuze balise ikonzo ekhethekileko yesikhathi esizeleko ngebanga lemiraro yokugula, ukutlhogomela umndeni, nobunye ubujamo obuthileko.16. Abafowethu nabodade bakutjengise njani ukuthobeka ekwamukeleni izabelo ezitjha?
16 Inengi labafowethu nabodadwethwaba likufumene kubudisi ukwenza amatjhuguluko la. Inengi elifumene izabelo ezitjha besele kuminyaka eminengi lenza izabelo zalo zaphambilini begodu belizithanda. Liqalene ‘nobuhlungu’ njengombana lizivumelanisa namatjhuguluko la. Ngokukhamba kwesikhathi, lakghona ukuvumelana nobujamobo. Kubayini? Kungombana bathanda uJehova ukudlula nanyana yini. Bebazi ukuthi bazinikele kuZimu, ingasi emsebenzini namkha esabelweni sabo. (Kol. 3:23) Bayakuthabela ukulotjha uJehova ngokuzithoba kinanyana ngisiphi isabelo. ‘Baphosela koke okubatshwenyako kuye,’ ngombana bayazi ukuthi unendaba nabo.—1 Pit. 5:6, 7.
17. Kubayini iBhayibheli lisikhuthaza bona sithobeke?
17 Kuyasithabisa ukwazi ukuthi iBhayibheli lisikhuthaza bona sithobeke. Nasithobekileko abanye abantu bazokuthabela ukuba nathi begodu nathi kuzosithabisa ukuba nabo. Sikghona ukuqalana neentjhijilo. Ngaphezu kwakho koke, sihlala sitjhidelene noBabethu wezulwini. Kusithabisa khulu ukwazi ukuthi nanyana ‘angoPhakemeko noPhezulu,’ uyazithanda iinceku zakhe!—Isa. 57:15.
INGOMA 45 Angizindle NgoZimu Ehliziywenami
^ isig. 5 Ubuntu obuqakathekileko ekufuze sibe nabo kuthobeka. Khuyini ukuthobeka? Kubayini kufuze sikuhlawulele? Kubayini kungaba sitjhijilo ukuthobeka nasiqalene namatjhuguluko? Imibuzo le kuzokucocwa ngayo esihlokwenesi.
^ isig. 7 Qala isihloko esithi, “Jehovah Has Dealt Rewardingly With Me” esifumaneka ngesiNgisi esiThaleni sango-Octoba 1, 1984.
^ isig. 8 Qala isahluko 3, isigaba 23.
^ isig. 53 IHLATHULULO YEENTHOMBE: Nakasemzini wabafowabo, umpostoli uPowula wakuthabela ukuba namanye amakholwa, kuhlanganise nabancani.
^ isig. 57 IHLATHULULO YEENTHOMBE: Umfowethu wamukela iseluleko esivela eBhayibhelini kumfowethu osesemutjha.
^ isig. 59 IHLATHULULO YEENTHOMBE: Umfowethu okhulileko akaphatheki kumbi njengombana umfowethu osesemutjha afumene ilungelo ebandleni.