Ekhabolakhona, soke siphila esikhathini esizele ngemiraro nesibangela amatlhuwo, uJesu wathi isikhathesi ‘lisizi elikhulu.’ (Matewu 24: 21) Angeze sasibalekela isikhathi samatlhuwesi. Kodwana kukhona esingakwenza bona siphephe. Khuyini esingayenza?

Etjumayelwenakhe yeNtabeni, uJesu Krestu wayelelisa ngokuthi: “Yeke ragelani phambili nifuna umBuso kaZimu qangi nokulunga kwakhe, koke okhunye nizakuphiwa khona.” (Matewu 6:33) Singakwenza njani lokho?

Ngokufuna umBuso kaZimu qangi. Lokho kutjho ukuthi kufuze sithande uZimu ukudlula nanyana yini. (Matewu 6:25, 32, 33) Kubayini? Ngombana abantu babhalelwe kurarulula imiraro yephasi. MBuso kaZimu kwaphela ongasusa yoke imiraro yephaseli.

Ngokufuna ukulunga kwakhe. Kufuze silinge ngamandla ukuphila ngemithetho kaZimu yokulunga nangeenkambisolawulo zakhe. Kubayini? Ngombana nasingazikhethela okulungileko nokungakalungi, sizokuqalana nemiphumela ebuhlungu khulu. (IzAga 16:25) Ngakelinye ihlangothi, nange siphila ngeenkambisolawulo zakaZimu, sizokuthaba begodu sizokuthabisa noZimu.—Isaya 48:17, 18.

Ngokuragela phambili sifuna umBuso kaZimu qangi nokulunga kwakhe. UJesu wayelelisa ngokuthi kungenzeka abanye bazikhohlise, bacabange ukuthi ukuba nemali enengi kungabavikela. Abanye bangavumela amatshwenyeko wokuphila abagandelele bangasakghoni  ukufuna umBuso kaZimu qangi.—Matewu 6:19-21, 25-32.

Nanyana kunjalo, uJesu wathembisa labo abasekela umBuso kaZimu ukuthi bazokufumana zoke izinto abazitlhogako nje begodu bazokufumana neembusiso ezinengi esikhathini esizako.—Matewu 6:33.

Ngitjho nanyana abafundi bakaJesu bafuna umBuso kaZimu qangi nokulunga kwakhe, bebanemiraro namatshwenyeko. Kodwana bebavikelekile. Njani?

Ukuphila ngeenkambisolawulo zakaZimu kwabavikela ezintweni ezimbi ebezenzeka ngesikhatheso. Ukukholwelwa kwabo ukuthi umBuso kaZimu uzokufika, kwabasiza ukuthi bakghodlhelele imiraro ebudisi ekuphileni kwabo. Begodu uZimu wabapha “amandla angaphezu kajayelekileko” bona bakghodlhelele imiraro abaqalene nayo.—2 Korinte 4:7-9.

AmaKrestu wekadeni alalela isiyalo sakaJesu sokuthi afune umBuso kaZimu qangi. Atjhumayela iindaba ezimnandi eengcenyeni zoke zephasi. (Kolose 1:23) Kghani bakhona abantu abakwenzako lokhu namhlanjesi?

Iye! AboFakazi bakaJehova bayalemuka ukuthi isikhathi esiseleko sincani. Yeke, benza koke abangakwenza ukuthi balalele umyalo kaJesu othi: “Iindaba ezimnandezi zomBuso zizokutjhunyayelwa kilo loke iphasi bona kube bufakazi kizo zoke iintjhaba, ngemva kwalokho isiphelo sizokufika.”—Matewu 24:14.

Kghani uzosilalela isiyeleliso sakaJesu sokufuna umBuso kaZimu qangi? Sikukhuthaza ukuthi ulingise abantu beMasedoniya edorobheni leBheriya. Nabezwa iindaba ezimnandi ezivela kumpostoli uPowula ezimalungana nomBuso kaZimu, bazamukela “ngetjisakalo ekulu.” Ngemva kwalokho, ‘bahlolisisa imiTlolo’ bona baqiniseke ngezinto abazizwileko begodu baba makholwa.—IzEnzo 17:11, 12.

Ungenza okufanako. Nawufuna umBuso kaZimu qangi nokulunga kwakhe, uzokufumana isiphephelo nje nesivikelo nokuthula esikhathini esizako.