Akhenge Sidalelwe Bona Sife
BOKE abantu bafuna ukuphila bathabile, bangafi. Akhucabange ukuphila uthabile begodu kunganamalwele. Besingaphila ngokungapheliko nabantu esibathandako, sikhambe iphaseli loke nje, sifunde amakghono amatjha, sifunde izinto ezinengi esizithandako.
Kubayini abantu bafuna ukuphila ngokungapheliko? ImiTlolo isitjela ukuthi uZimu usenze safuna ukuphila ngokungapheliko. (UMtjhumayeli 3:11) Ibuye ithi: “uZimu ulithando.” (1 Jwanisi 4:8) UZimu uyasithanda, yeke bekangeze asenza safuna ukuphila singafi khisibe angeze akghona ukufeza isifisweso.
Kusemtarini bona akakho umuntu ofuna ukufa. Kuhlekuhle iBhayibheli libiza ukufa ‘ngesitha.’ (1 Korinte 15:26) Kabanye kufika msinya bese kuthi kabanye kuthathe isikhathi. Kodwana woke umuntu uzokufa. Abantu abanengi bayathukwa nabacabanga ngokufa. Kodwana sizakhe sikuhlule na ukufa? Kungakghoneka lokho?
ISIQINISEKISO SOKUBA NETHEMBA
Bekungasi yihloso kaZimu ukuthi abantu bahlongakale. UGenesisi unikela ubufakazi bokuthi uZimu bekafuna abantu baphile ephasini ngokungapheliko. UJehova wadala iphasi walenza laba nezinto ezizokwenza abantu baphile kilo bathabile. Ngemva kwalokho wadala umuntu wokuthoma, u-Adamu, wambeka epharadesi, esimini ye-Edeni. Ngemva kwalokho, “UZimu wabona koke akwenzileko bona kuyakarisa.”—Genesisi 1:26, 31.
UZimu wadala u-Adamu anganasono. (Duteronomi 32:4) Nomka-Adamu naye bekaphelele emkhumbulweni nemzimbeni. UJehova wathi kibo: “Belethani nande, nizalise iphasi nilibuse; nibuse phezu kweenhlambi zelwandle, iinyoni zomkayi naphezu kwenyabanyaba yoke ekhamba phezu kwephasi.”—Genesisi 1:28.
Bekuzobathatha isikhathi u-Adamu no-Eva ukuzalisa iphasi. U-Eva bekazokuba nabantwana, bese kuthi abantwanabo nabo babe nabantwana, bekube kulapho iphasi lizala khona, lokho bekuyintando kaZimu. (Isaya 45:18) Bekuzabe kulungile na ngathana uZimu unikele u-Adamu umsebenzi lo, bese abenze bangaphili isikhathi eside ngokwaneleko ukuthi babone iinzukulwana zabo begodu bangawazi umphumela?
Akhucabange godu ngomyalo wokuthotjelwa ziinlwana. U-Adamu watjelwa bona athiye iinlwana amabizo, lokho bekuzokutlhoga isikhathi. (Genesisi 2:19) Ukuthi zizithobe kuye bekutlhoga bona athathe isikhathi sakhe afunde ngazo, azi bona kufuze azitlhogomele njani. Lokho bekutlhoga isikhathi esinengi tle!
Isinqophiso sakaZimu esithi zalisani iphasi begodu nilawule iinlwana besitjengisa ukuthi abantu bokuthoma bekufuze baphile isikhathi eside. Kuhlekuhle u-Adamu waphila isikhathi eside.
UZIMU UHLOSE UKUTHI ABANTU BAPHILE NGOKUNGAPHELIKO EPHASINI ELIYIPHARADESI
BAPHILA ISIKHATHI ESIDE
U-Adamu waphila iminyaka ema-930
UMetutjhelarhi waphila iminyaka ema-969
UNowa waphila iminyaka ema-950
Namhlanjesi siphila iminyaka ema-70-80
IBhayibheli litjengisa ukuthi kade, abantu bebaphila isikhathi eside ukudlula namhlanjesi. Lithi: “Yoke iminyaka u-Adamu ayiphilako imakhulu alithoba namatjhumi amathathu.” Bese liraga ngokuveza amanye amadoda asithandathu aphila iminyaka engaphezu kwema-900. Amadoda lawo nguSethi, u-Enotjhi, uKhenani, uJeredi, uMetutjhelarhi noNowa. Boke baphila ngaphambi komthwalela wangesikhathi sakaNowa, uNowa yena waphila iminyaka engaphezu kwema-600 ngaphambi komthwalela. (Genesisi 5:5-27; 7:6; 9:29) Kwakghonakala njani lokho?
Woke amadoda la, aphila ngesikhathi esihlalelene eduze nalokha abantu banganasono. Kungenzeka lokho ngikho okwabenza baphile isikhathi eside kangaka. Kodwana ukuphelela kuhlangana njani nokuphila isikhathi eside? Ukufa kuzokuhlulwa njani? Bona sifumane iimpendulo kufuze sithome ngokuzwisisa ukuthi kubayini siluphala bese siyafa.