1. UPitrosi wasabela njani ngemva kokuthi uJesu amsize ngokusimangaliso ukubamba iinhlambi ezinengi?

 UPITROSI wathiya iinhlambi ubusuku boke akhenge athole litho. Ngokurarako uJesu wathi kuye: “Sunduzelani isikepe lapho kutjhingela ngakhona, niphosele amanedenu bona nibambe iinhlambi.” (Luk. 5:4) UPitrosi wazaza ukuthi uzakubamba ihlambi, kodwana wenza lokho athi akwenze. UPitrosi namadoda ebekasebenza nawo, babuthelela iinhlambi ezinengi kangangobana amanede athoma ukudabuka. Nabalemuka ukuthi uJesu uqeda ukwenza ikarisomraro “barareka khulu.” UPitrosi warhuwelela wathi: “Suka kimi Kosi ngombana ngiyindoda enesono.” (Luk. 5:6-9) Watjho njalo ngebanga lokuthi bekazizwa angafaneleki ukuba noJesu.

2. Kubayini kulisizo ukucabanga ngesibonelo sakaPitrosi?

² UPitrosi bekaqinisile—‘bekayindoda enesono.’ ImiTlolo iyaveza ukuthi ngezinye iinkhathi bekatjho bekenze izinto azisole ngazo ekukhambeni kwesikhathi. Kghani nawe ngezinye iinkhathi uzizwa njengoPitrosi? Inga-kghani kunobuntu obuthileko olinga ukubuhlula namkha ukubogaboga okuthileko esele kusikhathi eside ulwisana nabo? Nange kunjalo, kungakukhuthaza ukufunda ngesibonelo sakaPitrosi. Njani? Cabanga ngalokhu: Imitjhapho kaPitrosi beyingasuswa lula eBhayibhelini. Nanyana kunjalo, yatlolwa bona sifunde kiyo. (2 Thim. 3:16, 17) Ukufunda ngendoda ebeyinokubogaboga namazizo afana newethu, kungasisiza sibone ukuthi uJehova akakalindeli bona singenzi imitjhapho. Ufuna sikghodlhelele, siragele phambili nanyana sibogaboga.

3. Kubayini kutlhogeka sikghodlhelele?

 ³ Kubayini kutlhogeka bona sikghodlhelele? Ngombana nasisolo siphrakthisa ukwenza okuthileko, siyathuthuka. Ngokwesibonelo: Nange umuntu afuna ukufunda ukudlala igatara kungamthatha isikhathi eside. Nakasafundako, angenza imitjhapho eminengi kodwana nakaragela phambili aphrakthisa uzokuthuthuka. Ngitjho nanyana sele akwazi ukuyidlala kuhle, angayenza imitjhapho. Nanyana kunjalo, akapheli amandla. Uragela phambili aphrakthisa ukuthi athuthuke. Nathi ngendlela efanako nanyana singabona ngasuthi sele sikuhlulile ukubogaboga okuthileko, singayenza imitjhapho godu. Nanyana kunjalo, silwela ukuragela phambili sithuthuka. Soke sitjho namkha senza izinto esizisola ngazo ngemva kwesikhathi, nanyana kunjalo nange singapheli amandla uJehova uzosisiza siragele phambili sithuthuka. (1 Pit. 5:10) Akhesicoce ngesibonelo sakaPitrosi sokukghodlhelela. Isirhawu uJesu amtjengisa sona naphezu kwemitjhaphwakhe, singasisiza siragele phambili silotjha uJehova.

4. Njengombana kutjengiswe kuLukasi 5:5-10, uPitrosi uzihlathulula njani kodwana uJesu umqinisekisa njani?

⁴ ImiTlolo ayitjho ukuthi kubayini uPitrosi azihlathulula ngokuthi ‘uyindoda enesono’ namkha ngiziphi izono ebekakhuluma ngazo. (Funda uLukasi 5:5-10.) Kodwana kungenzeka wenza imitjhapho emikhulu. UJesu bekazi ukuthi uPitrosi bekasaba, mhlamunye ngombana bekazizwa angasililitho. UJesu bekazi nokuthi uPitrosi bekangahlala athembekile. Yeke, ngomusa wamtjela ukuthi ‘angathukwa.’ Ukuba nethemba kwakaJesu kuPitrosi, kwatjhugulula ukuphila kwakhe. UPitrosi nomfowabo u-Andrisi ngokukhamba kwesikhathi batjhiya irhwebo labo lokuthiya iinhlambi balandela uMesiya emsebenzini wokutjhumayela, uJehova wababusisa ngeendlela ezinengi.—Mar. 1:16-18.

5. Ngiziphi iimbusiso uPitrosi azifumanako ngokuhlula ukusaba kwakhe nangokwamukela isimemo sakaJesu?

⁵ UPitrosi wabona izinto ezinengi ezikarisako njengomlandeli kaKrestu. Wabona uJesu alapha abagulako, akhipha amadimoni bekavusa nabahlongakeleko. b (Mat. 8:14-17; Mar. 5:37, 41, 42) UPitrosi godu wabona nombono okarisako, wendima ezokudlalwa nguJesu esikhathini esizako, njengeKosi emBusweni kaZimu ozako, akhenge asilibale isenzakalweso. (Mar. 9:1-8; 2 Pit. 1:16-18) UPitrosi wabona izinto ebengekhe akghone ukuzibona ngathana akhenge alandele uJesu. Siyaqiniseka ukuthi wathaba khulu bona akhenge avumele  amazizo angakhiko ukuthi aphundwe ziimbusiso ezihle kangaka!

6. Kghani uPitrosi wakuhlula msinyana ukubogaboga kwakhe? Hlathulula.

⁶ Naphezu kwalokho akubonako nakuzwako, uPitrosi bekasalwisana nokubogaboga kwakhe. Cabanga ngeembonelo ezimbalwa. Lokha uJesu nakahlathulula ukuthi uzokutlhaga kangangani bekahlongakale njengombana kwatjho imiTlolo, uPitrosi wathi angekhe kwenzeka lokho. (Mar. 8:31-33) Ngokubuyelelweko uPitrosi nabanye abapostoli bebasolo baphikisana ngokuthi ngubani omkhulu. (Mar. 9:33, 34) Ngobusuku bamaswaphela bangaphambi kokuhlongakala kwakaJesu, uPitrosi wasahlela enye indoda bewayiqunta indlebe. (Jwa. 18:10) Ngobusuku obufanako, uPitrosi warhidlwa livalo asaba ukuthi abantu bazokucabangani ngaye njengombana amngani kaJesu, yeke waphika uJesu kathathu. (Mar. 14:66-72) Ngemva kwalokho uPitrosi walila kabuhlungu.—Mat. 26:75.

7. Ngiliphi ithuba uPitrosi anikelwa lona ngemva kokuvuswa kwakaJesu?

⁷ UJesu akhenge amlahle umpostolakhe obekadanile. Ngemva kobana uJesu avusiwe, wanikela uPitrosi ithuba lokumtjengisa ukuthi usamthanda. UJesu wabawa uPitrosi ukuthi aluse izimvu zakhe. (Jwa. 21:15-17) UPitrosi bekakulungele ukwenza lokhu uJesu ambawe khona. BekaseJerusalema ngelanga lePentekoste begodu ahlangana nabantu bokuthoma abazeswa ngomoya ocwengileko.

8. Ngimuphi umtjhapho omkhulu uPitrosi awenzako e-Anthiyokiya?

⁸ Ngitjho nangemva kokuthi abe mKrestu ozesiweko, uPitrosi kwatlhogeka alwisane nokubogaboga kwakhe. Ngo-36 C.E, uZimu wathumela uPitrosi ku-Korneliyasi ongasimJuda, uZimu wazesa uKorneliyasi ngomoya ocwengileko okubufakazi bokuthi “akakhethi” nokuthi abangasimaJuda bangaba yingcenye yebandla lobuKrestu. (IzE. 10:34, 44, 45) Ngemva kwalokho, uPitrosi wazizwa atjhaphulukile ukudla nabantu abangasimaJuda, ebekuyinto ebengekhe ayenza ngaphambilini. (Gal. 2:12) Nanyana kunjalo, amanye amaKrestu amaJuda azizwa ngasuthi abantu abamaJuda nabangasimaJuda akukafuzi badle ndawonye. Lokha abanye ebebanombono onjalo beza e-Anthiyokiya, uPitrosi walisa ukudla nabafowabo abangasimaJuda, mhlamunye ngebanga lokusaba ukuzwisa ubuhlungu amaKrestu amaJuda. Umpostoli uPowula wabubona ubuzenzisobu wakhalima uPitrosi phambi kwabantu. (Gal. 2:13, 14) UPitrosi wakghodlhelela naphezu komtjhapho lo. Khuyini eyamsizako?

9. UJwanisi 6:68, 69, uveza njani ukuthembeka kwakaPitrosi?

⁹ UPitrosi bekathembekile, akhenge avumele nanyana yini bona imenze anghale. Watjengisa ukuthembeka kwakhe kesinye isenzakalo lapho uJesu atjho into abafundi bakhe abangakhenge bayizwisise. (Funda uJwanisi 6:68, 69.) Abanengi akhenge balinde namkha bafune ihlathululo, balisa ukulandela uJesu. Kodwana uPitrosi akhenge alise. Walemuka ukuthi nguJesu kwaphela “onamezwi wokuphila okungapheliko.”

10. UJesu watjengisa njani ukuthi uyamthemba uPitrosi? (Qala nesithombe.)

¹⁰ UJesu akhenge alahle uPitrosi. Ngobusuku bamaswaphela bokuphila kwakhe ephasini, uJesu bekazi ukuthi uPitrosi nabanye abapostoli bazomtjhiya. Nanyana kunjalo, watjela uPitrosi bona bekaqiniseka ukuthi uzokubuya begodu ahlale athembekile. (Luk. 22:31, 32) UJesu bekazwisisa ukuthi “ummoya uyafisa kodwana inyama iyabogaboga.” (Mar. 14:38) Ngitjho nangemva kokobana uPitrosi amphikile, uJesu akhange alahle ithemba ngompostolakhe.  Ngemva kokuvuswa kwakhe, wabonakala kuPitrosi ayedwa. (Mar. 16:7; Luk. 24:34; 1 Kor. 15:5) Cabanga ukuthi lokho kwamqinisa kangangani uPitrosi, obekadanile ngebanga lalokho akwenzako.

11. UJesu wamqinisekisa njani uPitrosi ukuthi uJehova uzomsekela?

¹¹ UJesu waqinisekisa uPitrosi ukuthi uJehova uzomtlhogomela. Ngemva kokuvuswa kwakaJesu, wenzela uPitrosi nabanye abapostoli enye ikarisomraro yokubamba iinhlambi. (Jwa. 21:4-6) Akunakuzaza ukuthi ikarisomraro le yaqinisekisa uPitrosi ukuthi uJehova angakghona ukumnikela nanyana yini ayitlhogako. Kungenzeka abapostoli bakhumbula amezwi kaJesu avela kuJehova athi uzokutlhogomela labo ‘abafuna umBuso qangi.’ (Mat. 6:33) Ngokuvumelana namezwi lawo uPitrosi wenza umsebenzi wokutjhumayela weza qangi ekuphileni kwakhe ingasi irhwebo lokuthiya iinhlambi. Watjhumayela ngesibindi ngelanga lePentekoste laka-33 C.E., asiza iingidi zabantu bona zamukele iindaba ezimnandi. (IzE. 2:14, 37-41) Ngemva kwalokho, wasiza abantu beSamariya nabantu abangasimaJuda ukuthi bamukele uKrestu. (IzE. 8:14-17; 10:44-48) Siyaqiniseka bona uJehova wasebenzisa uPitrosi ngendlela enamandla ukuletha yoke imihlobo yabantu ebandleni.

12. Isibonelo sakaPitrosi singasisiza njani lokha nasilwisana nokubogaboga okuthileko isikhathi eside?

¹² UJehova angasisiza sikghodlhelele. Angekhe kuhlale kulula ukuthi sihlale sikghodlhelela ngaso soke isikhathi khulukhulu lokha nasilwisana nokubogaboga okuthileko isikhathi eside. Ngezinye iinkhathi, ukubogaboga kwethu kungabonakala kubudisi khulu ukudlula lokhu uPitrosi aqalana nakho. Kodwana uJehova angasinikela amandla wokuthi singalahli itewu. (Rhu. 94:17-19) Ngokwesibonelo, omunye umfowethu bekathandana nabantu bobulili obufanako isikhathi eside ngaphambi kokobana afunde iqiniso. Wakutjhugulula ngokupheleleko ukuphila kwakhe waphila ngokuvumelana nalokho okutjhiwo yiBhayibheli. Nanyana kunjalo, ngezinye iinkhathi bekalwisana neemfiso ezimbi. Khuyini eyamsiza wakghodlhelela? Uhlathulula uthi: “UJehova uyasiqinisa.” Ungezelela uthi: “Ngomoya kaJehova . . . , ngifunde ukuthi kuyakghoneka [ukuragela] phambili uphila ngendlela uJehova afuna siphile ngayo . . . UJehova ukghonile ukungisebenzisa nanyana nginemitjhapho usaragela phambili angiqinisa.”

13. Singasilingisa njani isibonelo sakaPitrosi njengombana sitlolwe kuzEnzo 4:13, 29, 31? (Qala nesithombe.)

 ¹³ Njengombana sibonile, uPitrosi wenza imitjhapho emikhulu ngebanga lokusaba abantu kodwana wakghona ukuba nesibindi. (Funda izEnzo 4:13, 29, 31.) Nathi singakghona ukuhlula ukusaba kwethu. Cabanga ngalokho okwenzeka ku-Horst osesemutjha ohlala e-Nazi ye-Germany. Ngezinye iinkhathi abantu bekufuze balotjhise ngendlela ekhethekileko ebeyitjho ukuthi “u-Hitler uzosisindisa!” Ngitjho nanyana u-Horst bekazi ukuthi ukulotjhisa okunjalo bekungakalungi, ngezinye iinkhathi bekakutjho ngebanga lokusaba utitjhere nabantu afunda nabo etlasini. Kunokobana ababelethi bakhe bamkhalime, bathandaza naye babawa uJehova ukuthi amuphe isibindi. Ngesizo alifumana ebabelethini bakhe nakuJehova, u-Horst ngokukhamba kwesikhathi wakghona ukuthoma ukuba namandla ajame aqine. Ekukhambeni kwesikhathi walemuka okuthileko uthi: “UJehova akhenge angilahle.” c

14. Abelusi abanethando bangabaqinisekisa njani labo abadanileko?

¹⁴ UJehova noJesu angekhe basilahle. Ngemva kokobana uPitrosi aphike uJesu, bekufuze enze isiqunto esiqakathekileko. Kghani bekazokulisa namkha bekazokukghodlhelela njengomfundi kaKrestu? UJesu wathandaza kuJehova abawa ukuthi ukukholwa kwakaPitrosi kungapheli. UJesu watjela uPitrosi ngomthandazo loyo wabe waveza ukuthi uyamthemba nokuthi ngokukhamba kwesikhathi uzokukghona ukuqinisa abafowabo. (Luk. 22:31, 32) Qala bona lokho kungenzeka kwamqinisa kangangani uPitrosi nakacabanga ngamezwi kaJesu la! Lokha nakutlhogeka senze isiqunto esihlakaniphileko, uJehova angasebenzisa  abelusi ukuthi basinikele isiqinisekiso sokobana sitlhoga ukuhlala sithembekile. (Efe. 4:8, 11) U-Paul osele amdala isikhathi eside, ulinga ukwenza njalo. Ubawa labo abazizwa ngasuthi bafuna ukulisa bona bacabange ngendlela uJehova abadosele ngayo eqinisweni ekuthomeni. Uyabaqinisekisa ukuthi ngethando elithembekileko analo ngabo angekhe abatjhiye. Uphetha ngokuthi, “Ngibone abanengi abadanileko bakghodlhelela ngesizo lakaJehova.”

15. Isibonelo sakaPitrosi nesaka-Horst sikutjengisa njani ukuba liqiniso kwakaMatewu 6:33?

¹⁵ UJehova watlhogomela uPitrosi nabanye abapostoli ngalokho abakutlhogako, nathi uzositlhogomela lokha nasibeka umBuso qangi ekuphileni kwethu. (Mat. 6:33) Ngemva kwePi YePhasi II, u-Horst ekukhulunywe ngaye ekuthomeni, wacabangela ukuphayona. Bekadobha phasi begodu bekazaza ukuthi angakghona ukuzitlhogomela bekahlale asebenzela uJehova isikhathi esizeleko. Khuyini ayenzako? Waqunta ukulinga uJehova ngokuthi abe khona iveke yoke ngesikhathi sombonisi wesigodi. Nakuphela iveke warareka khulu lokha umbonisi wesigodi nakamnikela i-emvilobhu evela emuntwini angamaziko. Beyinemali eyaneleko bona imtlhogomele iinyanga ezithileko njengombana bekaphayona. U-Horst waqala isiphwesi njengesiqinisekiso sokuthi uJehova uzomtlhogomela. Wabeka umBuso qangi ukuphila kwakhe koke.—Mal. 3:10.

16. Kubayini kuzuzisa ukufunda ngokungeziweko ngoPitrosi nangalokho akutlolako eencwadini zakhe?

¹⁶ Cabanga bona kwamthabisa kangangani uPitrosi ukuthi uJesu akhenge amtjhiye njengombana abawa. UKrestu waragela phambili abandula uPitrosi ukuthi abe mpostoli othembekileko bekabe sibonelo esihle esiphuma phambili emaKrestwini. Sifunda iimfundo ezinengi eziligugu ebandulwenelo. UPitrosi ukhuluma ngezinye zeemfundwezo eencwadini ezimbili azitlolela amabandla ekhulwini lokuthoma begodu nje ziyingcenye yeBhayibheli. Esihlokweni esilandelako, sizokucoca ngeenkhumbuzo ezimbalwa ezivela eemfundwenezi nokuthi singazisebenzisa njani namhlanjesi.