1. Ngebanga lokuba nesono, ngiyiphi indlela evane sizizwe ngayo?

UPOWULA wakhe wathi, “Maye mina ngilisizi!” (Rom. 7:24) UPowula wakhe wazizwa aphelelwa mamandla begodu agandelelekile, yindlela nathi esizizwa ngayo namhlanjesi. Kwenziwa yini lokhu? Kwenziwa kukuthi soke siyafisa ukuthabisa uJehova, kodwana ngitjho nanyana silinga kangangani, siyabhalelwa ngezinye iinkhathi ngebanga lesono. Amanye amaKrestu enza izono ezikulu ekuphileni kwawo, lokho kuwenza azizwe angakufanelekeli ukulitjalelwa nguZimu.

2. (a) IRhubo 34:22 liyiveza njani indaba yokuthi akukafuzi sidliwe sisazelo ngokudluleleko? (b) Sizokufunda ngani esihlokwenesi? (Qala iboksi elithi “ Ziimfundo namkha Mifanekiso ejamelele into ethileko?”)

² IBhayibheli lithi nasiphephela kuJehova akukafuzi sidliwe sisazelo ngokudluleleko. (Funda iRhubo 34:22.) Mhlamunye uyazibuza ukuthi, kutjho ukuthini ukuphephela kuJehova? Begodu yini okufuze uyenze nawuzafumana umusa nokulitjalelwa nguJehova? Singafunda okukhulu ehlelweni lamadorobho wobuphephelo. Iye khona siyavuma ukuthi umthetho loyo wajanyiselwa ngomunye ngepentekoste laka-33. Kodwana kufuze sikhumbule ukuthi bewuvela kuJehova. Ehlelweni lamadorobho wobuphephelo  sifunda indlela uJehova aqala ngayo isono, izoni nabantu abaphendukako. Akhesithome ngokufunda ngomnqopho wamadorobho wobuphephelo sibone nendlela ebewasebenza ngayo.

3. Ama-Israyeli bekayilungisa njani imilandu yokubulala?

³ UJehova bekangayeqiseli amehlo imilandu yokubulala kwa-Israyeli. Kangangokuthi bekuthi umuntu nakabulele ngehloso, naye abulawe sihlobo somuntu ambuleleko esiyindoda, indoda leyo beyibizwa ngokuthi ‘imbuyiseleli weengazi.’ (Num. 35:19) Okutjho bona umuntu obekabulala ngehloso bekabhadela ngepilwakhe, ngombana ubulele umuntu omsulwa. Umlandu lo bekufuze ulungiswe msinya. Kubayini? Ukwenzela bona iNarha yesiThembiso ihlale icwengile. UJehova wathi: “Ningasilaphazi inarha eniphila kiyo ngombana iingazi ziyayisilaphaza inarha.”—Num. 35:33, 34.

4. Ama-Israyeli bekayilungisa njani imilandu yabantu ababulala bangakahlosi?

⁴ Alo ama-Israyeli bekayithini-ke yomuntu obulala angakahlosi? Ngitjho nanyana angakabulali ngehloso, usesenomlandu wokubulala. (Gen. 9:5) Kodwana nokho yena bekenzelwa umusa, ngombana bekufuze abalekele kwelinye lamadorobho wobuphephelo. Ngaleyo ndlela bekangasinda kumbuyiseli weengazi. Yeke ngebanga lokuthi ubulele angakahlosi, bekuzokufuze ahlale edorobheni lobuphephelo bekuhlongakale umphristi omkhulu.—Num. 35:15, 28.

5. Amadorobho wobuphephelo asisiza njani bona sazi uJehova ngcono?

⁵ NguJehova owenza amadorobho wobuphephelo. Wathi uJotjhuwa “akakhulume nama-Israyeli athi: ‘Khethani amadorobho wobuphephelo.’” Amadorobho la bewacwengile tle! (Jotj. 20:1, 2, 7, 8) Yeke ngebanga lokuthi nguJehova owathi kukhethwe amadorobho la, siyazibuza ukuthi, awuveza njani umusa kaJehova? Begodu asifundisani naziza endabeni yokuphephela kuye?

6, 7. (a) Akhusihlathululele bona abadala bebadlala yiphi indima umuntu nakabulele angakahlosi. (Qala isithombe esisekuthomeni.) (b) Kubayini umbaleki bekufuze ayokubonana nabadala?

⁶ Nange kwenzeka umuntu abulale angakahlosi, bekufuze “ahlathululele abaphathi bedorobhelo indabakhe,” aseyegeni yedorobho lobuphephelo abalekele kilo. Abaphathi bedorobho bekufuze bamamukele umbaleki. (Jotj. 20:4) Bese kuthi ngemva kwesikhathi esithileko, athunyelwe ebadaleni balapho abulele khona, ukwenzela bona umlandwakhe uyokudenjwa. (Funda uNumeri 35:24, 25.) Kuzakuthi ngemva kokuphenywa komlandwakhe begodu kwafunyanwa bona ubulele angakahlosi abuyiselwe edorobheni lobuphephelo.

⁷ Alo abadala bona bebangena njani endabeni le? Bekufuze baqiniseke bona ibandla labantu bakaZimu lihlala licwengile, bebasize nomuntu obulele angakahlosi abone umusa kaJehova. Esinye isazi seBhayibheli sathi nange umuntu obulele angakahlosi angayi ukuyokubonana nabadala “bekangabulawa nokubulawa. Nasekabulewe bekungekho ozokubekwa umlandu wokubulawa kwakhe, ngombana akhenge enze lokho okutjhiwo nguZimu.” Umuntu obulele angakahlosi lo bekangasizwa, kwaphela nange yena akufuna ukusizwa. Nange angabalekeli kwelinye lamadorobho wobuphephelo, isihlobo somuntu obuleweko esiyindoda besingambulala singabekwa mlandu.

8, 9. Kubayini kuqakathekile bona umKrestu nakenze isono esikhulu akhulume nabadala?

⁸ Namhlanjesi umKrestu nakenze isono esikhulu, kufuze ayokubawa abadala bona  bamsize. Kuqakatheke ngani lokho? Kokuthoma ihlelo lokuthi abadala badembe imilandu lisungulwe nguJehova, njengombana iBhayibheli isitjho. (Jak. 5:14-16) Kwesibili, abadala bazomsiza umuntu owenze isono bona abuyisane noZimu begodu kungagcini sekumkhuba ukona. (Gal. 6:1; Heb. 12:11) Kwesithathu kukuthi abadala bakhethiwe begodu babanduliwe bona basize izoni eziphenduka ngeqiniso, babakhothe amanceba behlise nobuhlungu bokuzizwa bamlandu. Kungebangelo uJehova abiza amadoda la ngokuthi ‘asiviko esiwuruwurwini.’ (Isa. 32:1, 2) Awuvumi na bona ihlelweli lisitjengisa bona uZimu unomusa?

⁹ Inengi labantu bakaZimu likubonile ukuthi ukukhuluma nabadala kubasizile tle! Isibonelo salokhu nguDaniel, wakhe wenza isono esikhulu begodu wathula isikhathi esithileko wangakhulumi nabadala. Uthi: “Isikhathi soke solo ngithulile ngicabanga ukuthi akunalitho abadala abangangisiza ngayo. Kodwana lokho bekungangiphi ukuthula, phela bengicabanga ukuthi ngizakuthini nange omunye athola bona ngenzeni. Begodu nangithandazako, into yokuthoma ebengiyenza bekubawa uJehova bona angilibalele ngesono engisenzileko.” Ekugcineni uDaniel wabawa abadala bona bamsize. Uthini: “Iye khona kuliqiniso ukuthi bengisaba ukuyokukhuluma nabadala, kodwana ngemva kokukhuluma nabo ngezwa ngathi kunelitje elikhulu elisuke emahlombami. Nje ngikghona ukuya kuJehova ngaphandle kokuliywa lilitho.” UDaniel nje uthi unonembeza omsulwa begodu simkhuluma nje sele abekwe bona abe yinceku ekhonzako.

10. Yini ebekufuze yenziwe mbaleki nakazakulitjalelwa?

¹⁰ Umuntu obulele angakahlosi bekufuze abalekele edorobheni lobuphephelo eliseduze. (Funda uJotjhuwa 20:4.) Kazi nakazakusindisa ipilwakhe, bekufuze abalekele edorobheni lobuphephelo ngemva nje kokwenzeka kwesehlakalo, begodu ahlale khona. Lokho kutjho bona bekufuze  kube nezinto azidelako. Bekufuze adele umsebenzakhe, indlwakhe nokuya la athanda khona. Into ebeyizomtjhaphulula kuhlongakala komphristi omkhulu. * (Num. 35:25) Kodwana ukuzidelokho bekuqakathekile! Nange angaqunta ukukhamba edorobheni lobuphephelo bekungatjho ukuthi akazisoli ngokubulala omunye umuntu, yeke nokubulawa bekangabulawa.

11. Yini umKrestu angayenza ukutjengisa ukuthi akadlali ngomusa kaZimu?

¹¹ Nanamhlanjesi kusesenjalo, umuntu ophenduka ngeqiniso ezonweni zakhe kunamagandango okufuze awathathe. Okutjho ukuthi kufuze sibalekele ngitjho nezono ezincani, ngombana ngizo ezisibangela ukuthi sigcine sele senze ezikulu. Umpostoli uPowula wakhe watlola ngezinto ezenziwa maKrestu weKorinte nakaphendukako, wathi: “Qalani bona ubuhlungu enabuzwiswa nguZimu buveze ukukhuthala okungangani kini, iye, ukuzimisela okungakaya kobana nizikhuphe emlandwini, ekwesabeni, ekulangazeleleni, ekutjhisekeleni nekuhlunguphazweni. Nizibonakalise ninganamlandu kikho koke malungana nalokho.” (2 Kor. 7:10, 11) Nasenza koke esingakwenza bona silise ukusolo sona, sizabe sitjengisa uJehova ukuthi siyatshwenyeka ngokwenzeka ekuphileni kwethu begodu asidlali ngomusakhe.

12. Ngiziphi izinto okungafuze sizidele nasifuna ukuthola umusa kaZimu?

¹² Nasizakuhlala sifumana umusa kaZimu yini okufuze siyidele? Kufuze sidele ngitjho nezinto esizithandako nange sibona ukuthi zizosifaka esonweni. (Mat. 18:8, 9) Ngokwesibonelo, akhesithi uyabona ukuthi abangani bakho bazokwenza wone kuJehova, kghani uzokuhlukana nabo? Nawulwisana nomraro wokurhamula khulu amarhugo, uzokulinga na ukubalekela ubujamo obukwenza usele khulu? Akhesithi ulwisana neemfiso zokuziphatha kumbi ngokwamabhayi, uzokwenza koke ongakwenza na bona ubalekele amamuvi, ama-website nanyana kungaba yini ezokwenza ufikelwe micabango emimbi? Kazi sifuna ukuhlala sithembekile kuJehova kungakhathaliseki ukuthi sidela ini. Akunanto ebuhlungu njengokuzizwa ulahlwe nguJehova. Begodu akunanto emnandi njengokuzwa ‘umusakhe ongapheliko.’—Isa. 54:7, 8.

13. Akhusihlathululele bona yini ebeyingenza umbaleki azizwe avikelekile, aphephile begodu aphile kamnandi ngitjho nanyana bekahlala edorobheni lobuphephelo.

¹³ Umbaleki nakangaphakathi kwedorobho lobuphephelo, bekazizwa aphephile. UJehova wathi amadorobho la “azakuba yindawo yokuphephela kini.” (Jotj. 20:2, 3) UJehova akhenge athi umbaleki kuzokutlhogeka bona ajeziselwe umlandu owodwa, begodu nakasedorobheni lobuphephelo nombuyiseli weengazi bekanganamvumo yokubulala umbaleki. Lokho bekwenza bona umbaleki namkha umuntu obulele angakahlosi angasabi ukuthi uzokugwetjwa. Ikani nakasedorobheni lobuphephelo, phela lapho bekavikelwa nguJehova. Kazi amadorobho la bewangasi majele. Yeke umbaleki bekanelungelo lokuzikhambela, asize abanye abantu abe alotjhe noJehova ngokuthula. Kuyatjho-ke ukuthi bekangaphila kamnandi lapho.

14. UmKrestu owenze isono kodwana waphenduka, kufuze aqiniseke ngani?

¹⁴ Abanye abantu bakaZimu basadliwa sisazelo ngitjho nanyana sebaphendukile, abanye baze bathi awa uJehova angeze avuka abalibalele. Nange nawe uzizwa njalo, qiniseka bona uJehova nakakulibalelako  usisula suli isono sakho! UDaniel esikhulume ngaye loya phambilini, wabona ukuthi lokho kuliqiniso. Ngemva kokuthi abadala bamlungisile bebamsiza bona abe nonembeza omsulwa uthi: “Akukafuzi ngidliwe sisazelo godu ngombana umlwandwami wadenjwa kuhle. Isono sadlula sidlulile. UJehova wathi uzosithula imithwalethu bese ayibekele le kude nathi.” Umbaleki nasekangakaphathi kwedorobho lobuphephelo, bekungasatlhogeki bona asabe umbuyiseli weengazi. Kuyafana-ke nangathi, nange uJehova alibalela izono zethu akutlhogeki bona sisabe ukuthi ngelinye ilanga uzayivusa imilandu leyo abe asigwebele yona.—Funda iRhubo 103:8-12.

15, 16. Indima uJesu ayidlalako ekubeni Mhlengi nomPhristi Ophakemeko iyakusiza na bona uwuthembe umusa kaZimu?

¹⁵ Nase sikhuluma iqiniso thina sinamabanga amanengi ukudlula ama-Israyeli wokuthemba umusa kaJehova. UPowula wathi nakaqeda ukutjho ukuthi uzizwa njani ngokubhalelwa ukuthabisa uZimu kuhle watjho amezwi naka: “Akathokozwe uZimu ngoJesu Krestu iKosethu!” (Rom. 7:25) Ngitjho nanyana bekalwa nokungapheleli kwakhe ngapha zizono azenza phambilini, kodwana bekaqiniseka bona uJehova usebenzise umhlatjelo kaJesu, wamlibalela. UJesu wasihlenga, yeke wenza sibe nabonembeza abamsulwa begodu sibe nokuthula. (Heb. 9:13, 14) Njengombana amPristi wethu Ophakemeko, “ngalokho unamandla wokusindisa ngesikhathi soke labo abeza kuZimu ngaye ngombana uhlala njalo abancengela.” (Heb. 7:24, 25) Indima ebeyidlalwa mphristi omkhulu ngesikhathi sama-Israyeli, yawaqinisekisa bona izono zawo zilitjalelwe. Kangangani-ke ngathi, phela thina sinomPhristi Omkhulu uJesu, yeke uzokwenza isiqinisekiso sokobana sifumana “isirhawu, sizuze umusa, sisizeke ngesikhathi esifaneleko.”—Heb. 4:15, 16.

¹⁶ Kutjho khona bona nasizakuphephela kuJehova, kufuze sibe nokukholwa emhlatjelweni kaJesu. Kunokuthi simane uthi uJesu wasihlenga soke ephasini, kufuze ukholwe ukuthi isihlengo sisiza wena. (Gal. 2:20, 21) Kufuze ukholwe ukuthi izono zakho zizakulitjalelwa kwaphela ngesihlengo, begodu ngaso unethemba lokuphila ngokungapheliko. Umhlatjelo kaJesu usisipho esivela kuJehova, akupha sona.

17. Kubayini ufuna ukuphephela kuJehova?

¹⁷ Amadorobho wobuphephelo ayasisiza sizwisise umusa kaJehova. Ihlelo uZimu alenzakweli lisitjela ukuthi ukuphila kucwengile. Lisitjengisa indlela abadala abasisiza ngayo nokuthi yini ebandakanyekileko umuntu nakazakuphenduka ngokupheleleko begodu kubayini singakuthemba ngokupheleleko ukulibalela kwakaJehova. Alo wena uyaphephela na kuJehova? Kuphela komuntu esingaphephela kuye! (Rhu. 91:1, 2) Esihlokweni esilandelako sizokubona ukuthi amadorobho wobuphephelo asisiza njani bona silingise uJehova naziza endabeni yokuba nobulungiswa nomusa.