4 | IBhayibheli Lisinikela Iseluleko Esisebenzako
IBHAYIBHELI ITHI: “Zoke izinto ezitlolwe emiTlolweni. . . ziyasiza.” —2 THIMOTHI 3:16.
Lokho Kutjho Ukuthini?
Nanyana iBhayibheli lingasiyo incwadi yezepilo, linikela iseluleko esisebenzako nesizuzisako. Iselulekwesi singasiza umuntu olwisana nemiraro yokugandeleleka. Cabanga ngeembonelwezi.
Kungakusiza Njani Lokhu?
“Abantu abaphilileko abamtlhogi udorhodere kodwana ngabagulako abamtlhogako.”—MATEWU 9:12.
IBhayibheli liyavuma ukuthi kungatlhogeka bona siyokufuna isizo labodorhodere. Abantu abanengi abanokugula kokugandeleleka komkhumbulo basizwe kufumana ilwazi ngokugula okubaphetheko nangokuya kibodorhodere.
‘Ukubandula umzimba kuyazuzisa.’—1 THIMOTHI 4:8.
Ukubekela eqadi isikhathi namandla wokwenza izinto ezithuthukisa ipilo kungasiza ukuthi ube nobujamo obuhle bomkhumbulo. Izintwezo zihlanganisa ukuba nehlelo lokubandula umzimba, ukudla okunepilo nokulala ngokwaneleko.
“Ihliziyo ethabileko injengesihlahla esipholisako, kodwana ummoya odanileko wenza umzimba uphelelwe mamandla.”—IZAGA 17:22.
Ukufunda amavesi weBhayibheli akhuthazako nokuzibekela imigomo ozokukghona ukuyifikelela kungakusiza uhlale uthabile. Nangabe uhlale ucabanga ngezinto ezihle epilweni nokuthi izinto zizokulunga esikhathini esizako, ungakghona ukuqalana nemiraro yokugandeleleka komkhumbulo.
“Ukuhlakanipha ngekwabathobekileko.”—IZAGA 11:2.
Uzokufumana ukuthi angekhe wakghona ukuzenzela yoke into, nje-ke vumela abanye bakusize. Abangani nomndeni kungenzeka bafune ukukusiza kodwana bangazi ukuthi bakusize njani. Batjele ukuthi khuyini oyitlhoga khulu. Ungalindeli bona bakwenzele yoke into, hlala ubathokoza ngesizo labo.
Indlela Iseluleko SeBhayibheli Esibasiza Ngayo Abagandelelekileko
“Bengingazizwa kuhle, nje-ke ngaya kudorhodere. Wangitjela ukuthi ngiphethwe yini. Lokho kwangisiza bona ngamukele ubujamo bami begodu ngafunda nangeendlela ezifumanekako zokulatjhwa bona ngitlhogomele ipilwami ngendlela engcono.”—U-Nicole, a olwisana ne-bipolar.
“Ngifumene ukuthi ukufunda iBhayibheli qobe nomkami kungisiza ngithome ilanga ngemicabango eyakhako. Kwamanye amalanga nangibhalelwa kuqalana nokugandeleleka, kuba nevesi elithileko elingiduduzako.”—U-Peter, olwisana nomraro wokugandeleleka komkhumbulo.
“Bekubudisi ukutjela abanye ngokugula enginakho ngebanga leenhloni. Kodwana umnganami wangilalelisisa kuhle begodu walinga nokuzwisisa indlela ebengizizwa ngayo. Wangisiza khulu ukuthi ngizizwe ngcono nokobana ngazi bona angisingedwa.”—U-Ji-yoo, olwisana nomraro wokungadli kuhle.
“IBhayibheli lingisize bona ngilinganisele naziza emsebenzini nekuphumuleni. Ukuhlakanipha kwalo kungisize ngaqalana nokugandeleleka ngokuphumelelako.”—U-Timothy, olwisana ne-obsessive-compulsive disorder (OCD).
a Amanye amabizo atjhugululiwe.
