Ngubani Ibizo LakaZimu? UZimu uthi: “NginguJehova. Libizo lami-ke lelo!” (Isaya 42:8, NW) Ibizo lakaZimu livela iinkhathi ezipheze zibe zii-7 000 eBhayibhelini. Nanyana kunjalo, abatjhugululi abanengi beBhayibheli bakhupha ibizo lakaZimu kungakafaneli bafaka isiqu esithi, “Kosi.” UZimu ufuna sibe bangani bakhe, yeke ufuna ‘simbize ngebizo lakhe.’—IRhubo 105:1.

Iziqu ZakaJehova. IBhayibheli libiza uJehova ngeziqu ezithi, “Zimu,” “Mninimandlawoke,” “Mdali,” “Baba,” “Kosi” nokuthi “Mbusi.” Imithandazo eminengi etlolwe eBhayibhelini ibiza uJehova ngesiqu nangegama lakhe elithi, Jehova.—Danyela 9:4.

 Unjani UZimu? UZimu umumoya. (Jwanisi 4:24) IBhayibheli lithi, “akunamuntu okhewabona uZimu nakanye.” (Jwanisi 1:18) IBhayibheli lisitjela indlela azizwa ngayo. Abantu bangamzwisa ubuhlungu nofana ‘bamthokozise.’—IzAga 11:20; IRhubo 78:40, 41.

Iimfanelo Ezihle ZakaZimu. UZimu akakhethi wamukela yoke imihlobo yabantu. (IzEnzo 10:34, 35) Begodu ‘unomusa nesirhawu, ubuthaka ekusilingekeni, uzele ukwethembeka neqiniso!’ (Eksodusi 34:6, 7) Nanyana kunjalo, kunezinto ezine ezingasenza simthande uZimu.

Amandla. Njengombana “aMninimandlawoke” unamandla angapheliko wokufezekisa nanyana yini ayithembisako.—Genesisi 17:1, NW.

Ukuhlakanipha. Akunamuntu ohlakaniphe njengoZimu. Kungebangelo iBhayibheli lithi, ‘nguye yedwa ohlakaniphileko.’—Roma 16:27.

Ubulungiswa. UZimu uhlala enza okulungileko. Umsebenzakhe “uphelele” begodu “iindlela zakhe zilungile.”—Duteronomi 32:4.

Ithando. IBhayibheli lithi, “uZimu ulithando.” (1 Jwanisi 4:8) UZimu akanathando kwaphela kodwana ungilo. Ithando lakhe elinganakumadaniswa libonakala kikho koke akwenzako begodu lisizuzisa ngeendlela ezinengi.

UZimu Ufuna Sibe Bangani Bakhe. UBabethu wezulwini uyasithanda. (Matewu 6:9) Nasikholelwa kuye, singaba bangani bakhe. (IRhubo 25:14) Kuhlekuhle, uZimu usimema bona sitjhidele kuye ngomthandazo begodu ‘siphosele koke okusitshwenyako kuye, ngombana unendaba nathi.’—1 Pitrosi 5:7; Jakopo 4:8.

UJesu AkasinguZimu. UJesu uhlukile ngombana uZimu wambumba ngokunqophileko. Kungebangelo iBhayibheli limbiza ngokuthi yiNdodana kaZimu. (Jwanisi 1:14) Ngemva kokobana uJehova abumbe uJesu, wamsebenzisa bona abe ‘ngusosini’ ukuthi abumbe abantu nakho koke.—IzAga 8:30, 31; Kolose 1:15, 16.

 UJesu Krestu akhenge athi unguZimu. Kunalokho, wathi: “Mina ngimjamelakhe [uZimu], begodu ungithumile.” (Jwanisi 7:29) Nakakhuluma nomunye wabafundi bakhe, uJesu wabiza uJehova ngokuthi, ‘nguBaba, noYihlo, uZimami, noZimenu.’ (Jwanisi 20:17) Ngemva kokufa kwakaJesu, uJehova wamvusela ezulwini wamnikela ilawulo esandleni sakhe sokudla.—Matewu 28:18; IzEnzo 2:32, 33.

UJesu Krestu Angakusiza Bona Utjhidele KuZimu

UJesu weza ephasini ukuzosifundisa ngoBabakhe. UJehova wathi ngoJesu: “Le yiNdodanami, engiyithandako. Yilaleleni.” (Markosi 9:7) Akunamuntu owazi uZimu njengoJesu. Wathi: “Akekho nowazi uBaba ngaphandle kweNdodana, nalabo iNdodana efuna ukubambulela yena.”—Lukasi 10:22.

UJesu wamlingisa ngokupheleleko uZimu. UJesu walingisa ubuntu bakaYise ngokupheleleko kungebangelo wathi: “Nanyana ngubani ongibonileko ubone noBaba.” (Jwanisi 14:9) UJesu udosela abantu kuZimu ngokulingisa uBabakhe ngethando, ngamezwi nangezenzo. Wathi: “Ngiyindlela neqiniso nokuphila. Akakho oza kuBaba ngaphandle kokuthi eze ngami.” (Jwanisi 14:6) Godu wathi: “Abalotjha ngeqiniso bazokulotjha uBaba ngommoya nangeqiniso, ngombana kwamambala, uBaba ufuna ukulotjhwa babantu abanjalo.” (Jwanisi 4:23) Cabanga! UJehova ufuna abantu abanjengawe abafuna ukukwazi iqiniso ngaye.