1-2. Kubayini kuqakathekile ukuthi sifunde ngendaba kaSamsoni?

 KHUYINI ocabanga ngayo nawuzwa igama lakaSamsoni? Kungenzeka ucabanga ngendlela ebekanamandla ngayo. Lokho kuliqiniso. USamsoni wenza iinqunto ezingasizihle ezaba nemiphumela engasimihle. Nanyana kunjalo, uJehova wadzimelela kilokho uSamsoni akwenzako bona amlotjhe. UZimu wafaka isibonelo sakaSamsoni sokuthembeka bona sizuze.

² UJehova wasebenzisa uSamsoni bona enze izinto ezikarisako ukusiza abantu bakhe u-Israyeli. Amakhulu weminyaka ngemva kokuhlongakala kwakaSamsoni, uJehova waphefumulela uPowula bona atlole igama lakhe erhelweni lamadoda anokukholwa. (Heb. 11:32-34) Isibonelo sakaSamsoni singasikhuthaza nathi. Wathembela kuJehova ngitjho nanyana aqalene nobujamo obubudisi. Esihlokwenesi sizokucoca ngokuthi khuyini esingayifunda nokuthi isibonelo sakhe sisikhuthaza njani.

3. USamsoni wafumana siphi isabelo?

³ Nakubelethwa uSamsoni, amaFilista bekabusa isitjhaba sakwa-Israyeli begodu bekasigandelela. (Hlul. 13:1) Ama-Israyeli bekatlhaga khulu ngombana amaFilista bekanelunya. UJehova wakhetha uSamsoni bona ‘uzokudosa phambili ekusindiseni u-Israyeli esandleni samaFilista.’ (Hlul. 13:5) Kodwana loyo bekumsebenzi obudisi khulu! Bona uSamsoni enze isabelo sakhe esibudisesi, bekufuze athembele kuJehova.

4. UJehova wamsiza njani uSamsoni bona azitjhaphulule kumaFilista? (AbaHluleli 15:14-16)

 ⁴ Cabanga ngesibonelo esitjengisa indlela uSamsoni athembela ngayo kuJehova nesekelo uZimu amnikela lona. Kesinye isenzakalo, ibutho lamasotja leza lazokubamba uSamsoni eLerhi, okungenzeka kukwaJuda. Amadoda wakwaJuda bekathukiwe, nje-ke aqunta ukunikela uSamsoni ezandleni zenaba. Amadoda la ambopha ngeentambo ezimbili ezitja amusa kumaFilista. (Hlul. 15:9-13) Nanyana kunjalo, “ummoya kaJehova wamupha amandla” begodu wazitjhaphulula. Ngemva kwalokho, “wafumana ithambo elitjha lomhlathi kadumbana oduna,” walidobha, walisebenzisa ukubulala amadoda ayi-1 000 wamaFilista.—Funda abaHluleli 15:14-16.

5. Ukusebenzisa kwakaSamsoni ithambo lomhlathi kadumbana kwatjengisa njani ukuthi uthembele kuJehova?

⁵ Kubayini uSamsoni asebenzisa ithambo lomhlathi kadumbana? Bekusikhali esingakajayeleki. Akunakuzaza ukuthi uSamsoni bekazi bona uJehova nguye ozomsiza ahlule amaFilista ngananyana ngisiphi isikhali asiphetheko. Indoda ethembekileko le yasebenzisa lokho ebeyinakho ukwenza intando kaJehova. USamsoni wahlula amadoda la ngebanga lokuthi bekathembele kuJehova.

6. Ngisiphi isifundo esingasifunda endabeni kaSamsoni?

⁶ Nathi uJehova uzosinikela amandla esiwatlhogako bona senze nanyana yini asibawa bonyana siyenze, ngitjho nanyana isabelo sibonakala singakghoneki. UZimu angasisiza ngendlela erarako. Yiba nethemba lokuthi uJehova, owasiza uSamsoni uzokusiza nawe wenze intandwakhe nawuthembele kuye bona akusize.—IzA. 16:3.

7. Ngisiphi isibonelo esitjengisa bona kuqakathekile ukufuna isinqophiso sakaJehova?

⁷ Abafowethu nabodadwethu abasiza ekwakhiweni kweendawo ekulotjhelwa kizo batjengisile ukuthi bathembele kuJehova. Esikhathini esidlulileko, abafowethu bebajayele ukutlama nokwakha amaWolo womBuso nezinye izakhiwo. Kodwana ngebanga lokuthi abantu abanengi bayabhajadiswa,  ihlangano kutlhogeke bona yenze amatjhuguluko. Abafowethu abadosa phambili bafuna isinqophiso sakaJehova balinga neendlela ezitja njengokuthenga izakhiwo nokuzivuselela. U-Robert osele asebenze emaphrojekthini amanengi wokwakha ephasini loke uthi, “Ekuthomeni bekungasilula ngabanye bona basebenzise iindlela ezitjezi.” Uraga uthi: “Lokhu bekuhluke khulu kilokhu ebesijayele ukukwenza eminyakeni edlulileko. Kodwana abafowethu bebazimisele ukuzivumelanisa nobujamo begodu lokhu kube bufakazi bokuthi uJehova uyawabusisa amatjhuguluko la.” Le ngenye yeendlela uJehova anqophisa ngayo abantu bakhe bona benze intandwakhe. Senza kuhle bona sinande sizibuza ukuthi, ‘Inga-kghani ngiyasifuna isinqophiso sakaJehova begodu ngizimisele ukwenza amatjhuguluko bona ngimlotjhe ngendlela ephuma phambili?’

8. Kesinye isenzakalo, khuyini uSamsoni ayenzako nakomileko?

⁸ Kungenzeka uyazikhumbula ezinye izinto ezihle uSamsoni azenzako. Wabulala ibhubezi, ngokukhamba kwesikhathi wabulala amadoda wamaFilista ama-30 e-Atjhikheloni. (Hlul. 14:5, 6, 19) USamsoni bekazi ukuthi bengekhe akghone ukukwenza koke lokhu ngaphandle kwesizo lakaJehova. Lokho kwabonakala kesinye isenzakalo lapho bekome khulu ngemva kokubulala amaFilista ayi-1 000. Wenzani? Kunokobana azifunele yena amanzi wokusela, wabawa isizo lakaJehova.—Hlul. 15:18.

9. UJehova wasabela njani esibaweni sakaSamsoni? (AbaHluleli 15:19 nomtlolo waphasi)

⁹ UJehova wasiphendula isibawo sakaSamsoni ngokwenza umthombo wamanzi ngokusimangaliso. Ngemva kokusela kiwo, “amandlakhe abuya begodu wavuseleleka.” (Funda abaHluleli 15:19 nomtlolo waphasi.) Kungenzeka umthombo wamanzi omutjha lo bewusesekhona nangesikhathi somphorofidi uSamyela lokha nakatlola incwadi yabaHluleli. Ama-Israyeli nakabona ukugeleza kwamanzi lawo, kungenzeka bekakhumbula ukuthi nawathembela kuJehova, uzowasiza nakatlhoga isizo.

10. Khuyini okufuze siyenze bona sifumane isizo lakaJehova? (Qala nesithombe.)

¹⁰ Nathi sitlhoga ukuthembela kuJehova bona asisize nanyana singaba namakghono namkha senze okunengi emsebenzinakhe. Kufuze sithobeke, sivume bona singakghona ukwenza lokho uJehova afuna ukuthi sikwenze kwaphela nange sithembele kuye. Njengombana uSamsoni aba namandla ngemva kokusela amanzi uJehova amlungiselele wona, nathi ubuhlobo bethu naye bungaqina nasiwasebenzisa kuhle woke amalungiselelo uJehova asilungiselele wona.—Mat. 11:28.

11. Singathembela njani kuJehova bona asisize begodu khuyini omunye umfowethu nodadwethu abayenzako?

¹¹ Cabanga ngesibonelo saka-Aleksey, omunye umfowethu we-Russian okghodlhelela ukuhlunguphazwa okubudisi. Khuyini eyamsizako bona ahlale aqinile ngaphasi kobujamo obubudisi? Yena nomkakhe bebanehlelo laqobe lokufunda iBhayibheli nelokulotjha. Uthi: “Qobe ngilinga ukuhlala ngenza isifundo somuntu mathupha nokufunda iBhayibheli. Qobe ekuseni, mina nomkami sicoca ngomtlolo welanga besithandaze ndawonye.” Kusifundisani lokhu? Kunokobana sizithembe thina, kufuze sithembele kuJehova. Njani? Ngokuhlala senza izinto ezakha ukukholwa kwethu, njengokufunda iBhayibheli, ukuthandaza, ukuba khona esifundweni  nokutjhumayela. Nasenza njalo, uJehova uzosinikela isizo esilitlhogako bona siragele phambili simlotjha. Waqinisa uSamsoni begodu nathi angasiqinisa.

12. Ngisiphi isiqunto esimbi uSamsoni asenzako begodu ubuhlobo bakhe noDelila bebuhluke njani?

¹² USamsoni bekanesono njengathi, nje-ke ngezinye iinkhathi bekenza iinqunto ezingasizihle. Esinye isiqunto asenzako saletha imiphumela ebuhlungu. Ngemva kokuthi uSamsoni abe ngumahluleli isikhathi eside, “wathandana nentombi yemRhobeni weSorekhi, igama layo bekunguDelila.” (Hlul. 16:4) Phambilini, uSamsoni bekathembisene umtjhado nomfazi omFilista. UJehova wanqophisa uSamsoni bona enze njalo ukwenzela ukuthi afumane ithuba lokulwa namaFilista. Ngokukhamba kwesikhathi, uSamsoni wahlala endlini yengwadla edorobheni lamaFilista eGaza. Esenzakalweneso, uZimu wanikela uSamsoni amandla wokubamba iminyango yamasango wedorobho, abogabogisa idorobho. (Hlul. 14:1-4; 16:1-3) Nanyana kunjalo, kungenzeka uDelila bekamIsrayeli, nje-ke ubuhlobo bakhe naye bebungamnikeli ithuba lokulwa namaFilista.

13. Khuyini uDelila ayenzako kuSamsoni?

¹³ UDelila wamukela imali enengi evela kumaFilista bona ajikele uSamsoni. Mhlamunye ngebanga lokuthi uSamsoni bekamthanda khulu uDelila, akhenge abone ukuthi bekafuna ukwenzani. UDelila bekasolo abawa uSamsoni bona amtjele ukuthi kubayini anamandla kangaka begodu ekugcineni uSamsoni wamtjela. Okudanisako kukuthi umtjhapho kaSamsoni wambangela bona alahlekelwe mamehlwakhe nakukwamukelwa nguJehova isikhatjhana.—Hlul. 16:16-20.

14. Ngimiphi imiphumela uSamsoni aqalana nayo ngebanga lokuthemba kwakhe uDelila?

 ¹⁴ USamsoni waqalana nemiphumela ebuhlungu ngebanga lokuthanda khulu uDelila kunokuthanda uJehova. AmaFilista abamba uSamsoni bekamgobhodlha amehlo. Ambophela ejele leGaza, lapho abantu bakhona abahlazisa phambilini, bamsebenzisa ukusila iinthoro. Ngemva kwalokho, amaFilista amhlazisa nawahlangene enza umnyanya. Enzela uzimabo uDagoni umhlatjelo ngombana bewakholelwa bona uwasizile abamba uSamsoni. Aletha uSamsoni emnyanyeni lo bona ‘azowahlekisa’—ukuhlekisa ngaye.—Hlul. 16:21-25.

15. USamsoni watjengisa njani ukuthi uthembele kuJehova godu? (AbaHluleli 16:28-30) (Qala isithombe esingaphandle.)

¹⁵ USamsoni wenza umtjhapho omkhulu kodwana waragela phambili alotjha uJehova. Wafuna ithuba lokwenza isabelo asinikelwe nguJehova sokulwa namaFilista. (Funda abaHluleli 16:28-30.) Wancenga uJehova wathi: “Zimu ngibawa ungivumele ngizibuyiselele kumaFilista.” UZimu weqiniso waphendula isibawo sakaSamsoni wabuyisa amandlakhe ngokusimangaliso. USamsoni waphumelela ukubulala amaFilista amanengi ukudlula phambilini.

16. Khuyini esingayifunda emtjhaphweni kaSamsoni?

¹⁶ Nanyana uSamsoni aqalana nemiphumela ebuhlungu ngebanga lemitjhaphwakhe, akhenge alise ukwenza intando kaJehova. Ngitjho nanyana senza imitjhapho begodu kutlhogeke bona sisolwe namkha silahlekelwe malungelo athileko, akukafuzi siphele amandla. Khumbula ukuthi uJehova ukulungele ukusilibalela. (Rhu. 103:8-10) UJehova angakghona ukusisebenzisa naphezu kwemitjhaphwethu njengombana enza kuSamsoni.

17-18. Kubayini isibonelo saka-Michael sikukhuthaza? (Qala nesithombe.)

¹⁷ Cabanga ngesibonelo somfowethu osesemutjha u-Michael. Bekamajadu emsebenzini kaJehova, ayinceku esizako begodu aliphayona. Okudanisako kukuthi wenza umtjhapho owabangela bona alahlekelwe malungelwakhe webandleni. Uthi, “Bekube nje bengimajadu emsebenzini kaJehova. Kungakalindeleki, ngazizwa ngasuthi ayikho into engingayenza emsebenzini kaJehova. Akhenge khengicabange bona uJehova uzongilahla kodwana ngazibuza ukuthi itjhebiswano lami naye lizokufana  naphambilini na namkha ukuthi ngizokukghona ukumlotjha ebandleni njengombana bengenza ngaphambilini.”

¹⁸ Okuthabisako u-Michael akhenge aphele amandla. Ungezelela uthi: “Ngadzimelela ekulungiseni ubuhlobo bami noJehova ngokuthandaza kuye qobe, ngokufunda nangokucabangisisa.” Ngokukhamba kwesikhathi, u-Michael wawafumana godu amalungelwakhe ebandleni. Nje, umdala webandla begodu uliphayona. Uthi: “Isekelo neenkhuthazo engazifumanako zangisiza ngalemuka bona uJehova usangithanda. Godu sengikghona ukulotjha ebandleni ngesazela esihlwengileko. Lokhu okwenzeke kimi kungifundise ukuthi uzokulibalela nanyana ngubani ophenduka kwamambala.” Nathi singaqiniseka bonyana uJehova uzosisebenzisa bekasiqinise, ngitjho nanyana khesenza umtjhapho nasenza koke esingakwenza bona silungise iindlela zethu siragele phambili sithembela kuye.—Rhu. 86:5; IzA. 28:13.

19. Isibonelo sakaSamsoni sikuqinise njani?

¹⁹ Esihlokwenesi, sicoce ngezenzakalo ezimbalwa ezikarisako ezenzeke ekuphileni kwakaSamsoni. Bekanesono kodwana akhenge alise ukulotjha uJehova, ngitjho nangemva komtjhaphwakhe noDelila. UJehova waragela phambili nokusebenzisa uSamsoni. UJehova godu wasebenzisa uSamsoni ngendlela enamandla. UJehova usamqala njengendoda enokukholwa okukarisako, wamfaka erhelweni labathembekileko elifumaneka kumaHebheru isahluko 11. Qala ukuthi kukhuthaza kangangani ukwazi bona silotjha uBaba wezulwini ofuna ukusiqinisa, khulukhulu lokha nasibogabogako! NjengoSamsoni, asincengeni uJehova sithi: “Ngibawa ungikhumbule begodu ngibawa ungiqinise.”—Hlul. 16:28.