Gijima Umjarho Ngokukghodlhelela

“Siphikelele sigijime ibanga esilibekelweko.”—HEB. 12:1.

1, 2. Umpostoli uPowula wayifanisa nani ikambo yokuphila kobuKrestu?

QOBE mnyaka, kuba neemjarho yokugijima yebanga elide eendaweni ezinengi. Labo ekuthiwa bagijimi abaziinkutani bagijima banomnqopho munye tere—ukuthumba. Nokho, inengi ligijima ngomnqopho ohlukileko. Kilo, nelingawugijima woke umjarho, lizabe lenze into elizazibetha isifuba ngayo.

² EBhayibhilini, ikambo yokuphila kobuKrestu ifaniswe nomjarho. Umpostoli uPowula walemukisa amaKrestu akunye nawo weKorinte yekadeni ngephuzweli encwadinakhe yokuthoma awatlolela yona. Wathi: “Niyazi bona lapho kuphikiswana ngebelo, phele badundubale boke, kodwana ngoyedwa kwaphela ozaba nomvuzo. Gijimani njalo, ze nizuze umvuzo!”—1 Kor. 9:24.

3. Kubayini uPowula athi kuthumba umgijimi munye kwaphela?

³ Kghani uPowula bekatjho bona munye kwaphela emaKrestwini layo ozokufumana unongorwana wokuphila bese kuthi boke abanye bagijimele ilize? Awa! Abagijima emaphaliswaneni bazibandula budisi ngomnqopho wokuba ziinkutani. UPowula bekafuna amaKrestu akunye nawo akulwele ngendlela efanako ukuphila okungapheliko. Nekenza njalo, bekangaba nethemba lokufumana unongorwana wokuphila. Kwamambala, emjarhweni wobuKrestu, boke abawuqedako bathumba unongorwana lowo.

4. Yini okutlhogeka siyicabangele malungana nomjarho esiwugijimako?

⁴ Amezwi lawo ayakhuthaza, kodwana ayaphaphamisa, kibo boke abangenele umjarho wokuphila namhlanjesi. Kubayini? Ngombana unongorwana—kungakhathaliseki bona ngewokuphila ezulwini namtjhana eParadeyisini ephasini—ngeze wamadaniswa nalitho. Liqiniso bona umjarho lo mude begodu uyadinisa; uneenqabo ezinengi, iinthikaziso, neengozi endleleni. (Mat. 7:13, 14) Ngokudanisako, abanye behlise ibelo, bacobeka amathambo, namtjhana bawa nokuwa endleleni. Ngiziphi iinthiyo neengozi ezikhona emjarhweni wokuphila? Ungazibalekela njani? Yini ongayenza bona uwuqede begodu uthumbe?

Kutlhogeka Ukukghodlhelela Bona Uthumbe

5. Njengombana kutlolwe kumaHebheru 12:1, uPowula waqalisela njani emjarhweni?

⁵ Encwadinakhe eya emaKrestwini amaHebheru eJerusalema neJudiya, godu uPowula waqalisela eentweni ezithileko eziphathelene nemidlalo namtjhana amaphaliswano wokugijima. (Funda KumaHebheru 12:1.) Zange akhulume ngamabanga wokungenela umjarho lo kwaphela kodwana waveza nalokho ekufuze umuntu akwenze bona athumbe. Ngaphambi kobana sihlole isiluleko sakaPowula esiphefumulelweko esiya emaKrestwini amaHebheru ukubona bona singafundani, khesicabangele bona yini eyatjhukumisa uPowula bona atlole incwadi leyo nokobana yini ebekalinga ukukhuthaza abafundi bayo bona bayenze.

6. AmaKrestu gade angaphasi kwaliphi igandelelo elivela kubadosiphambili bekolo?

⁶ AmaKrestu wekhulu lokuthoma, khulukhulu lawo ebekahlala eJerusalema neJudiya, bekaqalene nobudisi neenlingo ezinengi. Bekangaphasi kwegandelelo elikhulu labadosiphambili bekolo yamaJuda, egade basesenomthelela onamandla ebantwini. Phambilini, abadosiphambilabo baphumelela ekwenzeni  uJesu Krestu afunyanwe anomlando wokuvukela umbuso begodu abulawe njengesilelesi. Godu bebangakazimiseli nakancani ukulisa ukuphikisa kwabo. Encwadini yeZenzo, sifunda umlandelande wezehlakalo zokuthusela nokuhlaselwa kwamaKrestu, zithoma pheze ngemva kweemmangaliso ezenzeka ngePentekoste laka-33 C.E. Ngokuqinisekileko lokho kwenza ukuphila kwabathembekileko kwaba budisi kwamambala.—IZe. 4:1-3; 5:17, 18; 6:8-12; 7:59; 8:1, 3.

7. Ngiziphi iinkhathi ezibudisi amaKrestu uPowula awatlolelako egade aqalane nazo?

⁷ Godu amaKrestu lawo gade aphila esikhathini esiseduze nokuphela kwehlelo lezinto lamaJuda. UJesu bekawatjelile ngokutjhatjalaliswa ebekuzokwehlela isitjhaba samaJuda esingakathembeki. Godu bekatjele abalandeli bakhe ngezenzakalo ebezizokwenzeka ngaphambi kokuphela, wabanikela neenqophiso zamagadango ekufuze bawathathe bona basinde. (Funda uLuka 21:20-22.) Ngalokho-ke, yini ebekufuze bayenze? UJesu wayelelisa: ‘Hlalani nitjhejile! Ningazinikeli eminyanyeni, ekuseleni nemitlhagweni yephaseli, nakungasinjalo ilangelo lizanifumana.’—Luka 21:34.

8. Yini okungenzeka yabangela amanye amaKrestu bona ehlise ibelo namtjhana aphelelwe mamandla?

⁸ Ngesikhathi uPowula atlolela amaHebheru incwadakhe, pheze besekudlule iimnyaka ema-30 uJesu anikele isiyelelisweso. Ukukhamba kwesikhathi kwawathinta njani amaKrestu lawo? Amanye ahlulwa ligandelelo neenthikaziso zaqobe langa abhalelwa nakukwenza ituthuko engokomoya ebeyizowaqinisa. (Heb. 5:11-14) Kubonakala ngasuthi amanye aba namazizo wokobana ipilo beyizokuba lula khulu nekangavele avumelane nenengi lamaJuda eliwabhodileko. Phela amaJuda layo bekangakamtjhiyi ngokupheleleko uZimu; bekasawulandela uMthetho ngezinga elithileko. Amanye amaKrestu arogelwa namtjhana athuselwa ngabanye ebandleni ebebasekela ukunamathela eMthethweni kaMosisi nemasikweni. Yini uPowula ebekangayitjho ebeyizosiza abanakwabo abamaKrestu bona bahlale baphapheme ngokomoya begodu bakghodlhelela emjarhweni?

9, 10. (a) Ngemaphethelweni wesahluko-10 samaHebheru, ngisiphi isikhuthazo sakaPowula esifunda ngaso? (b) Kubayini uPowula atlola ngezenzo zekholo zabofakazi bekadeni?

⁹ Kuyathabisa ukubona indlela uPowula, ngaphasi kokuphefumulelwa nguZimu, afuna ngayo ukuqinisa amaKrestu amaHebheru. Esahlukweni-10 sencwadakhe, uPowula watjengisa bona uMthetho ‘bewusithunzi salokho okuzako’ begodu waveza ngokukhanyako inani lomhlatjelo kaKrestu osihlengo. Ngemaphethelweni wesahlukwesi, uPowula wakhuthaza labo abafunda incwadakhe: “Kufuneka ninyamazele, khona nizakwenza intando yakaZimu, namukele lokho anithembise khona. Ngombana umtlolo ocwengileko uthi: ‘Kusesikhatjhana nje, ozako uzafika, angekhe alibale.’”—Heb. 10:1, 36, 37.

¹⁰ KumaHebheru isahluko-11, uPowula uhlathulula ngekghono bona ikholo lamambala kuZimu liyini. Godu ufanisa ngeembonelo ezingokomlando zamadoda nabafazi egade banekholo. Kghani lokho bekukuphuma endabeni okungatlhogekiko? Awa. Umpostoli lo bekazi bonyana abakhulekeli abakunye naye bekufuze batjheje bona ikholo libizela izenzo zesibindi nokukghodlhelela. Isibonelo esihle seenceku zakaJehova ezithembekileko zekadeni besizokuqinisa amaHebheru bona ajamelane neenlingo nobudisi ebekaqalene nabo. Ngalokho, ngemva kokukhuluma ngezenzo zabathembekileko besikhathini esidlulileko, uPowula bekangathi: “Nje-ke thina siphahlwe siqubuthu esikhulu sabofakazi, yeke asikususe koke okusihlubayezako, sahlukane nesono esithiyakala ngaso thina, siphikelele sigijime ibanga esilibekelweko.”—Heb. 12:1.

‘Isiqubuthu Esikhulu Sabofakazi’

11. Nesicabanga ‘ngesiqubuthu esikhulu sabofakazi,’ khuyini okufuze siyikhumbule?

¹¹ ‘Isiqubuthu esikhulu sabofakazi’ besingasiziimbukeli nje kwaphela, ebezizele ukuzokubukela umjarho namtjhana ukubona isiqhema nofana umgijimi esimthandako athumba. Kunalokho, besinengcenye, njengabagijimi emjarhweni. Zawugijima ngokuphumelelako umjarho bezawuqeda. Nanyana kwanjesi  sezihlongakele, zingaqalwa njengabagijimi abanokuhlangabezanwe nakho abakhuthaza abagijimi abatjha emjarhweni. Cabanga bona umgijimi bekangazizwa njani ngathana bekazi bona abambhodileko, namtjhana abambukeleko, ngabanye babagijimi abaphumelele kwamambala. Angekhe atjhukumiseleke na ukwenza koke angakwenza namtjhana alinge nokwenza okungaphezu kwamandlakhe? Abofakazi bekadenabo bangakufakazela bona umjarho loyo ongokomfanekiso, kungakhathaliseki bona ubudisi kangangani, ungathunjwa. Ngalokho, ukuhlala akhumbula isibonelo ‘sesiqubuthu esikhulu sabofakazi,’ bekungenza amaKrestu amaHebheru wekhulu lokuthoma abe nesibindi begodu ‘awugijime ngokukghodlhelela umjarho’—njengombana kungenza nakithi namhlanjesi.

12. Khuyini esingayifunda ekholweni labantu uPowula akhulume ngabo?

¹² Abathembekileko abanengi uPowula akhuluma ngabo bebanobujamo obufana nebethu. Ngokwesibonelo, uNuwa waphila ngaphambi kobana uJehova atjhabalalise iphasi langesikhatheso ngoKukhulamungu. Siphila eduze nokuphela kwephasi lagadesi. U-Abrahama noSara batjelwa bona batjhiye inarha yekhabo balwele ukukhulekela kweqiniso balindele nokuzaliseka kwesithembiso sakaJehova. Sikhuthazwa bona sizidele sifumane nokwamukelwa nguJehova neembusiso asiphathele zona. UMosisi wakhamba emangweni osabekako, aya eNarheni Yesithembiso. Siphila ephasini elimbi begodu silinde iphasi elitjha uJehova alithembisileko. Lokho iincekwezi ezaqalana nakho, kuhlanganise ubujamo ezaphumelela nezahluleka kibo, amandla nokubogaboga kwazo, kwamambala kuyakufanelekela bona sicabangisise ngakho.—Rom. 15:4; 1 Kor. 10:11.

Baphumelela—Njani?

13. Ngiziphi iintjhijilo uNuwa aqalana nazo, begodu yini eyamenza wazihlula?

¹³ Yini eyenza iinceku zakaJehova lezi zikghone ukukghodlhelela begodu ziphumelele emjarhweni? Tjheja lokho uPowula akutlola ngoNuwa. (Funda KumaHebheru 11:7.) “Ukukhulamungu wamanzi phezu kwephasi ozokutjhabalalisa yoke inyama” bewuyinto uNuwa angakhange ‘ayibone.’ (Gen. 6:17) Bewungokuthileko okungakhange kwenzeke ngaphambili, into ebeyithoma ukuba khona. Nanyana kunjalo, uNuwa akhenge awuqale njengento ebeyingeze yenzeka. Kubayini? Ngombana bekanekholo lokobana nanyana yini uJehova ayitjhoko, uJehova uzoyenza. UNuwa akhange acabange bona bekubudisi ukwenza lokho ebekuthiwa akwenze. Kunalokho, “wenza njalo.” (Gen. 6:22) Nesicabangela koke uNuwa ebekufuze akwenze—ukwakha umkhumbi, ukubuthelela iinlwana, ukungenisa ukudla kwabo nekweenlwana ngeemkhunjini, ukutjhumayela umlayezo osiyeleliso, nokubulunga umndenakhe uqinile ngokomoya—bekungasimsebenzi omncani ‘ukwenza njalo.’ Nokho, ikholo lakaNuwa nokukghodlhelela kwakhe kwadosela ekuphileni neembusisweni azifumana yena nomndenakhe.

14. Ngiziphi iinlingo u-Abrahama noSara abazikghodlhelelako, basinikela siphi isifundo?

¹⁴ Ngokulandelako, uPowula ukhuluma ngo-Abrahama noSara erhelweni lakhe ‘lesiqubuthu sabofakazi esisiphahlileko.’ Balisiswa ukuphila kwabo okujayelekileko e-Uri, begodu ingomuso labo labonakala lingaqiniseki. Baba ziimbonelo zekholo eliqinileko nezokulalela esingaqala kizo nesiqalene nobujamo obulingako. Ngebanga lakho koke ukuzidela u-Abrahama ebekazimisele ukukwenza ngokukhulekela kweqiniso, wabizwa ngokufaneleko ngokobana “unguyise wabo boke abakholwa nguZimu.” (Rom. 4:11) UPowula waphawula kwaphela amaphuzu aveleleko ngo-Abrahama njengombana bekazi bona abantu egade abatlolela bebayazi kuhle imininingwane yokuphila kwakhe. Nanyana kunjalo, isifundo uPawulu asiphakamisako sinamandla: ‘Boke abantwaba [kuhlanganise u-Abrahama nomndenakhe] bafa bakakarele ekukholweni. Akhenge bekwemukeliswe lokho abebakuthenjisiweko, kodwana bakubona bathokoza ngakho kusesekude nabo. Batjengisa  ngokukhanyako bona bazizakhamuzi zesikhatjhana enarheni.’ (Heb. 11:13) Ngokukhanyako, ikholo labo kuZimu nobuhlobo babo bomuntu mathupha naye babasiza bona bagijime umjarho ngokukghodlhelela.

15. Yini eyatjhukumisela uMosisi bona aphile ngendlela enza ngayo?

¹⁵ UMosisi ungesinye isibonelo seenceku zakaJehova esihlangana ‘nesiqubuthu sabofakazi.’ UMosisi watjhiya ukuphila okunethezekileko, okuphakemeko, “wenyula khona ukutlhaga kanye nesitjhaba sakaZimu.” Yini eyamtjhukumisela bona enze njalo? UPowula waphendula: “Ihliziyo yakhe beyiqala umvuzo abekazowufumana esikhathini esizako. . . . Wanyamazela sengathi bekambona ngamehlo loyo ongabonwako.” (Funda KumaHebheru 11:24-27.) UMosisi azange athikaziswe ‘ukuzithabisa isikhatjhana esonweni.’ UZimu neenthembiso zakhe bekungokwamambala kuMosisi kangangobana watjengisa isibindi esingakajayeleki nokukghodlhelela. Wazinikela ngokungadinwa ekukhipheni ama-Israyeli eGibhida awayise eNarheni Yesithembiso.

16. Kubayini uMosisi angakhenge aphelelwe lithemba nekangavunyelwa ukungena eNarheni yeSithembiso?

¹⁶ Njengo-Abrahama, uMosisi akhenge akubone ukuzaliseka kwesithembiso sakaZimu esikhathini sakhe. Ama-Israyeli nekazokungena eNarheni Yesithembiso, uMosisi watjelwa amezwi la: “Uzoyibona ukude inarha le, kodwana ngeze ungene enarheni engiyinikela abantwana bakwa-Israyeli.” Lokhu bekungebanga lokobana phambilini, yena no-Aroni, bakwatiswe kuhlubuka kwabantu, ‘benza ngendlela engamkhazimulisiko [uZimu] hlangana kwabantwana bakwa-Israyeli emanzini weMeriba.” (Dut. 32:51, 52) UMosisi waphelelwa lithemba namtjhana wakwata? Awa. Wamemezela isibusiso esitjhabeni sakhona begodu waphetha ngamezwi naka: “Uyathaba, Israyeli! Ngubani onjengawe, isitjhaba esithabela iphuluso kuJehova, isiviko sesizo lakho, naLoyo osisabula sakho esiphakemeko?”—Dut. 33:29.

 Iimfundo Esizifumanako

17, 18. (a) Njengombana sisemjarhweni wokuphila, khuyini esingayifunda ‘esiqubuthwini esikhulu sabofakazi’? (b) Khuyini esizoyicabangela esihlokweni esilandelako?

¹⁷ Ngokubuyekeza kwethu ukuphila kwabanye balabo abakha ‘isiqubuthu esikhulu sabofakazi esisiphahlileko,’ kwenze kwaba sepepeneneni bona sigijime umjarho besiwuqede, kufuze sibe nekholo elipheleleko kuZimu neenthembisweni zakhe. (Heb. 11:6) Ikholo akukafuzi libe yinto esiyitjengisa ngeenkhathi ezithileko ekuphileni kwethu; kufuze libe mgogodlha wokuphila kwethu. Ngokungafani nalabo abanganakholo, iinceku zakaJehova zingabona ngale kwesikhathi sanje. Siyakghona ukumbona “ngamehlo loyo ongabonwako” bese sigijima umjarho ngokukghodlhelela.—2 Kor. 5:7.

¹⁸ Ukugijima umjarho wobuKrestu akusilula. Nokho, kungakghonakala ngathi bona siwuqede ngokuphumelelako umjarho lo. Esihlokweni esilandelako sizokukhuluma ngezinye izinto ezingasisiza siqede umjarho.

Ungahlathulula?

• Kubayini uPowula atlola ngezenzo zekholo labofakazi bekadeni?

• Isibonelo ‘sesiqubuthu esikhulu sabofakazi esisiphahlileko’ sisisiza bona siwukghodlhelele njani umjarho?

• Khuyini oyifunde ngokucabangela iimbonelo zabofakazi ezithembekileko ezinjengoNuwa, u-Abrahama, uSara, noMosisi?

[Iimbuzo Yesifundo]

[Isithombe ekhasini 19]

U-Abrahama noSara bebazimisele ukutjhiya ukunethezeka kwe-Uri