1, 2. (a) U-Isaya 60:22 uzaliseke njani emihleni yokuphela le? (b) Ngikuphi okutlhoga izandla engcenyeni yehlangano kaJehova esephasini?

“OPHASI ngesibalo uzakuba yikoro nomncani abe sisizwe esinamandla.” (Isa. 60:22) Amezwi asiphorofido lawo ayazaliseka emihleni yokuphela le, ngani ngoba enyakeni wekonzo ka-2015, kube nabatjhumayeli bevangeli lomBuso abazi-8 220 105 ebebaphasi phezulu nokutjhumayela ephasini loke! Ingcenye yamaswaphela yesiphorofidweso iwathinta woke amaKrestu, ngombana uBabethu wezulwini uJehova uthi: “Ngesikhathi esifaneleko ngizakwenza msinyana lokhu.” Lokhu singakufanisa nabantu abakhamba ngekoloyi, ngombana siyalizwa ibelo elandako lomsebenzi wokwenza abafundi. Ngamunye wethu wenzani-ke nakezwa ibelo elandako lelo? Senza koke esingakwenza na ekulitjhumayeleni ngekuthalo ivangeli lomBuso? Abazalwana nabodade abanengi bafaka iimbawo zokuba maphayona esizeleko, abanye bafaka zewesikhatjhana. Begodu asithabi na, ngokubona abanengi kangaka basabela esibaweni sokuyokusiza lapho umsebenzi wande khona, namkha bazibandakanye kweminye imisebenzi yekonzo kaZimu?

² Ngesikhathi esifanako, siyayibona netlhogeko yezinye iinsebenzi ezinengi. Kuvulwa amabandla angaba zii-2 000 qobe mnyaka. Nabekungathiwa abadala abahlanu basize ibandla ngalinye elitjha,  kutjho ukuthi iinceku ezikhonzako ezizi-10 000 bekuzokufuze zifanelekele ukuba babonisi unyaka nonyaka. Lokhu kutjho ukuthi bekuzokutlhoga iinkulungwana zabazalwana bona zilwele ukufaneleka ukuba ziinceku ezikhonzako. Ngaphezu kwalokho, kungakhathaliseki bona sibazalwana namkha abodade, soke singazinikela “ngokupheleleko emsebenzini weKosi.”—1 Kor. 15:58.

3, 4. Kutjho ukuthini kuwe ukuthuthukisa itjhebiswano lakho noZimu?

³ Funda 1 Thimothi 3:1. Isenzo sesiGirigi esitjhugululwe ngokuthi “langazelela” sitjho ukuzilula ngendlela engakajayeleki ukuze ubambe into. Nakasebenzisa ibizwelo, umpostoli uPowula wakubeka kwacaca ukuthi ituthuko ekwenzeni izinto zakaZimu itlhoga ukuzikhandla. Cabanga ngomzalwana ocabanga ngengomuso lakhe ebandleni. Nje kungenzeka akakabi yinceku ekhonzako, kodwana uyalemuka bona kufuze athuthuke ebandleni. Uthoma ngokuzikhandla ekutheni afanelekele ukuba yinceku ekhonzako. Nasekusikhathi esifaneleko, uba nethemba lokuthi sekayafaneleka ukuba mbonisi. Umzalwana lo, kinanyana ngikuphi akwenzako, uyazikhandla ekutheni afanelekele amalungelo angeziweko ebandleni.

⁴ Kunjalo-ke nangabazalwana nabodade abalangazelela ukuba maphayona, ukuya eBethel, namkha ukuyokwakha amaWolo womBuso, bayazikhandla bona bafinyelele amabizelo lawo. Akhesibone ukuthi iliZwi lakaZimu lisikhuthaza njani soke bona sithuthuke ekumkhulekeleni.

5. Abantu abatjha bangawasebenzisa njani amandlabo ekusebenzeleni umBuso kaZimu?

⁵ Abantu abatjha banawo amandla wokwenza okunengi ekonzweni kaJehova. (Funda izAga 20:29.) Abanye abazalwana abasesebatjha eBethel basebenza ukugadangisa amaBhayibheli neencwadi ezikhambisana nawo. Kuthi inengi labazalwana nabodade abasesebatjha lisebenze ekwakheni nekunakekeleni amaWolo womBuso. Nalokha nakuvela iinhlekelele zemvelo, abantu abatjha bayeza bazokusiza aboFakazi abanelemuko emsebenzini wokuhlangula. Ingasaphathwa yewoma-kazi lamaphayona amatjha asiza ekuthumeleni iindaba ezimnandi eendaweni zemakhaya neenarheni zangaphandle.

6-8. (a) Elinye isokana layitjhugulula njani indlela ebelizizwa ngayo ngekonzo kaZimu, begodu waba yini umphumela? (b) Singezwa njani ‘besibone bonyana [uJehova] muhle’?

⁶ Kuyatjho ukuthi uyakubona ukuqakatheka kokusebenzela uZimu ngehliziywakho yoke. Kodwana ungenza njani nawuzizwa njengomunye umzalwana obizwa ngo-Aaron? Nanyana akhuliswa mndeni omaKrestu, uthi, “Ukuya esifundweni nesimini bekumvilaphisa.” Bekafuna ukumsebenzela ngethabo uZimu kodwana azibuza ukuthi yini emqeda amandla kangaka. Ngikuphi-ke akwenza?

⁷ U-Aaron wazibekela umnqopho wokufunda iBhayibheli ngokulungiselela imihlangano kunye nokuphendula nakakiyo. Wathoma ukukhuthalela ukuthandaza qobe sikhathi. Ngokwenza njalo, wamthanda khulu uJehova, wathoma nokuthuthukisa itjhebiswano lakhe noJehova. Solo kwalokho, u-Aaron bekaphayona ngethabo, abambisene nabanye nemsebenzini wokuhlangula, newokutjhumayela kwenye inarha. Sikhuluma nje, u-Aaron usebenza eBethel, begodu ungumdala. Batjho uzizwa njani-ke ngesiqunto asenzilekwesi? Uthi: “‘Ngizwile bona uJehova muhle.’ Indlela angibusisa ngayo ingenza ngizizwe ngimkoloda, ngikho ngizimisele ukumsebenzela kangaka ngombana imiphumela yalokho ziimbusiso ezinengi.”

⁸ Umrhubi wabhina wathi: “Abamesabako [uJehova] abasweli litho.” (Funda  iRhubo 34:9-11; [34:8-10, NW].) Nangambala, uJehova angekhe abadanise labo abakhuthalele ukumsebenzela. Nathi ngokwethu ‘siyazizwela bona uJehova muhle’ kangangani njengombana senza koke esingakwenza ekumsebenzeleni. Begodu nasimnikela ikonzo yomphefumulo woke uZimu, sizizwa sithabe kwamambala.

9, 10. Kuqakatheke ngani ukuzimisela ‘ukulinda’?

⁹ Njengombana usebenzela emabizelweni ozibekele wona, zimisele ‘ukulinda.’ (Mik. 7:7) UJehova uhlala azisekela iinceku zakhe ezithembekileko, nanyana lokho kutjho ukulinda bona zithole amalungelo namkha zibe sebujamweni obufaneleko. Wathembisa u-Abrahamu indodana, kodwana lokho bekubizela ukulinda nesineke ku-Abrahamu. (Heb. 6:12-15) Nanyana alinda iminyaka ngaphambi kokubelethwa kwaka-Isaka, u-Abrahamu azange aphele ihliziyo, kanti-ke noJehova azange amdanise.—Gen. 15:3, 4; 21:5.

¹⁰ Ukulinda akusibulula. (IzA. 13:12) Yeke nasingahlala siqale izinto ezidanisako, sizokuphelelwa mamandla. Kodwana, kukuhlakanipha ukuthi sithathe isikhathi sithuthukise itjhebiswano lethu noZimu. Tjheja nazi iindlela ezintathu zokwenza njalo.

11. Ngiziphi izinto esingasebenzela ukuthuthuka kizo, begodu ziqakatheke ngani?

¹¹ Sebenzela ekuthuthukiseni ubuntu obufunwa nguZimu. Nasifunda iliZwi lakaZimu, sizindle nangalo, sizokuba nokuhlakanipha, ilemuko, sikwazi ukuhlukanisa, sibe nelwazi, ikghono lokucabanga, nokuhluzeka kwengqondo. Iimfanelo ezinjalo ziqakatheke khulu kilabo abadosa phambili ekolweni yeqiniso. (IzA. 1:1-4; Tit. 1:7-9) Njengombana siraga nokufunda iincwadi zethu ezisekelwe eBhayibhelini, sizowubona  umcabango kaZimu ezintweni ezinengi. Qobe langa sizithola sisebujamweni bokukhetha zokuzithabisa, ukumbatha nokuzilungisa, ukusebenzisa imali, nokubambisana nabanye. Yeke, nasisebenzisa lokho esikufunda eBhayibhelini, sizokwenza iinqunto ezimthabisako uJehova.

12. Amalunga webandla kungabonakala ngani ukuthi athembekile?

¹² Akubonakale ukuthi uthembekile. Kungakhathaliseki bona sibazalwana namkha abodade, kufuze senze koke esingakwenza ekuphetheni izabelo zethu esinikelwa zona. Nombusi uNerhemiya kwatlhogeka bona athole abantu ebebazokuphetha izabelo ebekaphathiswe zona ebantwini bakaZimu. Wakhetha abobani? Wakhetha labo ebebamhlonipha uZimu, begodu bathembekile. (Nerh. 7:2; 13:12, 13) Nanamhlanjesi, “kuyadingeka bona labo abaphathisiweko babonakalise ukuthembeka kwabo.” (1 Kor. 4:2) Imisebenzi emihle ayeqiselwa amehlo.—Funda 1 Thimothi 5:25.

13. Ungasilandela njani isibonelo sakaJosefa nawuphethwe makghwakghwa?

¹³ Vumela uJehova akucwengisise. Ungenzani-ke lokha abanye nabakuphatha madlakadlaka? Ongakwenza mhlamunye kulungisa nabo indaba isatjhisa. Ngezinye iinkhathi ukuzivikela kungawubhebhedlhisa umraro. UJosefa watlhoriswa banakwabo, kodwana azange ababambele ivunda. Ngokukhamba kwesikhathi, waphikelwa ngamala bewabotjhwa anganamlandu. Kodwana wavumela uJehova bona ahlale amnqophisa neenkhathini ezibudisi. Waba yini umphumela? “Ilizwi [“lakaJehova,” NW] lamzizinya.” (Rhu. 105:19) Kwathi nakuphela iinlingwezo, uJosefa wathola isabelo esikhetheke kwamambala. (Gen. 41:37-44; 45:4-8) Njengombana uqalene neentjhijilo ezibuhlungu, thandazela ukuhlakanipha, uzithobe ekulumweni nezenzweni, bese uqala kuZimu bona akuphe amandla. UJehova uzokusiza.—Funda 1 Pitrosi 5:10.

14, 15. (a) Kubayini kufuze ‘sikhuthalele’ indlela esitjhumayela ngayo? (b) Ungazivumelanisa njani nobujamo obutjhugulukako? (Qala isithombe esisekuthomeni nebhoksi elithi, “ Uzimisele Na Ukulinga Iindlela Ezitjha?”)

¹⁴ UPowula wakhuthaza uThimothi wathi: “Khuthalela ukufunda imitlolo, ukukhuthaza nokufundisa bengifike. Uzeluse wena kanye nefundiso yakho.” (1 Thim. 4:13, 16) UThimothi besekukade anelemuko ekutjhumayeleni ivangeli lomBuso. Kodwana, umsebenzakhe bewuzokubonakala kwaphela ‘nakakhuthalela’ ifundiso yakhe. Bekangazinyazi ekutheni abantu bangamlalela endleleni ejayelekile atjhumayela ngayo. Kodwana nakazakuraga nokufinyelela iinhliziyo zabo, bekufuze avumelanise ifundiso yakhe nalokho okutlhogwa babantwabo. Nathi kufuze senze njalo nasitjhumayela ivangeli lomBuso.

¹⁵ Sivame ukubathola bangekho emakhaya abantu nasitjhumayela umuzi nomuzi. Begodu kwezinye iindawo asikavunyelwa ngitjho nokungena siyokutjhumayela ebantwini abahlala lapho. Nangabe kunjalo ngendawo otjhumayela kiyo, kubayini ungacabangeli iindlela ezihlukileko zokutjhumayela kiyo?

16. Ukutjhumayela tjhatjhalazi kungaba namiphi imiphumela?

¹⁶ Ukutjhumayela tjhatjhalazi ngenye yeendlela eziphumelelako zokurhatjha iindaba ezimnandi. AboFakazi abanengi bathola imiphumela emihle ekonzweni le yokutjhumayela. Bazibekela isikhathi sokuya ebantwini abayokukhwela iintimela namabhesi, baye eendaweni zamabhizinisi nemaphageni, nakwezinye iindawo eziphithizelako. UFakazi okwazi ukuhlukanisa, angakghona ukuthoma ingcoco nomuntu ngokuthinta ezikhamba phambili eendabeni, ngokukhuluma okuhle ngabantwana bakhe, namkha ngokumbuza ngomsebenzi awenzako. Njengombana ingcoco leyo  iraga, otjhumayelako angafaka nephuzu lomTlolo, ezwe umbono womuntu loyo. Indlela azokuphendula ngayo ivame ukutjhinga eBhayibhelini.

17, 18. (a) Ungawuthola njani umdlandla wokutjhumayela tjhatjhalazi? (b) Umoya kaDavida wokudumisa uJehova ukukhuthaza njani njengombana utjhumayela?

¹⁷ Nangabe kuwe kubudisi ukutjhumayela tjhatjhalazi, ungapheli amandla. U-Eddie, ophayona eNew York City, bekumvilaphisa ukukhuluma nabantu tjhatjhalazi. Kodwana ngokukhamba kwesikhathi, wathola umdlandla. Wasizwa yini? Uthi: “Ngesikhathi sokukhulekela komndeni kwethu, sinomkami sirhubhulula ngeempendulo zalabo abangavimba ingcoco nemibono evame ukuvezwa babantu. Sibuza nabanye aboFakazi, sizwe yabo imibono.” Sikhuluma nje u-Eddie ukuthanda kwamambala ukutjhumayela tjhatjhalazi.

¹⁸ Njengombana uba nekghono nesibindi sokutjhumayela iindaba ezimnandi, netuthuko yakho ngezinto zakaZimu izokubonakala. (Funda 1 Thimothi 4:15.) Ngaphezu kwalokho, nawe uzomthokoza uBabethu wezulwini njengoDavida owabhina wathi: “[“UJehova,” NW] ngizamdumisa ngeenkhathi zoke; ngizakuhlala ngimbabaza njalo ngomlomami. Mina ngizazikhakhazisa [“ngoJehova,” NW] abathobekileko abezwe lokho, bajabule.” (Rhu. 34:2, 3; [34:1, 2, NW]) Begodu umphumela walokho ungaba kukuthi abalungileko bangene ekolweni yeqiniso.

19. Kubayini inceku kaJehova kufuze ithabe ngitjho nalokha isebujamweni obuyibophela phasi?

¹⁹ UDavida wabhina godu wathi: “Yoke imisebenzakho izakuthokoza, [“Jehova,” NW] nabathembekileko bakho bazakubabaza. Bazakhuluma ngephazimulo yombuswakho, bamemezele izenzo zakho zamandla, bazise abantu izenzo zakho zamandla nokuhlonitjhwa kwephazimulo yombuswakho.” (Rhu. 145:10-12) Amezwi lawo aveza indlela boke aboFakazi bakaJehova abazizwa ngayo. Kodwana kuthiwani nangabe ukugula, namkha ukukhula kuyibophela phasi ikonzo yakho? Hlala ukhumbula ukuthi nawuhlanganyela iindaba ezimnandi nalabo abakutlhogomelako nabanye, ikonzo ecwengileko leyo iyamphazimulisa uZimethu omangalisako. Nawubotjhiweko ngebanga lokukholwa kwakho, kuyatjho ukuthi usazokukhuluma ngeqiniso ubujamo nabuvumako, begodu lokho kuyilethela ithabo ihliziyo kaJehova. (IzA. 27:11) Lokhu kuliqiniso nalokha nawusemndenini ophadlhuke phakathi ngokwekolo, wena hlala unamathele ekambweni yakho yokulotjha uZimu. (1 Pit. 3:1-4) Ngitjho nalapho usebujamweni obumaphorodlha, ungakghona ukudumisa uJehova, uthuthukise nendlela omlotjha ngayo.

20, 21. Nawuphathiswe umsebenzi omnengi ehlanganweni kaJehova, ungaba njani sibusiso kwabanye?

²⁰ UJehova uzokubusisa nawuragela phambili uthuthukisa indlela owenza ngayo izinto. Mhlamunye nawungenza amatjhuguluko thize endleleni ophila ngayo, ungaba nendima ekulu oyifezako ekutjhumayezeni labo abatlhoga ithemba ngeendaba ezimnandi zeqiniso lakaZimu. Ngaphezu kwalokho, ituthuko yakho ezintweni zakaZimu nekambo yokuzidela oyikhethako ingabalethela iinzuzo ezinengi nalabo okhonza nabo. Begodu ngebanga lemizamo yakho yokuzithoba ebandleni, uzokubusiseka ngethando nesekelo elivela kilabo abathanda uJehova.

²¹ Kungakhathaliseki bona sesinesikhathi esingangani sisebenzela uJehova, soke singathuthuka ekumkhulekeleni. Kodwana amaKrestu esekahluzekile angawasiza njani asesematjha bona athuthukise itjhebiswano lawo noZimu? Ngileyo-ke esizabe siyiphethe ngeveke ezako.