Kghani UZimu Uyayizwa Imithandazwethu?
Kghani wakhe wazibuza ukuthi uZimu uyakuzwa na nawuthandazako? Nangabe kunjalo, awusiwedwa. Abantu abanengi bathandazela isizo kuZimu, kodwana imirarwabo solo ayipheli. Kghani uZimu uyibethisa ngomoya imithandazwethu? Awa! IBhayibheli lisiqinisekisa ngokuthi uZimu uyayilalela imithandazwethu, nasithandaza ngendlela efaneleko. Akhesizwe ukuthi lithini iBhayibheli.
UZIMU UYASIZWA.
“Iye, kuwe ozwa imithandazo. Abantu boke beza kuwe.”—IRhubo 65:3.
Abanye abantu bathandaza ngombana bathi, kubenza bazizwe ngcono ngitjho nanyana bangakholelwa ukuthi kukhona umuntu obalaleleko. Kodwana umthandazo ungaphezu kokwenza umuntu azizwe ngcono lokha nakaqalene nemiraro. IBhayibheli lisiqinisekisa ngokuthi, ‘USomnini * [uJehova] useduze nabo boke abambizako, iye, boke abambiza ngeqiniso. . . . Alalele isililo sabo abasindise.’—IRhubo 145:18, 19.
Ngalokho-ke singaqiniseka ukuthi uZimu uJehova uyayizwa imithandazo yabamlotjhako. Uthi: “Yeke nizangibiza, nize nizokuthandaza kimi, nje-ke ngizanilalela.”—Joromiya 29:12.
UZIMU UFUNA UTHANDAZE KUYE.
‘Phikelelani emthandazweni.’—Roma 12:12.
IBhayibheli, lisikhuthaza bona ‘sithandaze qobe’ begodu ‘siragele phambili sithandaza ngazo zoke iinkhathi.’ Kuyakhanya bona uJehova uZimu ufuna sithandaze kuye.—Matewu 26:41; Efesu 6:18.
Kubayini uZimu afuna sithandaze kuye? Cabanga ngesibonelwesi: Ngimuphi umbelethi ongeze wathaba lokha umntwana nakabawa isizo athi, “Baba ngibawa ungisize”? Kuliqiniso ukuthi ubaba uyazazi iintlhogo zomntwanakhe nendlela azizwa ngayo, kodwana nakezwa umntwana abawa isizo, kutjengisa bona umntwana uyamthemba ubabakhe begodu utjhidelene naye. Ngokufanako, nasithandazako kuJehova uZimu, sitjengisa ukuthi siyamthemba begodu sifuna ukutjhidela kuye.—IzAga 15:8; Jakopo 4:8.
UZIMU UNENDABA NAWE.
“Kukulapho niphosela koke okunitshwenyako kuye, ngombana unendaba nani.”—1 Pitrosi 5:7.
UZimu ufuna sithandaze kuye ngombana uyasithanda begodu unendaba nathi. Uyayazi imirarwethu nezinto ezisigandelelako begodu ufuna ukusisiza.
Kikho koke ukuphila kwayo iKosi uDavida beyithandaza kuJehova uZimu bona amsize begodu bekatjela uZimu ngazo zoke izinto azicabangako nangendlela azizwa ngayo. (IRhubo 23:1-6) UZimu bekazizwa njani ngoDavida? UZimu bekamthanda uDavida begodu walalela imithandazwakhe eminengi. (IzEnzo 13:22) Ngokufanako nangathi, uZimu ulalela imithandazwethu ngombana unendaba nathi.
“NGIYAMTHANDA USOMNINI NGOMBANA UZWA IPHIMBO LAMI”
La mamezwi womunye umtloli wamaRhubo eBhayibhelini. Bekaqiniseka ukuthi uZimu uyayizwa imithandazwakhe begodu lokho kwamsiza khulu. Wazizwa atjhidelene khulu noZimu begodu wafumana amandla wokuqalana nobuhlungu nemiraro yokuphila.—IRhubo 116:1-9.
Nasiqiniseka bona uZimu uyayizwa imithandazwethu, sizokuragela phambili sikhuluma naye ngomthandazo. Cabanga ngesibonelo sakaPedro, ohlala etlhagwini ye-Spain. Wahlongakalelwa yindodanakhe eneminyaka eli-19 engozini yekoloyi. Nakaqalene nesizeli, uPedro watjela uZimu koke, wathandaza kanengi abawa induduzo nesekelo lakaZimu. Kwenzekani? UPedro uthi, “uJehova waphendula imithandazwami, lokha mina nomamakwami nasifumana isekelo nenduduzo emaKrestwini esikunye nawo.”
UZimu uphendula imithandazwethu ngenduduzo nesekelo esilifumana ebanganini bethu abasithandako
Ngitjho nanyana imithandazo ingakhenge ibuyise indodanakhe kodwana yawusiza khulu umndeni kaPedro. Umamakwakhe, uMaría Carmen, uyakhumbula uthi: “Imithandazo yangisiza khulu bona ngikghodlhelele ubuhlungu. Bengazi ukuthi uJehova uZimu uyangizwisisa nangithandaza kuye, umoyami wehla begodu ngabanokuthula.”
IBhayibheli nezinto abantu abanengi abaqalene nazo ekuphileni ziyatjengisa ukuthi uZimu uyayizwa imithandazo. Nanyana kunjalo, kuyakhanya bona uZimu akayiphenduli yoke imithandazo. Kubayini uZimu aphendula eminye imithandazo kodwana eminye angayiphenduli?
^ isig. 5 UZimu ibizo lakhe nguSomnini [uJehova].—IRhubo 83:19.
