Iimbono Yokukhulekela Komndeni Nesifundo Somuntu Mathupha

EKUTHOMENI komnyaka ka-2009, emabandleni waboFakazi BakaJehova ephasini mazombe kwenziwa itjhuguluko ehlelweni lemihlangano yabo. Iimhlangano eembili yaphakathi neveke yahlanganiswa, boke bakhuthazwa bona basebenzise ubusuku abangasayi ngabo emhlanganweni bona babe nokukhulekela komndeni namtjhana isifundo somuntu mathupha. Uliqala njengeliqakathekileko ilungiselelo elitjheli? Uzuza ngokuzeleko kilo?

Abanye bebazibuza bona ngikuphi okufuze bakusebenzise ekukhulekeleni komndeni. Akusimnqopho weSihlopha Esibusako bona senze ilungiselelo linye bonyana lisetjenziswe ngiyo yoke iimndeni. Njengombana ubujamo bethu buhlukahlukene, kuyafaneleka bona ihloko yomndeni ngayinye namtjhana umuntu ngamunye azikhethele bona angasisebenzisa njani isikhathi sevekesi ngendlela ephumelelako.

Abanye balungiselela iimhlangano yebandla, kodwana ukukhulekela komndeni akukafuzi kusetjenziselwe lokho kwaphela. Abanye bafunda, bacoce, begodu benze idrama esekelwe eMtlolweni ukwenzela bona kuzuze khulukhulu abantwana abancani. Angeze kwatlhogeka namatjhana kufiseleke ngaso soke isikhathi ukusebenzisa indlela yeembuzo neempendulo njengombana kwenziwa emhlanganweni yebandla. Indawo epholileko esikhathini esinengi ngiyo eyenza bona isifundo sibe ngesikhuthazako begodu kuvezwe neembono ehlukahlukeneko. Indawo enjalo ithuthukisa ukucabanga, okungenza iinkhathezo zibe ngezikhumbulekako nezithatjelwa ngibo boke.

Omunye ubaba onabantwana abathathu watlola: “Egade sikwenza kanengi kusekelwe ekufundeni iBhayibhili. Umuntu ngamunye ufunda izahluko kusesengaphambili, abantwana bakhetha ezinye iingcenye abangenza irhubhululo kizo, begodu batjho lokho abakufumeneko. UMichael [oneemnyaka elikhomba] esikhathini esinengi udweba iinthombe namtjhana atlole isigaba ngakufundileko. UDavid noKaitlyn [abaneemnyaka ehlangana kwe-13 ne-15] bangatlola ngokulandisa kweBhayibhili njengokungathi bebalapho babukele. Ngokwesibonelo, nesifunda ngokuhlathulula kwakaJosefa amabhudango wombhagi nomphathinselo kaFaro, uKaitlyn watlola indatjana njengokungathi bekasibotjhwa abukele isehlakalo.”—Gen., isahl. 40.

Kungokwemvelo bona ubujamo buyahluka. Okusebenzele omunye umuntu namtjhana umndeni kungenzeka kungabasebenzeli abanye. Ibhoksi elikumagazini lo linikela iimbono eemnengi engasetjenziswa hlangana nesikhathi senu sokukhulekela komndeni namtjhana isifundo somuntu mathupha. Pheze ungacabanga ngeminye eemnengi.

[Ibhoksi/Isithombe emakhasini 6, 7]

 Iimndeni enabantwana abeqileko eemnyakeni elitjhumi nambili:

• Fundani begodu nicoce ngencwadi ethi Intsha Iyabuza—Izimpendulo Ezisebenzayo.

• Phrakthizani bona “Kuthiwani newuqalene nobujamo obunje . . . ?” (Qala INqabayokulinda ka-May 15, 1996, ikhasi 14, iingaba 17-18.)

• Khulumani ngeemnqopho yesikhathi eside neyesikhathi esifitjhani.

• Ngeenkhathi ezithileko, bukelani ividiyo yeBhayibhili begodu nicoce ngayo.

• Cabangelani iinhloko zeSithalasokulinda ezithi “Zabatjha.”

Abantu abatjhadileko abanganabantwana:

• Cocani ngezahluko 1, 3, 11-16 zencwadi ethi Imfihlo Yenjabulo Yomkhaya.

• Yitjhoni enikufumene nenenza irhubhululo ngamaphuzu wokufundwa kweBhayibhili.

• Lungiselelani ndawonye iSifundo SeBhayibhili Sebandla namtjhana iSifundo SeSithalasokulinda.

• Cocani ngeendlela zokwandisa ikonzwenu njengabantu abatjhadileko.

Abanakwethu nabodadwethu abangakatjhadi:

• Fundani iincwadi enisanduk’ uzifumana emihlanganweni yesigodi yamva.

• Fundani Iincwadi Zonyaka zagadesi namtjhana zeemnyaka edlulileko.

• Yenza irhubhululo leembuzo ejayelekileko esimini yenu.

• Lungiselela iintjumayelo zekonzo yesimini.

Iimndeni enabantwana abancani:

• Dlalani idrama ngeendima zeBhayibhili.

• Dlalani iimdlalo yokuqagela izinto ezithileko, njengaleyo esemakhasini 30 no-31 ku-Phaphama!

• Ngezinye iinkhathi, yenzani izinto enizithomele zona (Qala isihloko esithi “Ukufunda IBhayibheli—E-zoo!” ku-Phaphama! ka-March 8, 1996, emakhasini 16-19.)

• Cabangelani isihloko esithi “Fundisa Abantwabakho” kuSithalasokulinda.