Kubayini Kunehloyo Engaka?
Kubayini kunokuhloyana okungaka ephasini? Nasizokwazi ibanga lalokho kutlhogeka sizwisise ukuthi iyini ihloyo, kubayini abantu bahloyana nokuthi kubayini izele koke.
Iyini Ihloyo?
Ihloyo, kungathandi umuntu namkha into ngokusuka ehliziyweni. Ingaphezu kokukwatela umuntu isikhatjhana.
KUBAYINI ABANTU BATHOMA UKUHLOYANA
Manengi amabanga enza abantu bathome ukuhloya abanye. Umuntu angahloya omunye ingasi ngebanga lalokho akwenzako kodwana ngebanga lalokho angikho. Labo abahloywako bangaqalwa njengabangathandeki, bayingozi namkha angekhe batjhuguluka babe babantu abangcono. Bangaqalwa njengabantu abaphasi namkha ababanga imiraro. Labo abahloya abanye kungenzeka bebatlhoriswa, baphathwa kumbi namkha kwenzeka okuthileko okubangela ukuthi nabo babe nehloyo.
INDLELA ERHATJHEKA NGAYO
Umuntu angahloya omunye ngitjho nanyana angamazi. Ngokwesibonelo, angaba nombono othileko ngabanye ngebanga lalokho okutjhiwo ngilabo atjhidelene nabo. Yeke, nakunjalo kulula ukuthi ihloyo irhatjheke abanengi nabanombono ofanako ngendaba.
Nasizwisisa ukuthi ihloyo irhatjheka lula kangangani, sikghona ukubona ukuthi kubayini abantu abanengi banehloyo kangaka. Nanyana kunjalo, kunelinye ibanga lokuthi kubayini kunehloyo engaka bona silazi kufuze sifunde ukuthi ihloyo yathoma njani. Lokho singakufumana eBhayibhelini.
IBHAYIBHELI LISIVEZELA UKUTHI IHLOYO YATHOMA NJANI
IHLOYO AKHENGE ITHOME NGABANTU. Yathoma ezulwini lokha ingilozi ebizwa ngokuthi nguSathana uDeveli, ihlubuka kuZimu. UDeveli “bekambulali kusukela ekuthomeni” ngokuhlubuka kwakhe. Njengombana ‘amleyimala begodu anguyise wamala,’ usaragela phambili abangela ihloyo nenturhu. (Jwanisi 8:44; 1 Jwanisi 3:11, 12) IBhayibheli limhlathulula njengomuntu onehloyo, onelaka nonenturhu.—Jobho 2:7; IsAmbulo 12:9, 12, 17.
KULULA NGABANTU ABANESONO UKUHLOYA. Umuntu wokuthoma, u-Adamu walandela uSathana ngokona. Umphumela waba kukuthi boke abantu baba nesono nokungapheleli. (Roma 5:12) Indodana ka-Adamu yokuthoma uKayini yabulala umfowabo u-Abela ngebanga lehloyo. (1 Jwanisi 3:12) Iye khona, abantu abanengi banalo ithando nezwelo kodwana ngebanga lesono abanengi bamarhamaru, banomona, bayazikhakhazisa begodu lokho kubenza babe nehloyo.—2 Thimothi 3:1-5.
IHLOYO IYABHEBHEDLHA NASINGATHANDI ABANYE. Iphasi esiphila kilo likhuthaza abantu ukuthi babe nehloyo ngokuthi lingabi nomusa, libe nemibono elimazako begodu liziphathe kumbi. Ukwanda kokungabekezelelani, kokubandlulula, kwekulumo engakhiko, ukumotjhwa kwepahla nokuphathwa kumbi kwenzeka ngebanga lokuthi “iphasi loke lisemandleni kaSathana,” uDeveli.—1 Jwanisi 5:19.
Nanyana kunjalo iBhayibheli alivezi umsuka wehloyo kwaphela. Libuye likhulume ngesisombululo.
