“Kunini ngibiza, Somnini, ngifunana nesizo, kodwana soloko awuphenduli? Ngakurhuwelela ngathi, “Umguruguru!” kodwana kubayini ungasindisi?” (Rhabakhukhu 1:2, 3) La mamezwi atjhiwo nguRhabakhukhu, indoda elungileko ebeyamukelwa nguZimu. Kghani isibawo sakhe besiveza bona akanakho ukukholwa? Akusinjalo. UZimu waqinisekisa uRhabakhukhu bona ubeke isikhathi esifaneleko azokuqeda ngaso ubuhlungu.—Rhabakhukhu 2:2, 3.

Nange kunguwe namkha othileko omjayele khulu ezwa ubuhlungu, kulula ukuphetha ngokuthi uZimu uyariyada, bekufuze ngathana sekangenelele. IBhayibheli liyasiqinisekisa lithi: “UJehova akariyadi malungana nesithembiso sakhe, njengombana abanye bacabanga bona uyariyada, kodwana uyanibekezelela ngombana angafisi ukuthi namunye atjhabalale kodwana ufisa bona boke batjhuguluke.”—2 Pitrosi 3:9.

Ingasikade! UJesu waveza ukuthi isizukulwana esithileko sizokubona izinto ezizokuba litshwayo lemihla yokuphela ‘kwephasi.’ (Matewu 24:3-42) Ukuzaliseka kweemphorofidwezi esikhathini sethu kutjengisa bona uZimu nakanjani uzokungenelela eendabeni zabantu. *

Kodwana uZimu uzobuqeda njani boke ubuhlungu? UJesu nakasephasini, watjengisa amandla kaZimu ngokusiza abantu ebebezwa ubuhlungu. Akhucabange ngeembonelo nanzi.

Iinhlekelele Zemvelo: UJesu nabafundi bakhe nabakhamba ngesikepe eLwandle leGalile, isiwuruwuru esinamandla salinga ukucwilisa isikepe sabo. UJesu noYise batjengisa bona bangakghona ukulawula iinhlekelele zemvelo. (Kolose 1:15, 16) UJesu wathi: “Thula uthi du!” Umphumela wabayini? “Ummoya wathula, kwathula du!”—Markosi 4:35-39.

Ukugula: UJesu bekaziwa ngekghono lakhe lokulapha abantu abaphopheleko, abarholopheleko, kuhlanganise nalabo abanesithunthwani, abanobulepheru, nanyana ngiliphi ihlobo lokugula. “Walapha nabo boke abagulako.”—Matewu 4:23, 24; 8:16; 11:2-5.

Ukutlhayela Kokudla: UJesu wasebenzisa amandla awaphiwe nguYise bona andise ukudla. IBhayibheli lithi, kabili nakasemsebenzini wokutjhumayela, wondla iinkulungwana zabantu.—Matewu 14:14-21; 15:32-38.

Ukufa: UJehova unamandla wokuphelisa ukufa, lokho kuvezwe ngokukhanyako eBhayibhelini nalikhuluma ngezenzakalo ezintathu uJesu azenzako zokuvuswa kwabantu. Omunye wabo owavuswako besele anamalanga amane ahlongakele.—Markosi 5:35-42; Lukasi 7:11-16; Jwanisi 11:3-44.