Iimbuzo Evela Kubafundi

Kungakghoneka ukutjho ngokunembileko bona zingakhi iimporofido ezikhuluma ngoMesiya eziseMitlolweni yesiHebheru?

Ukufunda ngokutjhejisisa iMitlolo yesiHebheru kusenza sikghone ukubona iimporofido ezinengi ezazaliseka kuJesu Krestu. Iimporofidwezi zabikezela imniningwana ngesizinda sakaMesiya, isikhathi ebekazokufika ngaso, izenzo zakhe, indlela aphathwa ngayo nendawo yakhe elungiselelweni lakaJehova uZimu. Nezihlanganiswako zakha isithombe esisisiza sibone bona uJesu nguMesiya. Nokho, kuqakathekile bona sitjheje nesilinga ukufumana ngokunembileko bona zingakhi iimporofido ezikhuluma ngoMesiya eMitlolweni yesiHebheru.

Akusingiwo woke umuntu ovumelana nalokho okuthiwa ziimporofido ezimalungana noMesiya nalezo ekungasingizo. Encwadinakhe ethi The Life and Times of Jesus the Messiah, u-Alfred Edersheim wathi imitlolo yaborabi yekadeni beyiqala iindinyana ezi-456 eziseMitlolweni yesiHebheru njengezikhuluma ngoMesiya, nanyana ezinengi kizo bezingakhulumi ngokunqophileko ngoMesiya. Ukutjhejisisa iindinyanezi ezi-456, kuphakamisa iimbuzo enjengokuthi ezinye zazo zizimporofido eziqalisele kuJesu Krestu nofana awa. Ngokwesibonelo, u-Edersheim wathi amaJuda bekaqala umtlolo kaGenesisi 8:11 njengoqaliselwe kuMesiya. Bekakholelwa bona “ikari lomuthi we-oliva, eleza nejuba, belithethwe eNtabeni kaMesiya.” Umtloli godu wakhuluma ngo-Eksodosi 12:42. Ahlathulula indlela amaJuda ebekangawuzwisisi ngokunembileko umtlolo, watlola: “Njengombana uMosisi avela endaweni elibhudu, ngalokho noMesiya uzokuvela eRoma.” Izazi ezinengi nabanye abantu bebazokufumana kubudisi ukuhlobanisa amavesi amabili la neenhlathululo ezingasiliqiniso eziqaliselwe kuJesu Krestu.

Ngitjho nanyana singanamathela ngokuqinileko eemporofidweni lezo ezazaliseka kuJesu Krestu, kuba budisi ukuvumelana ngenani lazo elinembileko. Ngokwesibonelo, u-Isaya isahluko-53, uneengcenye ezimbalwa ezisiporofido ezimalungana noMesiya. U-Isaya 53:2-7 uyaporofida: “Akanasithunzi . . . Wadelelwa futhi wagegedwa babantu . . . Wathwala ukugula kwethu . . . Wahlatjwa ngebanga lezono zethu . . . Walethwa njengemvu izokuhlatjwa.” Iindimezi eziku-Isaya isahluko-53 kufuze ziqalwe njengesiporofido esisodwa esimalungana noMesiya, namtjhana kufuze bona ingcenye ngayinye yesiporofidwesi iqalwe njengesiporofido esizijameleko?

Godu cabangela, u-Isaya 11:1, ufundeka bunje: “Kuzokuvela ihlumela esidindini sakaJese; emirabhwini yakhe kuzokuthela ihlumela.” Isiporofidwesi siyavela godu evesini-10 ngamezwi afanako. Kufuze bona sibale amavesi amabili la njengemporofido eembili ezihlukeneko namtjhana njengesiporofido sinye esiphindiweko? Esiphetha ngakho ngo-Isaya isahluko-53 no-Isaya isahluko-11 ngokukhanyako kuzothinta inani leemporofido ezimalungana noMesiya.

Ngalokho, senza kuhle ngokubalekela ukutjho ngokunqophileko inani leemporofido ezimalungana noMesiya eziseMitlolweni yesiHebheru. Ihlangano kaJehova igadangise amarhelo atjengisa iimporofido ezinengi ezimalungana noJesu nokuzaliseka kwazo. * Amarhelo la angaba lisizo nesikhuthazo kithi esifundweni sethu mathupha nesifundweni somndeni nekonzweni yethu yatjhatjhalazi. Ngaphezu kwalokho, iimporofido ezinengi ezimalungana noMesiya, kungakhaliseki bona zingakhi, zisinikela ubufakazi obuqinileko bokobana uJesu unguKrestu, namtjhana uMesiya.

[Umtlolo waphasi]