USYLVIANA uneminyaka ema-27 begodu uyaphayona, uthi: “Nangizwa izinto ezihle nezithabisako abangani bami abazenzako eenarheni lapho kutlhayela khona amaphayona nami ngizizwa ngifisa ukuzwa ubumnandi ababuzwako. Kodwana bengisaba, ngizitjela ukuthi angeze ngakghona ukukwenza lokho.”

Wakhe wazizwa na njengoSylviana? Kungenzeka uyafisa ukuyokutjhumayela lapho kunganabatjhumayeli abanengi khona, yeke uyazibuza ukuthi kazi umgomakho lo uzakhe uwufikelele na. Nakhibe uzizwa njalo, ungalilahli itewu. Inengi labanakwethu nabodadwethu ngitjho nanyana bekunezinto ebezibavimba bona bayokutjhumayela kwezinye iindawo, uJehova wabasiza baphumelela. Nasifuna ukubona bonyana uJehova ubasize njani, akhesicoce ngokwenzeka eMadagascar esihlengele esikhulu.

Eminyakeni elitjhumi edlulileko kube nabatjhumayeli abangaphezu kwama-70 kuhlanganise namaphayona avela eenarheni ezili-11 *, baya eMadagascar. Abantu balapho bayalihlonipha iBhayibheli. Nenengi labatjhumayeli bendaweni le bazimisela khulu ukutjhumayela iindaba ezimnandi kiso soke isihlengelesi. Akhesikucocele ngabanye babo.

ULouis noPerrine batjhadikazi asebadlulile ema-30 basuka eFrance baya eMadagascar. Besele kuphele iminyaka bacabanga ukuyokutjhumayela kenye inarha kodwana uPerrine bekanokungabaza. UPerrine uthi: “Into ebeyingithusa khulu kukuya endaweni engingayaziko. Bengisaba ukutjhiya umndenethu, ibandla ebesikilo nomzethu. Besijayele ipilo yala ebesihlala khona. Kuhlekuhle ukutshwenyeka khulu ngikho ebekungivimba.” Nokho ngo-2012 uPerrine waqina idolo, banobabakwakhe batjhinga eMadagascar. Inga-kghani bayazisola ngesiqunto sabo? Uthi: “Kiyo yoke iminyaka le ukukholwa kwethu kwaqina nasibona indlela uJehova asisekela ngayo.” ULouis uthi: “Akhese ucabange nje esiKhumbuzweni sokuthoma esasibamba eMadagascar, kweza abantu abalisumi ebesifunda nabo iBhayibheli!”

Yini eyasiza uLouise noPerrine bahlala esabelweni sabo? Bathandaza babawa uJehova bona abaphe  amandla wokubekezela. (Flp. 4:13) ULouise uthi: “UJehova wayiphendula imithandazwethu, wasipha ‘ukuthula.’ Lokho kwasenza bona siragele phambili nomsebenzethu. Abangani bethu beFrance basithumela ama-email basitlolela neencwadi zokusikhuthaza.”—Flp. 4:6, 7; 2 Kor. 4:7.

UJehova wabusisa uLouis noPerrine ngokubekezela kwabo. ULouis uthi: “Ngo-Oktoba 2014 saya esiKolweni samaKrestu aTjhadileko * eFrance. Simthokoza khulu uJehova ngokusimemela esikolweneso.” Ngelanga abafumana ngalo iziqu batjelwa bona bazokubuyela eMadagascar, kwaba ziindaba ezimnandi khulu lezo kibo!

Ngo-2010 ngesikhathi uDidier noNadine bathuthela eFrance bebangaphezu kweminyaka ema-50. UDidier uthi: “Iye khona saphayona ebutjheni, kodwana ngokukhamba kwesikhathi saba nabantwana abathathu, yeke salisa ukuphayona. Bathi nasele babakhulu safisa ukuyokutjhumayela kenye inarha.” UNadine uthi: “Ukuhlukana nabantwana bethu bekungitsirimeza, kodwana basitjela bathi: ‘Naningayokutjhumayela kenye inarha sizonisekela.’ Amezwabo la asikhuthaza, yeke savele satjhinga khona. Iye khona sihlala kude khulu nabo, kodwana kuba mnandi nasiphele sikhuluma.”

Bekungasilula ukuthi uDidier noNadine bafunde isiMalagasy. UNadine uthi: “Nokho iminyaka seyikhambile, yeke ukufunda elinye elimi akusilula.” Alo baphumelela njani? Bafikela ebandleni lesiFrench. Bese kwathi nasele babona ukuthi sebangafunda isiMalagasy bafudukela ebandleni lakhona. UNadine uthi : “Inengi labantu esihlangana nabo esimini liyalithanda iBhayibheli. Kanengi sithi nasiqeda ukubatjhumayeza, bathokoze. Ngathi nangithoma ukukubona koke lokhu ngezwe ngathi ngiyabhudanga. Kumnandi khulu ukuphayona endaweni le. Nangivuka ekuseni ngivuka ngithabile, ngazi ukuthi ngiyokutjhumayela.”

UDidier nakakhumbula ngesikhathi athoma ukufunda isiMalagasy uhleka yedwa. Uthi: “Bengiyibamba imihlangano yebandla ngesiMalagasy, kodwana bengingadobhi litho abanakwethu nabodadwethu nabaphendulako. Bengivele ngithi ‘Siyathokoza.’ Nakho-ke ngelinye ilanga omunye udadwethu waphendula, njengemhleni ngamthokoza. Ebebahlezi ngemva kwakhe bangiphakamisela izandla bangazisa ukuthi awa ipendulo le akusiyo. Ngakhomba omunye umnakwethu, engithemba bona yena nokho waphendula kuhle.”

Emhlanganweni omkhulu wango-2005, uThierry noNadia babukela idrama enesihloko esithi “Pursue Goals That Honor God.” Idrama leyo beyimalungana noThimothi weBhayibhelini, yabasiza ukuthi bayokutjhumayela lapha kutlhayela khona abatjhumayeli bomBuso kaZimu. UThierry uthi: “Idrama leyo yathi ingaphela sawahla izandla, sisawahla njalo ngahlebela umkami ngathi ‘Alo thina siyaphi?’ Umkakhe wathi naye bekasazibuza lokho.” Kwathi ngemva kwalokho bathatha amagadango wokufinyelela umgomwabo. UNadia uthi: “Kancanikancani sakhambisa izinto ebesinazo kangangobana sasala nezinto ezingangena emabhegeni amane kwaphela.”

Bafika eMadagascar ngo-2006, bekube nje abazisoli nakancani. UNadia uthi: “Abantu esibatjhumayezako basenza sithabe.”

Kwathi sekudlule iminyaka esithandathu, kwavela iintjhijilo. Umaka Nadia uMarie-Madeleine ohlala eFrance, wawa waphuka umkhono walimala nehloko. UNadia nobabakwakhe bakhulumisana nodorhodera. Ngemva kwalokho babawa ummakhe bona azokuhlala nabo eMadagascar. Ngitjho nanyana bekaneminyaka ema-80 ngesikhatheso, kodwana wavumela phezulu nabambawako. Alo uzizwa njani ngokuthuthela kenye inarha? Uthi: “Iye khona akusilula ngaso soke isikhathi kodwana ngizizwa nginokunengi engingakwenza ebandleni ngitjho nanyana ngithiyeka lapha nalapha. Okungithabisa khulu ngokuthuthela eMadagascar kukuthi abantwabami basaraga kuhle nomsebenzabo wokutjhumayela khona lapha eMadagascar.”

URiana ona-22, wakhulela e-Alaotra Mangoro epumalanga yeMadagascar esifundeni esivundileko. Bekenza kuhle esikolweni, yeke lokho kwamenza wafuna ukuthuthukisa iimfundo zakhe. Ngemva kobana afunde iBhayibheli izinto zathoma ukugaya ngomunye umhlathi. Uthi: “Ngasebenza ngamandla bona ngikghone ukuqeda msinya esikolweni. Ngathembisa uJehova ukuthi nangiqeda isikolo ngizokuphayona.’” Ngemva kobana aqedile esikolweni, wenza ngokwendlela athembise ngayo. Wayokuhlala nomunye umzalwana ophayonako, wathola umsebenzi wamalanga athileko evekeni, ngemva kwalokho wathoma nokuphayona. Uthi: “Akazisoli ngesiqunto asithathakwesi.”

Iinhlobo zakaRiana akhenge zizwisise bona kubayini angayokuthuthukisa iimfundo zakhe. Uthi: “Ubaba, umalume nogogo, boke njalo bangikhuthaza bona ngikhethe ibizelo ngithuthukise iimfundo zami. Kodwana mina bekungananto ebengifuna ingilisise ukuphayona.” Kungasikade uRiana wafuna ukuthuthela ebandleni lapho kungana batjhumayeli abaneleko khona. Yini eyabasela isifisweso? Uhlathulula uthi: “Iinlelesi zangena la besihlala khona zeba izinto zami. Isenzweso sangikhumbuza amagama kaJesu akhuluma ngokuzibekela ‘umnotho ezulwini.’ Yeke lokho kwangenza ngafuna ukusebenza ngamandla bona ngizibekele umnotho ezulwini.” (Mat. 6:19, 20) Wafudukela esewula yeMadagascar esifundeni ebesinesomiso. Bekungaba makhilomitha ayi-1 300 ukusuka la bekahlala khona. Esifundeneso kulapho uthola khona abantu abama-Antandroy. Yini eyamenza waya lapho?

URiana nakazakungenelwa ziinlelesi, bese kudlule inyanga athoma ukufunda namadoda amabili ama-Antandroy. Wafunda isi-Tandroy, ngebanga lokuthi bekacabanga ngabantu abakhuluma ilimeli abangakabi nethuba lokuzwa umlayezo womBuso. Uthi: “Ngathandaza ngabawa uJehova bona angisize ngifudukele esifundeni sabantu abakhuluma isiTandroy.”

Ngambala uRiana wafuduka, wathi afika lapho wahlanga nesitjijilo. Bekafunana nomsebenzi phasiphezulu, kodwana kubhala. Ubabomunye wathi kuye: “Uzokwenzani la? Abantu nafuna imisebenzi baya la wena ubuya khona!” Ngemva kweemveke ezimbili, uRiana waya emhlanganweni wesiFunda. Bekatjhodatjhoda ngemali, azibuza bona uzokubona enzeni. Ngelanga lokugcina lomhlangano, umzalwana wase wafaka intwanyana esikhwameni sebhaji kaRiana. Nakaqalako bekuyimali eyaneleko yokuya e-Antandroy, wabe wathoma nebhizinisi yokuthengisa amayogadi. URiana uthi: “Khonapho ngabona bona nguJehova obekangisiza. Nje khona bengizokukhona ukusiza abantu abangakhenge bezwe ngoJehova. Nebandleni bekukunengi obekufuze kwenziwe. Bengabelwa bona ngebeke ikulumo, kabili ngenyanga. UJehova bekangibandula ngehlanganwakhe.” Sikhuluma nje uRiana usatjhumayela esimini yabantu abakhuluma isi-Tandroy begodu usabafundisa ngoJehova.

UJehova usiqinisekisa ngokuthi ‘nanyana ngubani obusisako enarheni abusise “ngoZimu othembekileko.”’ (Isa. 65:16) Nasisebenza ngamandla ukuthi silwisane neentjhijilo esihlangabezana nazo, sandise isikhathi sokutjhumayela, uJehova uzosibusisa. Cabanga ngoSylviana, ekhesacoca ngaye ekuthomeni. Bekasaba ukuyokutjhumayela lapho kunganabatjhumayeli abaneleko khona, acabanga ukuthi angeze akghona yena. Kubayini bekacabanga njalo? Uhlathulula uthi: “Inyawo lami langesinceleni lifitjhani kunelangesindleni. Lokho kwenza ngihluze begodu ngidinwa msinyana.”

Ngo-2014 uSylviana wahlangana noSylvie Ann iphayona elincani ebandleni, bobabili njalo bafudukela ethresteni elincani okumakhilomitha ama-85 ukusuka lapha bebahlala khona. Ngitjho nanyana bekaqalana nemiraro kodwana uSylviana wenza ngokwesifiso sakhe, begodu uJehova wamsiza khulu. Uyahlathulula uthi “Ngemva kobana kuphele umnyaka batjhumayela edorobheneli uDoratine, uSylviana wafundela umma osesemutjha bewabhajadiswa emhlanganweni wesigodi.”

Abantu abayokutjhumayela lapho kunetlhogeko yabatjhuamayeli khona, basuke banokukholwa okuqinileko. Nathi singafunda kibo, ngasikhathi silwisana neenqabo ezisidlela isikhathi esinengi sokutjhumayela. UJehova uzosibusisa njengombana athembisa iinceku zakhe zaphambilini, “Ngiyakuqinisa bengiyakusiza.” (Isa. 41:10) Lokho kuzokwenza simthande khulu uJehova. Ukungezelela kilokho, nasizimeselako sisebenze budisi endaweni esihlala kiyo namkha kenye inarha, kusilungisela umsebenzi kaZimu esizowenza ephasini elitjha. UDidier ekhasakhuluma ngaye phambilini uyebeka bunjesi, “ukutjhumayela endaweni enganabatjhumayeli abaneleko kukubandulule ingomuso.” Kwanga abatjhumayeli abanengi bangazimisela nabo bathome ukubandulwa kwabo msinyana!