“Ngirholophele Nje Kodwana Ingasi Bekube Phakade!”

Ilandiswa nguSara van der Monde

Abantu bajayele ukuthi kimi, “Sara, umomotheka kamnandi. Kubayini uhlala uthabe kangaka?” Ngibatjela bona nginethemba elikhethekileko. Lingahlathululwa ngamezwi athi “ngirholophele nje kodwana ingasi bekube phakade!”

NGABELETHWA ngo-1974 eParis, eFrance. Kwaba nemiraro nengibelethwako, begodu ngokukhamba kwesikhathi kwafumaneka bona nginokulimala ebuchotjheni (cerebral palsy). Bengingakghoni ukusikinya kuhle iimlenze, bekubudisi nokobana abanye bazwisise engikutjhoko. Ngaphathwa nasisifo sokuwa begodu bengingenwa zizifo lula.

Nengineemnyaka eembili umndenethu wafudukela eMelbourne, e-Australia. Ngemva kweemnyaka eembili, uBaba wasilahla mina noMma. Leso kwaba sikhathi sokuthoma ngikhumbula ngizizwa ngitjhidelene noZimu. UMma, omunye waboFakazi BakaJehova, bekahlala aya nami eemhlanganweni yobuKrestu, lapho ngafunda khona bona uZimu uyangithanda begodu uyangitlhogomela. Ukwazi lokho, kubandakanye nethando nesikhuthazo sakaMma, kwangisiza bona ngizizwe ngivikelekile naphezu kobujamo bethu obutjhugulukileko.

Godu uMma wangifundisa ukuthandaza kuJehova. Eqinisweni, ngifumene bona ukuthandaza kubulula khudlwana kunokukhuluma. Nengithandazako, akutlhogeki bona ngilwele ukuphimisela amezwi, kodwana “ngiwezwa” ngokukhanyako njengombana akheka engqondwenami. Begodu ngombana kubudisi ukuzwisisa nengikhulumako, kungiqinisa idolo ukwazi bona uJehova uzwisisa koke, kungakhathaliseki bona ngikutjho buthule engqondwenami namtjhana ngingunguza.—Rha. 65:2.

Ukuqalana Nokudana

Nengineemnyaka eemhlanu, ukugula kwami bekusezingeni lokobana bekutlhogeka ngisebenzise iinsimbi ezibudisi bona ngikwazi ukukhamba. Kuhle kuhle nengikhambako bekubonakala ngasuthi ngiyatherezela! Nengineminyaka eli-11, bengingasakwazi ngitjho nokukhamba. Ngokukhamba kwesikhathi, bengingasakwazi ukukhwela namtjhana ukwehla embhedeni ngaphandle kokusebenzisa umtjhini wegezi bona ungiphakamise ungibeke esitulweni sabarholopheleko esizikhambelako, engisinqophisa ngokusebenzisa isandla.

Ngiyavuma bona ngezinye iinkhathi ukurholophala kwami kungiqeda amandla. Kodwana ngikhumbula amezwi esiwasebenzisako ekhaya: “Ungatshwenyeki ngezinto ongekhe ukghone ukuzenza. Vele wenze lokho ongakghona ukukwenza.” Lokho kungisize ngaphumelela ekukhweleni iimpera, ukuthaya ngesikebhe, ukukhempa, ngitjho nokutjhayela ikoloyi endleleni enganabantu namtjhana iinkoloyi! Ngitjengisa ubukghwari bami ngokugwala, ukuthunga, ukwenza imikghabiso ethungiweko, nokubumba.

Njengombana ngirholophele khulu, abanye  bayazaza bona ngihlakaniphe ngokwaneleko bona ngizenzele isiqunto sokukhulekela uZimu. Nengineemnyaka eli-18, uthitjhere wangikhuthaza bona ngikhambe ekhaya “ngibalekele” ikolo kamma. Wazimisela nokungisiza bona ngifumane indawo yokuhlala. Nokho, ngamtjela bona ngeze ngilise ikholo lami nokobana ngizokukhamba ekhaya kwaphela nasele ngikulungele ukuzijamela khudlwana.

Kungasikade kwenzeke isenzakalwesi esibandakanya uthitjherami, ngabhabhadiswa njengomunye waboFakazi BakaJehova. Ngemva kweemnyaka eembili ngathuthela efledzini elincani. Lapha ngithabela ukufumana isekelo engilitlhogako nokuzijamela engikufisako.

Isibawo Esingakalindeleki

Njengombana iimnyaka ikhamba, ngiqalene nezinye iinlingo zekholo. Ngelinye ilanga ngarareka kwamambala lokha engifunda naye—naye orholopheleko—angibawa bona ngitjhade naye. Ngathoma ngokuzizwa ngiqakathekile begodu ngimuhle kwamambala. Njengabafazi abatjha abanengi, ngiyafisa ukuba nomlingani ekuphileni. Kodwana, ukobana sirholophele sobabili akusisiqinisekiso somtjhado othabisako. Ngaphezu kwalokho, isokanela belinganalo ikholo elifana nelami. Iinkolelo zethu, esikwenzako, neemqopho yethu beyihluke ngokupheleleko. Ngalokho besingaphila njani ndawonye? Godu bengizimisele ukulalela isinqophiso sakaZimu esikhanyako sokutjhada kwaphela nomkhulekeli engikunye naye. (1 Kor. 7:39) Ngalokho, ngomusa ngatjela isokanela bona ngeze ngisamukele isibawo salo.

Ngitjho nanamhlanjesi, ngiyazi bona ngenza isiqunto esilungileko. Begodu akunakuzaza engqondwenami bona ngizokuthaba ephasini elitjha elithenjiswe nguZimu. (Rha. 145:16; 2 Pit. 3:13) Okwanje, ngizimisele ukuhlala ngithembekile kuJehova begodu nganeliseke ngobujamo bami.

Ngiqale phambili elangeni engizokweqa ngalo esitulweni sami sabarholopheleko ngigijime njengomoya. Bese ngirhuwelele ngithi, “bengirholophele, kodwana nje sengiphile njengotjheleni—bekube nini nanini!”