1-2. Khuyini ethabisa abantu bakaZimu? (Jakopo 1:​22-25)

 UJEHOVA neNdodanakhe bafuna sithabe. Umtloli weRhubo 119:2 uthi: “Bayathaba abaphetha iinkhumbuzo zakhe, abamfuna ngehliziywabo yoke.” UJesu wathi: “Abathabako ngilabo abezwa ilizwi lakaZimu balenze.”—Luk. 11:28.

² Njengombana silotjha uJehova, sibabantu abathabileko. Kubayini? Sinamabanga amanengi kodwana eliqakatheke khulu kukuthi sifunda iliZwi lakaZimu qobe begodu senza okusemandlenethu ukusebenzisa esikufundako.—Funda uJakopo 1:​22-25.

3. Sizuza njani nasenza okuseliZwini lakaZimu?

³ Zinengi iindlela esizuza ngazo ngokuba “babenzi belizwi.” Ngokwesibonelo, nasenza esikufunda eliZwini lakaZimu sithabisa uJehova. Lokho kusenza sithabe. (UMtj. 12:13) Njengombana sisebenzisa esikufunda eliZwini lakaZimu sithuthukisa ukuphila kwemindenethu besibe nobungani obuhle nabantu esilotjha uJehova nabo. Kungenzeka ngilokho okwenzeka ekuphileni kwakho. Ukungezelela kilokho sibalekela imiraro eminengi eyenzeka kilabo abangalaleli imiyalo kaJehova. Njengombana iKosi uDavida yatjho. Engomenayo, ngemva kokukhuluma ngemithetho, imiyalo nezahlulelo zakaJehova, yaphetha ngokuthi: “Kunomvuzo omkhulu ngokuzilalela.”—Rhu. 19:​7-11.

4. Kubayini kungasilula ngaso soke isikhathi ukuba mumenzi weliZwi lakaZimu?

⁴ Akusilula ngaso soke isikhathi ukufunda iliZwi lakaZimu besisebenzise esikufundako. Nanyana simajadu, kufuze senze isikhathi sokufunda iBhayibheli nokuzwisisa lokho uJehova akulindele kithi. Nje, akhesihlole ezinye iimphakamiso ezingasisiza sifunde iBhayibheli qobe. Sizokuhlola  ukuthi khuyini engasisiza sicabange ngalokho esikufundako nendlela esingakusebenzisa ngakho ekuphileni kwethu.

YENZA ISIKHATHI SOKUFUNDA ILIZWI LAKAZIMU

5. Ngiziphi izinto esimajadu ngazo?

⁵ Abantu bakaJehova abanengi bamajadu. Senza izinto ezinengi iBhayibheli ethi ziqakathekile. Ngokwesibonelo, inengi lethu liyasebenza bona lizitlhogomele, litlhogomele nemindenalo. (1 Thim. 5:8) AmaKrestu amanengi atlhogomela iinhlobo zawo ezigulako nezilupheleko. Soke kufuze sitlhogomele ipilwethu begodu lokho kufuna isikhathi. Ukungezelela kilokho, kunezabelo ebandleni. Omunye umsebenzi oqakathekileko ekufuze siwenze, kutjhumayela iindaba ezimnandi. Nasicabanga ngakho koke ekufuze sikwenze singasifumanaphi isikhathi sokufunda iBhayibheli qobe, sicabangisise ngalokho esikufundako besikusebenzise ekuphileni kwethu?

6. Ungaqinisekisa njani ukuthi ufunda iBhayibheli qobe? (Qala nesithombe.)

⁶ Ukufunda iBhayibheli ‘yinto eqakatheke khulu’ kithi amaKrestu begodu kufuze siqiniseke ukuthi siyalifunda. (Flp. 1:10) Nakakhuluma ngomuntu othabako, umrhubi uthi: ‘Uthatjiswa mthetho kaJehova, ufunda umthethwakhe ngelizwi eliphasi imini nobusuku.” (Rhu. 1:​1, 2) Kuyakhanya ukuthi kufuze senze isikhathi sokufunda iliZwi lakaZimu. Ngisiphi isikhathi esihle sokufunda iBhayibheli? Kuyahluka, kuye ngomuntu. Okuqakathekileko kukuthi sikhethe isikhathi esizosisiza sikghone ukufunda iBhayibheli qobe. Umfowethu u-Victor uthi: “Ngithanda ukufunda iBhayibheli ekuseni. Ngitjho nanyana ngingasimumuntu othanda ukuvuka ekuseni khulu, azisizinengi izinto ezingangiphazamisa. Ngihlala ngiphaphame begodu kubalula ukufunda.” Inga-kghani nawe uzizwa ngendlela efanako? Zibuze, ‘Ngisiphi isikhathi esihle sokufunda iBhayibheli?’

 CABANGA NGOKUFUNDAKO

7-8. Khuyini engasenza singazuzi ngokupheleleko kilokho esikufundako? Fanekisa.

⁷ Kungenzeka qobe langa sifunde okunengi khulu kodwana singazuzi kikho. Khekwenzeka na ukuthi ufunde okuthileko, ngemva kwesikhatjhana ungasakukhumbuli? Soke khekwasenzakalela lokho. Kungenzeka lokhu nasifunda iBhayibheli. Ngokwesibonelo, kungenzeka sizibekele umnqopho wokufunda izahluko ezithileko zeBhayibheli qobe langa. Yinto ehle leyo. Kufuze sizibekele iminqopho besilwele ukunamathele kiyo. (1 Kor. 9:26) Ukufunda iBhayibheli kusithomo, kulindeleke okungaphezu kwalokho nasizakuzuza ekufundeni iliZwi lakaZimu.

⁸ Cabanga ngomfanekiso lo, izulu liqakathekile bona siphile. Kodwana nalina khulu ngesikhatjhana esincani kuba namanzi amanengi. Lokho nakwenzekako, izulu elinengi alisizi ngalitho. Ihlabathi itlhoga isikhathi esaneleko sokudosa amanzi ewatlhogako, iwasebenzise eentjalweni. Ngendlela efanako kufuze sikubalekele ukurhaba nasifunda iBhayibheli kangangokuthi sibhalelwe kuzwisisa nokukhumbula esikufundileko.—Jak. 1:24.

9. Khuyini ekufuze siyenze nangabe sele sinomukghwa wokurhaba nasifunda iBhayibheli?

⁹ Inga-kghani ngezinye iinkhathi uyarhaba nawufunda iBhayibheli? Khuyini ekufuze uyenze? Zigedle. Linga ukucabanga ngalokho okufundako nangalokho oqeda ukukufunda. Lokho akukafuzi kube yinto ebudisi. Ungangezelela isikhathi sokucabangisisa ngalokho okufundako. Ngakelinye ihlangothi, ungakhetha ukufunda amavesi ambalwa usebenzise isikhathi esiseleko ukucabangisisa ngalokho okufundileko. U-Victor esikhulume ngaye ekuthomeni uthi, “Angifundi iBhayibheli isikhathi eside, kungaba sisahluko sinye kwaphela. Ngebanga lokuthi ngilifunda ekuseni khulu, ngikghona ukucabanga ngalokho engikufundileko ilanga loke.” Nanyana ngiyiphi  indlela yokufunda oyikhethako kuqakathekile ukuthi ufunde ngebelo elizokukghona ukukusiza uzwisise okufundako.—Rhu. 119:97; funda nebhoksi elithi “ Imibuzo Engakusiza.”

10. Fanekisa ukuthi ungakusebenzisa njani okufundako. (1 Thesalonika 5:​17, 18)

¹⁰ Kunganandaba ukuthi ulifunda kangangani iBhayibheli nokuthi ulifunda isikhathi esingangani, qinisekisa ukuthi uyakusebenzisa okufundako. Njengombana ufunda ingcenye ethileko yeliZwi lakaZimu, zibuze, ‘Ngingakusebenzisa njani engikufundako nje namkha esikhathini esizako?’ Akhesithi ufunda yoku-1 kwebeThesalonika 5:​17, 18. (Ifunde.) Ngemva kokufunda amavesi amabili la, ungajama kancani ucabange ukuthi wena umthandazwakho udephe kangangani. Ungacabanga nangezinto othokoza ngazo. Mhlamunye ungaqunta ukuthokoza uJehova ngezinto ezintathu ezinqophileko. Ngitjho nanyana usebenzisa isikhathi esincani ukucabanga ngokufunde eBhayibhelini, kuzokusiza uzwisise iliZwi lakaZimu bewenze elikutjhoko. Cabanga ukuthi uzokuzuza kangangani nawubuyelela indlela le qobe langa, njengombana ufunda ezinye iingcenye zeBhayibheli. Uzokuthuthuka njengomenzi weliZwi lakaZimu. Kuthiwani nangabe kunengana ekufuze usebenzele kikho?

ZIBEKELE IMINQOPHO ONGAYIFIKELELA

11. Kubayini ungazizwa agandelelekile ngezinye iinkhathi? Nikela isibonelo.

¹¹ Nawufunda iBhayibheli ungazizwa ugandelelekile kesinye isikhathi nawubona ukuthi zinengi khulu izinto ekufuze uthuthukise kizo. Nasi isibonelo: Namhlanjesi njengombana ufunda iBhayibheli, kunesiyalo esikhuluma ngokukhethulula. (Jak. 2:​1-8) Kungenzeka ubone ukuthi kufuze uthuthukise indlela ophatha ngayo abanye begodu uqunta ukwenza amatjhuguluko lawo. Kuhle lokho. Kuthi ngelanga elilandelako, ufunde ngengcenye ekhuluma ngokuqakatheka kokuthi sitjheje esikutjhoko. (Jak. 3:​1-12) Uyatjheja ukuthi ngezinye iinkhathi ukhuluma ngendlela enganamusa nezinto ezingasizihle. Yeke uqunta ukuthi ukhulume izinto ezikhuthazako. Ngelanga elilandelako lokufunda kwakho iBhayibheli, ufunda ngesiyeleliso sokungabi mngani nephasi. (Jak. 4:​4-12) Lokho kukwenza ubone ukuthi kufuze ukhethe zokuzithabisa kuhle. Ngelanga lesine ungazizwa ugandelelekile nawucabanga ngakho koke ekufuze usebenzele kikho.

12. Kubayini kungakafuzi uphele amandla nange ukufunda kwakho iBhayibheli kuveza ukuthi kunamatjhuguluko ekufuze uwenze? (Qala nomtlolo waphasi.)

 ¹² Nange kunamatjhuguluko amanengana ekufuze uwenze namkha kunalapha ekufuze uthuthukise khona, ungapheli amandla. Nawubonako ukuthi kufuze uthuthukise kutjho ukuthi uthobekile bewufunda iBhayibheli ngeenhloso ezihle. Nasithobekileko sizokufunda imiTlolo, sifunde neendlela zokuthuthuka. a Khumbula ukuthi ‘ukumbatha ubuntu obutjha’ yinto eragela phambili. (Kol. 3:10) Khuyini ezokusiza uragele phambili ube mumenzi weliZwi lakaZimu?

13. Ngiyiphi indlela ehle yokusebenzisa okufundako? (Qala nesithombe.)

¹³ Kunokobana ulinge ukusebenzisa koke okufundileko ngesikhathi sinye, linga ukuthuthukisa into yinye namkha ezimbili. (IzA. 11:2) Linga okulandelako: Yiba nerhelo lezinto ofuna ukusebenzela kizo, ngemva kwalokho, ukhethe yinye namkha ezimbili ofuna ukuthoma ukusebenzela kizo, ulisele ezinye esikhathini esizako. Uzokuthomaphi?

14. Ngiziphi izinto ekufuze uthome ukusebenzela kizo?

¹⁴ Ungaqunta ukuthoma ngalokho okulula ukukwenza. Namkha ungathoma ngalapha obona ukuthi kufuze uthuthukise khudlwana khona. Nasele uquntile ukuthi ufuna ukusebenzela kuphi, yenza irhubhululo eencwadini zethu mhlamunye usebenzise i-Watch Tower Publications Index namkha IThulusi Lokurhubhulula laboFakazi BakaJehova. Thandaza kuJehova ukuthi akunikele “kokubili isifiso namandla wokusebenza.”  (Flp. 2:13) Ngemva kwalokho, kusebenzise okufundileko. Njengombana uzabe uthuthukile kilokho olinga ukukwenza, kungenzeka uzizwe ukhuthazeka ukwenza okhunye. Nawubonako ukuthi ukghonile ukwenza amatjhuguluko namkha ukuthuthukisa ubuntu bakho bobuKrestu, uzozizwa ukhuthazeka ukwenza amanye amatjhuguluko begodu ngokukhamba kwesikhathi kuzokuba bulula.

VUMELA ILIZWI LAKAZIMU ‘LISEBENZE KUWE’

15. Kubayini abantu bakaJehova bahlukile ebantwini abanengi abafunda iBhayibheli? (1 Thesalonika 2:13)

¹⁵ Abanye abantu bathi bafunde iBhayibheli iinkhathi ezinengi. Kodwana bayalikholwa na iBhayibheli? Kghani balingile ukuphila ngendlela iBhayibheli elitjho ngayo bebatjhuguluka? Awa, abantu abanengi abasilandeli isinqophiso seBhayibheli. Abantu bakaJehova bazizwa ngendlela ehlukileko ngeBhayibheli. NjengamaKrestu wekhulu lokuthoma, samukela iBhayibheli “njengeliZwi lakaZimu.” Njengombana eqinisweni lingilo. Ngaphezu kwakho koke, silinga koke esingakwenza ukusebenzisa iseluleko seBhayibheli.—Funda yoku-1 kwebeThesalonika 2:13.

16. Khuyini ezosisiza sibe babenzi beliZwi?

¹⁶ Akusilula ngaso soke isikhathi ukufunda nokusebenzisa lokho esikufunda eliZwini lakaZimu. Kungaba budisi ukufumana isikhathi sokufunda namkha singarhaba khulu nasifundako singakghoni ukuzwisisa. Namkha singazizwa sigandelelekile ngebanga lamatjhuguluko ekufuze siwenze. Nanyana isitjhijilo sakho singaba yini, ungakghona ukusihlula. Ngesizo lakaJehova ungakghona. Kwanga singazimisela ukwamukela isizo lakhe, singezwa kwaphela kodwana sibe babenzi beliZwi. Siyaqiniseka ukuthi nasisolo sifunda iliZwi lakaZimu sisebenzisa lokho esikufunda kilo sizokuthaba khulu.—Jak. 1:25.