Iimbuzo Evela Kubafundi

Atjho ukuthini amanani wombiko womnyaka wekonzo?

Qobe mnyaka, siqala phambili embikweni wekonzo ogadangiswe Encwadini Yonyaka. Kuyathabisa ukubona umsebenzi wokutjhumayela nokufundisa ngoMbuso owenziwe babantu bakaJehova njengesiqhema ephasini mazombe. Kodwana bona sifumane inzuzo ekulu embikweni, kufuze silungise indlela esizwisisa ngayo iimbiko engenako nombono olinganiselweko ngamanani. Cabangela iimbonelo ezimbalwa.

Unyaka wekonzo. Uthoma ngoSeptemba bese uphela ngo-Arhostosi womnyaka olandelako. Incwadi Yonyaka imumethe umbiko womnyaka wekonzo ogadungileko. Ngalokho, Incwadi Yonyaka ka-2011 imumethe umbiko womnyaka wekonzo ka-2010, othome ngo-Septemba 1, 2009, kuya ku-Arhostosi 31, 2010.

Inani eliphakemeko labarhuweleli nesilinganiso sabarhuweleli. “Abarhuweleli” bahlanganisa aboFakazi BakaJehova ababhabhadisiweko nabangakabhabhadiswa abafanelekela ukuba batjhumayeli boMbuso. “Inani eliphakemeko labarhuweleli” linani eliphezulu elibikwe kunyana ngiyiphi inyanga emnyakeni wekonzo, godu lingahlanganisa neembiko efike lada engakhenge ifakwe embikweni wenyanga egadungileko. Ngendlela le abanye abarhuweleli bangabalwa kabili. Nokho, inani lelo alihlanganisi inani labarhuweleli abahlanganyele ekonzweni kodwana bakhohlwa ukubika. Lokhu kugandelela ukuqakatheka komrhuweleli ngamunye bona abike ngesikhathi qobe nyanga. “isilinganiso sabarhuweleli” linani labarhuweleli abahlukahlukaneko ababika isikhathi abasisebenza ekonzweni qobe nyanga.

Inani lama-awara. Ngokuya kweNcwadi Yonyaka ka-2011, aboFakazi BakaJehova basebenza ama-awara angaphezu kwe-1.6 bhiliyoni ekonzweni yesimini. Nokho inaneli, alikajameli woke ama-awara esiwasebenzisa ekukhulekeni kwethu, ngombana alihlanganisi isikhathi esisinikela qobe emsebenzini enjengokwalusa, ukuba khona emihlanganweni, nokuba nesifundo seBhayibhili somuntu mathupha nesokuzindla.

Imali esetjenzisiweko. Hlangana nomnyaka wekonzo ka-2010, aboFakazi BakaJehova basebenzise imali engaphezu kwe-R1 bhiliyoni ekutlhogomeleni amaphayona ekhethekileko, iinthunywa zevangeli, nababonisi abakhambako ezabelweni zabo zekonzo yesimini. Nokho, inaneli alihlanganisi iindleko zokugadangisa iincwadi ezisekelwe eBhayibhilini esizikhiqizako; godu alihlanganisi nemali esetjenziswe ekutlhogomeleni iinsebenzi zokuzithandela zeBethel ezingaphezu kwe-20 000 ezikhonza emagatjeni asephasini mazombe.

Abadlako esikhumbuzweni. Leli linani lalabo ababhabhadiziweko abadla iimfanekiselo eSikhumbuzweni ephasini mazombe. Inaneli litjengisa bona bangaki abazesiweko ephasini? Awa. Izinto ezinengi—kuhlanganise neenkolelo ezingokwekolo zesikhathi esidlulileko namtjhana ukungaphili kuhle ngokomkhumbulo nanyana ngokwamazizo—zingabangela abanye ngephoso bacabange bona banobizo lezulwini. Ngalokho asinandlela yokwazi inani elinembileko labazesiweko ephasini; begodu akutlhogeki bona sazi. ISihlopha Esibusako asinarhelo lamabizo wawo woke umuntu odla uburotho newayini eSikhumbuzweni. *

Esikwaziko kukobana kuzokuba nabanye ebazesiweko ‘beenceku zakaZimu wethu’ ephasini lokha imimoya etjhabalalisako yesizi elikhulu itjhatjhululwa. (ISam. 7:1-3) Bekube kulapho, abazesiweko bazokudosa phambili entweni evezwe kuhle embikweni wekonzo waqobe mnyaka—umsebenzi omkhulu wokutjhumayela nokufundisa emlandweni wabantu.

[Umtlolo waphasi]