ISIHLOKO SAMA-38
“Yizani Kimi, . . . Ngizoniphumuza”
“Yizani kimi nina noke enidiniweko nenidisibezwako, ngizoniphumuza.”—MAT. 11:28.
INGOMA 17 “Ngiyathanda”
OKUZOKUCOCWA NGAKHO *
1. NgokomTlolo kaMatewu 11:28-30, ngisiphi isithembiso esenziwa nguJesu?
UJESU wenza isithembiso esihle esiqubuthwini ebesimlalele. Wathi, “Yizani kimi, ngizoniphumuza.” (Funda uMatewu 11:28-30.) Lesi bekusithembiso samambala. Ngokwesibonelo, akhucabange ngalokho akwenzela umfazi obekanokugula okumbi.
2. UJesu wamenzelani umfazi ogulako?
2 Umfazi lo bekalitlhoga khulu isizo. Wakhamba abodorhodere abanengi, anethemba lokuthi bazomlapha. Kodwana ngemva kweminyaka eli-12 asebuhlungwini, akhenge alapheke. NgokomThetho kaMosi, umfazi lo bekasilaphele. (Lev. 15:25) Wathi nakezwa bona uJesu uyabalapha abagulako, wakhamba wayomfuna. Nakamfumanako, wathinta umphetho wengubakhe yangaphandle, walapheka khonokho! UJesu wenza okungaphezu kokumelapha, wamqinisekisa ngokuthi uyamthanda begodu uyamhlonipha. Ngokwesibonelo, nakakhuluma naye, wasebenzisa igama elihloniphekileko, elithi, “ndodakazi.” Akunakuzaza bona umfazi lo wazizwa akhuthazekile.—Luk. 8:43-48.
3. Ngimiphi imibuzo esizoyiphendula?
3 Tjheja bona umfazi lo waya kuJesu. Wathatha igadango. Nanamhlanjesi kusesenjalo, kufuze sithathe igadango lokuya kuJesu. Esikhathini sethu, uJesu angekhe abalapha ngokusimangaliso labo ‘abeza’ kuye. Nanyana kunjalo, usasimema: “Yizani kimi, . . . ngizoniphumuza.” Esihlokwenesi, sizokuphendula
imibuzo emihlanu le: Singaya njani kuJesu? Bekatjho ukuthini uJesu nakathi: “Thathani ijogi lami”? Khuyini esingakufunda kuJesu? Kubayini umsebenzi asinikele wona usivuselela? Khuyini engasisiza bona sihlale sikhuthazeka ngaphasi kwejogi lakaJesu?“YIZANI KIMI”
4-5. Ngiziphi iindlela esingaya ngazo kuJesu?
4 Enye indlela esingaya ngayo kuJesu kufunda ngezinto azitjhoko nazenzako. (Luk. 1:1-4) Akekho umuntu ongasenzela lokho, kufuze sizifundele. Siya kuJesu nangokuthatha isiqunto sokubhajadiswa, sibe bafundi bakhe.
5 Enye indlela esiya ngayo kuJesu, kubawa isizo ebadaleni bebandla. UJesu usebenzisa ‘izipho ezibabantu’ bona zisitlhogomele. (Efe. 4:7, 8, 11; Jwa. 21:16; 1 Pit. 5:1-3) Kufuze sithathe igadango lokubawa isizo labo. Angeze silindele bona abadala bazi ukuthi sicabangani nokuthi khuyini esikutlhogako. Akhucabange ngokwatjhiwo ngumfowethu uJulian: “Ngebanga lokugula, kwafuze ngikhambe eBethel, umnganami wangitjela bona ngiyokubawa isikhuthazo ebadaleni. Ekuthomeni bengicabanga ukuthi angisitlhogi. Kodwana ngemva kwesikhathi ngalemuka ukuthi ngiyasitlhoga, ngabawa abadala bona bangivakatjhele, bangikhuthaza tle!” Abadala abafana nalabo abavakatjhela uJulian bangasisiza bona sazi “umkhumbulo kaKrestu,” okutjho ukuzwisisa nokulingisa indlela ebekacabanga ngayo naziphatha ngayo. (1 Kor. 2:16; 1 Pit. 2:21) Nabasisiza ngendlela le, kufana nokuthi basipha isipho esihle.
“THATHANI IJOGI LAMI”
6. UJesu bekatjho ukuthini nakathi: “Thathani ijogi lami”?
6 UJesu nakathi: “Thathani ijogi lami,” kungenzeka bekatjho ukuthi “Yamukelani igunya lami.” Namkha “ngenani nami ejogini begodu soke sisebenzele uJehova.” Womabili amezwi la atjho ukuthi kufuze sisebenze.
7. NgokomTlolo kaMatewu 28:18-20, ngimuphi umsebenzi esinikelwe bona siwenze, begodu khuyini esingaqiniseka ngakho?
7 Samukela isimemo sakaJesu nasinikela ukuphila kwethu kuJehova begodu sibhajadiswe. Isimemwesi siya kiwo woke umuntu, uJesu angeze akhandela muntu okufuna kwamambala ukulotjha uZimu. (Jwa. 6:37, 38) Boke abalandeli bakaKrestu banikelwe ilungelo lokuhlanganyela emsebenzini uJehova awunikele uJesu bona awenze. Singaqiniseka ngokuthi uJesu uzokuhlale asisekela emsebenzini lo.—Funda uMatewu 28:18-20.
“FUNDANI KIMI”
Khuthaza abanye njengombana kwenza ujesu (funda iingaba 8-11) *
8-9. Kubayini abantu abathobekileko bebaya kuJesu, begodu ngimiphi imibuzo okufuze sizibuze yona?
8 Abantu bathokileko bebaya kuJesu. (Mat. 19:13, 14; Luk. 7:37, 38) Kubayini? Cabanga ngomehluko hlangana kwakaJesu nabaFarisi. Abadosi phambili bekolwaba bebazikhakhazisa begodu bangabathandi abantu. (Mat. 12:9-14) Ngakelinye ihlangothi, uJesu bekabathanda abantu begodu athobekile. AbaFarisi bona bebathanda ukwaziwa begodu bazibona baqakathekile emphakathini. UJesu bekangakuthandi ukuzikhakhazisa begodu watjela nabafundi bakhe bona bathobeke basize abanye. (Mat. 23:2, 6-11) AbaFarisi bebawasebenzisa kumbi amandlabo ngokukatelela abantu ukuthi babalalele. (Jwa. 9:13, 22) UJesu bekavuselele abantu ngezenzo zethando nangamezwi anomusa.
9 Kghani ngilokhu okufundileko kuJesu? Zibuze: ‘Abantu nabangiqalileko, bangibona ngimumuntu othobekileko? Kghani ngiyenza ngokuzithandela na imisebenzi enganakekiko bona ngisize abanye? Nginomusa kwabanye?’
10. Bekunjani ebantwini ukusebenza noJesu?
Luk. 10:1, 19-21) Bekakhuthaza abafundi bakhe bona babuze imibuzo begodu bekafuna ukuzwa imibonwabo. (Mat. 16:13-16) Njengeentjalo, abafundi bakaJesu bebathuthuka. Bazamukela iimfundiso zakaJesu begodu bathela iinthelo zemisebenzi emihle.
10 La uJesu bekakhona bekuba nokuthula, nalabo ebekasebenza nabo bebadoseleka kuye begodu naye bekakuthabela ukubabandula. (Yiba mumuntu ongenekako nonobungani
Tjhiseka begodu ukhuthale
Zithobe begodu usebenze budisi *
11. Ngimiphi imibuzo okufuze sizibuze yona?
11 Kghani kunabantu obaphetheko? Nakunjalo, zibuze: ‘Ngisebenzisana njani nabo emsebenzini namkha ekhaya? Kghani bayakuthabela kuba nami? Ngiyabakhuthaza na abanye bona babuze imibuzo? Ngiyazimisela na ukulalela imibonwabo?’ Asifuni nakancani ukufana nabaFarisi, ebabasilingeka abantu nabababuza imibuzo begodu batjhutjhisa nalabo ebebaveza imibono ehlukileko kweyabo.—Mar. 3:1-6; Jwa. 9:29-34.
“NGIZONIPHUMUZA”
12-14. Kubayini umsebenzi uJesu asinikele wona usivuselela?
12 Kubayini kusivuselela ukwenza umsebenzi uJesu asinikela wona? Kuneenzathu ezinengi, kodwana okwanje sizokucoca ngezimbalwa.
13 Sinabatlhogomeli abaphuma phambili. UJehova umTlhogomeli omKhulu, akamsimphathi onelunya. Uyawuthabela umsebenzi esiwenzako. (Heb. 6:10) Begodu usinikela amandla esiwatlhogako bona senze umsebenzi asinikele wona. (2 Kor. 4:7; Gal. 6:5, ftn.) UJesu, iKosethu usibonelo kilokhu. (Jwa. 13:15) Abadala abasilusako balinga ukwenza njengoJesu, “umelusi omkhulu.” (Heb. 13:20; 1 Pit. 5:2) Balinga ngamandla ukuba nomusa, basikhuthaze njengombana basifundisa begodu basivikela.
14 Sinabangani abaphuma phambili. Abekho abanye abantu abanabangani abonomnqopho ofanako nethando elifanako. Cabanga nje: Sinelungelo lokusebenza nabafowethu nabodadwethu abonommoya omuhle nokuziphatha okuhle, abangacabangi ukuthi bangcono kunabanye. Banamakghono kodwana abazikhakhazisi ngawo, baqala abanye njengabakhulu kunabo. Abasiqali njengeensebenzi ezikunye nabo kwaphela kodwana njengabangani. Indlela abasithanda ngayo ingokwamambala kangangokuthi bangasifela!
15. Kufuze sizizwe njani ngomsebenzi esiwenzako?
15 Sinomsebenzi ophuma phambili. Sifundisa abanye iqiniso ngoZimu uJehova, sitjengise nabantu ukuthi uDeveli ungusomalakazi. (Jwa. 8:44) USathana ugandelela abantu ngamala, abenze baphelelwe lithemba. Ngokwesibonelo, ufuna sikholelwe ukuthi uJehova angeze asilibalela izono zethu begodu akasithandi. La mamala ahlaza, adanisa abantu! Nasiya kuKrestu, izono zethu ziyalitjalelwa. Iqiniso kukuthi uJehova usithanda soke. (Rom. 8:32, 38, 39) Kuyathabisa ukusiza abantu ukuthi bathembele kuJehova nokubabona batjhugulula amaphilwabo!
HLALA UNGAPHASI KWEJOGI LAKAJESU
16. Umsebenzi uJesu athi siwenze uhluke njani kweminye imisebenzi ekufuze siyenze?
16 Umsebenzi uJesu athi siwenze uhlukile kweminye imisebenzi ekufuze siyenze. Ngokwesibonelo, ngemva komsebenzi wokuziphilisa abantu abanengi bazizwa badiniwe begodu bangakathabi. Ngokuhlukileko, ngemva kokusebenzela uJehova noKrestu sizizwa sithabile besanelisekile. Singazizwa sidiniwe ngemva komsebenzi wokuziphilisa begodu sizikatelele bona siye esifundweni ngobusukobo. Kodwana nasibuya esifundweni sizizwa sivuselelekile begodu sikhuthazekile.
Kufana nalokha nasitjhumayelako begodu senza isifundo somuntu mathupha. Nasenza imizamo enjalo sizizwa sivuselelekile begodu sikhuthazekile.17. Khuyini ekufuze siyizwisise ngobujamo bethu begodu khuyini ekufuze siyitjheje?
17 Kufuze sizwisise bona ngamunye wethu unamandla alinganiselweko. Yeke kufuze sicabangisise kuhle ngaphambi kokwenza izinto. Ngokwesibonelo, singasebenzisa kumbi amandlethu ngokulinga ukubuthelela izinto eziphathekako. Tjheja lokho okwatjhiwo nguJesu endodeni enjingileko eyambuza yathi: “Kufuze ngenzeni bona ngizuze ilifa lokuphila okungapheliko?” Indoda le beyiwulalela umThetho. Kufuze bona beyilungile ngombana iVangeli lakaMarkosi likhuluma ngokukhethekileko ukuthi uJesu “wayithanda.” UJesu wayimema indoda le. UJesu wathi, “khamba, uyokuthengisa koke onakho, bese ungilandele.” Indoda le yadana, beyikufuna ukulandela uJesu kodwana ngebanga ‘lepahlayo enengi,’ yabhalelwa. (Mar. 10:17-22) Yaphetha ngokuthi ingalamukeli ijogi lakaJesu, yaragela phambili nokuba sigqila ‘sobuGwili.’ (Mat. 6:24) Wena bewungenzani?
18. Khuyini ekufuze siyenze begodu kubayini?
18 Ngaso soke isikhathi, kuhle bona sicabange ngezinto eziza qangi ekuphileni kwethu. Kubayini? Kungombana sifuna ukuqiniseka bona siwasebenzisa ngokuhlakanipha amandlethu. Cabanga ngesibonelo sakaMark uthi: “Eminyakeni eminengi bengizitjela ukuthi ngiphila ipilo elula. Bengiphayona, kodwana bengisolo ngicabanga ngemali nokuphila okumabothobotho. Bengilokhu ngizibuza ukuthi kubayini ngiziphilisa kabuhlungu. Ngalemuka ukuthi amandlami amanengi bengiwasebenzisela ezintweni ezithandwa ngimi, kuthi aseleko ngiwanikele uJehova.” UMark watjhugulula indlela ebekacabanga ngayo nokuphila kwakhe bona enze okungeziweko ekusebenzeleni uJehova. UMark uthi: “Ngezinye iinkhathi bengizizwa ngitshwenyekile, kodwana ngesizo lakaJehova nelakaJesu ngikghonile ukuhlula iintjhijilwezo.”
19. Kubayini kuqakathekile ukuhlala sinombono omuhle?
19 Sizokukhuthazeka ngaphasi kwejogi lakaJesu nasenza izinto ezintathwezi. Kokuthoma, hlala unombono omuhle. Senza umsebenzi kaJehova, yeke kufuze siwenze ngendlelakhe. Siziinsebenzi begodu uJehova Mphathi. (Luk. 17:10) Nange silinga ukwenza umsebenzakhe ngendlelethu, singazifumana siphikisana nejogi. Ngitjho nekunzi enamandla ingazilimaza begodu isale idiniwe nangabe iragela phambili yenza ngendlelayo, ilwisane nejogi kunye nomnqophisayo. Ngakelinye ihlangothi, nasenza izinto ngendlela kaJehova sizokukghona ukuhlula nanyana ngiziphi iintjhijilo esiqalana nazo, senze nezinto ebesingacabangi ukuthi singazenza. Kufuze sikhumbule ukuthi akekho namunye ongavimba intando kaJehova bona yenzeke.—Rom. 8:31; 1 Jwa. 4:4.
20. Nasizakwamukela ijogi lakaJesu, kufuze ube yini umnqophwethu?
20 Kwesibili, yenza izinto ngomnqopho omuhle. Umgomwethu kudumisa uBabethu onethando, uJehova. Abantu bangeenkhathi zakaJesu bebamarhamaru begodu bebazicabangela bona kwaphela, lokho kwabenza bangathabi, bebatjhiya ijogi lakaJesu. (Jwa. 6:25-27, 51, 60, 66; Flp. 3:18, 19) Ngokuhlukileko, labo abathanda uZimu nabomakhelwana, balithatha ngokuzithandela ijogi lakaJesu ukuphila kwabo koke ephasina, banethemba lokuphila ezulwini noKrestu. Ngokufana nabo, sizokuthaba nasithatha ijogi lakaJesu ngomnqopho omuhle.
21. NgokwakaMatewu 6:31-33, khuyini esingalindela bona uJehova ayenze?
21 Kwesithathu, lindela ukuthi uJehova uzokusekela. Jak. 1:2-4) Singaqiniseka bona uJehova uzosinikela lokho esikutlhogako, nokuthi uJesu uzositlhogomela begodu abafowethu nabodadwethu bazosikhuthaza. (Funda uMatewu 6:31-33; Jwa. 10:14; 1 Thes. 5:11) Sinakho koke esikutlhogako bona sikghodlhelelele nanyana ngisiphi isitjhijilo.
Sizikhethele ukuphila kokuzidela nokusebenza budisi. UJesu wasiyelelisa ukuthi sizokuhlunguphazwa. Kodwana singaqiniseka bona uJehova uzosipha amandla wokukghodlhelela nanyana ngisiphi isitjhijilo. Nasisolo sikghodlhelela, sizokuqina. (22. Khuyini esingathokoza ngakho?
22 Umfazi uJesu amlaphako wavuseleleka ngelanga alatjhwa ngalo. Kodwana bekazokufumana ukuvuseleleka okupheleleko kwaphela nangabe waba mfundi kaKrestu. Ucabanga ukuthi wakhethani? Nangabe wakhetha ukuthatha ijogi lakaJesu, cabanga ngomvuzo ebekazowufumana wokuba noJesu ezulwini! Nanyana ngikuphi ukuzidela akwenzako ngokuba mlandeli kaKrestu bekukuncancani khulu nakumadaniswa nomvuzo ebekazowufumana. Kungakhathaliseki bona sinethemba lokuphila ezulwini namkha ephasini, sithokoza khulu ngokuthi sisamukele isimemo sakaJesu esithi: “Yizani kimi!”
INGOMA 13 UKrestu Usibonelo Sethu
^ isig. 5 UJesu usimema bona size kuye. Khuyini ekufuze siyenze nasizakwamukela isimemo sakaJesu? Isihlokwesi sizowuphendula umbuzo lo, sizokubuye sisikhumbuze ngokuthi singakufumana njani ukuphumula nasisebenza noKrestu.
^ isig. 60 IHLATHULULO YEENTHOMBE: UJesu wakhuthaza abantu ngeendlela ezihlukahlukeneko.
^ isig. 66 IHLATHULULO YEENTHOMBE: Ngokufanako, umfowethu ukhuthaza abanye ngeendlela ezihlukahlukeneko.