Siza Amadoda Athuthuke Ngokomoya

‘Kusukela namhlanjesi uzokuthiya abantu.’—LUKA 5:10.

1, 2. (a) Amadoda asabela njani ekutjhumayeleni kwakaJesu? (b) Khuyini esizokufunda ngayo esihlokwenesi?

HLANGANA nekhambo lakhe lokutjhumayela eGaleliya, uJesu nabafundi bakhe bakhwela isikepe baya endaweni enganabantu. Kodwana isiqubuthu sabalandela ngeenyawo. Labo abeza kuye ngelangelo ‘bebamadoda aziinkulungwana ezihlanu, nekungabalwa abafazi nabantwana.’ (Mat. 14:21) Kesinye isenzakalo, isiqubuthu satjhidela kuJesu, sifuna ukuphulukiswa nokumuzwa akhuluma. Hlangana naso ‘bekunamadoda aziinkulungwana ezine kungabalwa abafazi nabantwana.’ (Mat. 15:38) Ngokukhanyako, amadoda amanengi bekahlangana nabantu abeza kuJesu batjengisa nekareko eemfundisweni zakhe. Eqinisweni, walindela bona amanye amanengi asabele, ngombana ngemva kobana enze bona kubanjwe iimfesi ngokusimangaliso, uJesu wathi kumfundi wakhe uSimoni: ‘Kusukela namhlanjesi uzokuthiya abantu.’ (Luka 5:10) Abafundi bakhe bekufuze baphosele amanethi wabo elwandle lesintu balindele nokobana ‘abakubambileko’ kuhlanganise namadoda amanengi.

² Ngokufanako, namhlanjesi amadoda amanengi atjengisa ikareko emlayezweni ongokoMtlolo esiwutjhumayelako begodu ayasabela kiwo. (Mat. 5:3) Nokho, amadoda amanengi adosa iinyawo, angathuthuki ngokomoya. Singawasiza njani? Ngitjho nanyana uJesu angakhenge athome ikonzo ekhethekileko yokufuna amadoda, ngokuqinisekileko wakhuluma ngezinye iindaba ebezitshwenya amadoda ngesikhathi sakhe. Sisebenzisa isibonelo sakhe, asihlolisise indlela esingasiza ngayo amadoda bona aqalane nezinto ezintathu eziwatshwenyako namhlanjesi: (1) ukuziphilisa, (2) ukusaba bona abantu bazokuthini, (3) nokuzinyaza.

Ukuziphilisa

3, 4. (a) Khuyini amadoda amanengi atshwenyeka ngayo? (b) Kubayini amanye amadoda abeka umsebenzi wokuziphilisa ngaphambi kwezinto ezingokomoya?

³ Umbhali wathi kuJesu, “Mfundisi, sengizilungiselela ukuya nawe lapha uyako.” Nokho, uJesu nekamtjela bona “iNdodana yomuntu ayinalapha ingalala khona iphumule,” umbhali waba nokuzaza. Ukungaqiniseki ngokobana uzokufumanaphi ukudla kwakhe okulandelako namtjhana uzokuhlalaphi zange kumhlalele kuhle umbhali lo, ngombana akukho okutjengisa bona waba mlandeli kaKrestu.—Mat. 8:19, 20.

⁴ Ngokujayelekileko amadoda abeka ukuvikeleka ngokwezinto eziqalekako ngaphambi kwezinto ezingokomoya. Ukufumana ifundo ephakemeko nomsebenzi obhadala kuhle yinto eza mantazi kwamanengi wawo. Ngokucabanga kwawo, umvuzo wokwenza imali urhaba khulu begodu ulisizo ukudlula nanyana ngiziphi iinzuzo ezingafumaneka ngokutaditjha iMitlolo nokufuna ukuba nobuhlobo obutjhideleneko noZimu. Kungenzeka kuyawakara lokho okufundiswa yiBhayibhili, kodwana “iintlayiseko zobuphilobu, nethando lobugwili” zikghama nanyana ngiyiphi ikareko okungenzeka abe nayo. (Mar. 4:18, 19) Cabangela indlela uJesu asiza ngayo abafundi bakhe bona babeke izinto eziqakathekileko qangi.

5, 6. Yini eyasiza u-Andrisi, uPitrosi, uJakobosi noJwanisi bona babeke izinto eziqakathekileko endaweni efaneleko malungana nokutjhumayela nomsebenzi wokuziphilisa?

⁵ U-Andrisi nomnakwabo uSimoni Pitrosi bebasebenzisana erhwebeni lokuthiya iimfesi. Bekunjalo nangoJwanisi, umnakwabo uJakobosi, noyise uZebediya. Ibhizinisi labo beliphumelela  kangangobana bebatlhoga isizo lamadoda aqatjhiweko. (Mar. 1:16-20) U-Andrisi noJwanisi nebezwa kokuthoma ngoJesu kuJwanisi uMbhabhadisi, baqiniseka bona bamfumene uMesiya. U-Andrisi wahlanganyela iindabezi nomnakwabo uSimoni Pitrosi, mhlamunye noJwanisi wenza njalo kumnakwabo uJakobosi. (Jwa. 1:29, 35-41) Eenyangeni ezalandelako, bobane basebenzisa isikhathi sabo noJesu njengombana atjhumayela eGaleliya, eJudiya neSamariya. Ngemva kwalokho abafundi abanaba babuyela erhwebeni lokuthiya iimfesi. Bebanekareko eentweni ezingokomoya, kodwana ikonzo beyingasiyinto eza qangi kibo.

⁶ Isikhathi esithileko ngemva kwalokho, uJesu wamema uPitrosi no-Andrisi bona bamlandele babe ‘bathiyi babantu.’ Basabela njani ababilaba? “Khonokho basukela amazika wabo bamlandela.” (Mat. 4:18-22) Kwenzeka okufanako kuJakobosi noJwanisi. “Khonokho basukela iskepe noyise, bamlandela.” (Mat. 4:18-22) Khuyini okwasiza amadoda la bona athathe ikonzo yesikhathi esizeleko? Kghani enza isiqunto ngokuwalazela, athathekile? Awa! Eenyangeni ezigadungileko, amadoda la alalela uJesu, ambona enza iimmangaliso, abona itjiseko yakhe ngokulunga, abona nendlela erarako abantu abasabela ngayo ekutjhumayeleni kwakhe. Ngebanga lalokho, ikholo nokuthembela kwabo kuJehova kwaqina!

7. Singazisiza njani iimfundo zeBhayibhili bona zakhe ukuthembela ekghonweni lakaJehova lokondla abantu bakhe?

⁷ Singamlingisa njani uJesu ekusizeni esifunda nabo iBhayibhili bona bathembe uJehova? (Iziy. 3:5, 6) Indlela esifundisa ngayo inomthelela omkhulu kilokhu. Nesifundisako, singagandelela isithembiso sakaZimu sokusibusisa khulu nesibeka iinkareko zoMbuso endaweni yokuthoma. (Funda uMalaki 3:10; Matewu 6:33.) Nanyana singasebenzisa iimtlolo ehlukahlukeneko ukuveza indlela uJehova atlhogomela ngayo abantu bakhe, akukafuzi sisithathe bulula isibonelo thina ngokwethu esisibekako. Okuhlangabezanwe nakho kwethu kungenza lukhulu ekusizeni iimfundo zethu zihlawulele ukuthemba uJehova. Godu singahlanganyela nazo okuhlangabezanwe nakho okukhuthazako esikufunde eencwadini zethu. *

8. (a) Kubayini kuqakathekile bona isifundo seBhayibhili ‘sinambithe sibone bonyana uJehova muhle’? (b) Singamsiza njani esifunda naye bona azizwele mathupha ubuhle bakaJehova?

⁸ Ukwakha ikholo eliqinileko kutlhoga okungaphezu kokufunda nokuzwa ngendlela abanye abazifumene ngayo iimbusiso zakaJehova. Godu kutlhogeka bona umfundi weBhayibhili azizwele mathupha ubuhle bakaJehova. Umrhalani wabhina: “Nambithani nibone bonyana uJehova muhle; nina bantu, iyathaba indoda enamandla ephephela kuye.” (Rha. 34:8) Singamsiza njani umfundi abone bonyana uJehova muhle? Akhe sithi umfundi utshwenyeke ngeemmali begodu ulinga ukulwisana nomukghwa omumbi, njengokubhema, ukugembula, namtjhana ukusela khulu. (Iziy. 23:20, 21; 2 Kor. 7:1; 1 Thi. 6:10) Ukufundisa umfundi ukuthandazela isizo lakaZimu bona ahlule umukghwa omumbi ngeze kwamsiza na abone ubuhle bakaJehova? Godu cabanga ngokungenzeka  nesikhuthaza umfundi bona enze izinto ezingokomoya zize qangi ngokwenza isikhathi sesifundo seBhayibhili saqobe veke nokulungiselela begodu abe khona emihlanganweni yobuKrestu. Phela, nekabona iimbusiso zakaJehova eemzamwenakhe, ikholo lakhe lizokuqina!

Ukusaba Bona Abantu Bazokuthini

9, 10. (a) Kubayini uNogodima noJesefa we-Arimathiya bafihla bona banekareko kuJesu? (b) Kubayini amanye amadoda azaza ukulandela uKrestu namhlanjesi?

⁹ Ngebanga lokugandelela kweentanga, amanye amadoda angazaza ukulandela uKrestu ngokuzeleko. UNogodima, noJesefa we-Arimathiya bafihla bona banekareko kuJesu ngombana basaba lokho amanye amaJuda angakutjho namtjhana akwenze nekangakufumana. (Jwa. 3:1, 2; 19:38) Ukusabokho bekungasiyinto abazithomele yona eengqondweni zabo. Ukuhloya kwabadosiphambi bekolo uJesu emaswapheleni kwaba kukhulu kangangobana nanyana ngubani obekavuma bona unekholo kuJesu bekaqothwa esinagogeni.—Jwa. 9:22.

¹⁰ Kezinye iindawo namhlanjesi, indoda neyiba nekareko ethe tjha kuZimu, eBhayibhilini, namtjhana ekolweni, ingatlhoriswa ngesebenza nabo, abangani, neenhlobo. Kezinye iindawo, kungaba ngitjho nayingozi ukukhuluma ngokutjhentjha ikolwakho. Ukugandelela kweentanga kungaba budisi ngokukhethekileko nengabe indoda isebenza emasotjeni, kezepolotiki, namtjhana kezomphakathi. Ngokwesibonelo, indoda ethileko eJarimani yathi: “Lokho nina boFakazi enikutjhumayelako ngeBhayibhili kuliqiniso. Kodwana, nengiba nguFakazi namhlanjesi, kusasa woke umuntu uzobe azi ngakho. Bazokucabangani emsebenzini, abomakhelwana, nesiqhema mina nomndenami esikiso? Ngeze ngikwazi ukukukghodlhelela lokho.”

11. UJesu wabasiza njani abafundi bakhe bona baqalane nokusaba abantu?

¹¹ Ngitjho nanyana kungekho umpostoli kaJesu egade alitjhatjha, boke balwisana nokusaba abantu. (Mar. 14:50, 66-72) UJesu wabasiza njani bona bathuthuke naphezu kwegandelelo elinamandla leentanga zabo? UJesu wathatha amagadango wokulungiselela abafundi bakhe ukuphikiswa ebebazokuqalana nakho ngokukhamba kwesikhathi. Wathi, ‘Niyathaba abantu nebanihloyako, baninina, banithuka banirhwayela okumbi ngebanga leNdodana yomuntu.’ (Luka 6:22) UJesu wayelelisa abalandeli bakhe bona kufuze bakulindele ukuthukwa. Nanyana ngikuphi ukuthukwa ‘bekungebanga leNdodana yomuntu.’ Godu uJesu wabaqinisekisa bona uZimu uzobasekela solankana bathembela Kuye ukufumana isizo namandla. (Luka 12:4-12) Ngaphezu kwalokho, uJesu wamema abasathomako bona bazihlanganise ngokutjhaphulukileko nabafundi bakhe, babe bangani babo.—Mar. 10:29, 30.

12. Ngiziphi iindlela esingasiza ngazo abasathoma ukuhlanganyela bahlule ukusaba abantu?

¹² Nathi kufuze sisize iimfundo zeBhayibhili bona zihlule ukusaba abantu. Ngokujayelekileko kulula ukuqalana nesitjhijilo newusilindeleko. (Jwa. 15:19) Ngokwesibonelo, kubayini ungasizi umfundi bona alungiselele iimpendulo ezisekelwe eBhayibhilini, ezilula nezinengqondo zeembuzo nokuphikisa okungavela kwasebenza  nabo namtjhana abanye? Ngaphezu kobana thina sibe bangani bakhe, singamethula kwamanye amalungu webandla, khulukhulu lawo angaba nokuthileko afana nawo ngakho. Ngaphezu kwakho koke, kufuze simfundise ukuthandaza qobe begodu ngokusuka ehliziyweni. Lokho kungamsiza bona atjhidele kuZimu, enze uJehova isiPhephelo neDwala lakhe.—Funda iRhalani 94:21-23; KaJakobosi 4:8.

Ukuzinyaza

13. Ukuzinyaza kungabaliya njani abanye bona bazibandakanye eentweni ezingokomoya?

¹³ Amanye amadoda adosa iinyawo ekuhlanganyeleni ezintweni ezingokomoya ngombana awakwazi ukufunda kuhle namtjhana awakwazi ukukhuluma ngokutjhelelako nofana aneenhloni. Amanye awazizwa atjhaphulukile ukuhlanganyela iimbono namtjhana amazizo wawo endaweni yomphakathi. Ukucabanga bona kufuze ataditjhe, aphendule emihlanganweni yobuKrestu, namtjhana ahlanganyele ikholo lawo nabanye kungabonakala kungaphezu kwamandla wawo. Omunye umzalwana omKrestu uyavuma, “Nengisesemncani, bengiya emnyango msinyana, ngenze ngasuthi ngiyakokoda, begodu ngibuyele emva msinya, nginethemba lokobana akekho azongizwa namtjhana angibone. . . . Umcabango wokuya endlini ngendlu bewungigulisa.”

14. Kubayini abafundi bakaJesu babhalelwa kupholisa umsana okhwelwe lidimoni?

¹⁴ Cabanga ngokungazithembi okungenzeka abafundi bakaJesu baqalana nakho nebabhalelwa kuphulukisa umsana okhwelwe lidimoni. Uyise lomsana lo weza kuJesu wathi: “Indodana yami inesithuthwani esimbi esiyiphosa ngemlilweni nanyana ngemanzini. Ngayiletha ebafundini bakho kodwana azange bakghone ukuyipholisa.” UJesu waliqotha idimoni, ngalokho wampholisa umsana. Kwamva abafundi batjhidela kuJesu bambuza: “Sibangelwe yini singakghoni ukuqotha umoya omumbi lo?” UJesu waphendula: ‘Kukobana aninalo ikholo elaneleko. Ngiyanitjela-yi, bona ingathana beninekholo elilingana nembewu yemastadi, beningathi entabeni le: “Suka lapha uye lapha,” beyizavele isuke. Beningenza nangayini!’ (Mat. 17:14-20) Kutlhogeka ikholo kuJehova ukuhlula iinqabo ezinjengentaba. Kwenzekani umuntu nekangasakuboni lokho, athome ukudzimelela emakghonwenakhe? Ukubhalelwa kuphumelela kuzokubangela ukungazithembi.

15, 16. Singamsiza njani umfundi weBhayibhili ahlule ukuzinyaza?

¹⁵ Indlela ehle yokusiza umuntu olwisana nokuzinyaza kumkhuthaza bona adzimelele kuJehova kunokudzimelela kuye. UPitrosi watlola: “Zithobeni ngaphasi kwesandla esinamandla sakaZimu, khona azaniphakamisa ngesikhathi esifaneleko. Fumbelani woke amatshwenyeko wenu kuye.” (1 Pit. 5:6, 7) Lokhu kutlhoga bona sisize esifunda naye iBhayibhili bona athuthukise ingokomoya lakhe. Umuntu onengokomoya elihle uyazitjhisakalela izinto ezingokomoya. Uyalithanda iLizwi lakaZimu, utjengisa ‘nesithelo somoya’ ekuphileni kwakhe. (Gal. 5:22, 23) Uyindoda yomthandazo. (Fil. 4:6, 7) Ngaphezu kwalokho, uqala eLizwini lakaZimu ukufumana isibindi namandla atlhogekako ukuqalana nananyana ngibuphi ubujamo namtjhana ukwenza nofana ngisiphi isabelo ngokuphumelelako.—Funda ye-2 KuThimothi 1:7, 8.

¹⁶ Abanye abafundi bangatlhoga isizo lamambala ukuthuthukisa amakghono wabo wokufunda, ukucoca namtjhana ukukhuluma. Abanye bangazizwa bangakufanelekeli ukukhonza uZimu ngebanga lezinto ezimbi abazenza bangakamazi uJehova. Kinanyana ngibuphi ubujamo, isizo lethu lethando nesineke  kungaba ngilokho kanye abatlhogako. UJesu wathi: ‘Abantu abangaguliko abamtlhogi udorhodere, kodwana utlhogwa ngilabo abagulako.’—Mat. 9:12.

‘Bamba’ Amadoda Angeziweko

17, 18. (a) Singawafikelela njani amadoda angeziweko ekonzwenethu? (b) Sizokufunda ngani ngokulandelako?

¹⁷ Sifisa bona amadoda angeziweko asabele emlayezweni owanelisa khulu ofumaneka kwaphela eBhayibhilini. (2 Thi. 3:16, 17) Ngalokho singawafikelela njani amadoda angeziweko ekonzwenethu? Ngokusebenzisa isikhathi esingeziweko sifakaza ntambama, nangemva kwamadina ngeempelaveke, namtjhana ngamawolideyi amadoda amanengi nekasekhaya. Abazalwana bangabawa ukukhuluma nendoda yomuzi nekukghonekako. Asifakaze ngokungakahlelwa kubantu bembaji esisebenza nabo nekufanelekako begodu sifikelele nemadodeni angakholwako wabodade esinabo ebandleni.

¹⁸ Njengombana sitjhumayela komunye nomunye esihlangana naye, singaqiniseka bona labo abaneenhliziyo ezimukelako bazokusabela ngokufaneleko. Asibasizeni ngesineke boke abatjengisa ikareko yamambala eqinisweni. Nokho, singawasiza njani amadoda abhabhadisiweko ebandleni bona afikelele begodu afanelekele imithwalo yefanelo ehlanganweni kaZimu? Isihloko esilandelako sizokudemba umbuzo lo.

[Umtlolo waphasi]

Ungaphendula Njani?

• Amadoda angasizwa njani bona abeke izinto ezingokomoya qangi?

• Singabasiza njani abasathoma ukuhlanganyela bona baqalane negandelelo leentanga?

• Khuyini okungasiza abanye bahlule ukuzinyaza?

[Iimbuzo Yesifundo]

[Isithombe ekhasini 25]

Uyawakha amathuba wokufikelela amadoda ngeendaba ezimnandi?

[Isithombe ekhasini 26]

Ungamlungiselela njani ofunda naye iBhayibhili bona aqalane neenlingo?