1. Khuyini uJesu azoyenza ingasi kade?

 SIPHILA esikhathini lapha kuzokwenzeka khona amatjhuguluko amanengi. UJesu uzokwahlulela woke umuntu ophila ephasini. UJesu wahlathulula izinto ezizokwenzeka ngaphambi kokufika kwesikhathi sokwahlulelwa, ngokunikela abafundi bakhe “isibonakaliso” sesiphorofido sokuba khona kwakhe okungabonakaliko “nesokuphela kwephasi.” (Mat. 24:3) Isiphorofidwesi sitlolwe kuMatewu izahluko 24 no-25, kuMarkosi isahluko 13 nakuLukasi isahluko 21.

2. Sizokucoca ngani esihlokwenesi begodu kuzosisiza ngani lokho?

² UJesu wasebenzisa imifanekiso ukusisiza sizilungiselele. Le mifanekiso yezimvu neembuzi, yeentombi ezihlakaniphileko nezizindlhandlha nomfanekiso wamatalende. Omunye wemifanekiso le, usisiza sizwisise ukuthi umuntu uzokwahlulelwa ngendlela aziphatha ngayo. Njengombana siqalisisa imifanekiso le, akhesibone ukuthi sifundani nokuthi singayisebenzisa njani ekuphileni kwethu. Umfanekiso wokuthoma esizokucoca ngawo ngewezimvu neembuzi.

IZIMVU NEEMBUZI

3. UJesu uzozahlulela abantu?

³ Emfanekisweni wezimvu neembuzi, uJesu uhlathulula isahlulelo sabantu abanethuba lokusabela eendabeni ezimnandi nokusekela abafowabo bakaJesu abazesiweko. (Mat. 25:​31-46) Ngesikhathi ‘sesizi elikhulu’ uzokwahlulela abalungileko ngaphambi kwe-Arimagedoni. (Mat. 24:21) Njengombana umalusi ahlukanisa izimvu neembuzi, uJesu uzokuhlukanisa abasekele abazesiweko ngokuthembeka nalabo abangakhenge benze njalo.

4. Ngokomtlolo ka-Isaya 11:​3, 4 kubayini siqiniseka ukuthi uJesu uzokwahlulela ngendlela enobulungiswa? (Qala nesithombe esingaphandle.)

 ⁴ IBhayibheli lisitjengisa bona uMahluleli okhethwe nguJehova, uJesu, uzokwahlulela ngokulunga. (Funda u-Isaya 11:​3, 4.) Uzokuqala indlela abantu abaziphatha, abacabanga nabakhuluma ngayo kuhlanganise nendlela abaphatha ngayo abafowabo abazesiweko. (Mat. 12:​36, 37; 25:40) UJesu uzobazi labo abasekele abafowabo abazesiweko nomsebenzi abanikelwe wona. a Enye yeendlela eziyihloko abanjengezimvu abasekela ngayo abafowabo bakaKrestu kubasiza emsebenzini wokutjhumayela. Labo abasiza ngomsebenzi lo, bazokwahlulelwa ngokuthi ‘balungile’ begodu bazokuba nethuba “lokuphila okungapheliko” ephasini. (Mat. 25:46; IsAm. 7:​16, 17) Qala bona mvuzo omuhle kangangani kilabo abathembekileko. Ngokuhlala bathembekile ngesizi elikhulu nangemva kwalokho, amagamabo azokuhlala atloliwe “encwadini yokuphila.”—IsAm. 20:15.

5. Ngisiphi isifundo esisifumana emfanekisweni wezimvu neembuzi begodu bobani abazuzako kiwo?

⁵ Hlala uthembekile. Umfanekiso kaJesu wezimvu neembuzi udzimelele ngokuyihloko kilabo abanethemba lokuphila ephasini. Batjengisa ukukholwa kwabo ingasi ngokusiza abafowabo bakaKrestu emsebenzini wokutjhumayela kwaphela kodwana nangokwamukela ukunqotjhiswa siqhema esincani sabafowabo bakaJesu abazesiweko, uJesu abakhethileko. (Mat. 24:45) Kodwana nalaba abanethemba lokuphila ezulwini kutlhogeka basilalele isinqophiso somlayezo womfanekiso lo. Kubayini? Ngombana uJesu uqale indlela abaziphatha, abacabanga nabakhuluma ngayo. Nabo kufuze bahlale bathembekile. Kuhlekuhle uJesu watjho eminye imifanekiso emibili ekhuluma ngeenyeleliso zabazesiweko ngokuyihloko. Sibuye sifumana imifanekiso le kuMatewu isahluko 25. Akhe sicoce ngomfanekiso weentombi ezihlakaniphileko nezizindlhadlha.

IINTOMBI EZIHLAKANIPHILEKO NEZIZINDLHADLHA

6. Iintombi ezihlanu zatjengisa njani bona zihlakaniphile? (Matewu 25:​6-10)

⁶ Emfanekisweni omunye, uJesu ukhuluma ngeentombi ezilitjhumi eziyokuhlangabeza umkhwenyana. (Mat. 25:​1-4) Zoke bezifuna ukuphekelela umkhwenyana emnyanyenakhe womtjhado. UJesu uthi iintombi ezihlanu “zihlakaniphile” bese ezinye ezihlanu ‘zizindlhayela.’ Ezihlakaniphileko, bezizilungiselele. Bezikulungele ukulinda umkhwenyana bekube kulapha afika khona, ngitjho nanyana angafika sele kusebusuku. Zaphatha namafutha angeziweko zenzelela ukuthi nakungenzeka umkhwenyana aladelwe, zikulungele ukuthi iimbani zazo zihlala zivutha. (Funda uMatewu 25:​6-10.) Umkhwenyana nakafikako iintombi ezihlakaniphileko zakhamba naye emnyanyeni. Ngendlela efanako, amaKrestu azesiweko nakahlala atjhejile begodu athembekile bekube kulapho uKrestu abuya khona, azokwahlulelwa ngokuthi akulungele ukuba nomkhwenyana, uJesu, emBuswenakhe wezulwini. b (IsAm. 7:​1-3) Kuthiwani ngeentombi ezihlanu ezizindlhadlha?

7. Kwenzekeni ngeentombi ezihlanu ezizindlhadlha begodu kubayini?

 ⁷ Ngokungafani neentombi ezihlakaniphileko, iintombi ezihlanu ezizindlhadlha bezingakabuyi lokha umkhwenyana nakafikako. Iimbani zazo besele zizokuqima begodu bezingakaphathi amafutha angeziweko. Nazizwa bona ukhwenyana sele azokufika zakhamba zayokuthenga amafutha. Bezingakabuyi umkhwenyana nakafikako. Ngesikhatheso, “iintombi ebesele zilungile zangena naye emnyanyeni womtjhado, kwavalwa umnyango.” (Mat. 25:10) Ngokukhamba kwesikhathi, iintombi ezizindlhadlha nazibuyako, zifuna ukungena, umkhwenyana wathi kizo, “anginazi.” (Mat. 25:​11, 12) Iintombezi bezingakakulungeli ukulinda umkhwenyana bekube kulapho afika khona. Khuyini abazesiweko abayifundako kilokhu?

8-9. Ngisiphi isifundo abazesiweko abasifundako emfanekisweni weentombi? (Qala nesithombe.)

⁸ Hlalani nizilungiselele begodu nitjhejile. Ngomfanekiso lo uJesu bekangabikezeli bona kuzokuba neenqhema ezimbili zabazesiweko, esinye sabakulungele ukulinda uJesu bekuphele iphaseli, esinye esingakakulungeli. Kunalokho, bekahlathulula ukuthi khuyini ezokwenzeka nange abazesiweko bangakakulungeli ukukghodlhelela bekube sekupheleni. Nakwenzeka benze njalo, bebangekhe bawufumane umvuzo. (Jwa. 14:​3, 4) Lokho kuqakathekile. Kunganandaba bona sinethemba lokuphila ezulwini namkha ephasini, kufuze sicabangisise ngawo umfanekiso weentombi. Soke kufuze sihlale sitjhejile begodu sikulungele ukukghodlhelela bekube sekupheleni.—Mat. 24:13.

⁹ Ngemva kokukhuluma ngomfanekiso weentombi, ukhanyisa iphuzu lokuthi sitlhoga ukuhlala sizilungiselele begodu sitjhejile, uJesu wakhuluma ngomfanekiso wamatalende. Umfanekiso lo, uveza iphuzu lokuthi kufuze sisebenze ngamandla.

 AMATALENDE

10. Iinsebenzi ezimbili zatjengisa njani bona zithembekile? (Matewu 25:​19-23)

¹⁰ Emfanekisweni wamatalende uJesu wakhuluma ngeensebenzi ezimbili ebezithembekile ekosinazo nesisebenzi sinye ebesingakathembeki. (Mat. 25:​14-18) Iinsebenzi ezimbili zatjengisa ukuthi zithembekile ngokusebenza budisi ukwandisa imali yekosazo. Ngaphambi kobana ikhambe, ikosi yazinikela amatalende, ebekuyimali enengi. Iinsebenzi ezimbili ezithembekileko, zasebenza budisi begodu zasebenzisa imali ngokuhlakanipha. Waba yini umphumela? Ikosazo nayibuyako, yafumana ukuthi, ziyenze kabili imali ezinikelwe yona. Yazithokoza yathi ‘thabani nekosenu.’ (Funda uMatewu 25:​19-23.) Kuthiwani ngesisebenzi sokugcina? Senzani ngemali ikosaso eyinikele yona?

11. Kwenzekani ngesisebenzi ‘esivilaphako’ begodu kubayini?

¹¹ Isisebenzi sesithathu safumana italende linye kodwana ‘besivilapha.’ Ikosi beyilindele bona sisebenzise italendeli ngokuhlakanipha. Kunalokho, salifaka ehlabathini. Ikosi nayifikako yafumana isisebenzesi singakenzi litho ngetalende laso. Isisebenzesi besingacabangisisi kuhle. Kunokobana sibawe ukulitjalelwa ngokungasebenzisi izinto zekosazo kuhle, sazithethelela, sathi ekosinaso, ‘iyindoda engacabangeliko.’ Ikosi akhenge ithabe ngesisebenzi sayo. Ngaphezu kwalokho, yathatha italende lesisebenzesi, yasiqotha emzinayo.—Mat. 25:​24, 26-30.

12. Iinsebenzi ezimbili ezithembekileko zijamelele abobani namhlanjesi?

¹² Iinsebenzi ezimbili ezithembekileko zijamelele amaKrestu azesiweko athembekileko. IKosazo, uJesu iyazimema bona ‘zithabe nekosazo.’ Zifumana umvuzwazo wezulwini, ukuvuswa kokuthoma. (Mat. 25:​21, 23; IsAm. 20:5b) Ngakelinye ihlangothi, isibonelo esimbi sesisebenzi esivilaphako sinikela isiyeleliso kabazesiweko. Njani?

13-14. Ngisiphi isifundo abazesiweko abasifundako emfanekisweni wamatalende? (Qala nesithombe.)

¹³ Zimisele ukusebenza begodu ukhuthale. Njengombana bekunjalo ngomfanekiso  wamatalende, emfanekisweni weentombi, uJesu bekangabikezeli ukuthi abazesiweko bazokuvilapha. Kunalokho, bekahlathulula lokho okuzokwenzeka nakungenzeka bavilaphe. Bebazokubhalelwa ‘ukuqiniseka ngokubizwa nokukhethwa kwabo’ begodu bengekhe bavunyelwe ukungena emBusweni wezulwini.—2 Pit. 1:10.

¹⁴ Umfanekiso kaJesu weentombi namatalende, wenza kukhanye bona woke amaKrestu azesiweko kufuze ahlale akulungele, atjhejile begodu asebenze budisi nangekuthalo. Kukhona na okhunye uJesu akutjhoko okusiyeleliso kabazesiweko? Iye kukhona. Amezwi uJesu awatjho kuMatewu 24:​40, 41 nawo anikela isahlulelo samaswaphela kabazesiweko.

BOBANI ‘ABANYE ABAZOKUTHATHWA’?

15-16. UMatewu 24:​40, 41 ukhanyisa njani itlhogeko yokuthi abazesiweko kufuze batjheje?

¹⁵ Ngaphambi kokutjho imifanekiso emithathu, uJesu uhlathulula isahlulelo samaswaphela sabazesiweko, esizokutjengisa ukuthi ngibaphi ebebathembekile. Wakhuluma ngamadoda amabili asebenza emasimini nabafazi ababili abasilako. Kubonakala ngasuthi benza umsebenzi ofanako kodwana uJesu wathi, “omunye uzokuthathwa omunye atjhiywe.” (Funda uMatewu 24:​40, 41.) Ngemva kwalokho, wakhuthaza abalandeli bakhe wathi: “Hlalani niqalile ngombana anilazi ilanga iKosenu ezokuza ngalo.” (Mat. 24:42) UJesu watjho okufanako ngemva kokutjho umfanekiso weentombi. (Mat. 25:13) Inga-kghani akutjhoko kuhlobene? Kubonakala njalo. MaKrestu athembekileko azesiweko kwaphela ‘azokuthathwa,’ amukelwe nguJesu emBusweni wezulwini.—Jwa. 14:3.

¹⁶ Hlalani nitjhejile. Nanyana ngimuphi ozesiweko, ongeze ahlale atjhejile, angekhe abuthelelwe ‘nabakhethiweko.’ (Mat. 24:31) Ukungezelela kilokho, boke abantu bakaZimu, kunganandaba ukuthi banaliphi ithemba, kufuze bawatjhejisise amezwi kaJesu begodu bahlale batjhejile, bathembeke.

17. Kubayini kungakafuzi sitshwenyeke ngokuthi uJehova uzobakhetha nini abazesiweko ngomoyakhe ocwengileko?

¹⁷ Sele simazi ngcono uJehova begodu siyayithemba indlela ahlulela ngayo. Akusitshwenyi ukuthi angakhetha abazesiweko abathembekileko emalangeni esiphila kiwo. c Khumbula uJesu akutjhoko malungana neensebenzi zesikhathi sokugcina emfanekiswenakhe wesimu. (Mat. 20:​1-16) Labo abaqatjhwa bona bazokusebenza esimini ngesikhathi samadina nangemva kwaso, bafumana umrholo ofanako nalabo abathome ukusebenza ilanga nalithomako. Ngokufanako, kunganandaba ukuthi abazesiweko bakhethwe nini, bazokufumana umvuzo wezulwini nabahlulelwa ngokuthi bathembekile.

LALELA IINYELELISO

18-19. Ngiziphi iimfundo neenyeleliso esicoce ngazo?

¹⁸ Sicoce ngani? Kilaba abanethemba lokuphila ngokungapheliko ephasini, umfanekiso wezimvu neembuzi ukhanyise itlhogeko yokuhlala bathembekile kuJehova nje nangesikhathi sesizi elikhulu elizako. Esikhathini esizako, uJesu uzokwahlulela abathembekileko ngokuthi bafanelwe kutjhinga “ekuphileni okungapheliko.”—Mat. 25:46.

¹⁹ Sicoce nangemifanekiso enikela iinyeleliso kabazesiweko. Emfanekisweni kaJesu weentombi ezihlakaniphileko nezizindlhadlha,  ezihlanu zitjengise ukuhlakanipha. Bezizilungiselele begodu zitjhejile, zilinde umkhwenyana bekwaba kulapho afika khona. Kodwana ezizindlhadlha bezingakazilungiseleli. Yeke umkhwenyana akhenge avume bona zingene emnyanyeni. Nathi kufuze sihlale sikulungele, silinde bekube kulapho uJesu athi khona, iphaseli seliphelile. Emfanekisweni kaJesu wamatalende sibuye safunda ngeensebenzi ezimbili ezithembekileko, ezikhutheleko nezisebenza budisi. Zasebenzela ikosazo budisi begodu yazamukela. Nanyana kunjalo, isisebenzi esivilaphako akhenge samukelwe. Sifundani kilokho? Kufuze sihlale simajadu emsebenzini kaJehova bekube sekupheleni. Emaswapheleni, sicoce ngokuthi abazesiweko kufuze bahlale batjhejile bona nabo ‘bathathwe’ nguJesu batjhingiswe emvuzweni wezulwini. Baqale ngabomvu ‘ekubuthelelweni ndawonye’ batjhingiswe kuJesu ezulwini. Ngemva kwepi ye-Arimagedoni, bazokuba ngumakoti kaJesu emtjhadweni wemvana.—2 Thes. 2:1; IsAm. 19:9.

20. UJehova uzobenzelani abalalela iinyeleliso zakhe?

²⁰ Isikhathi sakaJesu sokwahlulela sitjhidele kodwana akukafuzi sithukwe. Nasihlala sithembekile, uBabethu wezulwini onethando uzosinikela “amandla angaphezu kajayelekileko.” Bona ‘siphumelele . . . ekujameni phambi kweNdodana yomuntu.’ (2 Kor. 4:7; Luk. 21:36) Kunganandaba bona sinethemba lokuphila ezulwini namkha ephasini, sizokuthabisa uBabethu wezulwini nasilalela isiyeleliso esifumaneka emfanekisweni kaJesu. Ngebanga lomusa kaJehova ongakasifaneli, amagamethu azokufumaneka “encwadini yokuphila.”—Dan. 12:1; IsAm. 3:5.