Uyakhumbula?

Uwafunde kuhle amagadangiso weSithalasokulinda wamva nje? Nekunjalo, hlola bonyana ungayiphendula na iimbuzo elandelako:

• Ngiziphi izinto eentathu eziqakathekileko ezingasisiza silwisane nananyana ngikuphi ukutjhigamela kokungathembeki?

Ngilezi: (1) Hlawulela ukusaba ukudanisa uZimu. (1 Pit. 3:12) (2) Hlawulela ukuba nesazela esibandulwe yiBhayibhili. (3) Lwela ukuzizwa wanelisekile.—4/15-ZU, amakhasi 6-7.

• Sazi njani bona ukukhonza uZimu ngokuzimisela akutjho bona sihlale sidubhulile namtjhana singabi nesikhathi sokuzigedla?

Singacabanga ngesibonelo sakaJesu. Bekathabela ukudla nabanye ngokuzigedla. Siyazi bona bekangancami ngokudluleleko namtjhana abe ngongangenekiko. Abanye, ngitjho nabantwana, bebadoseleka kuye begodu bazizwa batjhaphulukile nebanaye.—4/01, ikhasi 14.

• Abatjhadi bangenzani nekubonakala ngasuthi ubuhlobo babo buthome ukubogaboga ngemva kokuba nabantwana?

Kufuze baqinisekisane bona basathandana. Indoda ingalwela ukusiza umkayo azizwe avikelekile. Begodu bobabili kutlhogeka basebenzele ukukhuluma ngokutjhaphulukileko ngamazizo nangeentlhogo zabo ezingokwenyama.—5/1-ZU, amakhasi 12-13.

• Khuyini efanekiselwa mumuthi we-oliva KwebeRoma isahluko-11?

Umuthi we-oliva uqalisele engcenyeni yesibili yenzalo ka-Abrahama, u-Israyeli ongokomoya. UJehova unjengomrabho begodu uJesu unjengesiqu somuthi we-oliva ongokomfanekiso lo. Inengi lamaJuda wemvelo nelala uJesu, abangasimaJuda ababamakholwa bahlunyelelwa, ngalokho baveza inani elizeleko lengcenye yesibili yenzalo ka-Abrahama.—5/1, amakhasi 23-28.

• Ngiziphi iindaba ezimnandi ngokukhethekileko esingazinikela abatlhagako?

Iindaba ezimnandi ngilezi: UZimu ubeke uJesu bona abe yiKosi. UMbusi okufanelekela kwamambala ukuqeda umtlhago. Kubayini? Ngombana uzokubusa soke isintu begodu unamandla wokuthatha amagadango; unesirhawu ngabatlhagako; angaqeda nokutjhigamela kwethu esikuzuze njengelifa kokuba marhamaru, okungunobangela womtlhago.—7/1, ikhasi 7.

• UJesu bekatjho ukuthini kuKhayifasi nekathi: “Sewutjhwile”?—Mat. 26:63, 64.

Kubonakala ngasuthi amezwi athi “sewutjhwile,” bekasisitjho samaJuda esijayelekileko sokuqinisekisa bona okukhulunyiweko kuliqiniso. UMpristi Ophakemeko uKhayifasi wabuza bona uJesu unguKrestu, iNdodana kaZimu. Ipendulo kaJesu ethi: “Sewutjhwile” beyitjengisa ukuvuma.—6/1, ikhasi 18.

• Kungenzeka na bona labo ebebangaba yinzalo yendoda epheleleko uJesu baba yingcenye yesihlengo?

Awa. Nanyana uJesu bekangaba mthombo wamabhiliyoni weenzukulwana ezipheleleko, inzalo enjalo ebekangaba nayo beyingasiyingcenye yesihlengo. Kuphila kwakaJesu okupheleleko kwaphela okwakhambelana nokwaka-Adamu. (1 Thi. 2:6)—6/1, ikhasi 21.

• AmaKrestu angatjengisa njani bona ayasitjheja isiyeleliso esimalungana nabafundisi bamala esitlolwe kuZenzo 20:29, 30?

Ababamukeli abafundisi bamala emizini yabo namtjhana babalotjhise. (Rom. 16:17; 2 Jwa. 9-11) AmaKrestu awazifundi iincwadi zeenhlubuki, awabukeli amahlelo we-TV azivezako, begodu awayi kuma-Web sites aneemfundiso zazo.—7/15-ZU, amakhasi 15-16.

• Ngubani okufuze afundise abantwana ngoZimu?

Umma nobaba kufuze bahlanganyele ekwenzeni bunjalo, ngokuvumelana nesiluleko seBhayibhili. (Iziy. 1:8; Efe. 6:4) Irhubhululo litjengisa bona ababelethi bobabili nebabambiseneko, umphumela uba muhle ebantwaneni.—8/1-ZU, amakhasi 6-7.