Ungaba NjengoFiniyasi Newuqalana Nobudisi?

KULILUNGELO eliligugu ukukhonza njengomdala webandla. Nokho, iLizwi lakaZimu liyavuma bona abadala baqalana nobudisi. Ngezinye iinkhathi, kufuze badembe amacala wokwenziwa kobumbi ‘bahlulelela uJehova.’ (2 Mil. 19:6) Namtjhana kungenzeka umbonisi afumane isabelo anamazizo wokobana akakasilungeli, njengoMosisi, owabuza ngokuthobeka malungana nesinye isabelo: “Ngingubani mina bona ngiye kuFaro?”—Eks. 3:11.

IMitlolo, etlolwe ngomthelela womoya ocwengileko ofanako nalowo obeka abadala, inikela iimbonelo eziphilako zababonisi abaqalana neenlingo ngokuphumelelako. UFiniyasi bekayindodana ka-Eliyezeri nomzukulu ka-Aroni ngalokho bekaserhelweni lokuba mpristi ophakemeko. Izehlakalo eentathu ekuphileni kwakhe zitjengisa itlhogakalo yokobana abadala namhlanjesi baqalane nobudisi ngesibindi, ilemuko, nokuthembela kuJehova.

“Wasikima Ngaphandle Kokuriyada”

UFiniyasi bekalisokana ama-Israyeli nekasekampeni yeMangweni wakwaMowabi. IBhayibhili iyabika: “Abantu bathoma ukuziphatha kumbi ngokomseme namadodakazi wakwaMowabi. . . . Godu abantu bathoma ukudla nokukhothamela abozimu babo.” (Num. 25:1, 2) UJehova wahlunguphaza abenzi bokumbabo ngesibetho esibulalako. Ungacabanga bona umbiko wokuziphatha okumbokhu nesibetho okwasibangelako kwamthinta njani uFiniyasi?

Ukulandisa kuragela phambili, “Qala! Indoda yakwa-Israyeli yeza, begodu beyitjhideza kubanakwabo umfazi wakwaMidiyani phambi kwakaMosisi naphambi kwayo yoke ihlangano yabantwana bakwa-Israyeli, ngesikhathi basalila esangweni letende lokuhlangana.” (Num. 25:6) Umpristi uFiniyasi bekazokwenzani? Bekasesemutjha, kukulapho umIsrayeli owonileko bekasikhulu esidosa phambili ekukhulekeleni hlangana nesitjhaba.—Num. 25:14.

Kodwana uFiniyasi bekasaba uJehova, ingasi abantu. Nekabona isibilesi, ngaphandle kokumorosa isikhathi wathatha umkhonto wabalandela ngetendeni yendoda le, wabahlaba bobabili. UJehova wakuqala njani ukuzimisela nesibindi sakaFiniyasi? UJehova wasiqeda khonokho isibetho, wavuza noFiniyasi ngesivumelwano sokobana ubupristi buzokuhlala emndeninakhe bekube “phakade.”—Num. 25:7-13.

Kuliqiniso, abadala abamaKrestu namhlanjesi abalwi. NjengoFiniyasi, abadala kufuze bakulungele ukuthatha iinqunto msinyana begodu babe nesibindi. Ngokwesibonelo, uGuilherme besekakhonze njengomdala iinyanga ezimbadlwana kwaphela nekakhethwa bona akhonze ekomidini yokwahlulela. Icala lokwenziwa kobumbi belihlanganisa umdala owasiza Guilherme nekasesemncani. Uthi, “Ngazizwa ngingakatjhaphuluki ngokuba sebujamwenobo. Bekubudisi ukulala ebusuku. Bengisolo ngicabanga ngeendlela zokurarulula icaleli ngaphandle kokuvumela amazizwami  afiphaze umbonwami ongokomoya. Ngathandaza amalanga amanengi ngenza nerhubhululo eencwadini ezisekelwe eBhayibhilini.” Lokhu kwamsiza bona abe nesibindi esitlhogekako ukurarulula ubujamo obukhethekilekobu anikele nomnakwabo owonileko isizo elingokomoya.—1 Thi. 4:11, 12.

Ngokwenza ngesibindi nokuzimisela nengabe ubujamo ebandleni butlhoga lokhu, abadala baba ziimbonelo zekholo nokuthembeka. Kuliqiniso, namanye amaKrestu kufuze atjengise isibindi, ngokubika ubumbi obukhulu okungenzeka babazi. Ngokufanako, kutlhogeka ukuthembeka ukungasarageli phambili uzihlanganisa nomngani namtjhana isihlobo esisusiweko ekuhlanganyeleni.—1 Kor. 5:11-13.

Ilemuko Likhandela Ihlekelele

Izenzo zakaFiniyasi zesibindi bezingasimphumela wokungacabangi, njengombana kujayele ukwenza abantu abatjha. Cabangela indlela alitjengisa ngayo ilemuko—ukwenza ngokutjheja nokuhlakanipha—nekufika omunye umbiko eendlebeni zakhe. Isitjhaba sakwaRubeni nesakwaGadi nesiquntu sesitjhaba sakaManase zakha i-aldare hlanu koMlambo iJordani. Amanye ama-Israyeli aphetha ngokobana belenzelwe ukukhulekela kwamala begodu abhincela ukuthatha amagadango wezepi.—Josh. 22:11, 12.

UFiniyasi wasabela njani? UFiniyasi, neenkhulu zakwa-Israyeli, ngokuhlakanipha bademba indaba nalabo abakha i-aldare. Iintjhaba ezisolwakwezo zabukhanyisa ubujamo, ngokuhlathulula bona kuhlekuhle bekuli-aldare “lekonzo kaJehova.” Ngalokho ihlekelele yakhandelwa.—Josh. 22:13-34.

Nengabe umKrestu uzwa iinsolo namtjhana umbiko omumbi ngenceku kaJehova akunye nayo, qala bona kungaba kuhlakanipha kangangani ukulingisa uFiniyasi! Ilemuko lisikhandela bona singakhubeki namtjhana sitjho izinto ezingathandekiko ngabanakwethu.—Iziy. 19:11.

Ukutjhejisisa kungabasiza njani abadala bona benze njengoFiniyasi? UJaime, omdala iimnyaka engaphezu kwelitjhumi wathi, “Umrhuweleli nekathoma ukukhuluma ngokungazwani anakho nomunye umuntu, msinyana ngibawa isizo kuJehova bona ngingathathi ihlangothi kodwana nginikele isinqophiso engokoMtlolo. Kwakhe kweza kimi udade ngomraro omalungana nendlela umzalwana onomthwalo kelinye ibandla amphathe ngayo. Njengombana umzalwana loyo bekumnganami, bekuzokuba lula ngami bona ngikhulume naye. Kunalokho, mina nodade sakhuluma ngeenkambisolawulo ezingokoMtlolo ezinengi. Ngaphezu kwalokho, wavuma ukuyokhuluma nomzalwana. (Mat. 5:23, 24) Akhange balibalelane msinyana. Ngalokho ngamkhuthaza bona acabangele ezinye iinkambisolawulo ezingokoMtlolo. Waqunta ukuthandaza godu ngendaba le begodu walwela ukumlibalela.”

Waba yini umphumela? UJaime uyakhumbula,  “Eenyangeni ezinengi ezalandelako, udade loya weza kimi. Wahlathulula bona, ngokukhamba kwesikhathi, umzalwana wazisola ngakutjhoko. Wahlela ukusebenza naye ekonzweni waveza nokobana uyamthokoza. Indaba yalungiswa. Bekuzorarululeka na ukungazwanokhu ngathana ngathatha ihlangothi, ngazifaka?” IBhayibhili iyaluleka: “Ungayi ukuyokurarulula umlandu ongokomthetho ngokuwalazela.” (Iziy. 25:8) Abadala abatjhejako ngokuhlakanipha bakhuthaza amaKrestu abe nokungazwani bona asebenzise iinkambisolawulo ezingokoMtlolo bona bakhuthaze ukuthula begodu bakufumane.

Wahlolisisa NgoJehova

UFiniyasi bekanelungelo lokukhonza njengompristi wabantu bakaZimu abakhethiweko. Njengombana kuveziwe, watjengisa isibindi nokutjheja okungaphezu kokujayelekileko, ngitjho nalokha esesemncani. Nokho, ukuphumelela kwakhe ukuqalana nobudisi bekusame ekuthembeleni kwakhe kuJehova.

Ukulandelela indaba yokukatwa nokubulawa kwekhohlo elimLefi madoda weGibeya, weentjhaba zakwaBhenjamini, kwathunyelwa ezinye iintjhaba bona ziyokulwa nabakwaBhenjamini. (Hlu. 20:1-11) Zathandazela isizo lakaJehova ngaphambi kobana zilwe, kodwana zahlulwa kabili, ngokulahlekelwa babantu abanengi khulu. (Hlu. 20:14-25) Bezizokuphetha ngokobana iimthandazwazo khenge izwakale? UJehova bekafuna kwamambala ukubona bonyana zizokusabela njani ebumbini obenzekileko?

Ukuthembela kuZimu okuqinileko kwabonakala godu kuFiniyasi, kwanje osekampristi ophakemeko kwa-Israyeli. Wathandaza, “Kufuze godu ngiyokulwa nabantwana bakwaBhenjamini umnakwethu nofana kufuze ngilise?” Nekaphedulako, uJehova wanikela bakwaBhenjamini ezandleni zabo, begodu iGibeya yatjhiswa yabamlotha.—Hlu. 20:27-48.

Ngisiphi isifundo esisifumanako kilokhu? Eminye iimraro ebandleni iragela phambili naphezu kweemzamo yamandla yabadala yokuthandazela isizo lakaZimu. Nekwenzeka lokhu, abadala benza kuhle ukukhumbula amezwi kaJesu athi: “Bawani [namtjhana thandazani] nizaphiwa, funani nizafumana, kokodani nizavulelwa.” (Luka 11:9) Ngitjho nanyana umthandazo ungabonakala ungaphendulwa msinyana, ababonisi bangaqiniseka ngokobana uJehova uzokuphendula ngesikhathi sakhe esifaneleko.

Ngokwesibonelo, ibandla elithileko e-Ireland belitlhoga iWolo LoMbuso msinyana, kodwana umuntu obekasika iindawo zokwakha bekangabanikeli indawo. Wala zoke iimbawo zendawo abazalwana ebebanethemba lokwakha kiyo. Bekubonakala ngasuthi ukuphela komuntu ongabanikela indawo bekumumuntu obekasika iindawo kiyo yoke inarha. Umthandazo bewungasiza, njengombana wenza ngesikhathi sakaFiniyasi?

Umdala webandlenelo uyalandisa: “Ngemva kokuthandaza kanengi begodu sibawa, sakhamba saya e-ofisi eliyihloko labasika iindawo. Ngatjelwa bona kuzokudlula iimveke ngaphambi kobana ngibonane nomphathi wendawo. Nokho, sakghona ukuhlangana naye imizuzu emihlanu. Ngemva kokubona amaplani ebesinawo, msinyana wasinikela imvume yokwakha begodu kusukela mhlokho umuntu obekasika iindawo wenza koke angakwenza bona asisize. Okwenzekako kwagandelela kithi amandla womthandazo.” Kwamambala, uJehova uzoyiphendula iimthandazo esuka ehliziyweni yabadala abathembela kuye.

UFiniyasi wathwala umthwalo obudisi kwa-Israyeli wekadeni; kodwana ngesibindi, ukutjhejisisa nokuthembela kuZimu, wakghona ukuqalana nobudisi ngokuphumelelako. UFiniyasi bekalikhathalela ngetjiseko ibandla likaZimu, uJehova wamamukela. Eemnyakeni e-1 000 eyalandelako, u-Ezra waphefumulelwa bona atlole: “NguFiniyasi indodana ka-Eleyazare egade amrholi phezu kwabo esikhathini esidlulileko. UJehova bekanaye.” (1 Mil. 9:20) Kwanga kungatjhiwo okufanako nangabo boke abadosa phambili hlangana kwabantu bakaZimu namhlanjesi, eqinisweni, ngawo woke amaKrestu akhonza ngokuthembeka.