ISIHLOKO SAMA-39
Inga-kghani Igama Lakho Likhona “Encwadini YokuPhila”?
“Umtlolo osongiweko wesikhumbuzo watlolwa phambi kwakhe mayelana nalabo abasaba uSomnini.”—MAL. 3:16.
INGOMA 61 Ragelani Phambili BoFakazi BakaJehova!
OKUZOKUCOCWA NGAKHO a
Kusukela ekadeni, uJehova bekasolo angezelela amagama “encwadini yokuphila” (Funda iingaba 1-2)
1. Ngokomtlolo kaMalaki 3:16, ngiyiphi incwadi uJehova ayitlolako, begodu utlola ini kiyo?
SELE kuziinkulungwana zeminyaka, uJehova asolo atlola incwadi ekhethekileko. Incwadi le inerhelo lamagama, lokuthoma ngelakaFakazi othembekileko u-Abela. b (Luk. 11:50, 51) Kusukela ekadeni uJehova bekasolo angezelela amagama encwadinakhe, namhlanjesi sele kuneengidi zamagama. EBhayibhelini incwadi leyo ibizwa ngokuthi ‘mtlolo osongiweko wesikhumbuzo,’ “yincwadi yokuphila,” nangokuthi ‘msongo wokuphila.’ Esihlokwenesi sizoyibiza ngokuthi “yincwadi yokuphila.”—Funda uMalaki 3:16; IsAm. 3:5; 17:8.
2. Magama wabobani atlolwe encwadini yokuphila begodu khuyini esingayenza bona newethu amagama atlolwe encwadini le?
2 Incwadi ekhethekileko le inamagama wabo boke abalotjha uJehova ngokuthembeka begodu bahloniphe igama lakhe. Banethemba lokufumana ukuphila okungapheliko. Nathi namhlanjesi amagamethu angatlolwa encwadini leyo nasiba nobuhlobo obutjhideleneko noJehova ngokusekelwe emhlatjelweni wesihlengo sendodanakhe uJesu Krestu. (Jwa. 3:16, 36) Soke sifuna amagamethu atlolwe encwadini le, akunandaba bona sinethemba lokuyophila ezulwini namkha ephasini!
3-4. (a) Inga-kghani ukutlolwa kwamagamethu encwadini le kutjho bona sizokuphila ngokungapheliko? Hlathulula. (b) Khuyini esizokucoca ngayo esihlokwenesi nakwesilandelako?
3 Kghani lokho kutjho ukuthi boke abatlolwe encwadini le banesiqiniseko sokuthi bazokufumana ukuphila okungapheliko? Sifumana ipendulo yombuzo lo, emezwini uJehova awatjela uMosi atlolwe ku-Eksodusi 32:33. UJehova wathi: “Ngizakusula kwaphela loyo owonileko kimi encwadinami.” Lokho kutjho ukuthi amagama atlolwe encwadini le angakhutjhwa namkha asulwe. Kuba kwangathi uJehova utlole amagama la ngepensela. (IsAm. 3:5) Kufuze silwele ukuthi amagamethu ahlale encwadini le bekube kulapho atlolwa khona nge-enke.
4 Kujayelekile bona sibe neminye imibuzo. Ngokwesibonelo, iBhayibheli lithini ngalabo amagamabo atlolwe encwadini yokuphila kunye nalabo amagamabo angakatlolwa encwadini le? Labo amagamabo asencwadini le bazokufumana nini ukuphila okungapheliko? Kuthiwani ngalabo abahlongakele bangakalifumani ithuba lokwazi uJehova? Kghani kungakghonakala na bona amagamabo atlolwe encwadini le? Imibuzo le izokuphendulwa esihlokwenesi nakwesilandelako.
MAGAMA WABOBANI ATLOLWE ENCWADINI LE?
5-6. (a) Njengombana kuvezwe emtlolweni webeFilipi 4:3, bobani amagamabo atlolwe encwadini yokuphila? (b) Amagamabo azokutlolwa nini nge-enke encwadini yokuphila?
5 Magama wabobani atlolwe encwadini engokomfanekiso le? Bona siphendule umbuzo lo sizokucoca ngeenqhema ezihlanu ezihlukahlukeneko zabantu. Hlangana neenqhemezi abanye amagamabo atloliwe encwadini yokuphila, wabanye awakatlolwa.
6 Isiqhema sokuthoma sakhiwa ngilabo abakhethelwe ukuyobusa noJesu ezulwini. Inga-kghani amagamabo atloliwe encwadini yokuphila? Iye. Ngokwamezwi kampostoli uPowula awanqophise ‘eensebenzini ezikunye naye’ eFilipi, amagama wabazesiweko abamenywe bona bayokubusa noJesu akhona encwadini yokuphila. (Funda kwebeFilipi 4:3.) Bona amagamabo angasulwa encwadini engokomfanekiso yokuphila kufuze bahlale bathembekile. Kuzokuthi nasele bafumana umvuzwabo wamaswaphela, kungaba ngaphambi kobana bahlongakale namkha ngaphambi kokuthoma kwesizi elikhulu, amagamabo azokutlolwa nge-enke encwadini le.—IsAm. 7:3.
7. Khuyini esiyizwisisako ngokwalokho okutlolwe kusAmbulo 7: 16, 17 malungana nokuthi amagama wesiqubuthu esikhulu sezinye izimvu azokutlolwa nini nge-enke encwadini yokuphila?
7 Isiqhema sesibili sifaka hlangana isiqubuthu esikhulu sezinye izimvu. Inga-kghani amagamabo atloliwe encwadini yokuphila? Iye. Kghani amagamabo azobe asesesencwadini yokuphila ngemva kokusinda kwabo e-Arimagedoni? Iye. (IsAm. 7:14) UJesu wathi laba abanjengezimvu bazokungena “ekuphileni okungapheliko.” (Mat. 25:46) Labo abasinde e-Arimagedoni angeze bawufumane khonokho umvuzo wokuphila ngokungapheliko. Amagamabo azokuhlala encwadini yokuphila atlolwe ngepensela. Hlangana neMinyaka eyiKulungwana yokuBusa, uJesu ‘uzobalusa abanqophisele emithonjeni yamanzi wokuphila.’ Labo abalalele isinqophiso sakaKrestu begodu bafunyanwa bathembekile kuJehova, amagamabo azokutlolwa nge-enke encwadini yokuphila.—Funda IsAmbulo 7:16, 17.
8. Magama wabobani angakatlolwa encwadini yokuphila begodu kuzokwenzekani kibo?
8 Isiqhema sesithathu sihlanganisa labo abanjengeembuzi abazokutjhatjalaliswa nge-Arimagedoni. Amagamabo awakatlolwa encwadini yokuphila. UJesu wathi ngabo “bazokuya ekutjhatjalisweni kwaphakade.” (Mat. 25:46) Ngaphasi kokuphefumulelwa, uPowula usitjela ukuthi “bona labo bazokugwetjelwa isijeziso sokutjhatjalaliswa phakade.” (2 Thes. 1:9; 2 Pit. 2:9) Kungatjhiwo okufanako nangalabo okuthe ngokukhamba kwesikhathi bona ummoya ocwengileko, nabo ngokufanako bazokutjhatjalaliswa ngokungapheliko begodu ngeze bakufumana ukuphila. Kuyakhanya, ngeze bavuswa. (Mat. 12:32; Mar. 3:28, 29; Heb. 6:4-6) Nje, akhesicoce ngeenqhema ezimbili zabantu ezizokuvuselwa ephasini.
LABO ABAZOKUVUSWA
9. Njengombana kuvezwe kuzEnzo 24:15 ngiziphi iinqhema ezimbili zabantu ezizokuvuselwa ephasini begodu zihluke ngani?
9 IBhayibheli likhuluma ngeenqhema ezimbili zabantu abanethemba lokuphila ngokungapheliko ephasini, ‘abalungileko’ “nabangakalungi.” (Funda IzEnzo 24:15.) ‘Abalungileko’ ngilabo abalotjhe uJehova ngokuthembeka lokha nabasaphilako, ngakwelinye ihlangothi, ‘abangakalungi’ ngilabo abangakhenge balotjhe uJehova ngokuthembeka. Ekhabolakhona, kukanengi la khebaziphatha khona ngokungakalungi. Ngebanga lokuthi iinqhemezi zombili zizokuvuswa, kghani singatjho na ukuthi amagamabo atloliwe encwadini yokuphila? Ipendulo yombuzo lo sizoyifumana ngokuthi sihlole isiqhema ngasinye.
10. Kubayini ‘abalungileko’ bazokuvuswa begodu ngiliphi ilungelo abazolithabela? (Qala godu esiThalenesi ngaphasi kwesithi “Imibuzo Evela Ebafundini” malungana nalabo abazokuvuselwa ephasini.)
10 ‘Abalungileko’ basiqhema sesine. Ngaphambi kokuhlongakala, amagamabo bewatloliwe encwadini yokuphila. Inga-kghani amagamabo akhutjhwa encwadini le nabahlongakalako? Awa, ngombana ‘basaphila’ emkhumbulweni kaJehova. “AkasinguZimu wabafileko, kodwana ungewabaphilako, ngombana boke bayaphila kuye.” (Luk. 20:38) Lokho kutjho ukuthi abalungilekwaba nabavuselwa ephasini amagamabo azobe akhona encwadini yokuphila nanyana atlolwe ngepensela. (Luk. 14:14) Akunakuzaza ukuthi abanye abavusiweko bazokufumana ilungelo lokuba “makhosana enarheni yoke.”—Rhu. 45:17.
11. Khuyini ‘abangakalungi’ ekuzokufuze bayifunde amagamabo nawazakutlolwa encwadini yokuphila?
11 Ekuphetheni, akhesikhulume ngesiqhema sesihlanu, ‘sabangakalungi.’ Khenge baphile ngendlela uJehova ayifunako ngaphambi kobana bahlongakale mhlamunye ngebanga lokuthi bebangayazi imithethwakhe. Yeke, amagamabo khenge atlolwe encwadini yokuphila. Ngokuvuswa kwabo, uZimu ubanikela ithuba lokobana amagamabo atlolwe encwadini le. Abantu ‘abangakalungi’ bazokutlhoga isizo. Ngaphambi kokuhlongakala kwabo abanye bebenza izinto ezimbi khulu. Yeke, kuzokufuze bafundiswe bona bangaphila njani ngeenkambisolawulo zakaJehova ezilungileko. Nabazakwenza kuhle lokho, umBuso kaZimu uzokunqophisa ijima elikhulu lokufundisa elingakhenge khelibe khona emlandweni.
12. (a) Ngubani ozokufundisa abantu abangakalungi? (b) Kuzokwenzekani kilabo abangafuni ukwamukela isizo?
12 Ngubani ozokufundisa abantu abangakalungi? Siqubuthu esikhulu nabalungileko abavusiweko. Bona amagama wabangakalungi atlolwe encwadini yokuphila kuzokufuze babe netjhebiswano elihle noJehova bebazinikele kuye. UJesu Krestu nabahluleli akunye nabo bazoyiqalisisa ituthuko yalabo abangakalungi. (IsAm. 20:4) Nanyana ngubani ongekhe amukele isizo uzokutjhatjalaliswa, ngitjho nanyana sele aneminyaka eli-100 ubudala. (Isa. 65:20) UJehova noJesu bayakghona ukufunda okusehliziyweni begodu bazokuqinisekisa ukuthi akunamuntu ozokubangela umonakalo ephasini elitjha.—Isa. 11:9; 60:18; 65:25; Jwa. 2:25.
UKUVUSELWA EKUPHILENI NEKWAHLULELWENI
13-14. (a) Esikhathini esidlulileko besiwazwisisa njani amezwi kaJesu afumaneka kuJwanisi 5:29? (b) Khuyini ekufuze siyitjheje ngamezwi la?
13 UJesu wakhuluma godu nangalabo abazokuvuselwa ekuphileni ephasini. Ngokwesibonelo wathi: “Isikhathi siyeza lapho boke abasemathuneni bazokuzwa ilizwi layo baphume, labo abenze okuhle bavuselwe ekuphileni, begodu labo ababenomukghwa wokwenza okumbi bavuselwe ekwahlulelweni.” (Jwa. 5:28, 29) Bekatjho ukuthini uJesu?
14 Esikhathini esidlulileko besikholelwa ukuthi amezwi kaJesu aqalisele ezenzweni zabantu abazozenza ngemva kokuvuswa kwabo, lokho kutjho ukuthi abanye abavusiweko bazokwenza izenzo ezihle abanye benze izenzo ezimbi. Nanyana kunjalo, tjheja ukuthi uJesu akathi labo abazokuvuswa emathuneni bazokwenza izinto ezihle namkha bazokwenza izinto ezimbi. Uqalisela esikhathini esidlulileko. Ukhuluma ngalabo ‘abenze izinto ezihle’ nalabo ‘abenze izinto ezimbi.’ Lokho kutjho ukuthi izenzwezi bazenze ngaphambi kukuhlongakala kwabo. Lokhu kuyazwisiseka, akusinjalo? Kazi, akunamuntu ozokuvunyelwa bona enze izinto ezimbi ephasini elitjha. Abangakalungi benze izinto ezimbi ngaphambi kokuhlongakala kwabo. Yeke, kufuze siwazwisise njani amezwi kaJesu malungana ‘nokuvuselwa ekuphileni’ kunye ‘nokuvuselwa ekwahlulelweni’?
15. Bobani ‘abazokuvuselwa ekuphileni’ begodu kubayini?
15 Abalungileko ebebenza izinto ezihle ngaphambi kokuhlongakala, ‘bazokuvuselwa ekuphileni’ ngombana amagamabo sele akhona encwadini yokuphila. Lokhu kutjho ukuthi ukuvuswa ‘kwabalungileko’ ekukhulunywa ngakho kuJwanisi 5:29, kuyafana nokuvuswa ‘kwabalungileko’ ekukhulunywa ngakho kuzEnzo 24:15. Ukuzwisisokhu kuvumelana namezwi asencwadini yebeRoma 6:7, athi: “Ngombana ofileko utjhatjululiwe esonweni sakhe.” Izono ezenziwa ngabathembekilekwaba, zaphela lokha nabahlongakalako kodwana umlandwabo wokuthembeka, usesekhona. (Heb. 6:10) Iye, abalungileko abavusiweko kuzokufuze bahlale bathembekile amagamabo nawazakuhlala encwadini yokuphila.
16. Kutjho ukuthini ‘ukuvuselwa ekwahlulelweni’?
16 Kuthiwani ngalabo ebebenza izinto ezimbi ngaphambi kokuhlongakala? Nanyana izono zabo zasulwa lokha nabahlongakalako, basengakabi nomlando wokuthembeka. Amagamabo awakatlolwa encwadini yokuphila. Kungebangelo ukuvuswa kwalabo ‘ebebenza izinto ezimbi’ kufana ‘nokuvuswa kwalabo abangakalungi’ okukhulunywa ngabo kuzEnzo 24:15. ‘Bazokuvuselwa ekwahlulelweni.’ c Labo abangakalungi, bazokwahlulelwa ngomqondo wokuthi kuzokuhlolisiswa izenzo zabo. (Luk. 22:30) Kuzokuthatha isikhathi ukubona ukuthi inga-kghani amagamabo kufuze atlolwe na encwadini yokuphila. Amagama wabantu abangakalungi azokutlolwa encwadini yokuphila kwaphela nabalisa izenzo zabo ezimbi zaphambilini begodu banikele ukuphila kwabo kuJehova.
17-18. Khuyini boke abavuselwe ekuphileni ephasini ekuzokufuze bayenze begodu ngiziphi ‘izenzo’ ekuqaliselwe kizo kusAmbulo 20:12, 13?
17 Akunandaba ukuthi bebalungile namkha bebangakalungi, abavusiweko kuzokutlhogeka balalele imithetho efumaneka emisongweni emitjha ezokuvulwa hlangana neminyaka eyi-1000. Umpostoli uJwanisi uhlathulula lokho akubonako, uthi: “Ngabona abafileko, abakhulu nabancani, bajame phambi kwesihlalo sobukhosi, kwavulwa nemisongo. Kodwana kwavulwa nomunye umsongo; umsongo wokuphila. Abafileko bahlulelwa ngokwezinto ezitlolwe emisongweni ngokuya ngokwezenzo zabo.”—IsAm. 20:12, 13.
18 Abavusiweko bazokwahlulelwa ngokwaziphi ‘izenzo’? Kghani kuzokuba zizinto abazenzako ngaphambi kokuhlongakala kwabo? Awa! Khumbula ukuthi izono zabo zasulwa lokha nabahlongakalako. Kilokhu, ‘izenzo zabo’ ngeze kwaba zizenzo zangaphambilini. Kuzokufuze kuqalwe izenzo zabo endleleni abazokusabela ngayo ebandulweni abazolifumana ephasini elitjha. Amadoda akholwako njengoNowa, uSamyela, uDavida noDanyela, kuzokufuze afunde okunengi ngoJesu bewatjengise ukukholwa emhlatjelwenakhe. Kangangani-ke ngabantu abangakalungi!
19. Khuyini ezokwenzeka kilabo abangalamukeliko ithuba elihleli?
19 Khuyini ezokwenzeka kilabo abangalamukeliko ithuba elihle kangaka? IsAmbulo 20:15 sithi: “Nanyana ngubani ongakhenge afunyanwe atlolwe encwadini yokuphila waphoselwa elitsheni lomlilo.” Iye, bazokurhayilwa ngokupheleleko. Yeke, kuqakatheke khulu bona siqiniseke ngokuthi igama lethu litlolwe encwadini yokuphila begodu lihlale litloliwe!
Umfowethu udlala indimakhe emsebenzini wokufundisa ozokuragwa hlangana nokuBusa kwemiNyaka eyiKulungwana (Funda isigaba 20)
20. Ngimuphi umsebenzi okarisako ozokwenziwa hlangana nokuBusa kwemiNyaka eyiKulungwana? (Qala isithombe esingaphandle.)
20 Isikhathi sokuBusa kwemiNyaka eyiKulungwana kuzokuba sikhathi esikarisa kwamambala! Isikhathesi sizokufaka hlangana ijima elikhulu lokufundisa abantu ephasini. Kuzokuba sikhathi godu sokuhlolisisa ukuziphatha kwabalungileko nabangakalungi. (Isa. 26:9; IzE. 17:31) Ihlelo lokufundiseli lizokuragwa njani? Isihloko esilandelako sizosisiza sizwisise besithabele ihlelo elihleli.
INGOMA 147 Sithenjiswe Ukuphila Okungapheliko
a Isihlokwesi sizokulungisa indlela ebegade sizwisisa ngayo amezwi kaJesu atlolwe kuJwanisi 5: 28, 29 malungana nalabo ‘abazokuvuselwa ekuphileni’ kunye nalabo abazokuvuselwa ‘ekwahlulelweni.’ Sizokufunda ngokuthi imihlobo emibili yevuko le, iqalisele kuphi begodu bobani ababandakanyekileko.
b Ukutlolwa kwencwadi le kwathonywa “ekuthonyisweni kwephasi,” okuqalisele ebantwini abanethuba lokuzuza emhlatjelweni kaJesu. (Mat. 25:34; IsAm. 17:8) Yeke, u-Abela waba mumuntu wokuthoma igama lakhe elitlolwe encwadini yokuphila.
c Esikhathini sangaphambili, sahlathulula ibizo elithi, ‘isahlulelo’ njengeliveza umqondo womphumela wento engamukelekiko. Kuhlekuhle, ibizo elithi isahlulelo, kungenzeka linehlathululo enjalo. Endabeni le, kubonakala kwanga uJesu usebenzise ibizo elithi ‘isahlulelo’ ngomqondo ojayekileko, aqalisela endleleni yokuhlolisisa namkha njengombana isazi esimGirigi sitjho, “ukuhlolisisa ukuziphatha komuntu.”
